Фыццаг ӕй кӕнынц Аннӕмӕ, уый фӕстӕ та — Кайафӕмӕ

ЙЕСОЙЫ фыдгӕнӕгау сбастой ӕмӕ йӕ афтӕмӕй акодтой Аннӕмӕ, раздӕры дзырддзӕугӕ хистӕр сауджынмӕ. Йесо 12-аздзыдӕй кувӕндоны ахуыргӕнджыты йӕ ныхасӕй дисы куы бафтыдта, уӕд Аннӕ уыд хистӕр сауджын. Уый фӕстӕ хистӕр сауджынтӕй лӕггад кодтой Аннӕйы фырттӕй цалдӕр, ныр та уыцы бынат ахсы йӕ сиахс Кайафӕ.

Йесойы фыццаг акодтой Аннӕйы хӕдзармӕ, ӕвӕццӕгӕн ын бирӕ рӕстӕджы дӕргъы иудейты динон царды стыр ахадындзинад кӕй уыд, уый тыххӕй. Аннӕмӕ уал ӕй кӕй бакодтой, уый фӕрцы хистӕр сауджын Кайафӕйӕн рӕстӕг ис синедрионы, иудейаг сӕйраг тӕрхондоны, 71 уӕнджы ӕрӕмбырд кӕнынӕн ӕмӕ ма мӕнгӕвдисӕнтӕ ссарынӕн дӕр.

Раздӕры хистӕр сауджын Аннӕ Йесойы фӕрсы йӕ ахуыргӕнинӕгтӕ ӕмӕ йӕ ахуырӕдты тыххӕй. Фӕлӕ йын Йесо дзуапп дӕтты: «Ӕз дзырдтон ӕргом дунейӕн; Ӕз ӕдзухдӕр ахуыр кодтон ӕмбырдгӕнӕны ӕмӕ кувӕндоны, Иудейтӕ ӕдзухдӕр кӕм ӕрӕмбырд вӕййынц, ӕмӕ сусӕгӕй ницы дзырдтон; цӕмӕн фӕрсыс Мӕн? бафӕрс, фехъусджыты, Ӕз цы дзырдтон, уыдонӕн; мӕнӕ уыдон зонынц, Ӕз цы дзырдтон, уый».

Уый фехъусгӕйӕ йын, йӕ цуры чи лӕууыд, уыцы кусджытӕй сӕ иу йӕ уадул ныццавта ӕмӕ йын дзуры: «Афтӕ дзуапп дӕттыс Ды хистӕр сауджынӕн?»

«Кӕд Ӕз ӕвзӕр загътон,— дзуры йын Йесо,— уӕд равдис ӕвзӕр кӕй у, фӕлӕ кӕд хорз, уӕд цы нӕмыс ды Мӕн?» Уыцы ныхӕсты фӕстӕ Аннӕ Йесойы бастӕй арвыста Кайафӕмӕ.

Уӕдмӕ хистӕр сауджынтӕ, адӕмы хистӕртӕ ӕмӕ чиныджы дӕснытӕ, иудзырдӕй, синедрионы уӕнгтӕ иуылдӕр ӕмбырд кӕнын райдыдтой. Куыд зыны, афтӕмӕй ӕрӕмбырд сты Кайафӕйы хӕдзары. Иудейты закъонмӕ гӕсгӕ Куадзӕны ӕхсӕв ахӕм тӕрхоны рабадт саразыны бар нӕй. Фӕлӕ дины разамонджыты уый дӕр нӕ уромы сӕ фыдвӕндӕй.

Цалдӕр къуырийы размӕ, Йесо Лазӕры куы райгас кодта, уӕд синедрион аскъуыддзаг кодта, Йесойӕн ӕнӕамаргӕ кӕй нӕй. Дыууӕ боны размӕ ӕртыццӕджы та дины разамонджытӕ уынаффӕ рахастой, цӕмӕй Йесойыл хинӕй рацӕуой ӕмӕ йӕ афтӕмӕй ӕрцахсой ӕмӕ йӕ амарой. Ахъуыды ма кӕн, Йесойӕн йӕ хъуыддаг нӕма равзӕрстой, афтӕмӕй йын тӕрхон рахастой!

Ныр та агурынц мӕнг ӕвдисӕнты, цӕмӕй Йесойы ныхмӕ тӕрхоны хъуыддаг скӕной. Фӕлӕ сӕ бон нӕу, иу ныхас чи кӕны, ахӕм ӕвдисӕнты ссарын. Ӕппынфӕстаг дыууӕйӕ сразы сты ӕмӕ дзурынц: «Мах фехъуыстам, Уый куыд дзырдта: „Ӕз фехалдзынӕн ацы къухӕй конд кувӕндон ӕмӕ ӕртӕ боны фӕстӕ ӕндӕр ӕнӕкъухӕй конд сараздзынӕн“».

«Цӕуылнӕ исты дзуапп дӕттыс? — фӕрсы йӕ Кайафӕ. — Уыдон Дӕу ныхмӕ цы ӕвдисӕнад кӕнынц?» Фӕлӕ Йесо ницы дзуры. Синедрионы худинагӕн, уыцы хъуыддаджы дӕр ӕвдисӕнтӕн сӕ бон нӕу ӕмхуызон ӕвдисӕнад раттын. Уымӕ гӕсгӕ хистӕр сауджын хъуыддаг ӕндӕрырдӕм фӕзылдта.

Кайафӕ зоны, исчи йӕхи Хуыцауы Фырт куы схона, уӕд иудейтӕ куыд ӕнӕрцӕф уыдзысты. Амӕй размӕ Йесойы раст кӕй нӕ бамбӕрстой, уымӕ гӕсгӕ йӕ дыууӕ хатты схуыдтой Хуыцауы фауӕг ӕмӕ аскъуыддзаг кодтой, мӕлӕты аккаг кӕй у; фыццаг хатт — афтӕ кӕй хъуыды кодтой, зӕгъгӕ, йӕхи Хуыцауы ӕмсӕр кӕны, уый тыххӕй. Уӕдӕ ныр Кайафӕ мӕнгардӕй домы: «Ӕгас Хуыцауы номӕй Дӕ курын, зӕгъ махӕн, Ды Дӕ Чырысти, Хуыцауы Фырт?»

Иудейтӕ куыдфӕнды ма хъуыды кӕной, уӕддӕр Йесо ӕцӕгдӕр у Хуыцауы Фырт. Куы ницы зӕгъа, уӕд ӕй афтӕ бамбардзысты, ӕмӕ Чырысти кӕй у, ууыл разы нӕу. Уымӕ гӕсгӕ Йесо уӕндонӕй дзуапп дӕтты: «Ӕз дӕн. Ӕмӕ сымах фендзыстут Адӕймаджы Фырты Хуыцауы рахиз фарс барджынӕй бадгӕ ӕмӕ уӕларвон ӕврӕгътыл ӕрцӕйцӕугӕ» (МСЕ).

Уыцы ныхӕстӕм Кайафӕ, цыма театры ис, афтӕ йӕ дарӕстӕ аскъуыдта ӕмӕ дзуры: «Уый фауы Хуыцауы! цӕмӕн ма хъӕуы мах ӕвдисӕнтӕ? Мӕнӕ, ныр сымах фехъуыстат куыд фауы Уый Хуыцауы! куыд уӕм кӕсы?»

«Мӕлӕты аккаг у»,— ӕмхъӕлӕсӕй загътой синедрионы уӕнгтӕ. Ӕмӕ дзы хынджылӕг кӕнын райдыдтой, ӕлгъитынц ӕй. Иутӕ йын цӕвынц йӕ цӕсгом ӕмӕ йыл тутӕ кӕнынц. Иннӕтӕ та йын йӕ цӕсгом бамбӕрзтой, тымбыл къухӕй йӕ нӕмын райдыдтой ӕмӕ йӕ хынджылӕджы хуызы фӕрсынц: «Зӕгъ ма махӕн, Чырысти, чи ныццавта Дӕу?» Уыцы ӕвирхъау, ӕнӕзакъонон хъуыддӕгтӕ арӕзт цӕуынц ӕхсӕвыгон тӕрхоны рӕстӕджы. Матфейы 26:57—68; 26:3, 4; Маркы 14:53—65; Лукайы 22:54, 63—65; Иоанны 18:13—24; 11:45—53; 10:31—39; 5:16—18.

▪ Йесойы фыццаг кӕдӕм акодтой ӕмӕ йыл уым цы ’рцыд?

▪ Уый фӕстӕ кӕдӕм акодтой Йесойы ӕмӕ цӕмӕн?

▪ Кайафӕйӕн куыд бантыст синедрион Йесойӕн мӕлӕты тӕрхон рахӕссыныл сразы кӕнын?

▪ Тӕрхоны рӕстӕджы цавӕр ӕвирхъау, ӕнӕзакъонон хъуыддӕгтӕ ӕрцыд арӕзт?