Цавӕр ахуырады фӕрцы уыдзынӕ амондджын?

ДӔ ЗЫНДЗИНӔДТӔЙ хъуырмӕ никуы сдӕ? Куыд сӕ фервӕзай, ууыл хъуыды кӕнгӕйӕ, иу кӕнӕ фылдӕр хатт раст уынаффӕ куы нӕ рахастаис, уӕд цас зӕрдӕрис бавзӕрстаис?! Царды алы фарст дӕр куыдхуыздӕрӕй лыг кӕнын ӕмӕ кӕддӕриддӕр раст уынаффӕтӕ хӕссын – уыцы хъомыс гуырдзӕй ничи рахӕссы. Ууыл хъӕуы ахуыр кӕнын. Уӕдӕ дын зындзинӕдты сӕрты хизынӕн чи баххуыс кӕна, ахӕм ахуырад кӕм ис ссарӕн?

Ӕрыгӕттӕй дӕр ӕмӕ ацӕргӕтӕй дӕр бирӕтӕ уӕлдӕр ахуырадӕн стыр нысаниуӕг дӕттынц. Иуӕй-иу иртасджытӕ ма афтӕ дӕр зӕгъынц, зӕгъгӕ, уыдонмӕ «афтӕ кӕсы, ӕмӕ [хорз] куыст ӕнӕ уӕлдӕр ахуырадӕй ссарӕн нӕй». Фӕлӕ адӕймаджы царды ис ахӕм хъуыддӕгтӕ ӕмӕ сын исбон ницы ахъаз у. Цӕвиттон, уӕлдӕр ахуырад дын баххуыс кӕндзӕн, цӕмӕй хорз ныййарӕг, хорз цардӕмбал кӕнӕ хорз хӕлар уай? Ӕцӕгдӕр, адӕймаг йӕ ӕнтыстытӕй куы ныббуц уа, уӕд, гӕнӕн ис, ӕмӕ йӕм ӕвзӕр миниуджытӕ фӕзына, йӕ бинонты цард фехӕла кӕнӕ йӕхи дӕр амара.

Иуӕй-иутӕ разамынд фӕагурынц дины, уымӕн ӕмӕ йӕ нымайынц зонындзинӕдты суадоныл. Фӕлӕ фӕфыдӕнхъӕл вӕййынц, сӕ зындзинӕдтӕ иуварс кӕнынӕн сын кӕй нӕ баххуыс кӕны, уый тыххӕй. Уый афтӕ кӕй у, уымӕн цӕвиттонӕн ӕрхӕссӕн ис Эмилийыa, цӕры Мексикӕйы. Эмили зӕгъы: «Уый уыди 15 азы размӕ. Ӕмбӕрстон ӕй, мӕ лӕгимӕ мӕ бон дарддӕр цӕрын кӕй нал у. Ӕдзух хыл кодтам. Йӕ нозт ныууадзын кӕнын ын мӕ бон нӕ уыд. Арӕх-иу мӕ гыццыл сывӕллӕтты иунӕгӕй ныууагътон ӕмӕ-иу мӕ лӕджы агурӕг ацыдтӕн. Мӕ уд ӕрдуйӕ нарӕгдӕр сси. Ӕххуыс агуырдтон, ӕмӕ цалдӕр хатты аргъуанмӕ бацыдтӕн. Кӕд-иу дзы Библи кастысты, уӕддӕр дзы, мӕн чи хъуыд, ахӕм уынаффӕ никуы фехъуыстон; цы кӕнын мӕ хъӕуы, уый дӕр мын никуы ничи бацамыдта. Аргъуаны-иу бадтӕн ӕмӕ-иу иуӕй-иу куывдтытӕ цалдӕр хатты радзырдтон, фӕлӕ мын уыдон дӕр ницы баххуыс кодтой». Иннӕтӕн та сӕ уырнындзинад фесӕфы, сӕ дины разамонджыты царды фӕзминагӕй кӕй ницы фенынц, уый тыххӕй. Афтӕмӕй бирӕтӕ дин нал нымайынц, сӕ цард сын чи фӕхуыздӕр кӕна, ахӕм зонындзинӕдты кӕнӕ ахуырады суадоныл.

Уымӕ гӕсгӕ дӕ бон у дӕхи бафӕрсын: «Цӕмӕй амондджын уон, уый тыххӕй мӕ цавӕр ахуырад хъӕуы?» Цымӕ ӕцӕг чырыстон дин ацы ахсджиаг фарстӕн дзуапп дӕтты? Ууыл ныхас цӕудзӕн иннӕ статьяйы.

[Фиппаинаг]