Ездрӕ адӕмӕн амыдта Хуыцауы Закъон

Израилӕгтӕн сӕ фылдӕр Иерусалиммӕ куы аздӕхтысты, уымӕй рацыд 70 азы бӕрц. Фӕлӕ ма сӕ уӕддӕр чидӕртӕ цард Персы паддзахады алы рӕтты. Уыдонӕй сӕ иу уыд сауджын Ездрӕ. Уый иннӕтӕн амыдта Йегъовӕйы закъон. Ездрӕ уый куы базыдта, ӕмӕ Иерусалимы адӕм Закъон не ’ххӕст кӕнынц, уӕд сфӕнд кодта уырдӕм ацӕуын ӕмӕ сын баххуыс кӕнын. Персы паддзах Артаксеркс ын загъта: «Хуыцау дӕ схайджын кодта зондӕй, цӕмӕй иннӕтӕн Закъон амонай. Ацу ӕмӕ ма кӕй бафӕнда ацӕуын, уыдоны дӕр демӕ акӕн». Ездрӕ фембӕлд, Иерусалиммӕ ацӕуын кӕй бафӕндыд, уыдонимӕ. Ӕмӕ Йегъовӕмӕ скуывтой, цӕмӕй дзӕбӕхӕй ныххӕццӕ уыдаиккой. Ӕмӕ стӕй уыцы дард фӕндагыл араст сты.

Цыппар мӕйы фӕстӕ Иерусалиммӕ ӕрхӕццӕ сты. Кънйӕзтӕ Ездрӕйӕн загътой: «Израилӕгтӕ Йегъовӕйы коммӕ нал кӕсынц. Мӕнгхуыцӕуттӕн чи кувы, ахӕм устыты ракуырдтой». Цымӕ Ездрӕ куыд бакодта? Адӕмы раз йӕ зонгуытыл ӕрхауд ӕмӕ скуывта: «Йегъовӕ, ды махӕн уыйбӕрц хорздзинӕдтӕ сарӕзтай, мах та дӕ ныхмӕ тӕригъӕдтӕ аразӕм». Кӕд адӕм сӕ тӕригъӕдтыл басастысты, уӕддӕр арӕзтой, раст цы нӕ уыд, уый. Ездрӕ равзӕрста хистӕр лӕгты ӕмӕ тӕрхонгӕнджыты, цӕмӕй уыцы хъуыддаг сраст кодтаиккой. Ӕмӕ ӕртӕ мӕйы фӕстӕ, Йегъовӕйӕн чи нӕ лӕггад кодта, уыдоны сӕ зӕххӕй арвыстой.

Рацыд 12 азы. Уӕдмӕ Иерусалимы къултӕ дӕр арӕзт фесты. Ездрӕ адӕмы ӕрӕмбырд кодта, цӕмӕй сын Хуыцауы Закъон бакастаид. Закъоны чиныг куы байгом кодта, уӕд адӕм сыстадысты. Стӕй Йегъовӕйы скадджын кодта, ӕмӕ адӕм сӕ къухтӕ хӕрдмӕ систой, йӕ ныхӕстимӕ разы кӕй сты, уый равдисынӕн. Стӕй Ездрӕ райдыдта Закъоны чиныг кӕсын ӕмӕ дзы цы фыст уыд, уый адӕмӕн ӕмбарын кӕнын. Ӕмӕ йӕм уыдон дӕр лӕмбынӕг хъуыстой. Адӕм басастысты, ногӕй та Йегъовӕйӕ кӕй адард сты, ууыл, ӕмӕ ныккуыдтой. Иннӕ бон Ездрӕ адӕмӕн Закъонӕй ноджы фылдӕр цыдӕртӕ бакаст. Уыдон базыдтой, тагъд сӕ кӕй хъӕудзӕн Халагъудты бӕрӕгбон сбӕрӕг кӕнын, ӕмӕ уайтагъд сӕхи цӕттӕ кӕнын райдыдтой.

Бӕрӕг ӕй кодтой авд боны дӕргъы. Адӕм цин кодтой ӕмӕ Йегъовӕйӕн бузныг дзырдтой, бирӕ хор сӕм кӕй ӕрзад, уый тыххӕй. Йесо Навины замантӕй фӕстӕмӕ Халагъудты бӕрӕгбон афтӕ никуы сбӕрӕг кодтой. Бӕрӕгбоны фӕстӕ адӕм ӕрӕмбырд сты ӕмӕ Хуыцаумӕ скуывтой: «Йегъовӕ, ды нӕ фервӕзын кодтай, ӕмӕ цагъартӕ нал стӕм. Ӕдзӕрӕг быдыры нӕ ӕфсӕстай ӕмӕ нын стӕй ацы рӕсугъд зӕхх радтай. Фӕлӕ-иу мах дӕ коммӕ нӕ кастыстӕм. Ды-иу нӕм дӕ пехуымпарты ӕрвыстай, мах та-иу сӕм нӕ хъуыстам. Фӕлӕ ды уӕддӕр фӕразонӕй ӕнхъӕлмӕ кастӕ. Авраамӕн цы дзырд радтай, уый сӕххӕст кодтай. Ӕмӕ дын ныр мах дзырд дӕттӕм, дӕ коммӕ кӕй кӕсдзыстӕм». Хуыцауӕн цы дзырд радтой, уый гӕххӕттыл ныффыстой ӕмӕ йыл кънйӕзтӕ, левиттӕ ӕмӕ сауджынтӕ мыхуыр сӕвӕрдтой.