Йегъовӕйы Ӕвдисӕнтӕ ахуырмӕ цы цӕстӕй кӕсынц?

Мах ахуыры фӕдыл уынаффӕтӕ фӕхӕссӕм Библийы уагӕвӕрдтӕм гӕсгӕ. Алы Ӕвдисӕн дӕр йе ’фсарм ахуыр кӕны Библимӕ гӕсгӕ. Ӕмӕ нын уыцы ӕфсарм ӕххуыс кӕны, Хуыцауы уагӕвӕрдтӕм гӕсгӕ куыд архайын хъӕуы, уый бамбарынӕн, зӕгъӕм, мӕнӕ ацы уагӕвӕрдтӕм гӕсгӕa.

• Ахуыр кӕнын ахсджиаг у

• Ахуырадмӕ хъӕуы раст цӕстӕй кӕсын

• Адӕймаг уӕлдӕр ахуырмӕ куы бацӕуа, уӕд уый, гӕнӕн ис, ӕвзӕрырдӕм фӕзына йе ’гъдауыл ӕмӕ йӕ уырнындзинадыл

• Йегъовӕйы Ӕвдисӕнтӕн дины скъолатӕ ис?

Ахуыр кӕнын ахсджиаг у

Адӕймаг ахуыры фӕрцы свӕййы куырыхон зонды хицау ӕмӕ хъуыды кӕнын сахуыр вӕййы. Библимӕ гӕсгӕ та уыцы миниуджытӕн стыр аргъ ис (Ӕмбисӕндтӕ 2:10, 11; 3:21, 22). Йесо йӕ фӕдылдзӕуджытӕн загъта, цӕмӕй адӕмӕн амоной, цы сын бафӕдзӕхста, уый (Матфейы 28:19, 20). Уымӕ гӕсгӕ мах не ’мчырыстӕтты разӕнгард кӕнӕм ӕмӕ сын ӕххуыс кӕнӕм, цӕмӕй ахуыр кӕной, зӕгъӕм, зоной кӕсын, фыссын ӕмӕ иннӕтимӕ ныхас кӕнын, стӕй сӕм цӕмӕй зонындзинӕдтӕ уа ӕндӕр динты ӕмӕ ӕгъдӕутты тыххӕй дӕр (1 Коринфӕгтӕм 9:20–22; 1 Тимофеймӕ 4:13)b.

Хицауӕдтӕ дӕр ӕмбарынц, ахуыр кӕнын куыд ахсджиаг у, ӕмӕ уымӕ гӕсгӕ бирӕ бӕстӕты ӕнӕмӕнг у, цӕмӕй-иу сывӕллӕттӕ скъола каст фӕуой. Мах сӕм хъусӕм, уымӕн ӕмӕ Библийы фыст ис: «Алы адӕймаг дӕр хицӕуттӕн коммӕгӕс уӕд» (Ромӕгтӕм 13:1). Уымӕй уӕлдай ма нӕ сывӕллӕттӕн фӕдзурӕм, цӕмӕй ӕрмӕст аттестат райсыны тыххӕй ма ахуыр кӕной, фӕлӕ архайой, цӕмӕй хорз ахуыр кӕнойc. Хуыцауы Ныхасы фыст ис: «Цы кӕнут, ӕппӕтдӕр кӕнут зӕрдиагӕй, куыд адӕймӕгтӕн нӕ, фӕлӕ Хицауӕн» (Колоссӕгтӕм 3:23, «Ног Фӕдзӕхст ӕмӕ Псалтир», 1994 аз).

Ахуыр нын ӕххуыс кӕны нӕ бинонты дарынӕн. Библийы фыст ис: «Йӕхиуӕттыл, ӕмӕ уӕлдайдӕр та йӕ бинонтыл, чи нӕ тыхсы, уый ныууагъта уырнындзинад ӕмӕ у, уырнындзинад кӕмӕ нӕй, уымӕй фыддӕр» (1 Тимофеймӕ 5:8). Ахуыры фӕрцы нын ацы фӕдзӕхст ӕххӕст кӕнын ӕнцондӕр уыдзӕн. Иу энциклопедийы куыд фыст ис, афтӕмӕй ахуырӕн йӕ сӕйраг нысан у, «адӕймаджы уымӕ бацӕттӕ кӕнын, цӕмӕй йӕ бон уа ӕхсӕнадӕн пайда хӕссын... зӕгъӕм, ахӕм пайда хӕссы экономистты куыст» (The World Book Encyclopedia). Цавӕрдӕр дӕсныйад кӕнӕ ахуырад кӕмӕ ис, уыдонӕн куыст ссарын ӕмӕ сӕ бинонты дарын ӕнцондӕр вӕййы, скъолайы чи нӕ ахуыр кодта ӕмӕ дӕсныйад кӕмӕ нӕй, уыдонӕй (Ӕмбисӕндтӕ 22:29).

Ныййарджытӕ фӕархайынц, цӕмӕй сӕ сывӕллӕтты цардмӕ бацӕттӕ кӕной. Ӕмӕ уый тыххӕй та скъолайы ахуыр кӕнын тынг ахсджиаг у (2 Коринфӕгтӕм 12:14). Мах ныййарджыты разӕнгард кӕнӕм сӕ сывӕллӕтты скъоламӕ дӕттынмӕ, кӕд, кӕм цӕрынц, уым уый афтӕ ӕнцон нӕу, ахуыры тыххӕй дзы фидын хъӕуы кӕнӕ дзы ахӕм ӕгъдау нӕй, цӕмӕй сывӕллӕттӕ скъолайы ахуыр кӕнойd. Стӕй ма ныййарджытӕн уынаффӕтӕ фӕдӕттӕм, сӕ бон куыд у сӕ сывӕллӕттӕн ӕххуыс кӕнын, цӕмӕй сын хуыздӕр ахуыр кӕнойe.

Ахуырадмӕ хъӕуы раст цӕстӕй кӕсын

Скъолайы фӕстӕ ахуырмӕ кӕдӕм бацӕудзыстӕм, ууыл лӕмбынӕг фӕхъуыды кӕнӕм. Библи зӕгъы: «Ӕвӕлтӕрд алы ныхасыл дӕр ӕууӕнды, ӕмбаргӕ адӕймаг та хъуыды кӕны йӕ къахдзӕфтыл» (Ӕмбисӕндтӕ 14:15). Мах архайӕм ацы уагӕвӕрдмӕ гӕсгӕ, ӕмӕ лӕмбынӕг фӕхъуыды кӕнӕм, скъолайы фӕстӕ ахуырмӕ кӕдӕм бацӕудзыстӕм, нӕ ахуырыл цас ӕхца ацӕудзӕн ӕмӕ нын цы пайда уыдзӕн, ууыл. Зӕгъӕм, цыбыр рӕстӕгмӕ вӕййы исты хорз дӕсныйад райсӕн.

Библи ахуыр кӕнын ахуырад райсынӕй бирӕ пайдадӕр у. Адӕймаг Библи ахуыр кӕнгӕйӕ Хуыцауы базоны. Уыцы зонындзинӕдтӕ кӕнынц ӕнусон цардмӕ, ӕмӕ нын ахӕм зонындзинӕдтӕ ӕндӕр никӕцы ахуырад ратдзӕн (Иоанны 17:3). Библийӕ нӕ бон у базонын, цы у уаг ӕмӕ ӕгъдау – «цы нысан кӕны, раст, ӕнӕхӕрам ӕмӕ рӕстзӕрдӕ уай, уый – хорз цы у, уый ӕгасӕй дӕр» (Ӕмбисӕндтӕ 2:9). Апостол Павелмӕ цы ахуырад уыд, уый абарӕн ис абоны университеты ахуырадимӕ. Фӕлӕ Павел загъта: «[Ӕз] ссардтон, ӕппӕтӕй зынаргъдӕр цы у, уый – базыдтон мӕ Хицау Йесо Чырыстийы» (Филиппӕгтӕм 3:8; Хъуыддӕгтӕ 22:3). Афтӕ абон дӕр Йегъовӕйы Ӕвдисӕнтӕй бирӕтӕ уӕлдӕр ахуырад райстой, фӕлӕ Библи кӕй ахуыр кӕнынц, уый сын уыцы ахуырадӕй ахсджиагдӕр уf.

Адӕймаг уӕлдӕр ахуырмӕ куы бацӕуа, уӕд уый, гӕнӕн ис, ӕвзӕрырдӕм фӕзына йе ’гъдауыл ӕмӕ йӕ уырнындзинадыл

Библи зӕгъы: «Ӕмбаргӕ адӕймаг фыдбылыз уыны ӕмӕ дзы йӕхи хизы» (Ӕмбисӕндтӕ 22:3). Йегъовӕйы Ӕвдисӕнтӕ ӕмбарынц, адӕймаг уӕлдӕр ахуырмӕ куы бацӕуа, уӕд ын, гӕнӕн ис, иннӕты зондахаст йе ’гъдауыл ӕмӕ йӕ уырнындзинадыл ӕвзӕрырдӕм фӕзына. Уымӕ гӕсгӕ Ӕвдисӕнтӕй бирӕтӕ аскъуыддзаг кӕнынц, сӕхи ӕмӕ сӕ сывӕллӕтты ахӕм тӕссаг уавӕры кӕй нӕ баппардзысты. Уыдон зонынц, институтты ӕмӕ университетты арӕх студенттӕн кӕй фӕхъарынц алыхуызон рӕдыд хъуыдытӕ. Дӕлдӕр дзы ис цалдӕр.

• Рӕдыд хъуыды: ӕхцайы фӕрцы адӕймаг уыдзӕн амондджын ӕмӕ ӕдас

  Арӕх фӕзӕгъынц, адӕймагмӕ, дам, уӕлдӕр ахуырад куы уа, уӕд, дам, бирӕ ӕхца кусдзӕн. Уымӕ гӕсгӕ фылдӕрӕй-фылдӕр кӕны студентты нымӕц. Чидӕртӕ сӕ афтӕ фӕхъуыды кӕнынц, ӕмӕ сӕм ӕхца куы уа, уӕд уыдзысты амондджын ӕмӕ ӕдас. Фӕлӕ Библи зӕгъы, афтӕ хъуыды кӕнын раст кӕй нӕу (Екклесиаст 5:10). Уымӕй уӕлдай ма Библийы фыст ис, зӕгъгӕ, «адӕймаг ӕхцауарзаг куы уа, уӕд уымӕй цӕуы алыхуызон фыдбылызтӕ». Ӕмӕ уый аххосӕй бирӕтӕ уырнындзинады фӕндагӕй адзӕгъӕл вӕййынц (1 Тимофеймӕ 6:10). Йегъовӕйы Ӕвдисӕнтӕ ӕппӕт хъарутӕй архайынц, цӕмӕй сӕ хъӕздыгдзинад йӕ фӕдыл ма асайа (Матфейы 13:22).

• Рӕдыд хъуыды: адӕймаг хъуамӕ тырна, цӕмӕй йын иннӕты ’хсӕн кад уа, ӕмӕ йӕм уый тыххӕй та хъуамӕ уа уӕлдӕр ахуырад

  Зӕгъӕм, Никъа Гилаури, Гуырдзыстоны раздӕры премьер-министр, йӕ бӕстӕйы цӕрджытӕй бирӕтӕ цы хъуыдыйыл хӕст сты, уый фӕдыл ныффыста: «Гуырдзыстоны дын цӕмӕй иннӕты ’хсӕн кад уа, уый тыххӕй дӕм хъуамӕ университеты диплом уа. [...] [Раздӕр-иу] ӕрыгӕттӕй диплом кӕмӕ нӕ уыд, уымӕ-иу ахӕм цӕстӕй кастысты, цыма йӕ бинонты худинаг кодта»g. Библи та нӕ фӕдзӕхсы, цӕмӕй ацы дунейы нӕхицӕн кад ма агурӕм. Чырысти, йӕ рӕстӕджы чи цард ӕмӕ кадмӕ чи бӕллыд, уыцы дины разамонджытӕн загъта: «Ӕниу мыл ӕууӕндгӕ дӕр куыд хъуамӕ кӕнат, кӕд ӕмӕ сымах уарзут, уӕ иу иннӕйы кадджын кӕна, уый?» (Иоанны 5:44). Университеты ахуыр кӕнгӕйӕ адӕймагыл, гӕнӕн ис, иннӕты зондахаст бандава, ӕмӕ ссӕрбӕрзонд уа, ӕмӕ Хуыцау та уыцы миниуӕгӕй йе сӕфт уыны (Ӕмбисӕндтӕ 6:16, 17; 1 Петры 5:5).

• Рӕдыд хъуыды: алкӕмӕн дӕр йӕхи бар у, хорзыл цы нымайы ӕмӕ ӕвзӕрыл цы нымайы, уый

  Йегъовӕйы Ӕвдисӕнтӕ, хорз цы у ӕмӕ ӕвзӕр цы у, уымӕ Хуыцауы цӕстӕй кӕсынц (Исай 5:20). Фӕлӕ иу журналы куыд фыст уыд, афтӕмӕй университетты студенттӕй бирӕтӕ се ’мгӕртты зондыл ацӕуынц, ӕмӕ «рахӕссынц, хорз цы у ӕмӕ ӕвзӕр цы у, уый фӕдыл цы хъуыды кӕнынц, уый ныхмӕ чи вӕййы, ахӕм уынаффӕтӕ» (Journal of Alcohol and Drug Education)h. Ӕмӕ Библийы дӕр фыст ис: «Ӕвзӕр ӕмбӕлттӕ хорз ӕгъдӕуттӕ халгӕ кӕнынц» (1 Коринфӕгтӕм 15:33). Университетты парахат сты, Хуыцауы зӕрдӕмӕ чи нӕ цӕуы, ахӕм хъуыддӕгтӕ, зӕгъӕм, фыднозт кӕнын, наркотиктӕ кӕнын ӕмӕ хӕтын – суанг ма хорзыл нымад дӕр сты (1 Коринфӕгтӕм 6:9, 10; 2 Коринфӕгтӕм 7:1).

• Рӕдыд хъуыды: цард хуыздӕрырдӕм фӕивынӕн хъӕуы уӕлдӕр ахуырад райсын

  Мах зонӕм, бирӕтӕ уӕлдӕр ахуырмӕ уый тыххӕй кӕй нӕ бацӕуынц, цӕмӕй схъӕздыг уой, адӕмы ’хсӕн сын кад уа кӕнӕ сӕ уды дзӕбӕхӕн цӕрой. Уыдоны фӕфӕнды, цӕмӕй сӕхи дӕр ӕмӕ цард дӕр хуыздӕрырдӕм фӕивой. Уыдон хорз фӕндтӕ сты, фӕлӕ Чырыстийау мах дӕр зонӕм, цард хуыздӕрырдӕм ӕрмӕстдӕр Хуыцауы Паддзахад кӕй фӕивдзӕн (Матфейы 6:9, 10). Фӕлӕ, Хуыцауы Паддзахад адӕмы зындзинӕдтӕн кӕрон кӕд скӕндзӕн, уымӕ ӕнцад бадгӕйӕ не ’нхъӕлмӕ кӕсӕм. Чырыстийау мах дӕр «Хуыцауы паддзахады тыххӕй... хорз хабар» ӕгас зӕххыл хъусын кӕнӕм ӕмӕ алы аз дӕр сӕдӕгай минтӕн баххуыс кӕнӕм сӕ цард хуыздӕрырдӕм фӕивынӕн (Матфейы 24:14)i.