Ахуыргӕнинагыл ис стыр бӕрндзинад

ЗЫНДГОНД фарисейы, синедрионы уӕнджы хӕдзарӕй рацӕугӕйӕ, Йесо дарддӕр кӕны йӕ фӕндаг Иерусалиммӕ. Йӕ фӕдыл цӕуы бирӕ адӕм. Фӕлӕ цӕй тыххӕй? Цы нысан кӕны Йесойы ӕцӕг фӕдылдзӕуӕг уын?

Фӕндагыл Йесо ныхас кӕны бирӕ адӕмимӕ ӕмӕ сӕ ӕвӕццӕгӕн йӕ ныхӕстӕй дисы ӕфтауы: «Мӕнмӕ чи ӕрцӕуа, уымӕн, ӕнӕуынон куы нӕ суой йӕ фыд ӕмӕ мад, ус ӕмӕ сывӕллӕттӕ, ӕфсымӕртӕ ӕмӕ хотӕ, ӕмӕ ма йӕхи цард дӕр, уӕд уый бон нӕу Мӕн ахуыргӕнинаг уӕвын».

Цы зӕгъын фӕнды уымӕй Йесойы? Уый нӕ дзуры, йӕ фӕдылдзӕуджытӕ сӕ хӕстӕджытӕм ӕцӕгдӕр знаджы цӕстӕй кӕй хъуамӕ кӕсой. Уый нысан кӕны, уымӕй сӕ къаддӕр кӕй хъуамӕ уарзой. Йесойы фыдӕл Иаковы тыххӕй дзырдӕуы, зӕгъгӕ йын Лиа «ӕнӕуынон» уыд, Рахилы та уарзта; уый нысан кӕны, Иаков Лиайы йӕ хо Рахилӕй къаддӕр кӕй уарзта.

Уымӕй уӕлдай ма ахъуыды кӕн: Йесо загъта, йӕ ахуыргӕнинагӕн «йӕхи цард дӕр» ӕнӕуынон кӕй хъуамӕ суа. Уымӕй Йесо бамбарын кодта, йӕ ахуыргӕнинаг ӕй йӕхицӕй фылдӕр кӕй хъуамӕ уарза. Уӕдӕ Йесо бӕлвырдӕй ӕвдисы, йӕ ахуыргӕнинаг суӕвын стыр бӕрндзинад кӕй у. Ахӕм къахдзӕфыл лӕмбынӕг ахъуыды кӕнын хъӕуы.

Йесо дарддӕр куыд ӕмбарын кӕны, афтӕмӕй йӕ ахуыргӕнинаг чи уа, уымӕ ӕнхъӕлмӕ кӕсынц зындзинӕдтӕ ӕмӕ ӕфхӕрд: «Чи цӕуы Мӕ фӕдыл ӕмӕ нӕ хӕссы йӕ дзуар, уый бон нӕу Мӕ ахуыргӕнинаг уӕвын». Уымӕ гӕсгӕ, ӕцӕг ахуыргӕнинаг хъуамӕ цӕттӕ уа, Йесо йӕхиуыл цы ӕвзӕр ахаст ӕвзары, ахӕм ахаст бавзарынмӕ ӕмӕ куы бахъӕуа, уӕд, тагъд рӕстӕджы Йесойы куыд амардзысты, афтӕ Хуыцауы знӕгты къухӕй амӕлынмӕ дӕр.

Уымӕ гӕсгӕ Чырыстийы фӕдыл цы адӕм цӕуы, уыдонӕй йӕ ахуыргӕнинаг суӕвын кӕй фӕнды, уый хъуамӕ хорз ахъуыды кӕна. Уый хуыздӕр бамбарын кӕнынӕн Йесо ӕрхаста фӕсномыг ныхас. Уый дзуры: «Сымахӕй кӕй бафӕнда мӕсыг самайын, раздӕр нӕ ӕрбаддзӕн ӕмӕ нӕ банымайдзӕн цы йӕ бахардз кӕнын хъӕудзӕн уыдон, цӕмӕй зона, ис ӕм кӕронмӕ саразыны фаг, цӕмӕй куы ӕрӕвӕра бындур ӕмӕ йӕ кӕронмӕ куы нӕ сараза, уӕд ӕппӕт уынджытӕ ма байдайой худын ууыл, дзургӕйӕ: ацы адӕймаг райдыдта аразын ӕмӕ йӕ нӕ фӕцис кӕронмӕ».

Йӕ фӕдыл цы адӕм цӕуы, уыдонӕн Йесо ӕвдисы, мӕсыг аразынвӕнд чи скӕны, уый раздӕр куыд сбӕрӕг кӕны, кӕронмӕ саразыны фаг ӕрмӕг ӕм ис ӕви нӕ, афтӕ йӕ ахуыргӕнинаг суӕвын кӕй фӕнды, уый дӕр раздӕр хъуамӕ ахъуыды кӕна, уыцы фӕндаг равзаргӕйӕ йӕм цы ӕнхъӕлмӕ кӕсы, уый сфӕразын йӕ бон бауыдзӕн ӕви нӕ. Иннӕ фӕсномыг ныхас ӕрхӕсгӕйӕ, Йесо дзуры:

«Кӕнӕ цавӕр паддзах, ӕндӕр паддзахы ныхмӕ хӕстмӕ цӕугӕйӕ, нӕ ӕрбаддзӕн ӕмӕ нӕ бауынаффӕ кӕндзӕн раздӕр, дӕс минимӕ йӕ бон бауыдзӕн, ссӕдз минимӕ йӕм, чи цӕуы, уый ныхмӕ лӕууын? Кӕннод, уый дард цалынмӕ уа, уӕдмӕ йӕм арвитдзӕн минӕвӕрттӕ бафидауыны тыххӕй».

Уый фӕстӕ фӕсномыг ныхӕсты сӕйраг хъуыды бахаххгӕнгӕйӕ, Йесо дзуры: «Афтӕ сымахӕй алчидӕр, чи нӕ бакӕна ӕвдисӕн, цы йӕм ис уыдон ӕппӕтыл, уый бон нӕу Мӕн ахуыргӕнинаг уӕвын». Уымӕ хъуамӕ цӕттӕ уой, йӕ фӕдыл цы бирӕ адӕм цӕуы, уыдон се ’ппӕтдӕр — Чырысти кӕй ахуыр кӕны, уыдонӕй алчидӕр. Кӕд сӕ фӕнды, цӕмӕй Йесойы ахуыргӕнинӕгтӕ уой, уӕд уыдон хъуамӕ цӕттӕ уой, цыдӕриддӕр сын ис, уый — сӕ исбон, уыимӕ сӕ цард — раттынмӕ дӕр. Ды цӕттӕ дӕ уымӕ?

«Цӕхх хорз у»,— дзуры дарддӕр Йесо. Уӕлхох уацамынды уый дзырдта, йӕ ахуыргӕнинӕгтӕ кӕй сты «зӕххы цӕхх», ома цӕхх хӕлцадон продукттӕ ӕмбийын куыд нӕ уадзы, афтӕ уыдон дӕр иннӕтыл кӕй ӕндавынц, уый фӕрцы сын хъахъхъӕнынц сӕ цард. «Фӕлӕ цӕхх йӕ хъару [«йӕ ад», НФ] куы фесафа, цӕмӕй йын ӕй раздахдзынӕ? Нӕдӕр зӕххӕн бӕззы, нӕдӕр фаджысӕн,— дзуры кӕронбӕттӕны Йесо. — Ӕддӕмӕ йӕ аппарынц. Кӕмӕн ис хъустӕ хъусынӕн, уадз хъусӕд!»

Афтӕмӕй Йесо равдыста, йӕ ахуыргӕнинӕгты дӕр фидар лӕууын кӕй хъӕуы. Кӕннод уыдон суыдзысты ӕнӕпайда — Хуыцауы худинаг кӕндзысты, ацы дунейӕн та худӕджы хос уыдзысты. Йӕ ад чи фесӕфта, ахӕм цӕхх куыд аппарынц, афтӕ уыдон дӕр ӕппӕрст кӕнӕ куынӕггонд ӕрцӕудзысты. Лукайы 14:25—35; Уӕвынад 29:30—33; Матфейы 5:13.

▪ Куыд ӕмбарын хъӕуы, зӕгъгӕ дын дӕ хӕстӕджытӕ кӕнӕ дӕхи цард «ӕнӕуынон» суой?

▪ Цавӕр дыууӕ фӕсномыг ныхасы ӕрхаста Йесо ӕмӕ цы нысан кӕнынц?

▪ Цӕххы тыххӕй Йесойы фӕстаг ныхӕсты мидис цы у?