7 СӔР
Ӕмбырдтӕ «разӕнгард кӕнынц уарзондзинадмӕ ӕмӕ хорз хъуыддӕгтӕм»
ӔНУСТЫ дӕргъы Йегъовӕйы адӕм иумӕ ӕмбырд кодтой бӕлвырд ӕгъдаумӕ гӕсгӕ. Рагон Израилы-иу нӕлгоймӕгтӕ се ’ппӕт дӕр Иерусалиммӕ ӕрцыдысты ӕртӕ стыр бӕрӕгбонмӕ (Дык. з. 16:16). Фыццаг ӕнусы чырыстӕттӕ иумӕ ӕмбырд кодтой, арӕхдӕр – кӕйдӕр хӕдзӕртты (Филим. 1, 2). Абон мах дӕр фӕцӕуӕм ӕмбырды фембӕлдтӕм ӕмӕ конгресстӕм. Хуыцауы лӕггадгӕнджытӕ иумӕ цӕмӕн ӕмбырд кӕнынц? Сӕйраджыдӕр уый тыххӕй, ӕмӕ уый хауы нӕ лӕггадмӕ (Пс. 95:6; Кол. 3:16).
2 Уымӕй уӕлдай, ӕмбырды фембӕлдтӕ стыр пайда хӕссынц, чи сӕм цӕуы, уыдонӕн. Израилӕгтӕ-иу Халагъудты бӕрӕгбон алы ӕвдӕм аз дӕр куыд хъуамӕ бӕрӕг кодтаиккой, уый тыххӕй сын загъд уыд: «Ӕрӕмбырд кӕнут адӕмы се ’ппӕты дӕр: нӕлгоймӕгты, сылгоймӕгты, сывӕллӕтты ӕмӕ, уӕ горӕтты чи цӕры, уыцы ӕрцӕуӕггӕгты,– цӕмӕй хъусой ӕмӕ ахуыр кӕной, уымӕн ӕмӕ хъуамӕ тӕрсой уӕ Хуыцау Йегъовӕйӕ ӕмӕ, ацы закъоны цыдӕриддӕр фыст ис, уый ӕххӕст кӕной» (Дык. з. 31:12). Бӕрӕг у, ӕмбырды фембӕлдтӕм цӕуын ма уый тыххӕй дӕр кӕй хъӕуы, цӕмӕй нӕ Йегъовӕ ахуыр кӕна (Ис. 54:13). Уымӕй уӕлдай ма фембӕлдты нӕ кӕрӕдзи дӕр хуыздӕр базонӕм, кӕрӕдзийы ныхасӕй бафидар кӕнӕм ӕмӕ кӕрӕдзийы ныфсыл ныфс бафтауӕм.
ӔМБЫРДЫ ФЕМБӔЛДТӔ
3 Н. э. 33 азы Фӕндзайӕм боны фӕстӕ иумӕ чи ӕрӕмбырд, уыцы ахуыргӕнинӕгтӕ зӕрдиагӕй хъуыстой, апостолтӕ цы амыдтой, уымӕ, «ӕмӕ-иу алы бон дӕр кувӕндоны иумӕ ӕрӕмбырд сты» (Хъуыд. 2:42, 46). Фӕстӕдӕр-иу ӕмбырдты кастысты Сыгъдӕг Фыстад, уыимӕ апостолты ӕмӕ иннӕ ахуыргӕнинӕгты фыстӕджытӕ дӕр (1 Кор. 1:1, 2; Кол. 4:16; 1 Фес. 1:1; Иак. 1:1). Ӕмбырды-иу иумӕ кувгӕ дӕр скодтой (Хъуыд. 4:24–29; 20:36). Хатт-иу дзы ӕфсымӕртӕ радзырдтой, миссионертӕй лӕггадгӕнгӕйӕ сыл цы хабӕрттӕ ӕрцыд, уыдон (Хъуыд. 11:5–18; 14:27, 28). Ӕмбырдты-иу ныхас кодтой Библийы ахуырӕдтыл ӕмӕ, пехуымпарӕдтӕ куыд ӕххӕст кӕнынц, ууыл. Дзырд-иу дзы цыди, чырыстон куыд хъуамӕ цӕра ӕмӕ Хуыцауӕн иузӕрдионӕй куыд хъуамӕ лӕггад кӕна, ууыл дӕр. Ӕмбырдты ма се ’ппӕты дӕр разӕнгард кодтой зынгзӕрдӕйӕ хъусын кӕнынмӕ (Ром. 10:9, 10; 1 Кор. 11:23–26; 15:58; Еф. 5:1–33).
4 Абон чырыстон фембӕлдтӕ дӕр фӕцӕуынц, апостолты рӕстӕг сын цы ӕгъдау сфидар кодтой, уымӕ гӕсгӕ. Мах архайӕм Дзуттӕгтӕм 10:24, 25 фыст ныхӕстӕм гӕсгӕ: «Нӕ кӕрӕдзийыл хъуыды кӕнӕм, цӕмӕй... не ’мбырдтӕ ма цух кӕнӕм, фӕлӕ кӕрӕдзийы ныфсыл ныфс ӕфтауӕм, ӕмӕ, уыцы бон куыд хӕстӕг кӕны, уый цас бӕлвырддӕр уынӕм, уыйас ноджы тынгдӕр». Ацы фӕстаг уӕззау бонты нӕ ноджы тынгдӕр хъӕуы иумӕ ӕмбӕлын ӕмӕ кӕрӕдзийы ныфсыл ныфс ӕфтауын, цӕмӕй нӕ уырнындзинад фидар уа ӕмӕ Хуыцауыл иузӕрдион уӕм (Ром. 1:11, 12). Нӕ алыварс адӕм сты хӕлд ӕмӕ зыгъуыммӕ зондыл хӕст. Мах та ӕнӕхуыцау хъуыддӕгтӕй ӕмӕ зӕххон монцтӕй дард лидзӕм (Фил. 2:15, 16; Тит. 2:12–14). Уӕдӕ Йегъовӕйы адӕмимӕ куы нӕ уӕм, уӕд ма кӕм хъуамӕ уӕм? (Пс. 84:10). Стӕй нын Хуыцауы Ныхас иртасынӕй ӕмӕ йыл ныхас кӕнынӕй хуыздӕр цы хъуамӕ уа? Уӕдӕ аныхас кӕнӕм, нӕ пайдайӕн арӕзт чи ӕрцыд, уыцы фембӕлдтыл.
УЛӔФГӔ БОНТЫ ЦЫ ФЕМБӔЛД ВӔЙЙЫ, УЫЙ
5 Улӕфгӕ бонты нын цы фембӕлд вӕййы, уымӕн йӕ фыццаг хайы вӕййы Библийыл арӕзт раныхас. Ацы раныхас афтӕ бацӕттӕ кӕнынц, цӕмӕй-иу пайда ӕрхӕсса алыхуызон адӕмӕн, зӕгъӕм, ӕмбырдмӕ фыццаг хатт чи ӕрбацыд, уыдонӕн дӕр. Ӕмбырдмӕ ӕрӕджы чи райдыдта цӕуын, уыдонӕн дӕр ӕмӕ хъусынгӕнджытӕн дӕр ӕргом раныхасы фӕрцы сӕ уырнындзинад бафидар вӕййы (Хъуыд. 18:4; 19:9, 10).
6 Йесо Чырысти, стӕй йӕ апостолтӕ ӕмӕ йӕ иннӕ ахуыргӕнинӕгтӕ дӕр раныхӕстӕ дзырдтой, абон Йегъовӕйы Ӕвдисӕнты ӕмбырдты куыд вӕййы, афтӕ. Дзырд дӕр ыл нӕй, зӕххыл Йесойӕ хуыздӕр дзурынмӕ ничи арӕхст. Йесойы тыххӕй Библийы фыст ис: «Уыцы адӕймаг куыд дзуры, афтӕ никуы ничи дзырдта» (Иоан. 7:46). Йӕ ныхасмӕхъусджытӕ-иу дисӕй мардысты, куыд барджын ныхас кодта, ууыл (Матф. 7:28, 29). Йӕ ныхӕстӕ-иу ын йӕ зӕрдӕмӕ чи айста, уыдон-иу арфӕгонд ӕрцыдысты (Матф. 13:16, 17). Ӕмӕ апостолтӕ дӕр сӕ Ахуыргӕнӕджы фӕзмыдтой. Хъуыддӕгты 2:14–36 фыст ис, н. э. 33 азы Фӕндзайӕм боны Петр адӕмы раз цы диссаджы раныхасимӕ рацыд, уый. Йӕ ныхасы ахӕм тых уыд, ӕмӕ цалдӕр мин адӕймаджы бафӕндыд бӕлвырд къахдзӕфтӕ скӕнын. Фӕстӕдӕр та Павел Афинты адӕмы раз ныхасы рацыд, ӕмӕ йӕм чи хъуыста, уыдонӕй чидӕртӕ уырнджытӕ систы (Хъуыд. 17:22–34).
7 Раст афтӕ абон дӕр милуангай адӕмӕн пайда хӕссынц, алы къуыри дӕр ӕмбырдты, стӕй конгрессты цы ӕргом раныхӕстӕ вӕййы, уыдон дӕр. Уыцы раныхӕстӕ нын ӕххуыс кӕнынц, цӕмӕй Библийы ахуырӕдтыл фидар хӕцӕм ӕмӕ Хуыцауӕн дарддӕр дӕр зынгзӕрдӕйӕ лӕггад кӕнӕм. Фылдӕр базонын кӕй фӕнды, уыдоны дӕр ӕмӕ иннӕты дӕр раныхӕстӕм куы хонӕм, уӕд нын афтӕмӕй бирӕ ӕнтысдзӕн адӕмы Библийы сӕйраг ахуырӕдтимӕ зонгӕ кӕныны хъуыддаджы.
8 Ӕргом раныхӕстӕ вӕййынц алыхуызон темӕтыл. Ныхас фӕцӕуы Библийы ахуырӕдтыл ӕмӕ пехуымпарӕдтыл, стӕй дзы бинонты царды фӕдыл цы уагӕвӕрдтӕ ӕмӕ уынаффӕтӕ ис, ууыл. Дзырд ма дзы фӕцӕуы уаг ӕмӕ ӕгъдауыл ӕмӕ, ӕрыгӕттӕ цы зындзинӕдтыл ӕмбӕлынц, уыдоныл. Иуӕй-иу раныхӕсты дзырд фӕцӕуы, Йегъовӕ цы диссӕгтӕ сфӕлдыста, уыдӕттыл. Раныхӕсты ма хъусджыты ’ргом раздахынц, Хуыцауы рагон лӕггадгӕнджытӕ нын сӕ уырнындзинадӕй, сӕ хъӕбатырдзинадӕй ӕмӕ сӕ иузӕрдиондзинадӕй фӕзминаг куыд сты, уымӕ.
9 Цӕмӕй нын ӕргом раныхас фылдӕр пайда ӕрхӕсса, уый тыххӕй-иу лӕмбынӕг хъусӕм ӕмӕ, ӕфсымӕр Библийӕ цы стихтӕ кӕса ӕмӕ ӕмбарын кӕна, уыдон-иу мах дӕр нӕ Библийы ссарӕм (Лук. 8:18). Афтӕмӕй-иу нӕхицӕн сбӕлвырд кӕндзыстӕм, цы дзуры, уый раст кӕй у. Уый фӕрцы, цы базыдтам, ууыл фидар хӕцдзыстӕм ӕмӕ уыцы зонындзинӕдтӕй нӕ царды дӕр пайда кӕндзыстӕм (1 Фес. 5:21).
10 Кӕд, раныхӕстимӕ чи рацӕуа, ахӕм ӕфсымӕртӕ фаг ис, уӕд ӕмбырды ӕргом раныхас вӕййы алы къуыри дӕр. Уый тыххӕй арӕх фӕхонынц ӕфсымӕрты сыхаг ӕмбырдтӕй. Ахӕм ӕфсымӕртӕ куы нӕ фӕфаг кӕны, уӕд та раныхӕстӕ вӕййы, уавӕртӕ куыд фӕамонынц, уымӕ гӕсгӕ.
11 Улӕфгӕ бонты нын цы фембӕлд вӕййы, уымӕн йӕ дыккаг хайы вӕййы «Хъахъхъӕнӕн мӕсыджы» ахуыр. Ахуыргӕнӕн статьятӕ ӕвзӕрст фӕцӕуынц фарстатӕ ӕмӕ дзуаппытӕм гӕсгӕ. Журнал «Хъахъхъӕнӕн мӕсыджы» фӕрцы нын Йегъовӕ йӕ афоныл дӕтты уырнындзинад фидаргӕнӕн хӕринаг.
12 Ахуыргӕнӕн статьяты арӕх дзырд фӕцӕуы, Библийы уагӕвӕрдтӕй царды куыд ис пайда кӕнӕн, ууыл. Уыцы статьятӕ чырыстӕтты уырнындзинад фидар кӕнынц, ӕмӕ сын уый фӕрцы ӕнцондӕр у сӕхи «ацы дунейы зондӕй» ӕмӕ ӕнӕгъдау митӕй хизын (1 Кор. 2:12). «Хъахъхъӕнӕн мӕсыджы» фӕрцы ма хуыздӕр бамбарӕм Библийы ахуырӕдтӕ ӕмӕ пехуымпарӕдтӕ дӕр. Ӕмӕ нын уый ӕххуыс кӕны, цӕмӕй, Йегъовӕ йӕ организацийы уылты рӕстдзинад куыд ӕмбарын кӕны, уымӕй фӕстейӕ ма баззайӕм ӕмӕ рӕстгӕнджыты фӕндагӕй ма ахауӕм (Пс. 97:11; Ӕмб. 4:18). Ацы фембӕлдмӕ кӕй ӕрбацӕуӕм ӕмӕ дзы кӕй фӕархайӕм, уый фӕрцы нын Йегъовӕйы рӕстаг ног дунейы цӕрыны ныфс у цины хос (Ром. 12:12; 2 Пет. 3:13). Статья кӕй февзарӕм, уый нын ӕххуыс кӕны нӕ удыхъӕды сыгъдӕг тыхы дыргъ фидар кӕнынӕн, стӕй нӕ ноджы тынгдӕр бафӕнды Йегъовӕйӕн зынгзӕрдӕйӕ лӕггад кӕнын (Гал. 5:22, 23). Ӕппӕт уыдӕтты фӕрцы нӕ бон у фӕлварӕнты фидар фӕлӕууын. Стӕй афтӕмӕй аразӕм «фидӕнӕн хорз бындур, цӕмӕй фидар ныххӕцӕм ӕцӕг цардыл» (1 Тим. 6:19; 1 Пет. 1:6, 7).
13 Ацы фембӕлд нын фылдӕр пайда кӕд хӕсдзӕн? Алы къуыри дӕр-иу статья хӕдзары нӕхӕдӕг кӕнӕ нӕ бинонтимӕ куы бацӕттӕ кӕнӕм, цы стихтӕ дзы ис, уыдонмӕ-иу куы ’ркӕсӕм ӕмӕ-иу стӕй ӕмбырды нӕхи ныхӕстӕй дзуапп куы раттӕм. Афтӕмӕй рӕстдзинад нӕ зӕрдӕты арф уидӕгтӕ ауадздзӕн. Нӕ уырнындзинады тыххӕй ӕргом кӕй дзурӕм, уый фӕрцы-иу иннӕты дӕр бафидар кӕндзыстӕм. Ӕмӕ-иу нӕхӕдӕг дӕр иннӕты дзуаппытӕм лӕмбынӕг куы хъусӕм, уӕд-иу нын уый фӕрцы дӕр статья ноджы фылдӕр пайда ӕрхӕсдзӕн.
КЪУЫРИЙЫ АСТӔУ ЦЫ ФЕМБӔЛД ВӔЙЙЫ, УЫЙ
14 Алы къуыри дӕр Паддзахады залмӕ ӕрбацӕуӕм, «Нӕ чырыстон цард ӕмӕ нӕ лӕггад» чи хуыйны, уыцы фембӕлдмӕ. Ацы фембӕлд конд у ӕртӕ хайӕ, ӕмӕ нын ӕххуыс кӕны, цӕмӕй Хуыцауы лӕггадгӕнджытӕн «бӕззӕм» (2 Кор. 3:5, 6). Фембӕлды ӕвзӕрст кӕд цы цӕудзӕн, уый алы мӕй дӕр мыхуыргонд вӕййы «Нӕ цард ӕмӕ нӕ лӕггад»-ы кусӕн тетрады. Уымӕй уӕлдай ма дзы вӕййы, уацамынды ныхас райдайӕн куыд ис, уый дӕр.
15 Фембӕлды фыццаг хай хуыйны «Хуыцауы Ныхасы хӕзнатӕ», ӕмӕ нын ӕххуыс кӕны, Библийы хабӕрттӕ цы уавӕрты фыст ӕрцыдысты, сӕ контекст цавӕр у ӕмӕ сӕ нӕ цардмӕ куыд ис ахӕссӕн, уыдӕттӕ хуыздӕр базонынӕн. Фембӕлды вӕййы раныхас, бакӕсынц дзы Библийӕ скъуыддзаг ӕмӕ, къуырийы дӕргъы Библийӕ цы сӕртӕ кастыстӕм, уыдоныл иумӕ аныхас кӕнӕм. Цӕмӕй нын уыцы хабӕрттӕ иннӕтӕн ӕмбарын кӕнын ӕнцондӕр уа, уый тыххӕй ма «Нӕ цард ӕмӕ нӕ лӕггад»-ы вӕййы алыхуызон цӕстуынгӕ ӕрмӕг ӕмӕ схемӕтӕ дӕр. Библи афтӕ арф кӕй иртасӕм, уый нӕхицӕн дӕр царды стыр пайда хӕссы ӕмӕ нын стыр ӕххуыс у иннӕты ахуыр кӕнынӕн дӕр, цӕмӕй «алцыдӕр хорз зонӕм ӕмӕ алы хорз хъуыддагмӕ дӕр алцӕмӕй дӕр цӕттӕ уӕм» (2 Тим. 3:16, 17).
16 Фембӕлды дыккаг хай та хуыйны «Арӕхстджындӕрӕй хъусын кӕн», ӕмӕ дзы алкӕмӕн дӕр фадат вӕййы, куыд хъусын кӕндзӕн, уый афӕлварынӕн. Ӕмӕ уый фӕрцы нӕ бон у арӕхстджындӕрӕй хъусын кӕнын ӕмӕ иннӕты ахуыр кӕнын. Хъусынгӕнджытӕн дзы вӕййы хӕслӕвӕрдтӕ. Стӕй ма дзы ӕвзӕрст фӕцӕуынц видеороликтӕ, уацамынды куыд ис аныхас кӕнӕн, уый фӕдыл. Фембӕлды ацы хай нын ӕххуыс кӕны, цӕмӕй нын уа «ахуыргӕнинӕгты ӕвзаг» ӕмӕ «зонӕм, фӕллад адӕймаджы ныхасӕй куыд барӕвдауӕм, уый» (Ис. 50:4).
17 Ӕртыккаг хайы та, «Нӕ чырыстон цард», зӕгъгӕ, дзырд фӕцӕуы, Библийы уагӕвӕрдтӕй царды куыд ис пайда кӕнӕн, ууыл (Пс. 119:105). Ацы хайы фылдӕр рӕстӕг ахсы Библийы ахуыр ӕмбырдимӕ. «Хъахъхъӕнӕн мӕсыджы» рӕстӕг куыд вӕййы, афтӕ ам дӕр ӕрмӕг февзарынц фарстатӕ ӕмӕ дзуаппытӕм гӕсгӕ.
18 Алы мӕй дӕр «Нӕ цард ӕмӕ нӕ лӕггад»-ы ног номыр куы рацӕуы, уӕд хистӕр нӕлгоймӕгты советы координатор кӕнӕ йын чи феххуыс кӕны, ӕндӕр ахӕм хистӕр нӕлгоймаг программӕмӕ лӕмбынӕг ӕркӕсы ӕмӕ ӕфсымӕртӕн сӕ хӕслӕвӕрдтӕ спълан кӕны. Алы къуыри дӕр фембӕлды сӕрдариуӕггӕнӕг вӕййы, иннӕты ахуыр кӕнынмӕ хорз чи арӕхсы ӕмӕ хистӕр нӕлгоймӕгты совет кӕй равзары, ахӕм хистӕр нӕлгоймаг. Уый йӕ хъус фӕдары, цӕмӕй фембӕлд афоныл райдайа ӕмӕ фӕуа. Стӕй, хӕслӕвӕрдтӕ кӕмӕн вӕййы, уыцы ахуыргӕнинӕгтӕй раппӕлы ӕмӕ сын уынаффӕтӕ ратты.
19 Ацы фембӕлдмӕ алы къуыри дӕр кӕй цӕуӕм, нӕхи йӕм кӕй цӕттӕ кӕнӕм ӕмӕ дзы кӕй архайӕм, уый фӕрцы фылдӕр цыдӕртӕ базонӕм Хуыцауы Ныхасӕй ӕмӕ хуыздӕр ӕмбарӕм, цы уагӕвӕрдтӕ дзы ис, уыдон, стӕй хорз хабар ноджы ныфсджындӕрӕй хъусын кӕнӕм ӕмӕ хуыздӕр арӕхсӕм ахуыргӕнинӕгтӕ цӕттӕ кӕнынмӕ. Фембӕлдмӕ чи ӕрбацӕуы, фӕлӕ донаргъуыд чи нӕма райста, уыдон дӕр сӕхиуыл банкъарынц хотӕ ӕмӕ ӕфсымӕрты уарзондзинад ӕмӕ дзы цы фехъусынц, уый фӕрцы сӕ уырнындзинад бафидар вӕййы. Ацы фембӕлдмӕ ӕмӕ иннӕ фембӕлдтӕм цӕттӕ кӕнгӕйӕ пайда кӕнӕн ис алыхуызон библиотекӕтӕй (Watchtower Library, JW Library®, «Хъахъхъӕнӕн мӕсыджы онлайн-библиотекӕ»), кӕд уе ’взагыл сты, уӕд, ӕмӕ, Паддзахады залы цы библиотекӕ ис, уымӕй. Паддзахады залы библиотекӕйы вӕййы Йегъовӕйы Ӕвдисӕнты уагъд публикацитӕ, «Индекс публикаций Сторожевой Башни» кӕнӕ «Йегъовӕйы Ӕвдисӕнтӕн ӕрмӕг агурынӕн ӕххуыс», стӕй Библийы алыхуызон тӕлмацтӕ, индекстӕ, дзырдуӕттӕ ӕмӕ ӕндӕр энциклопедитӕ. Ацы библиотекӕйӕ алкӕмӕн дӕр йӕ бон пайда кӕнын у кӕнӕ фембӕлдты размӕ, кӕнӕ фембӕлдты фӕстӕ.
УАЦАМЫНДОН ФЕМБӔЛДТӔ
20 Къорд иумӕ ӕрӕмбырд вӕййы цыбыр уацамындон фембӕлды кусгӕ бонты дӕр ӕмӕ улӕфты бонты дӕр. Ацы фембӕлдтӕ фӕцӕуынц хъусынгӕнджытӕй искӕмӕ хӕдзары кӕнӕ ӕндӕр ран. Ауадзӕн ма сӕ вӕййы Паддзахады залы дӕр. Хъусынгӕнджытӕ ӕмбырды территорийы алы рӕтты гыццыл къордтӕй кӕй фембырд кӕнынц, уый фӕрцы сын ӕнцондӕр вӕййы уацамындон фембӕлдмӕ дӕр ӕмӕ участокмӕ дӕр ацӕуын. Стӕй, чи кӕимӕ ӕмӕ кӕдӕм ацӕудзӕн, уый дӕр тагъддӕр вӕййы спълан кӕнӕн ӕмӕ ӕнцондӕр вӕййы уайтагъд хъусын кӕнынмӕ ацӕуын. Уый фӕрцы ма къорды цӕстдарӕгӕн йӕ бон вӕййы, йӕ къорды чи ис, уыдоныл тыхсын. Къордтӕн уацамындон фембӕлдтӕ алы рӕтты кӕй вӕййы, уый хорз бирӕ цӕмӕйдӕрты у, фӕлӕ иуӕй-иу хатт уавӕртӕ фӕдомынц, цӕмӕй цалдӕр къорды иумӕ ӕмбырд кӕной. Зӕгъӕм, кусгӕ бонты уацамынды чи цӕуа, уыцы хъусынгӕнджытӕ бирӕ куы нӕ уой, уӕд хуыздӕр уаид къордтӕ баиу кӕнын кӕнӕ та къордтӕн се ’ппӕтӕн дӕр фембӕлд иумӕ Паддзахады залы кӕнӕ ӕндӕр искуы ауадзын. Уӕд хъусынгӕнджытӕй алкӕмӕн дӕр, кӕимӕ хъусын кӕна, уый уыдзӕн. Чи зоны ма уацамындон фембӕлдтӕ Паддзахады залы ауадзын хуыздӕр уа алыхуызон бӕрӕгбӕтты рӕстӕг дӕр. Йе та ӕнӕхъӕн ӕмбырдӕн дӕр иумӕйаг уацамындон фембӕлд скӕнӕн ис «Хъахъхъӕнӕн мӕсыджы» ахуыры фӕстӕ.
21 Къордтӕ хицӕнтӕй куы фембырд кӕнынц, уӕд уацамындон фембӕлдтӕ фӕуадзы къорды цӕстдарӕг. Иуӕй-иу хатт фембӕлд ауадзын бахӕс кӕны йе ’ххуысгӕнӕгӕн кӕнӕ ӕндӕр фӕзминаг ӕфсымӕрӕн. Чи йӕ уадза, уый хъуамӕ бацӕттӕ кӕна ӕмӕ аныхас кӕна, уацамынды хорз чи уыдзӕн, ахӕм хъуыдыйыл. Стӕй, чи кӕимӕ ацӕудзӕн, уый спълан кӕндзӕн, ӕмӕ сӕ исчи Хуыцаумӕ скувдзӕн. Ӕмӕ фембӕлды хӕдфӕстӕ къорд хъусын кӕнынмӕ ацӕудзӕн. Уацамындон фембӕлд хъуамӕ 5–7 минутӕй фылдӕр ма уа, ӕмбырды фӕстӕ куы уа, уӕд та – ноджы къаддӕр. Фембӕлд хъуамӕ, уацамынды чи цӕуы, уыдонӕн сӕ ныфсыл ныфс бафтауа ӕмӕ дзы хорз амындтӕ ӕмӕ уынаффӕтӕ фехъусой. Ногтӕн ӕмӕ, ӕххуыс кӕй хъӕуы, ахӕм хъусынгӕнджытӕн хорз уыдзӕн, фӕлтӕрд хъусынгӕнджытимӕ куы хъусын кӕной, цӕмӕй ахуыр кӕной.
ФЕМБӔЛДТӔ НОГ КӔНӔ ГЫЦЦЫЛ ӔМБЫРДТЫ
22 Ахуыргӕнинӕгты нымӕц куыд фылдӕр кӕны, афтӕ фылдӕр кӕнынц ӕмбырдтӕ дӕр. Ног ӕмбырд скӕныны тыххӕй курдиат бахӕссы районон цӕстдарӕг. Фӕлӕ иуӕй-иу уавӕрты гыццыл къордтӕн хуыздӕр вӕййы, хӕстӕгдӕр сӕм цы ӕмбырд ис, уырдӕм цӕуын.
23 Хатгай гыццыл ӕмбырдты вӕййы ӕрмӕстдӕр хотӕ. Уӕд хъуамӕ, ӕмбырды чи кува кӕнӕ фембӕлдтӕ чи уадза, уыцы хо йӕ сӕр бамбӕрза, Хуыцауы Ныхасы цы ӕгъдау ӕрцыд фидаргонд, уымӕ гӕсгӕ (1 Кор. 11:3–16). Арӕхдӕр хо фембӕлд фӕуадзы, ӕмбырдмӕ чи ӕрбацыд, уыдонӕн сӕ разы фӕбады, афтӕмӕй. Хотӕ ӕмбырды раныхӕстӕ нӕ фӕдзурынц. Нӕ организацийы лӕвӕрд ӕрмӕг ӕнӕуи бакӕсынц ӕмӕ уый фӕдыл сӕ хъуыдытӕ фӕзӕгъынц. Хатт та ӕрмӕг равзарынц фарстатӕ ӕмӕ дзуаппыты хуызы кӕнӕ равдыстыты хуызы. Филиал хотӕй сӕ иуӕн бахӕс кӕндзӕн, цӕмӕй фембӕлдтӕ уадза ӕмӕ, ӕмбырдимӕ баст хъуыддӕгты фӕдыл филиалмӕ цыдӕриддӕр фыссын хъӕуы, уый фысса. Уыцы хӕстӕ ӕххӕст кӕнын кӕй бон у, ахӕм ӕфсымӕртӕ куы фӕзына, уӕд сӕ уыдонӕн бабар кӕндзысты.
РАЙОНОН КОНГРЕССТӔ
24 Иу районы цы ӕмбырдтӕ ис, уыдонӕн афӕдз дыууӕ хатты вӕййы иубонон районон конгресстӕ. Уырдӕм чи ӕрбацӕуы, уыдон се ’ппӕт дӕр тынг фӕцин кӕнынц, уымӕн ӕмӕ сын фадат фӕзыны хотӕ ӕмӕ ӕфсымӕртӕн «сӕ зӕрдӕтӕ уӕрӕх байгом кӕнынӕн» (2 Кор. 6:11–13). Йегъовӕйы организаци Библийыл арӕзт темӕтӕ ӕмӕ программӕйы алыхуызон хӕйттӕ бацӕттӕ кӕны, тынгдӕр хъус ӕрдарын цӕмӕ хъӕуы, уымӕ гӕсгӕ. Вӕййы дзы раныхӕстӕ, равдыстытӕ, инсценировкӕтӕ, монологтӕ ӕмӕ интервьютӕ. Ахӕм программӕ алы хатт дӕр вӕййы йӕ афоныл ӕмӕ се ’ппӕты дӕр тынг бафидар кӕны. Стӕй ма дзы ног хъусынгӕнджытӕ донаргъуыд дӕр райсынц ӕмӕ афтӕмӕй равдисынц, сӕхи Йегъовӕйӕн кӕй снывонд кодтой, уый.
РЕГИОНАЛОН КОНГРЕССТӔ
25 Афӕдз ма иу хатт вӕййы стырдӕр конгресстӕ дӕр. Уыдон сты регионалон конгресстӕ ӕмӕ вӕййынц ӕртӕ боны. Иумӕ ӕрӕмбырд вӕййынц цалдӕр районы ӕмбырдтӕ. Филиал дзуапп цы ӕмбырдтӕн дӕтты, уыдон бирӕ куы нӕ уой, уӕд, чи зоны, филиал аскъуыддзаг кӕна, хуыздӕр кӕй уыдзӕн, цӕмӕй иууылдӕр иу конгресмӕ ӕрӕмбырд уой. Иуӕй-иу бӕстӕты конгресстӕ фӕуадзынц бынӕттон уавӕртӕм гӕсгӕ кӕнӕ нӕ организацийӕ цы разамынд райсынц, уымӕ гӕсгӕ. Рӕстӕгӕй-рӕстӕгмӕ иуӕй-иу бӕстӕты скӕнынц ӕхсӕнадӕмон кӕнӕ сӕрмагонд конгресстӕ дӕр ӕмӕ уырдӕм алы бӕстӕтӕй фӕхонынц Йегъовӕйы Ӕвдисӕнтӕй дӕсгай минты. Йегъовӕйы Ӕвдисӕнтӕн ахӕм стыр фембӕлдтӕ кӕй вӕййы, уый адӕм ӕнӕбафиппайгӕ нӕ фӕвӕййынц, ӕмӕ уый фӕрцы бирӕтӕ фехъусынц Хуыцауы Паддзахады тыххӕй.
26 Конгресстӕ Йегъовӕйы адӕмӕн сты стыр цины бӕрӕгбӕттӕ – уым иумӕ фӕкувынц сӕ Хуыцауӕн. Ахӕм конгрессты нын раргом кӕнынц, рӕстдзинад бӕлвырдӕй-бӕлвырддӕр куыд кӕны, уый. Хатгай регионалон конгрессты фехъусын кӕнынц, кӕй рацыд ног публикаци, цӕмӕй йӕ нӕхӕдӕг дӕр ӕмӕ ӕмбырды дӕр ахуыр кӕнӕм кӕнӕ та дзы уацамынды пайда кӕнӕм. Регионалон конгрессты райсынц донаргъуыд дӕр. Уыцы конгресстӕ стыр ахъаз сты Хуыцауы лӕггадгӕнджыты уырнындзинад фидар кӕнынӕн. Стӕй ахӕм конгрессты ирдӕй зыны, Йегъовӕйы адӕм ӕнӕхъӕн дунейы дӕр иу бинонтау кӕй цӕрынц ӕмӕ се ’хсӕн кӕй ис ӕцӕг уарзондзинад – Йесо Чырыстийы ахуыргӕнинӕгты цы миниуӕгӕй ис базонӕн, уый (Иоан. 13:35).
27 Ӕмбырдтӕм ӕмӕ конгресстӕм кӕй цӕуӕм, уый фӕрцы нӕ хъарутыл хъарутӕ бафты ӕмӕ нӕ ноджы тынгдӕр фӕфӕнды Йегъовӕйы фӕндон ӕххӕст кӕнын. Стӕй уый фӕрцы ацы дунейы зондахастӕн нӕ уырнындзинад фӕцудын кӕныны бар нӕ дӕттӕм. Ахӕм фембӕлдтӕ стыр кад хӕссынц Йегъовӕйӕн (Пс. 35:18; Ӕмб. 14:28). Ацы фӕстаг бонты Йегъовӕ йӕ иузӕрдион лӕггадгӕнджытӕн ахӕм диссаджы куывдтӕ кӕй скӕны ӕмӕ сын сӕ ныфсыл ныфс кӕй бафтауы, уый тыххӕй дзы бузныг куыннӕ хъуамӕ уӕм!
ЧЫРЫСТИЙЫ МӔЛӔТ ӔРЫМЫСӔН ИЗӔР
28 Афӕдз иу хатт ӕгас дунейы дӕр Йегъовӕйы Ӕвдисӕнты ӕппӕт ӕмбырдты дӕр фӕбӕрӕг кӕнынц Чырыстийы мӕлӕт Ӕрымысӕн изӕр, кӕнӕ Хицауы ӕхсӕвӕр (1 Кор. 11:20, 23, 24). Йегъовӕйы адӕмӕн афӕдзы мидӕг уымӕй ахсджиагдӕр фембӕлд нӕ вӕййы. Йесо нын йӕхӕдӕг ныффӕдзӕхста, цӕмӕй-иу ын йӕ мӕлӕт ӕрымысӕм (Лук. 22:19).
29 Ӕрымысӕн изӕр вӕййы, дзуттӕгты Куадзӕн цы бонмӕ хауы, уыцы бон, ӕмӕ уый тыххӕй бӕлвырд амындтӕ лӕвӕрд ӕрцыд Библийы (Рац. 12:2, 6; Матф. 26:17, 20, 26). Дзуттӕгтӕ Куадзӕн бӕрӕг кодтой алы аз дӕр, цӕмӕй-иу сӕ зӕрдыл ӕрлӕууын кодтаиккой, н. э. размӕ 1513 азы Египетӕй кӕй рацыдысты, уый. Уыцы рӕстӕг сын Йегъовӕ загъта, фыццаг мӕйы (мӕйы змӕлдмӕ гӕсгӕ нымайгӕйӕ) 14-ӕм бон Куадзӕны уӕрыкк кӕй хъуамӕ бахордтаиккой ӕмӕ Египетӕй кӕй хъуамӕ рацыдаиккой (Рац. 12:1–51). Ӕрымысӕн изӕры бон куыд сбӕрӕг кӕнынц? Уалдзӕджы ӕхсӕв ӕмӕ бон ӕмиас цы бон свӕййынц, уыцы бонмӕ ӕввахс Иерусалимы сӕрмӕ ног мӕй куы фӕзыны, уыцы изӕрӕй банымайынц 13 боны. Ӕрымысӕн изӕры бон арӕхдӕр ӕрхауы, уалдзӕджы ӕхсӕв ӕмӕ бон ӕмиас куы свӕййынц, уый фӕстӕ мӕй фыццаг хатт цалхыдзаг куы свӕййы, уыцы бонмӕ.
30 Матфейы 26:26–28 фыст сты Йесойы ныхӕстӕ, Ӕрымысӕн изӕр куыд хъӕуы бӕрӕг кӕнын, уый фӕдыл. Уыцы бӕрӕгбоны, бамбарӕн кӕмӕн нӕй, ахӕм сусӕг хабарӕй ницы ис. Йесо Чырыстиимӕ уӕлӕрвты паддзӕхтӕ чи уыдзысты, уыдон дзул ӕмӕ сӕнӕй саходынц. Уыцы дзул ӕмӕ сӕн амонынц бӕлвырд цӕмӕдӕрты (Лук. 22:28–30). Ӕрымысӕн изӕрмӕ ӕрбацӕуынц Чырыстийы иннӕ иузӕрдион фӕдылдзӕуджытӕ се ’ппӕт дӕр, стӕй, фылдӕр базонын кӕй фӕнды, уыцы адӕм дӕр. Ӕмӕ кӕд уыдон дзул ӕмӕ сӕнӕй нӕ саходынц, уӕддӕр, кӕй ӕрбацӕуынц, уымӕй равдисынц, Йегъовӕ адӕмы фервӕзын кӕнынӕн йӕ Фырт Йесо Чырыстийы уылты цы сарӕзта, уый тыххӕй дзы бузныг кӕй сты. Ӕрымысӕн изӕры размӕ ӕмбырдты вӕййы сӕрмагонд раныхас. Уыцы раныхасӕн йӕ нысан вӕййы, цӕмӕй адӕмы бафӕнда Ӕрымысӕн изӕрмӕ ӕрбацӕуын ӕмӕ Библи ахуыр кӕнын райдайын.
31 Иумӕ куы ӕрӕмбырд вӕййӕм, уӕд тынг фӕцин кӕнӕм. Ахӕм фембӕлдты рӕстӕг «кӕрӕдзийыл фӕхъуыды кӕнӕм, цӕмӕй кӕрӕдзийы разӕнгард кӕнӕм уарзондзинадмӕ ӕмӕ хорз хъуыддӕгтӕм» (Дзут. 10:24). Ӕууӕнкджын ӕмӕ нын зондджын цагъар иумӕ фембӕлынӕн алыхуызон фадӕттӕ скӕны, ӕмӕ нын афтӕмӕй нӕ уырнындзинад бафидар кӕны. Библи Йегъовӕйы лӕггадгӕнджыты се ’ппӕты дӕр, стӕй, фылдӕр базонын кӕй фӕнды, уыдоны дӕр разӕнгард кӕны, цӕмӕй алы фембӕлдмӕ дӕр цӕуой ӕмӕ дзы сӕхицӕн фылдӕр пайда исой. Йегъовӕ нын йӕ организацийы уылты цы дӕтты, уымӕн кӕй аргъ кӕнӕм, уый фӕрцы не ’хсӕн ис иудзинад. Ноджы ахсджиагдӕр та уый у, ӕмӕ афтӕмӕй кадджын кӕнӕм Йегъовӕйы (Пс. 111:1).