Кӕлӕнтӕ кӕнын ӕмӕ дӕсны фӕрсын раст нӕу

Сайтаны фӕнды, цӕмӕй кӕлӕнтӕ кӕнай. Бирӕтӕ сӕ мард фыдӕлтӕн кӕнӕ сын сӕ удтӕн хӕссынц нывӕндтӕ, цӕмӕй сын знаггад ма кӕной. Уыдон афтӕ уый тыххӕй кӕнынц, ӕмӕ тӕрсынц ӕнӕуынгӕ дунейы тыхтӕй. Уыдон дарынц кӕлӕны къухдарӕнтӕ кӕнӕ цонгдарӕнтӕ. Уыдон нуазынц «хосгӕнӕн дӕттӕ» кӕнӕ сӕ сӕ буӕрттыл байсӕрдынц, афтӕ сӕм кӕсы, цыма сӕ ис диссаджы дзӕбӕхгӕнӕн тых. Иуӕй-иутӕ сӕ хӕдзӕртты кӕнӕ зӕххы баныгӕнынц цавӕрдӕр дзаумӕттӕ, афтӕ сӕм фӕкӕсы, цыма сӕ уыдон бахъахъхъӕндзысты. Иннӕтӕ та дарынц дуатӕ, уымӕн ӕмӕ сӕ уырны, уыдон сын кӕй баххуыс кӕндзысты бизнесы, скъолайы фӕлварӕнты кӕнӕ тӕрхондоны ӕнтыстджын уӕвынӕн.

Иегъовӕ дӕ хӕлар куы уа, уӕд дӕ уый Сайтанӕй бахъахъхъӕндзӕн. Иегъовӕ Хуыцау йӕ зӕдтимӕ Сайтан ӕмӕ йӕ хӕйрӕджытӕй бирӕ тыхджындӕр у (Иаковы 2:19; Раргомад 12:9). Иегъовӕйы тынг фӕнды йӕ хӕлӕртты, ӕппӕт зӕрдӕйӕ йыл иузӕрдион чи у, уыдоны бахъахъхъӕныны тыххӕй йӕ тых равдисын (2 Паралипоменон 16:9).

Хуыцауы Ныхасы дзырдӕуы: «Хинтӕ ма кӕнут». Иегъовӕйӕн ӕнӕуынон сты кӕлӕнтӕ ӕмӕ дӕсны фӕрсын, уымӕн ӕмӕ уыцы хъуыддӕгтӕ чи аразы, уыдонӕн сӕ бон у Сайтан Хӕйрӕджы ӕндӕвдады бын бахауын (Левит 19:26).