Цӕттӕ ут!

ЙЕСО адӕмы бафӕдзӕхста, цӕмӕй зыд ма кӕной ӕмӕ йӕ ахуыргӕнинӕгтӕн уынаффӕ ратта, цӕмӕй материалон хъуыддӕгтыл ӕгӕр ма тыхсой. Ныр та фидар кӕны йӕ ахуыргӕнинӕгты: «Ма тӕрс, гыццыл дзуг! уымӕн ӕмӕ уӕ Фыды хорз фӕндон у сымахӕн Паддзахад раттын». Уымӕй Йесо ӕргом кӕны, Уӕларвон Паддзахадмӕ чи бацӕудзӕн, уыдон бирӕ кӕй нӕ уыдзысты (фӕстӕдӕр куыд рабӕрӕг, афтӕмӕй 144 000). Ӕнусон цард чи райсдзӕн, уыдонӕн сӕ фылдӕр цӕрдзысты зӕххыл Паддзахады къухдариуӕгады бын.

Цӕй диссаджы лӕвар у, ӕвӕдза, «Паддзахад»! Уыцы лӕвар чи райсдзӕн, уыдонӕн цавӕр ахаст хъуамӕ уа, уый тыххӕй Йесо дзуры: «Уӕй кӕнут уӕ мулк ӕмӕ дӕттут хорзӕх». О, уыдон хъуамӕ сӕ фӕрӕзтӕй пайда кӕной иннӕтӕн духовон ӕгъдауӕй ӕххуыс кӕнынӕн ӕмӕ афтӕмӕй сӕхицӕн цӕттӕ кӕндзысты, «къаддӕр чи нӕ кӕны, ахӕм хӕзнатӕ арвыл».

Уый фӕстӕ Йесо йӕ ахуыргӕнинӕгты фӕдзӕхсы, цӕмӕй йе ’рцыдмӕ цӕттӕ уой: «Уадз уӕнт уӕ рӕттӕ уӕ астӕутыл баст ӕмӕ уӕ рухсгӕнӕнтӕ судзӕнт; ӕмӕ сымах ут чындзӕхсӕвӕй йӕ ӕлдармӕ ӕрбаздӕхынмӕ ӕнхъӕлмӕ чи кӕсы, ахӕм адӕмы хуызӕн, цӕмӕй куы ӕрбацӕуа ӕмӕ бахойа, уыцы сахат уымӕн дуар бакӕной. Тӕхудиаг сты уыцы цагъартӕ, кӕцыты сӕ ӕлдар, ӕрцӕугӕйӕ, ӕрӕййафа хъӕлдзӕгӕй; ӕцӕг зӕгъын сымахӕн, уый йӕ астӕу ӕрбабӕтдзӕн ӕмӕ ӕрбадын кӕндзӕн уыдоны, ӕмӕ сӕм бацӕугӕйӕ, лӕггад кӕндзӕн уыдонӕн».

Ацы фӕсномыг ныхасы лӕггадгӕнджытӕ сӕ хицауы ӕрбацыдмӕ цӕттӕ кӕй сты, уый бӕрӕг у, сӕ даргъ дарӕстыл кӕй схӕцыдысты, сӕ астӕутыл сӕ ронӕй кӕй бафидар кодтой ӕмӕ зетийӕ йедзаг рухсгӕнӕнты рухсмӕ суанг ӕмбисӕхсӕвмӕ сӕ хӕстӕ кӕй ӕххӕст кӕнынц, уымӕй. Йесо ӕмбарын кӕны: «Ӕмӕ куы ӕрцӕуа дыккаг хъахъхъӕнын афон [изӕры фараст сахатӕй ӕмбисӕхсӕвы онг], ӕртыккаг хъахъхъӕнын афон [ӕмбисӕхсӕвӕй райсомы ӕртӕ сахаты онг] дӕр, ӕмӕ уыдоны афтӕмӕй куы ӕрӕййафа, уӕд тӕхудиаг сты уыцы цагъартӕ».

Хицау йӕ лӕггадгӕнджыты диссаджы хуызы хорзӕхджын кӕны. Ӕрбадын сӕ кодта фынджы уӕлхъус ӕмӕ сын лӕггад кӕны. Цагъарты ахаст сӕм нӕ дары, фӕлӕ ӕнувыд хӕлӕртты ахаст. Цӕй диссаджы хорзӕх райстой, ӕвӕдза, ӕнӕхъӕн ӕхсӕв сӕ хицауы ’рцыдмӕ ӕнхъӕлмӕгӕсгӕйӕ ӕвӕллайгӕйӕ кӕй куыстой, уый тыххӕй! Кӕронбӕттӕны Йесо дзуры: «Цӕттӕ ут сымах дӕр, уымӕн ӕмӕ кӕцы сахат ӕнхъӕл не стут, ӕрцӕудзӕн Адӕймаджы Фырт».

Йесо дзырд куы фӕци, уӕд ӕй Петр фӕрсы: «Хицау! махӕн зӕгъыс ацы фӕсномыг ныхас, ӕви ӕппӕтӕн дӕр?»

Комкоммӕ дзуапп раттыны бӕсты Йесо дзуры ӕндӕр фӕсномыг ныхас: «Чи у ӕууӕнкджын ӕмӕ ӕмбаргӕ хӕдзармӕгӕсӕг, кӕцыйы ӕлдар [«хицау», НФ] сӕвӕрдта йӕ ӕххуырстыты сӕргъыл, цӕмӕй уыдонӕн афоныл сӕ дзулы хай дӕтта? Тӕхудиаг у уыцы цагъар, кӕцыйы йӕ ӕлдар [«хицау», НФ], ӕрцӕугӕйӕ, ӕрӕййафа афтӕ кӕнгӕ; ӕцӕг зӕгъын сымахӕн, йӕ ӕппӕт мулкы сӕргъыл ӕй сӕвӕрдзӕн».

Бӕрӕг у, «хицау» Йесо Чырысти кӕй у. «Хӕдзармӕгӕсӕг» та у ахуыргӕнинӕгты «гыццыл дзуг» ӕмткӕй райсгӕйӕ, дзырд «ӕххуырстытӕ» дӕр хауы, уӕларвон цард чи райсдзӕн, уыцы 144 000 адӕймагмӕ, фӕлӕ ӕвдисы, алчидӕр сӕ хицӕнӕй цы кусы, уый. Хӕдзармӕгӕсӕджы бӕрны цы «мулк» уыдзӕн, уый та у, хицауӕн зӕххыл цыдӕриддӕр ис, уый, уырдӕм хауынц, зӕххыл Паддзахады къухдариуӕгады бын чи цӕрдзӕн, уыдон дӕр.

Фӕсномыг ныхас дарддӕр дзургӕйӕ, Йесо ӕвдисы, хӕдзармӕгӕсӕджы къорд кӕнӕ ӕххуырстытӕ се ’ппӕт кӕронмӕ ӕнувыд кӕй нӕ уыдзысты: «Фӕлӕ куы зӕгъа уыцы цагъар йӕ зӕрдӕйы: „тагъд не ’рбацӕудзӕн мӕ ӕлдар [«мӕ хицау», НФ], ӕмӕ куы райдайа нӕмын ӕххуырстыты, хӕрын, нуазын ӕмӕ расыг кӕнын, уӕд ӕрцӕудзӕн уыцы цагъары ӕлдар [«хицау», НФ], ӕнхъӕлмӕ кӕд нӕ кӕсы, уыцы бон... ӕмӕ йӕ афаддзӕн».

Йесо ма ӕвдисы, йе ’рцыды рӕстӕг иудейтӕн тынг уӕззау рӕстӕг кӕй у, уымӕн ӕмӕ йын иутӕ исынц йӕ ахуырад, иннӕтӕ та — нӕ. Ӕртӕ аз ӕмӕ ӕрдӕджы размӕ Йесо райста донаргъуыд, ныр та кӕронмӕ фӕхӕццӕ кӕны йӕ мӕлӕтмӕ аргъуыд, ӕмӕ уый дзуры: «Ӕз куыд фӕлмӕцын, цалынмӕ уый сӕххӕст уа!»

Йесо йӕ ахуыргӕнинӕгтӕн уыцы ныхӕстӕ куы загъта, уӕд та йе ’ргом ногӕй аздӕхта адӕммӕ. Тынг зын ын у, хивӕнд адӕм, чи у ӕмӕ йын цы нысаниуӕг ис, уый ӕвдисӕг бӕлвырд факттӕ кӕй ницӕмӕ дарынц. «Куы фенут сымах мигъ ныгуылӕнӕй ссӕугӕ, уыцы сахат зӕгъут: „къӕвда уыдзӕн“; ӕмӕ афтӕ вӕййы,— дзуры сын Йесо. — Ӕмӕ хуссарӕй дымгӕ куы кӕны, уӕд зӕгъут: „тӕвд уыдзӕн“; ӕмӕ вӕййы. Цӕстмӕхъустӕ! зӕхх ӕмӕ арвы цӕсгом иртасын зонут, уӕд уыцы рӕстӕг куыд нӕ базондзыстут?» Лукайы 12:32—59.

▪ «Гыццыл дзуг» цал адӕймагӕй конд у ӕмӕ цы райсдзӕн?

▪ Йесо йӕ ахуыргӕнинӕгтӕн, цӕттӕ кӕй хъуамӕ уой, уый куыд равдыста?

▪ Кӕй кӕнӕ цы ӕвдисынц Йесойы фӕсномыг ныхасы «хицау», «хӕдзармӕгӕсӕг», «ӕххуырстытӕ» ӕмӕ «мулк»?