Уацамындон фембӕлдтӕн сӕ нысан цы у?

1. Уацамындон фембӕлдтӕн сӕ нысан цы у?

¹ Иухатт Йесо йӕ ахуыргӕнинӕгтимӕ, 70 адӕймагимӕ, фембӕлд, цалынмӕ хъусын кӕнынмӕ нӕ ацыдысты, уӕдмӕ (Лук. 10:1–11). Йесо сын сӕ зӕрдыл ӕрлӕууын кодта, иунӕг кӕй нӕ уыдзысты – разамынд сын «хуымы Хицау» Йегъовӕ кӕй дӕтдзӕн,– ӕмӕ сӕ афтӕмӕй бафидар кодта. Стӕй ма сын амындтӕ дӕр радта, цӕмӕй хъусын кӕнынмӕ цӕттӕ уыдаиккой ӕмӕ сӕ «дыгӕйттӕй» арвыста. Абон махӕн дӕр цы уацамындон фембӕлдтӕ вӕййы, уыдонӕн сӕ нысан у, цӕмӕй-иу бафидар уӕм, нӕхи-иу бацӕттӕ кӕнӕм ӕмӕ-иу нӕхицӕн ӕмбал ссарӕм.

2. Уацамындон фембӕлд цас хъуамӕ цӕуа?

² Уацамындон фембӕлдтӕ фӕцӕуынц 10–15 минуты. Ӕфсымӕр фӕзӕгъы, чи кӕимӕ ацӕудзӕн хъусын кӕнынмӕ, уый, хъусынгӕнджытӕн участоктӕ ратты ӕмӕ стӕй ӕфсымӕртӕй исчи скувы. Фӕлӕ ныр уацамындон фембӕлдты иу цыдӕр фӕивдзӕн. Апрелӕй фӕстӕмӕ 5–7 минутӕй фылдӕр нӕ цӕудзысты. Уацамындон фембӕлд ӕмбырды фӕстӕ куы уа, уӕд та ноджы цыбырдӕр хъуамӕ уа, уымӕн ӕмӕ хъусынгӕнджытӕ ӕмбырды ӕнӕуи дӕр Библийыл бӕстон аныхас кӕнынц. Уацамындон фембӕлдтӕ кӕй фӕцыбырдӕр уыдзысты, уый фӕрцы алкӕмӕн дӕр хъусын кӕнынӕн уыдзӕн фылдӕр рӕстӕг. Стӕй, зӕгъӕм, кӕд пионертӕ кӕнӕ иннӕ хъусынгӕнджытӕ уацамындон фембӕлды размӕ райдыдтой хъусын кӕнын, уӕд сӕ сӕ рӕстӕгӕй бирӕ нӕ хъӕудзӕн ратонын.

3. Цы ис саразӕн, цӕмӕй-иу уацамындон фембӕлд хъусынгӕнджытӕн фылдӕр пайда ӕрхӕсса?

³ Ӕфсымӕр-иу уацамындон фембӕлд хъуамӕ афтӕ бацӕттӕ кӕна, цӕмӕй-иу хъусынгӕнджытӕн фылдӕр пайда ӕрхӕсса. Бирӕ ӕмбырдты уацамындон къордтӕ иууылдӕр иу ран нӕ фембырд кӕнынц, фӕлӕ хицӕнтӕй. Уый фӕрцы хъусынгӕнджытӕн ӕнцондӕр вӕййы уацамындон фембӕлдтӕм ӕмӕ сӕ участоктӕм цӕуын. Уацамындон къорды цӕстдарӕгӕн та ӕнцондӕр вӕййы, чи кӕимӕ ацӕудзӕн, уый аскъуыддзаг кӕнын, стӕй алкӕмӕн дӕр хицӕнӕй ӕххуыс кӕнын. Хистӕр нӕлгоймӕгты советӕн йӕ бон у бауынаффӕ кӕнын, хъусынгӕнджытӕ хицӕн къордтӕй ӕмбырд кӕндзысты ӕви иумӕ. Уацамындон фембӕлды кӕрон-иу ӕфсымӕр цалынмӕ цыбыртӕй не скува, уӕдмӕ-иу алчидӕр хъуамӕ зона, кӕм ӕмӕ кӕимӕ хъусын кӕндзӕн, уый.

4. Афтӕ цӕуылнӕ хъуамӕ хъуыды кӕнӕм, ӕмӕ уацамындон фембӕлд иннӕ фембӕлдтау ахсджиаг нӕу?

⁴ Иннӕ фембӕлдтау ацы фембӕлд дӕр у ахсджиаг. Уацамындон фембӕлдтӕ фӕуадзынц, хъусын кӕнынмӕ чи фӕцӕуы, уыдонӕн, ӕмӕ уымӕ гӕсгӕ хотӕ ӕмӕ ӕфсымӕртӕ се ’ппӕт не ’рбацӕуынц. Фӕлӕ сӕм хъуамӕ куыдфӕндыйы цӕстӕй ма кӕсӕм ӕмӕ афтӕ ма хъуыды кӕнӕм, ӕмӕ иннӕ фембӕлдтау ахсджиаг не сты. Уацамындон фембӕлд дӕр нын Йегъовӕ уый тыххӕй радта, цӕмӕй кӕрӕдзийы разӕнгард кӕнӕм уарзондзинадмӕ ӕмӕ хорз хъуыддӕгтӕм (Дзут. 10:24, 25). Уӕдӕ уацамындон фембӕлд чи уадза, уый-иу хъуамӕ йӕхи афтӕ бацӕттӕ кӕна, цӕмӕй-иу, цӕуыл ныхас кӕной, уымӕй Йегъовӕйӕн кад ӕрхӕссой ӕмӕ хъусынгӕнджытӕн стыр ӕххуыс фӕуа. Хъусын кӕнынмӕ цӕуинаг чи уа, уыдон-иу хъуамӕ бацархайой, цӕмӕй-иу уацамындон фембӕлдмӕ, гӕнӕн уӕвгӕйӕ, ӕрбацӕуой.

Уацамындон фембӕлдтӕм хъуамӕ куыдфӕндыйы цӕстӕй ма кӕсӕм ӕмӕ афтӕ ма хъуыды кӕнӕм, ӕмӕ иннӕ фембӕлдтау ахсджиаг не сты

5. а) Уацамындӕн дзуапдӕттӕг цӕстдарӕгӕн йӕ хӕстӕй иу цы у? б) Хо уацамындон фембӕлд куыд хъуамӕ уадза?

⁵ Уацамындон фембӕлд чи уадза, уый йӕхи куыд хъуамӕ бацӕттӕ кӕна. Ӕфсымӕрӕн ӕмбырды исты хӕслӕвӕрд куы вӕййы, уӕд ын ӕй рагацау раттынц, цӕмӕй йӕ хорз бацӕттӕ кӕна. Уацамындон фембӕлдтӕн дӕр сӕ хабар афтӕ у. Кӕй зӕгъын ӕй хъӕуы, уацамындон къордтӕ хицӕнтӕй куы фембӕлынц, уӕд къорды цӕстдарджытӕ сӕхӕдӕг кӕнӕ сӕ бӕсты иннӕ ӕфсымӕртӕ ауадзынц фембӕлд. Фӕлӕ ӕмбырдӕн иумӕйаг уацамындон фембӕлд куы уа, уӕд уацамындӕн дзуапдӕттӕг цӕстдарӕг искӕмӕн бахӕс кӕндзӕн фембӕлд ауадзын. Иуӕй-иу ӕмбырдты уацамындӕн дзуапдӕттӕг цӕстдарджытӕ, уацамындон фембӕлдтӕ чи кӕд уадздзӕн, уыцы график ӕфсымӕртӕн раттынц, йӕ къопи та йын хъусинӕгты фӕйнӕгыл бакӕнынц. Уацамындӕн дзуапдӕттӕг цӕстдарӕг хъуамӕ йӕ зӕрдыл дара, ӕфсымӕр иннӕты ахуыр кӕнынмӕ ӕмӕ хъуыддӕгтӕ пълан кӕнынмӕ хорз арӕхсы ӕви нӕ, уымӕй дӕр аразгӕ кӕй у, фембӕлд иннӕтӕн пайда ӕрхӕсдзӕн ӕви нӕ. Хистӕр нӕлгоймӕгтӕй, кӕстӕриуӕггӕнӕг ӕфсымӕртӕй кӕнӕ ӕндӕр фӕлтӕрд донаргъуыд ӕфсымӕртӕй фембӕлд ауадзын йӕ бон куы никӕмӕн суа, уӕд уацамындӕн дзуапдӕттӕг цӕстдарӕг фембӕлд ауадзын бахӕс кӕндзӕн, хорз чи сарӕхса, ахӕм донаргъуыд хойӕн. (Кӕс статья «Уацамындон фембӕлд хо куы уадза».)

6. Уацамындон фембӕлдтӕ чи фӕуадзы, уыдон сӕхи хорз цӕмӕн хъуамӕ цӕттӕ кӕной?

⁶ Хъусынгӕнджыты скъолайы кӕнӕ нын хъусын кӕныны фембӕлдты хӕслӕвӕрдтӕй искӕцы куы раттынц, уӕд ӕм уӕлӕнгай цӕстӕй нӕ ракӕсӕм ӕмӕ нӕхи хорз бацӕттӕ кӕнӕм. Нӕ фылдӕрӕй афтӕ зӕгъӕн нӕй, ӕмӕ ӕрмӕстдӕр ӕмбырдмӕ цӕугӕйӕ райдайынц хъуыды кӕнын, сценӕйыл цы дзурдзысты, ууыл. Уӕдӕ-иу уацамындон фембӕлд чи уадза, уый дӕр-иу хъуамӕ йӕ хӕстӕм уӕлӕнгай цӕстӕй ма кӕса. Уацамындон фембӕлдтӕ ныр цыбырдӕр кӕй уыдзысты, уымӕ гӕсгӕ ноджы ахсджиагдӕр у хорз цӕттӕ кӕнын, цӕмӕй-иу фембӕлд алкӕмӕн дӕр пайда ӕрхӕсса ӕмӕ-иу афоныл фӕуа. Ӕфсымӕр ма хорз цӕттӕ уыдзӕн, рагацау участоктӕ куы райса ӕмӕ сӕ уацамындон фембӕлдмӕ куы ’рбахӕсса.

7. Уацамындон фембӕлды цӕуыл ис аныхас кӕнӕн?

⁷ Цӕуыл ис аныхас кӕнӕн. Алыхуызон территориты алыхуызон уавӕртӕ кӕй ис, уымӕ гӕсгӕ «ӕууӕнкджын ӕмӕ зондджын цагъар» бӕлвырд разамынд нӕ дӕтты, уацамындон фембӕлдты цӕуыл хъуамӕ ныхас кӕнӕм, уый фӕдыл. Рамкӕйы «Уацамындон фембӕлды цӕуыл ис аныхас кӕнӕн» ис цалдӕр уынаффӕйы. Хатт-иу уацамындон фембӕлдмӕ бацӕттӕ кӕнӕн уыдзӕн равдыст кӕнӕ та уыдзӕн, нӕ сайты чи ис ӕмӕ уацамындмӕ чи хауы, уыцы видеороликтӕй искӕцымӕ бакӕсӕн. Уацамындон фембӕлд чи уадза, уый йӕхи куы цӕттӕ кӕна, уӕд-иу хъуамӕ ахъуыды кӕна, хъусынгӕнджыты цӕмӕй ис бафидар кӕнӕн ӕмӕ сӕ куыд ис хорз бацӕттӕ кӕнӕн, ууыл.

Уацамындон фембӕлд чи уадза, уый йӕхи куы цӕттӕ кӕна, уӕд-иу хъуамӕ ахъуыды кӕна, хъусынгӕнджыты цӕмӕй ис бафидар кӕнӕн ӕмӕ сӕ куыд ис хорз бацӕттӕ кӕнӕн

8. Сабат ӕмӕ хуыцаубоны уацамындон фембӕлды хуыздӕр цӕуыл уаид аныхас кӕнын?

⁸ Сабатбонты хъусынгӕнджытӕн сӕ фылдӕр фӕпарахат кӕнынц брошюрӕтӕ. Бирӕтӕ сӕ къуырийы дӕргъы нӕ фӕхъусын кӕнынц, ӕмӕ сын, чи зоны, зын вӕййы ӕрхъуыды кӕнын, ныхас райдайӕн куыд ис, уый бинонты ахуыры рӕстӕг куыд фӕлвӕрдтой, уый. Ӕмӕ уымӕ гӕсгӕ, хъусынгӕнджытӕн стыр ӕххуыс фӕуыдзӕн, уацамындон фембӕлд чи уадза, уый сын сӕ зӕрдыл куы ’рлӕууын кӕна, «Нӕ хъусын кӕныны хъуыддаджы» фӕстаг фарсыл цы цӕвиттонтӕ вӕййы, уыдонӕй искӕцы. Кӕнӕ та кӕд сӕ территорийы исты хабар ӕрцыд, науӕд дзы исты бӕрӕгбон ис, уӕд йӕ бон у аныхас кӕнын, уый фӕрцы ныхас райдайӕн ӕмӕ адӕймагӕн брошюрӕ раттӕн куыд ис. Кӕнӕ та йӕ бон у аныхас кӕнын, адӕймаг брошюрӕ куы райса, уӕд ын цы зӕгъӕн ис, цӕмӕй та йӕм иннӕ хатт дӕр ӕрбацӕуӕм. Кӕд хъусынгӕнджытӕй исчи уый размӕ уыцы мӕйы брошюрӕтӕ парахат кодта, уӕд, уацамындон фембӕлд чи уадза, уымӕн йӕ бон у зӕгъын, цӕмӕй исты хорз хъуыдытӕ кӕнӕ цымыдисаг цаутӕ радзурой. Уацамындон фембӕлд хуыцаубоны куы уа, уӕд уым дӕр афтӕ аныхас кӕнӕн уыдзӕн, уыцы мӕй цы публикацитӕ парахат кӕндзыстӕм, уыдоныл. Библи ахуыргӕнӕн публикацитӕ нӕ бон дӕттын у кӕцыфӕнды бон, ӕмӕ уымӕ гӕсгӕ ӕфсымӕр аныхас кӕндзӕн, куыд сӕ ис раттӕн, ууыл дӕр.

9. Кӕд ӕмбырд улӕфгӕ бонты зиуы архайа, уӕд уацамындон фембӕлды цӕуыл уыдзӕн аныхас кӕнӕн?

⁹ Кӕд ӕмбырд улӕфгӕ бонты зиуы архайа, уӕд, уацамындон фембӕлд чи уадза, уымӕн йӕ бон уыдзӕн аныхас кӕнын, уыцы мӕй кӕй парахат кӕндзыстӕм, уыцы брошюрӕ хуынды гӕххӕттимӕ кӕнӕ буклетимӕ куыд ис раттӕн, ууыл. Кӕнӕ та йӕ бон уыдзӕн аныхас кӕнын, адӕймаджы фылдӕр базонӕн куы бафӕнда, уӕд дарддӕр куыд хъӕуы архайын, ууыл. Кӕнӕ та хъусынгӕнджытӕн сӕ бон уыдзӕн цымыдисаг цаутӕ радзурын, ахӕм зиуы архайын куыд ахсджиаг у, уый равдисынӕн.

10, 11. Цӕмӕй уацамындон фембӕлдтӕ се ’ппӕтӕн дӕр пайда хӕссой, уый тыххӕй хъусынгӕнджытӕ сӕхи цӕмӕн хъуамӕ цӕттӕ кӕной?

¹⁰ Хъусынгӕнджытӕ сӕхи куыд хъуамӕ бацӕттӕ кӕной. Уацамындон фембӕлд хорз ацӕудзӕн ӕви нӕ, уый хъусынгӕнджытӕй дӕр у кӕнгӕ. Уацамындмӕ сӕхи рагацау куы цӕттӕ кӕной, зӕгъӕм, бинонты ахуыры рӕстӕг, уӕд сӕ бон уыдзӕн иннӕ хъусынгӕнджытӕн исты хорз хъуыдытӕ радзурын. Хъусынгӕнджытӕ ма хорз цӕттӕ уыдзысты, уыцы мӕйы брошюрӕтӕ ӕмӕ-иу ӕндӕр литературӕ рагацау куы райсой, цӕмӕй-иу уацамындон фембӕлды хӕдфӕстӕ сӕ участоктӕм ацӕуой.

¹¹ Ахсджиаг ма у, цӕмӕй-иу уацамындон фембӕлдмӕ гыццыл раздӕр ӕрбацӕуӕм. Кӕй зӕгъын ӕй хъӕуы, мах фӕархайӕм, цӕмӕй-иу ӕмбырдтӕм ма ӕрӕджы кӕнӕм. Фӕлӕ уацамындон фембӕлдтӕм куы ӕрӕджы кӕнӕм, уӕд уый иннӕты ноджы тынгдӕр къуылымпы кӕндзӕн. Цымӕ куыд? Ӕфсымӕр, хъусын кӕнынмӕ чи кӕимӕ ацӕудзӕн, уый аскъуыддзаг кӕныны размӕ ахъуыды кӕны цалдӕр хъуыддагыл. Кӕд хъусынгӕнджытӕ бирӕ не сты, уӕд сӕ, чи зоны, арвита, уый размӕ кӕм хъусын кодтой, ахӕм участокмӕ. Йӕ участок дард кӕмӕн у, уыдоны, чи зоны, арвита, машинӕ кӕмӕ ис, уыцы хъусынгӕнджытимӕ. Кӕд участок, фыдракӕндтӕ арӕх кӕм ӕрцӕуы, ахӕм районы ис, уӕд уырдӕм, чи зоны, ӕфсымӕрты снысан кӕна, цӕмӕй хотимӕ иумӕ кӕнӕ та, хотӕ кӕм хъусын кӕндзысты, уырдӕм хӕстӕг хъусын кӕной. Йе ’нӕниздзинад бынтон хорз кӕмӕн нӕу, уыдоны, чи зоны, арвита, хорз фӕндӕгтӕ кӕм ис кӕнӕ, хи хӕдзӕрттӕ кӕм ис, ахӕм уынгты хъусын кӕнынмӕ. Ног хъусынгӕнджыты, чи зоны, арвита, фӕлтӕрдджындӕр чи у, ахӕм хъусынгӕнджытимӕ. Фӕлӕ-иу хъусынгӕнджытӕ уацамындон фембӕлдмӕ куы байрӕджы кӕной, уӕд-иу ӕй бахъӕудзӕн алцыдӕр ногӕй пълан кӕнын, цӕмӕй-иу уыдонӕн дӕр ӕмбал ссара. Кӕй зӕгъын ӕй хъӕуы, хатт цӕйдӕр тыххӕй нӕ бон не свӕййы афоныл ӕрбацӕуын. Фӕлӕ кӕд ӕдзухдӕр байрӕджы кӕнӕм, уӕд хъуамӕ ахъуыды кӕнӕм, мыййаг, афтӕ уый тыххӕй нӕу, ӕмӕ сын нӕ аргъ кӕнӕм йе та нӕ хъуыддӕгтӕ хорз не спълан кӕнӕм.

12. Кӕд уацамынды цӕуынӕн арӕхдӕр дӕхӕдӕг ссарыс ӕмбал, уӕд цӕуыл хъуамӕ ахъуыды кӕнай?

¹² Уацамындон фембӕлды размӕ хъусынгӕнджытӕй иуӕй-иутӕ сӕхӕдӕг искӕимӕ баныхас кӕнынц, иннӕтӕ та хъусын кӕнынмӕ ацӕуынц, фембӕлды сын кӕй снысан кӕнынц, уыдонимӕ. Кӕд арӕхдӕр дӕхӕдӕг ссарыс ӕмбал, уӕд дӕ бон нӕ уаид дӕ зӕрдӕ «уӕрӕх байгом кӕнын», ома ӕрмӕст де ’ввахс ӕмбӕлттимӕ нӕ, фӕлӕ иннӕтимӕ дӕр цӕуын? (2 Кор. 6:11–13). Дӕ бон-иу нӕ уаид, ӕрӕджы чи сси хъусынгӕнӕг, уыдонимӕ дӕр цӕуын, цӕмӕй арӕхстджындӕрӕй хъусын кӕнын сахуыр уой? (1 Кор. 10:24; 1 Тим. 4:13, 15). Уацамындон фембӕлдты цы уынаффӕтӕ фӕдӕттынц, зӕгъӕм, хъусын кӕнын райдайӕн кӕм ис, уый фӕдыл, уыдонмӕ-иу лӕмбынӕг хъус. Фембӕлды фӕстӕ-иу дӕ пълӕнттӕ ма фӕив ӕмӕ-иу дӕ участокмӕ ӕвӕстиатӕй ацу.

13. Уацамындон фембӕлдтӕм йӕхи алчидӕр куы цӕттӕ кӕна ӕмӕ ӕнӕзӕрдӕхудтӕй куы архайа, уӕд нын цавӕр пайда хӕсдзысты?

¹³ Йесо хъусын кӕнынмӕ кӕй арвыста, уыцы 70 ахуыргӕнинаджы фӕстӕмӕ «цингӕнгӕ ӕрбаздӕхтысты» (Лук. 10:17). Фидарӕй зӕгъӕн ис, ӕмӕ сын уыцы хъуыддаджы стыр ӕххуыс фӕци, Йесо семӕ хъусын кӕныны размӕ кӕй фембӕлд, уый. Абон уацамындон фембӕлдтӕ махӕн дӕр стыр ӕххуыс сты. Уацамындон фембӕлдтӕм йӕхи алчидӕр куы цӕттӕ кӕна ӕмӕ ӕнӕзӕрдӕхудтӕй куы архайа, уӕд-иу се ’ппӕт дӕр бафидар уыдзысты, сӕхи-иу бацӕттӕ кӕндзысты ӕмӕ-иу сӕхицӕн ӕмбал ссардзысты, цӕмӕй хорз хабар «ӕппӕт адӕмтӕн дӕр» хъусын кӕной (Матф. 24:14).

Уацамындон фембӕлд хо куы уадза

Уацамындон фембӕлд хо куы уадза, уӕд хъуамӕ йӕ сӕрыл сӕрбӕттӕн уа ӕмӕ фембӕлд бадгӕйӕ уадза. Йӕ бон у аныхас кӕнын, ӕфсымӕр цӕуыл ныхас кодтаид, ахӕм фарстайыл. Хъуамӕ афтӕ ма ныхас кӕна, цыма иннӕты ахуыр кӕны, фӕлӕ йӕ бон у фарстатӕ дӕттын, цӕмӕй иннӕтӕ сӕ хъуыдытӕ дзурой. Кӕд донаргъуыд хотӕй искӕмӕн зӕгъа, цӕмӕй акува, уӕд уымӕн дӕр йӕ сӕрыл хъуамӕ сӕрбӕттӕн уа. Уацамындон фембӕлд куы нӕма фӕуа, афтӕ донаргъуыд ӕфсымӕр куы ’рбацӕуа, уӕд хо зӕгъдзӕн, фембӕлд кӕронмӕ ӕфсымӕр кӕй ауадздзӕн. Уацамындӕн дзуапдӕттӕг цӕстдарӕг хъуамӕ ахӕм хабӕрттыл рагацау ахъуыды кӕна ӕмӕ, ахӕм уавӕрты куыд кӕнгӕ у, уый хотӕ ӕмӕ ӕфсымӕртӕн бамбарын кӕна, цӕмӕй-иу мачи мацӕмӕй фӕтыхса. Зӕгъӕм, рӕзгӕ кары чи ис, ахӕм донаргъуыд ӕфсымӕр уацамындон фембӕлдмӕ ӕрбацыд, ӕмӕ фембӕлд хо уадзы. Фӕлӕ хистӕр нӕлгоймӕгты хъуыдымӕ гӕсгӕ, уыцы ӕфсымӕр уацамындон фембӕлдтӕ уадзынмӕ нӕма сарӕхсдзӕн. Ахӕм уавӕры уацамындӕн дзуапдӕттӕг цӕстдарӕг рагацау хойӕн дӕр ӕмӕ ӕфсымӕрӕн дӕр зӕгъдзӕн, фембӕлд хо кӕй ауадздзӕн, ӕфсымӕр та кувгӕ кӕй акӕндзӕн, кӕд ын хистӕр нӕлгоймӕгты хъуыдымӕ гӕсгӕ ахӕм хӕс раттӕн ис, уӕд. Кӕнӕ та, чи зоны, фембӕлдмӕ ӕрбацӕуа, ӕмбырдтӕ уадзыны ӕмӕ иннӕты номӕй кувыны бар кӕмӕн нал ис, ахӕм ӕфсымӕр. Хистӕр нӕлгоймӕгтӕ хотӕн нӕ дзурдзысты, цӕй тыххӕй йын нӕй уый бар, фӕлӕ сын рагацау зӕгъдзысты, уыцы ӕфсымӕр фембӕлдмӕ куы ’рбацӕуа, уӕддӕр фембӕлд сӕхӕдӕг кӕй хъуамӕ ауадзой ӕмӕ сӕхӕдӕг кӕй хъуамӕ акувой. Хистӕр нӕлгоймӕгтӕн сӕ бон у ӕфсымӕрӕн рагацау зӕгъын, уацамындон фембӕлд хотӕ кӕцы бонты уадздзысты, уый.

Уацамындон фембӕлды цӕуыл ис аныхас кӕнӕн:

«Нӕ хъусын кӕныны хъуыддаджы» фӕстаг фарсыл цы цӕвиттон вӕййы, ууыл.
Сайты jw.org чи ис ӕмӕ уацамындимӕ баст чи у, уыцы видеороликтӕй искӕцыйыл.
Куыд ис адӕмимӕ арӕхстджынӕй ныхас кӕнӕн, зӕгъӕм, цӕмӕй ис ныхас райдайӕн, цы ис зӕгъӕн, цӕмӕй йӕм иннӕ хатт дӕр ӕрбацӕуай кӕнӕ литературӕ куы райса, уӕд ын куыд ис мысайнаджы кой скӕнӕн.
Уацамындмӕ чи хауы ӕмӕ ныфс чи уадзы кӕнӕ хорз уынаффӕ кӕм ис, ахӕм стихтыл.
Уӕ территорийы чи ’рцыд йе та нӕ публикациты чи уыд, ахӕм цаутыл.
«Нӕ хъусын кӕныны хъуыддаджы» статьятӕй искӕцыйыл.
Хъусын кӕныны фембӕлдты цы темӕтӕ ӕвзӕрст цыдысты, уыдонӕй искӕцыйыл.
Уацамындимӕ баст чи у, ахӕм хъуыдытыл нӕ брошюрӕтӕй.
Уацамындимӕ баст чи у, ахӕм хъуыдытыл чиныгӕй «Хуыцауы Ныхас хъусынгӕнджыты скъола».
Сайты jw.org уацамынды пайда кӕнынӕн цы ӕрмӕг ис, ууыл.
Брошюрӕты «Ӕрмӕг Библи иртасынӕн» ӕмӕ «Хуыцауы Ныхасы цы фыст ис» уацамынды пайда кӕнынӕн цы ӕрмӕг ис, ууыл.
Куыд ис ныхас райдайӕн, Хуыцау кӕй нӕ уырны, эволюцийы ахуырадыл чи ӕууӕнды кӕнӕ, зӕгъӕм, пысылмон диныл хӕст чи у, ахӕм адӕймагыл куы сӕмбӕлай, уӕд.
Адӕймаг нын нӕ ныхас ӕрдӕгыл куы аскъуына, уӕд куыд ис бакӕнӕн.
Хӕдзарӕй-хӕдзармӕ кӕимӕ хъусын кӕнай, уымӕн куыд ис баххуыс кӕнӕн, цӕмӕй арӕхстджындӕрӕй хъусын кӕна.
Ӕндӕр ӕвзагыл чи дзуры, ахӕм адӕймагыл куы сӕмбӕлӕм, уӕд куыд кӕнгӕ у.
Кӕд хъусынгӕнджытӕй чидӕртӕ кӕцыдӕр ӕвзагыл дзурӕг адӕмы агурынмӕ цӕуой, телефонӕй хъусын кӕнын фӕнд кӕной, бирӕ адӕм кӕм вӕййы, уым хъусын кӕнынмӕ цӕуой кӕнӕ кӕмӕдӕрты ногӕй бацӕуын йе та кӕимӕдӕр Библи ахуыр кӕнын пълан кӕной, уӕд уыцы хъуыддӕгты фӕдыл ис уынаффӕтӕ раттӕн.
Уацамынды тӕссаг уавӕртӕй хи хизын кӕй хъӕуы, уавӕртӕм гӕсгӕ ныхас фӕивын кӕй фӕхъӕуы, уӕздан ӕмӕ ӕгъдауджын кӕй хъуамӕ уӕм, адӕммӕ раст цӕстӕй кӕй хъуамӕ кӕсӕм, ууыл ӕмӕ ӕндӕр ахӕм темӕтыл.