Ӕххуыс сын кӕн. Фӕстиат кӕнынӕн рӕстӕг нал ис!
«Хицау, кӕмӕ хъуамӕ ацӕуӕм? Ӕнусон царды ныхӕстӕ дӕумӕ куы сты» (ИОАН. 6:68).
1. Йесойы йӕ ахуыргӕнинӕгтӕй бирӕтӕ куы ныууагътой, уӕд Петр цы загъта?
ИУХАТТ Йесо Чырыстийы йӕ ахуыргӕнинӕгтӕй бирӕтӕ ныууагътой – сӕ зӕрдӕмӕ нӕ фӕцыд йӕ ахуырӕдтӕй иу. Уӕд Йесо йӕ апостолты бафарста: «Мыййаг, сымах дӕр нӕ фӕнды ацӕуын?». Петр ын дзуапп радта: «Хицау, кӕмӕ хъуамӕ ацӕуӕм? Ӕнусон царды ныхӕстӕ дӕумӕ куы сты» (Иоан. 6:51–69). Ӕцӕгдӕр, кӕдӕм ацыдаиккой, уый нӕ уыд. Уыцы рӕстӕг дзуттӕгты дины «ӕнусон царды ныхӕстӕ» нал уыд, абон Стыр Вавилоны, ома мӕнг динты ӕмткӕй райсгӕйӕ, куыд нӕй, афтӕ. Хуыцауы дзугӕй чи адзӕгъӕл, фӕлӕ Йегъовӕйы зӕрдӕ рухс кӕнын кӕй фӕнды, уыдон хъуамӕ ӕвӕстиатӕй «райхъал уой» ӕмӕ фысты кӕртмӕ ӕрбаздӕхой (Ром. 13:11).
2. Цы хъӕуы зӕрдыл дарын, ӕмбырды комитет кӕй хъуамӕ ӕвзара кӕнӕ ӕрмӕст хистӕр нӕлгоймӕгтӕ кӕй хъуамӕ зоной, ахӕм хъуыддӕгты фӕдыл?
2 Йегъовӕ тыхсти Израилы сӕфт фыстыл. (Бакӕс Иезекил 34:15, 16.) Афтӕ хистӕр нӕлгоймӕгты дӕр фӕнды ӕмӕ сӕ хӕс дӕр у, Хуыцауы дзугӕй чи адзӕгъӕл, уыдонӕн ӕххуыс кӕнын. Зӕгъӕм, хъусынгӕнӕгӕн бахӕс кодтой, чи ӕрлӕмӕгъ ӕмӕ ӕххуыс чи агуры, ахӕм адӕймагимӕ ахуыр кӕнын. Фӕлӕ ахуыры рӕстӕг рабӕрӕг, уыцы адӕймаг уӕззау тӕригъӕд кӕй ракодта. Куыд хъуамӕ бакӕна хъусынгӕнӕг? Ӕмбырды комитет кӕй хъуамӕ ӕвзара кӕнӕ ӕрмӕст хистӕр нӕлгоймӕгтӕ кӕй хъуамӕ зоной, исты ахӕм хъуыддаджы фӕдыл ын хъусынгӕнӕг хъуамӕ уынаффӕтӕ ма дӕтта, фӕлӕ йын зӕгъа, цӕмӕй хистӕр нӕлгоймӕгтимӕ аныхас кӕна. Йӕ ныхасмӕ йын куы нӕ байхъуса, уӕд хъусынгӕнӕг хъуамӕ йӕхӕдӕг радзура хабар хистӕр нӕлгоймӕгтӕн (Лев. 5:1; Гал. 6:1).
3. Сӕдӕ фысы кӕмӕ уыд, уымӕн йӕ фыстӕй иу куы фесӕфт, уӕд куыд бакодта?
3 Айразмӕ статьяйы дзырд цыди Йесойы фӕсномыг ныхасыл, сӕдӕ фысы кӕмӕ уыди, уыцы адӕймаджы тыххӕй. Йӕ фыстӕй иу куы фесӕфт, уӕд йӕ 99 фысы ныууагъта ӕмӕ ацыд сӕфт фысы агурӕг. Куыд цин кодта, куы йӕ ссардта, уӕд! (Лук. 15:4–7). Мах дӕр афтӕ фӕцин кӕнӕм, Хуыцауы дзугӕй чи адзӕгъӕл, уыцы фыстӕй исчи фӕстӕмӕ куы ’рбаздӕхы, уӕд. Уыцы адӕймаджы хистӕр нӕлгоймӕгтӕ ӕмӕ иннӕ чырыстӕттӕ кӕй уарзынц, уымӕ гӕсгӕ йӕ, ӕвӕццӕгӕн, бӕрӕг дӕр кодтой. Уыдоны дӕр фӕнды, цӕмӕй адӕймаг фӕстӕмӕ фысты кӕртмӕ ’рбаздӕха ӕмӕ йын Хуыцау ӕххуыс кӕна, хъахъхъӕна йӕ ӕмӕ йын арфӕ кӕна (Дык. з. 33:27; Пс. 91:14; Ӕмб. 10:22). Фадат сын куы уа, цӕмӕй искӕмӕн фӕстӕмӕ ӕмбырдмӕ ӕрбаздӕхынӕн баххуыс кӕной, уӕд сӕ бон цы у аразын?
4. Галатӕгтӕм 6:2, 5 сӕ хъуыды цы у?
4 Ахӕм адӕймаджы зӕрдӕ гӕнӕн ис, ӕмӕ бацагайа, фӕлмӕнӕй йын куы бамбарын кӕнӕм, Йегъовӕ йӕ фысты кӕй уарзы ӕмӕ, сӕ бон цы у, уымӕй фылдӕр сӕ кӕй нӕ домы. Цы нӕ домы, уый та у, цӕмӕй Фыстад ахуыр кӕнӕм, фембӕлдтӕм цӕуӕм ӕмӕ Паддзахады тыххӕй хорз хабар хъусын кӕнӕм. Хорз уаид Галатӕгтӕм 6:2, 5 куы бакӕсиккам ӕмӕ йын куы зӕгъиккам, зӕгъгӕ, чырыстӕттӕ кӕрӕдзийӕн сӕ уӕргътӕ хӕссынӕн ӕххуыс кӕнынц, фӕлӕ Йегъовӕйы раз «алчидӕр йӕхи тыххӕй ратдзӕн дзуапп». Хуыцауыл нӕ бӕсты иузӕрдион ничи уыдзӕн.
«Царды сагъӕсты» аххосӕй ӕрлӕмӕгъ сты?
5, 6. а) Чи ӕрлӕмӕгъ, уыцы чырыстӕттӕм лӕмбынӕг хъусын ахсджиаг цӕмӕн у? ӕ) Чи ӕрлӕмӕгъ, уыдонӕн куыд ис бамбарын кӕнӕн, фембӕлдтӕм кӕй нал цӕуынц, уый сын ӕвзӕрдӕр кӕй у?
5 Цӕмӕй хистӕр нӕлгоймӕгтӕ ӕмӕ фӕлтӕрд чырыстӕттӕ бамбарой, чи ӕрлӕмӕгъ, уыдонӕн баххуыс кӕнӕн куыд ис, уый тыххӕй хъуамӕ лӕмбынӕг хъусой, сӕ зӕрдӕйы цы ис, уыдӕттӕ сын куы дзурой, уӕд. Зӕгъӕм, хистӕр нӕлгоймаг дӕ ӕмӕ бӕрӕг кӕныс, фембӕлдтӕм чи нал цӕуы ӕмӕ «царды сагъӕсты» аххосӕй чи ӕрлӕмӕгъ, ахӕм лӕг ӕмӕ усы (Лук. 21:34). Чи зоны, чырыстон хъуыддӕгтӕй сабыргай уымӕн адард сты, цардамӕлттӕ кӕнын сын кӕй фӕзындӕр йе та сыл бинонты ’хсӕн фылдӕр хӕстӕ кӕй фӕзынд, уымӕ гӕсгӕ. Кӕд сӕм афтӕ кӕсы, ӕмӕ сӕ нырма сӕ хъуыддӕгтӕ банывыл кӕнын хъӕуы, уӕд сын зӕгъ, фембӕлдтӕм куы нӕ цӕуой, уӕд сын уый кӕй нӕ баххуыс кӕндзӕн. (Бакӕс Ӕмбисӕндтӕ 18:1.) Дӕ бон сӕ у фӕлмӕнӕй бафӕрсын: «Ӕмбырдмӕ куы нал цӕут, уӕдӕй нырмӕ амондджындӕр фестут? Уӕ кӕрӕдзи хуыздӕр ӕмбарын райдыдтат? Йегъовӕ цы циндзинад дӕтты, уый ма уӕ ныр дӕр фидар кӕны?» (Неем. 8:10).
6 Ацы фарстатыл куы ахъуыды кӕной, уӕд гӕнӕн ис, ӕмӕ феной, ӕмбырдмӕ кӕй нал цӕуынц, уый аххосӕй сӕ уырнындзинад кӕй ӕрлӕмӕгъ ӕмӕ раздӕрау амондджын кӕй нал сты (Матф. 5:3; Дзут. 10:24, 25). Чи зоны сын бамбарын кӕнай, сӕ циндзинад уымӕн кӕй фесӕфт, ӕмӕ хорз хабар нал хъусын кӕнынц (Матф. 28:19, 20). Уӕдӕ сӕ уӕд цы хъӕуы бакӕнын?
7. Дзугӕй чи адзӕгъӕл, уыдоны цӕмӕ ис разӕнгард кӕнӕн?
7 Йесо загъта: «Уӕхимӕ кӕсут, цӕмӕй уӕ зӕрдӕтӕ фырхӕрд, фырнозт ӕмӕ царды сагъӕстӕй ма ӕруӕззау уой [...] Уӕдӕ ма бафынӕй ут. Ӕдзухдӕр зӕрдиагӕй кувут, цӕмӕй бафӕразат, ӕрцӕуинаг цыдӕриддӕр у, уый сӕрты ахизын» (Лук. 21:34–36). Дзугӕй чи адзӕгъӕл, фӕлӕ раздӕрау амондджын уой, уый кӕй фӕнды, уыдоны разӕнгард кӕнӕн ис, цӕмӕй Йегъовӕйӕ сыгъдӕг уды ӕххуыс курой, стӕй сӕ куывдтытӕм гӕсгӕ архайгӕ дӕр кӕной (Лук. 11:13).
Исчи кӕнӕ сын исты сси цӕлхдур?
8, 9. Чи ӕрлӕмӕгъ, уыцы адӕймагимӕ хистӕр нӕлгоймагӕн йӕ бон аныхас кӕнын цӕуыл у?
8 Адӕм сты ӕнӕххӕст ӕмӕ хатт кӕрӕдзи нӕ бамбарынц. Уый, гӕнӕн ис, искӕмӕн цӕлхдур суа. Зӕгъӕм, иуӕй-иутӕн цӕлхдур свӕййы, фӕлтӕрд чырыстон Библийы уагӕвӕрдтӕм гӕсгӕ исты раст куы нӕ бакӕны, уый. Кӕд чырыстон уый тыххӕй ӕрлӕмӕгъ, уӕд ӕм цы хистӕр нӕлгоймаг бацӕуа, уымӕн йӕ бон у бацархайын, цӕмӕй йын бамбарын кӕна, Йегъовӕ цӕлхдур кӕй никӕмӕн ӕвӕры. Уӕдӕ искӕй аххосӕй йӕ зӕрдӕ Йегъовӕйыл цӕмӕн хъуамӕ сива? Цымӕ хъуамӕ дарддӕр дӕр Йегъовӕйӕн ма лӕггад кӕна ӕмӕ йӕ фидарӕй ма уырна, «ӕгас зӕххы Тӕрхонгӕнӕг» кӕй зоны, цы ’рцыд, уый ӕмӕ раст тӕрхон кӕй рахӕсдзӕн? (Райд. 18:25; Кол. 3:23–25). Адӕймаг йӕ къах истӕуыл куы скъуыра ӕмӕ куы ахауа, уӕд цымӕ хуысгӕйӕ баззайдзӕн? Сыстын ӕппындӕр нӕ бафӕлвардзӕн?
9 Хистӕр нӕлгоймаг ахӕм адӕймагӕн куы ӕххуыс кӕна, уӕд йӕ бон у, ӕмӕ йын йӕ хъус ӕрдара, раздӕр кӕмӕндӕр цӕлхдур цы уыд, уый уыцы адӕймагмӕ ныр афтӕ ахсджиаг кӕй нал кӕсы. Гӕнӕн ис, уыцы цӕлхдур абон нал ис. Кӕд адӕймаг, ӕфхӕргӕ йӕ кӕй бакодтой, уый тыххӕй фӕхӕрам, уӕд хорз уаид, Йегъовӕмӕ куы скувид ӕмӕ алцӕуылдӕр лӕмбынӕг куы ахъуыды кӕнид. Уый фӕрцы, гӕнӕн ис, ахӕм хатдзӕгмӕ ’рцӕуа, ӕмӕ йӕхӕдӕг дӕр бынтон раст кӕй нӕ уыд ӕмӕ кӕй ма хъуамӕ бауагътаид, цӕмӕй йын уыцы ӕфхӕрд цӕлхдур суыдаид (Пс. 119:165; Дзут. 12:5–13).
Библийы ахуырӕдтӕй сӕ исты фӕкъуылымпы кодта?
10, 11. Библийы ахуырӕдтӕй кӕцыдӕр ӕндӕрхуызон чи ӕмбары, уымӕн цавӕр бӕлвырдгӕнӕнтӕ ис ӕрхӕссӕн?
10 Чидӕртӕ Хуыцауы дзуг ныууагътой, Библийы ахуырӕдтӕй кӕцыдӕримӕ разы кӕй нӕ уыдысты, уый тыххӕй. Израилӕгтӕ Египеты цагъарадӕй куы ссӕрибар сты, уӕд сӕ «ферох сты [Хуыцауы] хъуыддӕгтӕ» ӕмӕ «нал ӕнхъӕлмӕ кастысты йӕ уынаффӕмӕ» (Пс. 106:13). Хорз уаид, чи ӕрлӕмӕгъ, уымӕн йӕ зӕрдыл ӕрлӕууын кӕнын, «ӕууӕнкджын ӕмӕ зондджын цагъар» диссаджы «хӕринаг» кӕй дӕтты (Матф. 24:45). Ӕмӕ уыцы «хӕринаджы» фӕрцы базыдта рӕстдзинад, чи ӕрлӕмӕгъ, уыцы адӕймаг дӕр. Уӕдӕ фӕндфидарӕй цӕуылнӕ хъуамӕ аскъуыддзаг кӕна, цӕмӕй та ногӕй ӕцӕгдзинадмӕ гӕсгӕ цӕра? (2 Иоан. 4).
11 Хуыцауы дзугӕй чи адзӕгъӕл, уыдонӕн ӕххуысгӕнгӕйӕ хистӕр нӕлгоймагӕн йӕ бон у радзурын, Йесойы чи ныууагъта, уыцы ахуыргӕнинӕгты кой – уыдон ӕй ныууагътой, йӕ ахуырӕдтӕй цыдӕр сӕ зӕрдӕмӕ кӕй нӕ фӕцыд, уый тыххӕй (Иоан. 6:53, 66). Чырыстийы ӕмӕ йын йӕ иузӕрдион фӕдылдзӕуджыты куы ныууагътой, уӕд сӕ уырнындзинад ӕрлӕмӕгъ ӕмӕ сӕ циндзинад фесӕфтой. Цымӕ чырыстон ӕмбырдӕй чи адард, уыдон, уырнындзинад фидаргӕнӕн «хӕринаг» парахатӕй кӕм ис, ӕндӕр ахӕм бынат ссардтой? Нӕ, уымӕн ӕмӕ ахӕм бынат ӕндӕр никуы ис!
Мыййаг, уӕззау тӕригъӕд ракодтой?
12, 13. Исчи уӕззау тӕригъӕд куы ракӕна, ӕмӕ уый тыххӕй дзугӕй куы адзӕгъӕл уа, уӕд ын куыд ис баххуыс кӕнӕн?
12 Чидӕртӕ хорз хабар нал хъусын кӕнынц ӕмӕ фембӕлдтӕм нал цӕуынц, уӕззау тӕригъӕд кӕй ракодтой, уый тыххӕй. Уыдон чи зоны афтӕ хъуыды кӕнынц, ӕмӕ сӕ рӕдыды тыххӕй хистӕр нӕлгоймӕгтӕн куы радзурой, уӕд сӕ ӕмбырдӕй ацух кӕндзысты. Фӕлӕ кӕд уыцы ӕвзӕр хъуыддаг нал аразынц ӕмӕ зӕрдӕбынӕй ӕрфӕсмон кодтой, уӕд сӕ нӕ ацух кӕндзысты (2 Кор. 7:10, 11). Ӕмбырды сыл бацин кӕндзысты ӕмӕ сын хистӕр нӕлгоймӕгтӕ баххуыс кӕндзысты, цӕмӕй ногӕй Йегъовӕмӕ баввахс уой.
13 Зӕгъӕм, фӕлтӕрд хъусынгӕнӕг дӕ ӕмӕ дын бахӕс кодтой, чи ӕрлӕмӕгъ, ахӕм адӕймагӕн ӕххуыс кӕнын. Уыцы адӕймаг дын куы зӕгъа, уӕззау тӕригъӕд кӕй ракодта, уӕд цы хъуамӕ аразай? Куыд базыдтам, афтӕмӕй уыцы хъуыддаджы фӕдыл исты уынаффӕтӕ дӕттыны бӕсты хуыздӕр уаид, куы йын зӕгъис, цӕмӕй хистӕр нӕлгоймӕгтӕм бацӕуа. Афтӕ бакӕнын ӕй куы нӕ фӕнда, уӕд архай, ахӕм хъуыддӕгтӕ скъуыддзаг кӕнынӕн Хуыцау цы уагӕвӕрд радта, уымӕ гӕсгӕ. Уымӕй равдисдзынӕ, Йегъовӕйы номыл ӕмӕ ӕмбырды хӕрзӕбоныл кӕй тыхсыс. (Бакӕс Левит 5:1.) Хистӕр нӕлгоймӕгтӕ аскъуыддзаг кӕндзысты, куыд баххуыс кӕной, ӕмбырдмӕ ӕрбаздӕхын ӕмӕ Хуыцауы фӕндонмӕ гӕсгӕ цӕрын кӕй фӕнды, уыдонӕй алкӕмӕн дӕр. Чи зоны йын бахъӕуа фӕлмӕнӕй зонд бацамонын (Дзут. 12:7–11). Адӕймаг, Хуыцауы ныхмӕ тӕригъӕд кӕй ракодта, ууыл куы басӕтта, уыцы рӕдыд куы нал кӕна ӕмӕ зӕрдӕйӕ куы фӕсмон кӕна, уӕд ын хистӕр нӕлгоймӕгтӕ баххуыс кӕндзысты ӕмӕ йын Йегъовӕ ныххатыр кӕндзӕн (Ис. 1:18; 55:7; Иак. 5:13–16).
Йӕ фырт ӕрбаздӕхт ӕмӕ цин кӕны
14. Радзур, Йесойы фӕсномыг ныхас сӕфт фырты тыххӕй.
14 Дзугӕй чи адзӕгъӕл, ахӕм фысӕн куы ӕххуыс кӕнай, уӕд хорз уаид, йӕ хъус ын куы ӕрдарис Йесойы фӕсномыг ныхасмӕ, фыст ис Лукайы 15:11–24. Уым дзырд цы ӕрыгон нӕлгоймагыл цӕуы, уый йӕ бынтӕ ӕнӕгъдау цард кӕнгӕйӕ ныппаплой кодта. Ӕппынфӕстаг ахӕм цардӕй стыхст. Цы бахордтаид, уый йын нал уыд, мысыд йӕ бинонты ӕмӕ йӕхинымӕр скарста: цом, цӕуон мӕ фыды хӕдзармӕ! Нырма дард уыд, афтӕмӕй йӕ йӕ фыд ауыдта, йӕ размӕ разгъордта, ныттыхст ыл ӕмӕ йын пъатӕ кодта. Фыды зӕрдӕ цинӕй байдзаг. Ацы цӕвиттоныл хъуыды кӕнгӕйӕ, чи адзӕгъӕл, уыцы адӕймаджы, чи зоны, бафӕнда фӕстӕмӕ Хуыцауы фысты кӕртмӕ ’рбаздӕхын. Ацы дунейӕн тагъд йӕ кӕрон кӕй ӕрцӕудзӕн, уымӕ гӕсгӕ хъуамӕ ӕвӕстиатӕй фӕстӕмӕ «йӕ хӕдзармӕ ӕрбаздӕха».
15. Иуӕй-иутӕ ӕмбырдӕй цӕмӕн адзӕгъӕл сты?
15 Ӕмбырдӕй чи адзӕгъӕл, уыдонӕн сӕ фылдӕр, сӕфт фырт куыд сыстад ӕмӕ куыд ацыд, афтӕ нӕ бакӕнынц. Иуӕй-иутӕ ӕмбырдӕй адзӕгъӕл вӕййынц сабыргай, дон науы сындӕггай былӕй куыд ахӕссы, уыйау. Иннӕтӕ та царды сагъӕстыл свӕййынц, ӕмӕ сӕ Йегъовӕ айрох вӕййы. Аннӕтӕ та уый бар раттынц, цӕмӕй сын ӕмбырды исчи цӕлхдур суа, йе та ацӕуынц, уымӕн ӕмӕ Библийӕ цавӕрдӕр ахуырӕдтыл не сразы вӕййынц. Чидӕртӕ та ракӕнынц тӕригъӕд. Фӕлӕ уӕлдӕр цы уынаффӕтӕм ӕркастыстӕм, уыдоны фӕрцы, чи зоны, дӕ бон уа баххуыс кӕнын, дзугӕй уыцы аххосӕгты тыххӕй, йе та ӕндӕр истӕй тыххӕй чи адзӕгъӕл, уыдонӕн, ӕмӕ, цалынмӕ ӕгӕр нӕ байрӕджы, уӕдмӕ фӕстӕмӕ ӕрбаздӕхой.
«Хъӕбул, ӕгас цу дӕ хӕдзармӕ!»
16–18. а) Бирӕ азты дӕргъы ӕмбырдмӕ чи нал цыд, ахӕм ӕфсымӕрӕн иу хистӕр нӕлгоймаг куыд баххуыс кодта? ӕ) Уыцы ӕфсымӕр цӕмӕн ӕрлӕмӕгъ, куыд ын баххуыс кодтой ӕмӕ йыл ӕмбырды куыд сӕмбӕлдысты?
16 Иу хистӕр нӕлгоймаг дзуры: «Не ’мбырды хистӕр нӕлгоймӕгты совет бирӕ аразы, чи ӕрлӕмӕгъ, уыдоны бӕрӕг кӕнынӕн. Ӕз хъуыды кодтон, кӕддӕр Библи кӕимӕ ахуыр кодтон ӕмӕ рӕстдзинад чи базыдта, иу ахӕм ӕфсымӕрыл. Ӕмбырдмӕ иу-25 азы бӕрц нал цыд. Бирӕ зындзинӕдтӕ бавзӕрста. Ӕз ын бамбарын кодтон, Библийы уагӕвӕрдтӕм гӕсгӕ куы архайа, уӕд ын уый куыд баххуыс кӕндзӕн. Цасдӕры фӕстӕ уыцы ӕфсымӕр райдыдта фембӕлдтӕм цӕуын ӕмӕ сразы Библи ахуыр кӕныныл, цӕмӕй бафидар уыдаид ӕмӕ фӕстӕмӕ дзугмӕ ’рбаздӕхтаид».
17 Цӕмӕн ӕрлӕмӕгъ уыцы ӕфсымӕр? Уый дзуры: «Хабӕрттӕ райдыдтой уымӕй, ӕмӕ Йегъовӕйы хъуыддӕгтӕй дунейы хъуыддӕгтӕм мӕ хъус тынгдӕр райдыдтон дарын. Уый фӕстӕ Библи нал кастӕн, хорз хабар нал хъусын кодтон ӕмӕ фембӕлдтӕм нал цыдтӕн. Ӕмбаргӕ дӕр ӕй нӕ бакодтон, ӕмбырдӕй куыд фӕиппӕрд дӕн. Фӕлӕ мыл уыцы хистӕр нӕлгоймаг зӕрдиагӕй кӕй батыхст, уый мын баххуыс кодта фӕстӕмӕ ӕрбаздӕхынӕн». Уыцы ’фсымӕрӕн йӕ зындзинӕдтӕ фӕкъаддӕр сты, Библи ахуыр кӕныныл куы сразы, уый фӕстӕ. Уый дзуры: «Ӕз ӕй бамбӕрстон, царды цӕмӕй фӕцух дӕн – Йегъовӕйы ӕмӕ йӕ организацийы уарзондзинад ӕмӕ разамындӕй».
18 Цымӕ куыд сӕмбӕлдысты уыцы ӕфсымӕрыл ӕмбырды? Уый дзуры: «Мӕхимӕ кастӕн, Йесо кӕй кой кодта, уыцы сӕфт фырты хуызӕн. 30 азы размӕ дӕр ӕмбырды чи уыд ӕмӕ ныр дӕр Йегъовӕйӕн иузӕрдионӕй чи лӕггад кӕны, иу ахӕм ацӕргӕ хо мын загъта: „Хъӕбул, ӕгас цу дӕ хӕдзармӕ!“ Уыцы ныхас мын мӕ зӕрдӕ бацагайдта. Ӕз ӕцӕгдӕр ӕрбаздӕхтӕн мӕ хӕдзармӕ! Ӕмӕ мӕ тынг фӕнды стыр бузныг зӕгъын уыцы хистӕр нӕлгоймагӕн ӕмӕ ӕгас ӕмбырдӕн дӕр, цы уарзондзинад мӕм равдыстой, сӕ зӕрдӕйы хъармӕй мӕ куыд батавтой, куыд фӕразон уыдысты ӕмӕ мыл куыд батыхстысты, уый тыххӕй. Хуыцауы ӕмӕ адӕмы куыд уарзынц, уый мын баххуыс кодта, цӕмӕй фӕстӕмӕ дзугмӕ ӕрбаздӕхтаин».
Разӕнгард сӕ кӕн, цӕмӕй фӕстиат ма кӕной!
19, 20. Чи ӕрлӕмӕгъ уыдоны дӕ бон куыд у разӕнгард кӕнын, цӕмӕй дзугмӕ ӕвӕстиатӕй ӕрбаздӕхой ӕмӕ сын дӕ бон куыд у бамбарын кӕнын, Хуыцау нӕ ӕгӕр бирӕ кӕй нӕ домы?
19 Мах цӕрӕм фӕстаг бонты ӕмӕ ацы дунейӕн тынг тагъд йӕ кӕрон ӕрцӕудзӕн. Уымӕ гӕсгӕ, чи ӕрлӕмӕгъ, уыдоны разӕнгард кӕн, цӕмӕй ӕвӕстиатӕй райдайой фембӕлдтӕм цӕуын. Сӕ зӕрдыл сын ӕрлӕууын кӕн, Сайтан кӕй архайы, Хуыцауӕй сӕ куыд адард кӕна ӕмӕ афтӕ куыд хъуыды кӕной, зӕгъгӕ, Хуыцауӕн куы нал лӕггад кӕнӕм, уӕд нӕ зындзинӕдтӕй ссӕрибар уыдзыстӕм. Бамбарын сын кӕн, Йесойы фӕдыл иузӕрдионӕй куы цӕуой, ӕрмӕстдӕр уӕд кӕй ссардзысты ӕцӕг удӕнцой. (Бакӕс Матфейы 11:28–30.)
20 Сӕ зӕрдыл сын ӕрлӕууын кӕн, Хуыцау, нӕ бон цы у, уымӕй нӕ фылдӕр кӕй нӕ домы. Лазӕры хо Марийӕйыл чидӕртӕ хъуыр-хъуыр кодтой, Йесойы йӕ мӕлӕты размӕ зынаргъ хӕрздӕф сойӕ куы байсӕрста, уӕд. Фӕлӕ сын Йесо загъта: «Ныууадзут ӕй. [...] Йӕ бон цы уыд, уый сарӕзта» (Марчы 14:6–8). Йесо раппӕлыд, кувӕндоны ӕхцавӕрӕны тынг гыццыл мысайнаг чи нывӕрдта, уыцы идӕдз усӕй. Уый дӕр сарӕзта, йӕ бон цы уыд, уый (Лук. 21:1–4). Нӕ фылдӕрӕн йӕ бон у фембӕлдтӕм цӕуын ӕмӕ Хуыцауы Паддзахады тыххӕй хорз хабар хъусын кӕнын. Чи ӕрлӕмӕгъ, уыдонӕй дӕр бирӕтӕн уый Йегъовӕйы фӕрцы сӕ бон бауыдзӕн.
21, 22. Йегъовӕмӕ чи ӕрбаздӕхы, уыдонӕн дӕ бон ныфс бавӕрын цӕмӕй у?
21 Дзугӕй чи адзӕгъӕл, уыцы адӕймаг куы тӕрса йе ’фсымӕртимӕ ногӕй фембӕлын, уӕд ын йӕ зӕрдыл ӕрлӕууын кӕн, сӕфт фырт хӕдзармӕ куы ӕрбаздӕхт, уӕд ыл куыд бацин кодтой, уый. Ӕмбырдмӕ чи ӕрбаздӕхы, уыдоныл дӕр афтӕ бацин кӕнынц. Разӕнгард сӕ кӕн, цӕмӕй Хӕйрӕджы ныхмӕ фӕлӕууой ӕмӕ Хуыцаумӕ баввахс уой (Иак. 4:7, 8).
22 Йегъовӕмӕ чи ӕрбаздӕхы, уыдоныл ӕмбырды зӕрдиагӕй бацин кӕнынц (Йер. хъ. 3:40). Кӕй зӕгъын ӕй хъӕуы, уыдон нӕ ферох кодтой, раздӕр Хуыцауӕн куы лӕггад кодтой, уӕд сын уый стыр циндзинад кӕй хаста. Дзугмӕ ӕвӕстиатӕй чи ӕрбаздӕхы, уыдонмӕ разӕй ӕнхъӕлмӕ кӕсы ноджы фылдӕр арфӕдзинӕдтӕ!
Цавӕр дзуапп ратдзынӕ?
• Дӕ бон куыд у баххуыс кӕнын, исчи кӕнӕ исты цӕлхдур кӕмӕн сси ӕмӕ чи ӕрлӕмӕгъ, ахӕм чырыстонӕн?
• Библийы ахуырӕдтӕй кӕцыдӕр ӕндӕрхуызон чи ӕмбары ӕмӕ уый тыххӕй Хуыцауы дзугӕй чи адзӕгъӕл, уымӕн цавӕр бӕлвырдгӕнӕнтӕ баххуыс кӕниккой?
• Куыд ис баххуыс кӕнӕн, ӕмбырдмӕ ӕрбаздӕхынмӕ йӕ ныфс чи нӕ хӕссы, ахӕм адӕймагӕн?
[Ныв 13 фарсыл]
Чи ӕрлӕмӕгъ, ахӕм чырыстон дын, йӕ зӕрдӕйы цы ис, уыдӕттӕ куы дзура, уӕд-иу ӕм лӕмбынӕг байхъус
[Ныв 15 фарсыл]
Йесо сӕфт фырты тыххӕй цы фӕсномыг ныхас радзырдта, ууыл хъуыдыгӕнгӕйӕ адӕймаджы, гӕнӕн ис, бафӕнда дзугмӕ ӕрбаздӕхын