Хуыцауы зӕрдӕмӕ кӕцы дин цӕуы?

1. Хуыцауӕн раст куы кувӕм, уӕд нын уый цы пайда ӕрхӕсдзӕн?

ЙЕГЪОВӔ ХУЫЦАУ тыхсы махӕй алкӕуыл дӕр ӕмӕ йӕ фӕнды, цӕмӕй йӕ фӕндагыл цӕуӕм. Раст ын куы кувӕм, уӕд амондджын уыдзыстӕм ӕмӕ нӕхи бирӕ зындзинӕдтӕй бахиздзыстӕм. Стӕй нын Хуыцау ӕххуыс кӕндзӕн ӕмӕ нын арфӕ дӕр кӕндзӕн (Исай 48:17). Фӕлӕ зӕххыл тынг бирӕ динтӕ ис, ӕмӕ дзы алкӕцы дӕр йӕхи раст хоны. Афтӕмӕй та, Хуыцау чи у ӕмӕ нӕм цӕмӕ ӕнхъӕлмӕ кӕсы, уый тыххӕй иутӕ иухуызон дзурынц, иннӕтӕ та – бынтон ӕндӕрхуызон.

2. Йегъовӕйӕн кувын куыд хъӕуы, уый куыд ис базонӕн ӕмӕ уымӕн цавӕр цӕвиттон ис ӕрхӕссӕн?

² Уӕдӕ, Йегъовӕйӕн кувын куыд хъӕуы, уый куыд ис базонӕн? Уый тыххӕй дӕу нӕ хъӕуы, ӕппӕт динтӕ цы дзурынц, уый иртасын ӕмӕ сӕ стӕй кӕрӕдзиимӕ барын. Уый бӕсты дӕ хъӕуы, раст дины тыххӕй Библи цы дзуры, уый базонын. Ӕрхӕссӕм иу цӕвиттон. Бирӕ бӕстӕты фыдгӕнджытӕ мыхуыр кӕнынц мӕнг ӕхцатӕ. Ӕмӕ дын, зӕгъӕм, бахӕс кодтой, ӕхцатӕй мӕнг кӕцытӕ сты, уый сбӕрӕг кӕнын. Куыд бакӕндзынӕ? Цыдӕриддӕр ӕхцатӕ ис, уыдонмӕ кӕсдзынӕ ӕмӕ дзы алкӕцыдӕр цыхуызӕн у, уый бахъуыды кӕныныл архайдзынӕ? Хуыздӕр уаид, ӕцӕг ӕхцатӕм лӕмбынӕг куы ӕркӕсис ӕмӕ, цыхуызӕн сты, уый куы базонис. Ӕцӕг ӕхцатӕ цыхуызӕн сты, уый куы зонай, уӕд дӕ бон уыдзӕн, ӕхцатӕй мӕнг кӕцытӕ сты, уый дӕр сбӕрӕг кӕнын. Афтӕ у динты хабар дӕр. Динтӕй Хуыцауы цӕсты раст кӕцы у, уый куы базонӕм, уӕд нын, динтӕй мӕнг кӕцытӕ сты, уый раиртасын дӕр зын нӕ уыдзӕн.

3. Цӕмӕй нӕ Хуыцау райгонд уа, уый тыххӕй цы хъуамӕ аразӕм?

³ Йегъовӕйӕн хъуамӕ кувӕм, йӕхӕдӕг куыд зӕгъы, афтӕ. Бирӕтӕ хъуыды кӕнынц, ӕмӕ Хуыцау ӕппӕт динтӕй дӕр разы у, фӕлӕ Библимӕ гӕсгӕ уый афтӕ нӕу. Стӕй, адӕймаг йӕхи чырыстон хона, уый дӕр фаг нӕу. Чырысти ахӕм ныхӕстӕ загъта: «Мӕнмӕ „Хицау! Хицау!“ чи дзуры, уыдонӕй алчи нӕ бацӕудзӕн уӕларвон паддзахадмӕ, фӕлӕ йӕм бацӕудзӕн, мӕ уӕларвон Фыды фӕндон чи ӕххӕст кӕны, уый». Уӕдӕ нӕ цӕмӕй Хуыцау райгонд уа, уый тыххӕй йын хъуамӕ йӕ фӕдзӕхстытӕ базонӕм ӕмӕ сӕ ӕххӕст кӕнӕм. Хуыцауы фӕндон чи не ’ххӕст кӕны, уыдоны Йесо схуыдта «фыдгӕнджытӕ» (Матфейы 7:21–23). Мӕнг ӕхцатӕй куыд ницы пайда ис, афтӕ мӕнг динӕй дӕр ницы пайда ис. Уымӕй уӕлдай ма мӕнг дин адӕймагӕн зиан дӕр хӕссы.

4. Йесо цавӕр дыууӕ фӕндаджы кой кодта ӕмӕ уыцы фӕндӕгтӕ кӕдӕм кӕнынц?

⁴ Йегъовӕ алкӕмӕн дӕр фадат дӕтты, цӕмӕй зӕххыл, Дзӕнӕты, ӕнустӕм цӕра. Фӕлӕ уый тыххӕй хъуамӕ Хуыцауӕн раст кувӕм ӕмӕ йын нӕ цардӕй йӕ зӕрдӕ рухс кӕнӕм. Хъыгагӕн, уый бирӕты нӕ фӕнды. Йесо афтӕ дӕр уымӕн загъта: «Бахизут нарӕг дуарыл, уымӕн ӕмӕ сӕфтмӕ цы фӕндаг кӕны, уый у фӕтӕн ӕмӕ уӕрӕх, ӕмӕ йыл бирӕтӕ цӕуынц. Цардмӕ цы фӕндаг кӕны, уый та уынгӕг у, ӕмӕ дуар дӕр нарӕг у, ӕмӕ уыцы фӕндаг бирӕтӕ не ссарынц» (Матфейы 7:13, 14). Раст дин кӕны ӕнусон цардмӕ. Мӕнг дин та кӕны сӕфтмӕ. Фӕлӕ Йегъовӕйы нӕ фӕнды, цӕмӕй исчи фесӕфа. Ӕмӕ зӕххыл алы адӕймагӕн дӕр уый тыххӕй дӕтты фадат, цӕмӕй, Хуыцау чи у, уый базона (2 Петры 3:9). Ӕцӕгдӕр, Хуыцауӕн куыд кувӕм, уымӕй аразгӕ у нӕ фидӕн. Уый нӕ кӕнӕ цардмӕ ӕркӕндзӕн, кӕнӕ – мӕлӕтмӕ.

РАСТ ДИН КУЫД ИС ССАРӔН

5. Раст диныл хӕст адӕмы цӕмӕй ис базонӕн?

⁵ «Цардмӕ цы фӕндаг кӕны, уый» куыд ис ссарӕн? Йесо куыд загъта, афтӕмӕй раст дин базонӕн ис, уыцы диныл цы адӕм хӕст сты, уыдонӕн сӕ цардӕй. «Сӕ хъуыддӕгтӕй [«дыргътӕй», фиппаинаг] сӕ базондзыстут. Алы хорз бӕласыл дӕр ӕрзайы хорз дыргътӕ» (Матфейы 7:16, 17). Ӕндӕр ныхасӕй, раст диныл хӕст адӕмы базонӕн ис, цӕуыл ӕууӕндынц, уымӕй ӕмӕ сӕ уаг, се ’гъдауӕй. Кӕд Хуыцауы ӕцӕг лӕггадгӕнджытӕ дӕр алцӕмӕй ӕххӕст ӕмӕ ӕнӕрӕдийгӕ не сты, уӕддӕр архайынц Хуыцауы фӕндон ӕххӕст кӕныныл. Базонӕн сӕ ис ӕхсӕз хъуыддагӕй. Ӕркӕсӕм сӕм.

6, 7. Хуыцауы лӕггадгӕнджытӕ Библимӕ цы цӕстӕй кӕсынц ӕмӕ нын ацы хъуыддаджы Йесо фӕзминаг куыд у?

⁶ Хуыцауы лӕггадгӕнджытӕ дзурынц, Библийы цы фыст ис, уый. Библи йӕхӕдӕг зӕгъы: «Фыстад ӕнӕхъӕнӕй дӕр у Хуыцауы комытӕфӕй фыст ӕмӕ пайда у адӕймаджы ахуыр кӕнынӕн, уайдзӕф кӕнынӕн, хъуыддӕгтӕ раст кӕнынӕн, раст зондыл аразынӕн, цӕмӕй Хуыцауы адӕймаг алцыдӕр хорз зона ӕмӕ алы хорз хъуыддагмӕ дӕр алцӕмӕй дӕр цӕттӕ уа» (2 Тимофеймӕ 3:16, 17). Апостол Павел йе ’муырнджытӕм фыста: «Махӕй Хуыцауы ныхас куы фехъуыстат, уӕд ӕй адӕймаджы ныхасыл нӕ банымадтат, фӕлӕ, ӕцӕгӕй цы у, ууыл – Хуыцауы ныхасыл» (1 Фессалоникӕгтӕм 2:13). Уымӕ гӕсгӕ, раст диныл хӕст чи у, уыдонӕн сӕ ахуырӕдтӕ ӕмӕ сӕ хъуыддӕгтӕ адӕмы зонд ӕмӕ ӕгъдӕуттыл арӕзт не сты. Уыдон ӕууӕндынц, Хуыцауы Ныхасы, Библийы, цы фыст ис, ӕрмӕстдӕр ууыл.

⁷ Уыцы хъуыддаджы нын фӕзминаг у Йесо Чырысти. Цы дзырдта, уый алкӕддӕр уыд Хуыцауы Ныхасӕй. Иухатт йӕ уӕларвон Фыдмӕ куы куывта, уӕд ахӕм ныхӕстӕ загъта: «Дӕ ныхас у рӕстдзинад» (Иоанны 17:17). Йесо ӕууӕндыд Хуыцауы Ныхасыл ӕмӕ адӕмӕн дӕр, уым цы фыст ис, уый амыдта. Арӕх-иу загъта, «фыст у», зӕгъгӕ (Матфейы 4:4, 7, 10). Ӕмӕ-иу стӕй Фыстадӕй кӕцыдӕр ныхӕстӕ ӕрхаста. Абон Хуыцауы лӕггадгӕнджытӕ дӕр адӕмӕн сӕхи хъуыдытӕ нӕ дзурынц. Уыдон фидарӕй зонынц, Библи Хуыцауы Ныхас кӕй у, ӕмӕ иннӕтӕн дӕр амонынц, уым цы фыст ис, ӕрмӕстдӕр уый.

8. Йегъовӕйӕн кувӕг адӕм цы аразынц?

⁸ Раст диныл хӕст чи у, уыдон кувынц ӕрмӕстдӕр Йегъовӕйӕн ӕмӕ йын йӕ ном иннӕтӕн ӕргом кӕнынц. Йесо загъта: «Дӕ Хуыцау Йегъовӕйӕн кув ӕмӕ ӕрмӕстдӕр уымӕн лӕггад кӕн» (Матфейы 4:10). Уӕдӕ Хуыцауы лӕггадгӕнджытӕ Йегъовӕйы йеддӕмӕ ӕндӕр никӕмӕн кувынц. Кувгӕ та йын куыд кӕнынц? Адӕмӕн дзурынц, ӕцӕг Хуыцауӕн йӕ ном куыд у ӕмӕ цавӕр Хуыцау у, уый тыххӕй. Псаломы 83:18 стихы фыст ис: «Ды, йӕ ном Йегъовӕ кӕмӕн у, ӕрмӕстдӕр ды... дӕ Иунӕг Стыр Хуыцау, Хицау ӕгас зӕххӕн». Йесо адӕмӕн ӕххуыс кодта Хуыцауы базонынӕн. Иухатт Хуыцамӕ куы куывта, уӕд ын загъта: «Дунейӕ мын кӕй радтай, уыдонӕн ӕз дӕ ном раргом кодтон» (Иоанны 17:6). Абон дӕр, раст диныл хӕст чи у, уыдон адӕмӕн дзурынц Хуыцауӕн йӕ ном, йӕ фӕндтӕ ӕмӕ йӕ миниуджыты тыххӕй дӕр.

9, 10. Ӕцӕг чырыстӕттӕ кӕрӕдзи кӕй уарзынц, уый цавӕр хъуыддӕгтӕй ӕвдисынц?

⁹ Хуыцауы адӕм кӕрӕдзи уарзынц ӕцӕг, удуӕлдай уарзтӕй. Йесо загъта: «Мӕ ахуыргӕнинӕгтӕ кӕй стут, уый адӕм иууылдӕр уымӕй базондзысты, ӕмӕ уӕ кӕрӕдзийы куы уарзат» (Иоанны 13:35). Фыццаг ӕнусы цӕрӕг чырыстӕттӕ сӕ кӕрӕдзи растдӕр ахӕм уарзтӕй уарзтой. Хуыцау нӕ цы уарзондзинадыл ахуыр кӕны, уый нӕ кӕсы, чи кӕцы адӕмӕй у кӕнӕ цы бынат ахсы, уымӕ. Уыцы уарзондзинад адӕмы кӕрӕдзийыл афтӕ тынг бӕтты, ӕмӕ кӕрӕдзийӕн ӕцӕг ӕфсымӕртау адджын свӕййынц (Колоссӕгтӕм 3:14). Мӕнг динты адӕм кӕрӕдзи ахӕм уарзтӕй нӕ уарзынц. Кӕд иу диныл хӕст сты, уӕддӕр кӕрӕдзи марынц, сӕ иу дзы иу адӕмыхаттӕй кӕй у, иннӕ та – ӕндӕр адӕмыхаттӕй, уый тыххӕй. Ӕцӕг чырыстӕттӕ та хӕцӕнгарз сӕ къухмӕ исгӕ дӕр нӕ кӕнынц. Уыдон нӕдӕр сӕ чырыстон ӕфсымӕрты марынц, нӕдӕр иннӕ адӕмы. Библийы фыст ис: «Хуыцауы сывӕллӕтты ӕмӕ Хӕйрӕджы сывӕллӕтты афтӕ ис базонӕн: раст хъуыддӕгтӕ чи нӕ кӕны, уый Хуыцауӕй нӕу. Ӕмӕ уый зӕгъӕн ис, йе ’фсымӕры чи нӕ уарзы, уымӕй дӕр. ...Мах хъуамӕ кӕрӕдзийы уарзӕм ӕмӕ, Фыдбылызӕй чи уыд ӕмӕ йе ’фсымӕры фыдмард чи акодта, уыцы Каины хуызӕн ма уӕм» (1 Иоанны 3:10–12; 4:20, 21).

¹⁰ Фӕлӕ ӕцӕг уарзондзинад ӕрмӕст уый нӕу, ӕмӕ макӕй марай. Ӕцӕг чырыстӕттӕ сӕ рӕстӕг, сӕ хъарутӕ ӕмӕ сӕм цы ис, уый кӕрӕдзийӕн не ’вгъау кӕнынц. Сӕ кӕрӕдзийы ныфсыл ныфс ӕфтауынц (Дзуттӕгтӕм 10:24, 25). Исты бӕллӕх куы ’рцӕуы, уӕд кӕрӕдзийы фарсмӕ балӕууынц. Уымӕй уӕлдай сты ӕнӕзӕрдӕхудт ӕмӕ никӕй сайынц. Уыдон цӕрынц, Библи куыд амоны, афтӕ – «алкӕмӕн дӕр хорздзинад аразынц» (Галатӕгтӕм 6:10).

11. Хуыцау адӕмы Йесо Чырыстийы фӕрцы кӕй фервӕзын кӕндзӕн, ууыл ӕууӕндын ӕнӕмӕнг цӕмӕн хъӕуы?

¹¹ Ӕцӕг чырыстӕттӕ ӕууӕндынц, Хуыцау адӕмы Йесо Чырыстийы фӕрцы кӕй фервӕзын кӕндзӕн. Библи афтӕ зӕгъы: «Фервӕзӕн... ӕндӕр никӕй фӕрцы ис, уымӕн ӕмӕ арвы бын Хуыцау ӕндӕр никӕмӕн радта ахӕм ном – ӕрмӕстдӕр уый фӕрцы фервӕздзыстӕм» (Хъуыддӕгтӕ 4:12). Чырысти йӕ цард радта коммӕгӕс адӕмы тыххӕй (Матфейы 20:28). Уымӕй уӕлдай, Хуыцау Йесо Чырыстийы сӕвӕрдта уӕларвон Паддзахады сӕргъы, ӕмӕ уырдыгӕй разамынд дӕтдзӕн ӕнӕхъӕн зӕххӕн дӕр. Уӕдӕ нӕ кӕд ӕнустӕм цӕрын фӕнды, уӕд хъуамӕ Чырыстийы коммӕ кӕсӕм ӕмӕ нӕ цард аразӕм, уый цы амыдта, уымӕ гӕсгӕ. Библийы афтӕ дӕр уымӕн ис фыст: «Фыртыл чи ӕууӕнды, уый хайджын уыдзӕн ӕнусон цардӕй» (Иоанны 3:36).

12. Ацы дунейӕ ма уай, уый цы нысан кӕны?

¹² Хуыцауӕн кувӕг адӕм ацы дунейӕ не сты. Ромаг хицау Пилаты раз лӕугӕйӕ Йесо загъта: «Мӕ паддзахад ацы дунейӕ нӕу» (Иоанны 18:36). Йесойы ӕцӕг фӕдылдзӕуджытӕ цавӕрфӕнды бӕстӕйы ма цӕрой, уӕддӕр уыдон сты уӕларвон Паддзахады дӕлбар ӕмӕ ацы дунейы политикон хъуыддӕгты нӕ архайынц. Ацы дунейы искуы хӕст куы вӕййы, уӕд дзы нӕдӕр иуты фарс вӕййынц, нӕдӕр – иннӕты. Фӕлӕ Йегъовӕйы адӕм иннӕтӕн афтӕ нӕ дзурынц, зӕгъгӕ, политикон партимӕ ма бацу, ацы дунейы хицауы бынатмӕ ма тырн кӕнӕ хъӕлӕс макӕуыл кӕн. Ӕмӕ кӕд сӕхӕдӕг политикӕмӕ ницы бар дарынц, уӕддӕр сӕ бӕстӕйы закъӕттӕ ӕнӕзӕрдӕхудтӕй ӕххӕст кӕнынц. Цӕмӕн? Уымӕн ӕмӕ сын Хуыцауы Ныхас афтӕ амоны, цӕмӕй «хицӕуттӕн коммӕгӕс уой» (Ромӕгтӕм 13:1). Ӕрмӕст сын зӕххон хицӕуттӕ, Хуыцауы закъоны ныхмӕ цы у, ахӕм исты куы фӕаразын кӕнынц, уӕд уыдон дӕр апостолтау фӕзӕгъынц: «Хуыцау у нӕ хицау, ӕмӕ фыццаджыдӕр хъуамӕ уымӕ хъусӕм, адӕммӕ нӕ, фӕлӕ» (Хъуыддӕгтӕ 5:29; Марчы 12:17).

13. Чырыстийы ӕцӕг фӕдылдзӕуджытӕ Хуыцауы Паддзахады тыххӕй цы хъуыды кӕнынц ӕмӕ цы аразынц?

¹³ Чырыстийы ӕцӕг фӕдылдзӕуджытӕ хъусын кӕнынц, адӕмы сӕ зындзинӕдтӕй ӕрмӕстдӕр Хуыцауы Паддзахад кӕй фервӕзын кӕндзӕн. Йесо зӕххыл куы уыд, уӕд загъта: «Хуыцауы паддзахады тыххӕй ацы хорз хабар хъуыстгонд ӕрцӕудзӕн ӕгас зӕххы цъарыл дӕр, цӕмӕй уый тыххӕй ӕппӕт адӕмтӕ дӕр фехъусой. Ӕмӕ уӕд ӕрцӕудзӕн кӕрон» (Матфейы 24:14). Чырыстийы ӕцӕг фӕдылдзӕуджытӕ адӕмы уымӕ нӕ разӕнгард кӕнынц, цӕмӕй сӕ ныфс зӕххон хицӕуттыл дарой, уыдон уын скӕндзысты хорз цард, зӕгъгӕ. Ӕцӕг чырыстӕттӕ хъусын кӕнынц, адӕмы сӕ зындзинӕдтӕй ӕрмӕстдӕр Хуыцауы уӕларвон Паддзахад кӕй фервӕзын кӕндзӕн (Псалом 146:3). Чырысти йӕ фӕдылдзӕуджытӕн амыдта, цӕмӕй уыцы уӕларвон хицауады тыххӕй куывтаиккой. Уый загъта: «Ӕрцӕуӕд дӕ паддзахад. Дӕ фӕндон уӕлӕрвты куыд ис, афтӕ уӕд зӕххыл дӕр» (Матфейы 6:10). Хуыцауы Ныхасы раджы фыст ӕрцыд, уыцы уӕларвон Паддзахад цы сараздзӕн, уый тыххӕй: «Уый ныппырх кӕндзӕн ӕмӕ фесафдзӕн уыцы паддзахӕдтӕ иууылдӕр, йӕхӕдӕг та лӕудзӕн ӕнустӕм» (Данел 2:44).

14. Куыд хъуыды кӕныс, дунейы цы динтӕ ис, уыдонӕй Хуыцауӕн раст кӕцы кувы?

¹⁴ Мах ӕркастыстӕм, раст дин куыд ис базонӕн, уымӕ. Ныр-ма ахъуыды кӕн: адӕмӕн кӕцы дин дзуры, Библийы цы фыст ис, ӕрмӕстдӕр уый? Чи сын ӕргом кӕны Йегъовӕйы ном? Кӕцы диныл хӕст адӕм уарзынц кӕрӕдзи, Хуыцау сӕ куыд ахуыр кӕны, афтӕ? Йӕ цардӕй чи ӕвдисы, Чырыстийыл кӕй ӕууӕндынц, уый? Кӕмӕй ис зӕгъӕн, ӕмӕ ацы дунейӕ нӕу, науӕд чи хъусын кӕны, адӕмы сӕ зындзинӕдтӕй ӕрмӕстдӕр Хуыцауы Паддзахад кӕй фервӕзын кӕндзӕн, уый тыххӕй? Зӕххыл цы динтӕ ис, уыдонӕй ацы хъуыддӕгтӕ кӕцы дин аразы? Бӕлвырдгӕнӕнтӕ куыд ӕвдисынц, афтӕмӕй уыдон сты Йегъовӕйы Ӕвдисӕнтӕ (Исай 43:10–12).

ДЫ КУЫД БАКӔНДЗЫНӔ?

15. Хуыцау кӕй ис, уый нӕ уырна, уымӕй уӕлдай ма нӕ ноджыдӕр цы хъӕуы аразын?

¹⁵ Кӕд нӕ Хуыцауы хорзӕх ссарын фӕнды, уӕд фаг нӕу, ӕмӕ дзурӕм, мӕн Хуыцау уырны, зӕгъгӕ. Хуыцау кӕй ис, уый хӕйрӕджыты дӕр уырны (Иаковы 2:19). Фӕлӕ уыдон Хуыцауы фӕндон не ’ххӕст кӕнынц, ӕмӕ уымӕ гӕсгӕ сӕ уырнындзинад йӕ цӕсты ницы у. Уӕдӕ, Хуыцау кӕй ис, ууыл ӕууӕндынӕй уӕлдай ма йын хъуамӕ йӕ фӕндон дӕр ӕххӕст кӕнӕм. Стӕй хъуамӕ мӕнг дин ныууадзӕм ӕмӕ, раст дин куыд амоны, афтӕ цӕрӕм.

16. Кӕд мӕнг динимӕ баст стӕм, уӕд нӕ цы бакӕнын хъӕуы?

¹⁶ Мӕнг динимӕ нын иумӕйагӕй кӕй хъуамӕ мацы уа, уый бӕрӕг у апостол Павелы ныхӕстӕй: «„Се ’хсӕнӕй рацӕут ӕмӕ сӕ уӕхи фӕхицӕн кӕнут,– зӕгъы Йегъовӕ,– ӕмӕ, чъизи цы у, ахӕмӕй мацӕмӕуал ӕвналут“, „ӕмӕ уӕ ӕз ме уазӕг бакӕндзынӕн“» (2 Коринфӕгтӕм 6:17; Исай 52:11). Уымӕ гӕсгӕ ӕцӕг чырыстӕттӕ, мӕнг динимӕ баст цыдӕриддӕр у, уымӕ хӕстӕг дӕр нӕ цӕуынц.

17, 18. Цы у «Стыр Вавилон» ӕмӕ дзы ӕвӕстиатӕй цӕмӕн хъӕуы рацӕуын?

¹⁷ Библи нын ӕмбарын кӕны, зӕххыл цыдӕриддӕр мӕнг динтӕ ис, уыдон кӕй сты «Стыр Вавилон» (Раргомад 17:5)a. Кӕддӕр уыд ахӕм горӕт, Вавилон, зӕгъгӕ. Нойы рӕстӕджы Доны хъаймӕт куы уыди, уый фӕстӕ уыцы горӕты фӕзынд мӕнг дин. Рагон Вавилонӕй рацыдысты, абон мӕнг динтыл хӕст адӕм цӕуыл ӕууӕндынц ӕмӕ цы ӕгъдӕуттыл хӕст сты, уыдонӕй бирӕтӕ. Зӕгъӕм, Вавилоны цӕрджытӕ куывтой троицӕтӕн, ома ӕртыгай хуыцӕуттӕн. Ӕмӕ абон дӕр бирӕ динты сӕйрагдӕр ахуырад уый у, зӕгъгӕ, Хуыцау у Троицӕ. Фӕлӕ Библи бӕлвырдӕй зӕгъы, кӕй ис ӕрмӕстдӕр иунӕг ӕцӕг Хуыцау – Йегъовӕ, ӕмӕ Йесо Чырысти та йӕ Фырт кӕй у (Иоанны 17:3). Вавилойнӕгтӕ ма ӕууӕндыдысты, адӕймаг куы амӕлы, уӕд йӕ уд цӕргӕйӕ кӕй баззайы ӕмӕ зындоны кӕй фӕхъизӕмар кӕны, ууыл дӕр. Ӕмӕ абон дӕр динтӕн сӕ фылдӕр афтӕ дзурынц, уд, дам, ӕнӕмӕлгӕ у ӕмӕ, дам, зындоны арты фӕхъизӕмар кӕны.

¹⁸ Рагон Вавилоны дины ӕгъдӕуттӕ ӕмӕ ахуырӕдтӕ ӕгас зӕххыл дӕр кӕй апарахат сты, уымӕ гӕсгӕ зӕгъӕн ис, ӕмӕ Стыр Вавилон у, зӕххыл цыдӕриддӕр мӕнг динтӕ ис, уыдон. Хуыцау раджы загъта, ӕппӕт мӕнг динтӕн дӕр сӕ кӕрон ӕвиппайды кӕй ӕрцӕудзӕн (Раргомад 18:8). Уӕдӕ йӕ ӕмбарыс, Стыр Вавилонимӕ баст цыдӕриддӕр у, уыдӕттӕ дӕ ныууадзын цӕмӕн хъӕуы? Йегъовӕйы фӕнды, цӕмӕй мӕнг динӕй ӕвӕстиатӕй «рацӕуай», цалынмӕ ма рӕстӕг ис, уӕдмӕ (Раргомад 18:4).

19. Йегъовӕйӕн лӕггад кӕнгӕйӕ цавӕр хорздзинӕдтӕ ссардзынӕ?

¹⁹ Мӕнг дины хъуыддӕгтӕ куы ныууадзай, уӕд дӕм, чи зоны, дӕ хиуӕттӕй ӕмӕ дӕ зонгӕтӕй иуӕй-иутӕ хӕстӕг дӕр мауал цӕуой. Фӕлӕ Йегъовӕйӕн йӕ адӕмимӕ лӕггад кӕнгӕйӕ ды ссардзынӕ, цӕмӕй фӕцух уай, уымӕй бирӕ фылдӕр. Чырыстийы фыццаг ахуыргӕнинӕгтӕ дӕр цӕмӕй йӕ фӕдыл цыдаиккой, уый тыххӕй бирӕ цыдӕртӕ ныууагътой, фӕлӕ стӕй сӕхицӕн бирӕ ӕфсымӕртӕ ӕмӕ хотӕ ссардтой. Уӕдӕ ды дӕр ссардзынӕ, хи мадызӕнӕгау дӕ чи уарздзӕн, бирӕ ахӕм ӕфсымӕртӕ ӕмӕ хотӕ. Зӕххыл Чырыстийы ӕцӕг фӕдылдзӕуджытӕ сты цалдӕр милуаны, ӕмӕ дын уыдон иууылдӕр суыдзысты хи бинонтау адджын. Уымӕй уӕлдай «фидӕны» та хайджын уыдзынӕ «ӕнусон цардӕй» (Марчы 10:28–30). Стӕй дӕм дӕ уырнындзинады тыххӕй хӕстӕг чи нал цӕуы, уыдоны дӕр, чи зоны, иу бон бафӕнда, Библийы цы фыст ис, уый базонын, ӕмӕ уыдон дӕр Йегъовӕйӕн лӕггад кӕнын райдайой.

20. Раст диныл хӕст чи у, уыдонмӕ цавӕр фидӕн ӕнхъӕлмӕ кӕсы?

²⁰ Библийы куыд фыст ис, афтӕмӕй тагъд Хуыцау ацы фыддуне фесафдзӕн ӕмӕ скӕндзӕн рӕстаг ног дуне. Уыцы дунейӕн разамынд дӕтдзӕн Хуыцауы Паддзахад (2 Петры 3:9, 13). Ахъуыды-ма кӕн, уый цы диссаджы дуне уыдзӕн, ууыл! Уым уыдзӕн ӕрмӕстдӕр иу дин. Адӕм иууылдӕр Хуыцауӕн кувдзысты, уый куыд фӕнды, афтӕ. Уӕдӕ ды дӕр ӕвӕстиатӕй архай, цӕмӕй Хуыцауы ӕцӕг лӕггадгӕнджытӕм ӕрбаиу уай.