Чи ӕрлӕмӕгъ, уыдоны ма рох кӕнӕм
1. Чи ӕрлӕмӕгъ, уыдонӕн цӕмӕн хъуамӕ ӕххуыс кӕнӕм?
1 Чи ӕрлӕмӕгъ, ахӕм хо кӕнӕ ӕфсымӕры зоныс? Чи зоны, ӕмбырдтӕм нал цӕуы ӕмӕ йӕ уырнындзинад ӕрлӕмӕгъ. Ахӕм адӕймагыл фембӕлӕн ис уацамынды. Ӕмӕ уӕд хъуамӕ нӕ зӕрдыл дарӕм: куыдфӕнды ма уа, уый ныр дӕр ма у нӕ хо кӕнӕ не ’фсымӕр. Мах фӕнды, кӕй йӕ уарзӕм, уый равдисын ӕмӕ йын баххуыс кӕнын, цӕмӕй ӕмбырдмӕ, стӕй нӕ «фыййаумӕ ӕмӕ нӕ цӕстдарӕгмӕ» раздӕха (1 Пет. 2:25).
2. Нӕ бон куыд у, чи ӕрлӕмӕгъ, ахӕм адӕймаджы бафидар кӕнын?
2 Батыхсӕм ыл. Чи ӕрлӕмӕгъ, ахӕм адӕймагмӕ телефонӕй куы бадзурӕм кӕнӕ йӕм куы бацӕуӕм, уӕд бамбардзӕн, рох нӕ кӕй нӕу. Цӕуыл у нӕ бон йемӕ аныхас кӕнын? Афтӕ йын куы зӕгъӕм, зӕгъгӕ дыл хъуыды кодтон, уӕд дӕр дзы ныфс бауадздзыстӕм. Ныхас кӕнӕм хорз хъуыддӕгтыл ӕмӕ, йӕ зӕрдӕ цӕмӕй бафидар уа, уыдӕттыл (Фил. 4:8). Зӕгъӕм, ӕрӕджы ӕмбырды цымыдисагӕй цы фехъуыстам, ууыл. Нӕ бон ма йӕ у ӕмбырдмӕ кӕнӕ конгресмӕ фӕхонын, бынат ын бацахсын кӕнӕ йӕ машинӕйыл ӕрбаласын.
3. Иу хо ногӕй ӕмбырдтӕм цӕуын куыд райдыдта?
3 20 азӕй фылдӕр ӕмбырдтӕм чи нӕ цыд, ахӕм хойыл фембӕлдысты хӕдзарӕй-хӕдзармӕ хъусын кӕнгӕйӕ. Кӕд ӕй ногӕй Библи ахуыр кӕнын нӕ бафӕндыд, уӕддӕр та-иу ӕм нӕ хо бацыд ӕмӕ-иу ын ног журналтӕ ныууагъта. Облӕстон конгрессы фӕстӕ та йӕ бабӕрӕг кодта ӕмӕ дзы цы ахсджиаг хъуыдытӕ уыд, уыдонӕй йын иуӕй-иутӕ радзырдта. Ӕппынфӕстаг та хо ӕмбырдтӕм цӕуын райдыдта.
4. Цы цӕстӕй хъуамӕ кӕсӕм, ногӕй ӕмбырдтӕм цӕуын чи райдыдта, уыдонмӕ?
4 Ӕххуыс кӕнӕм, чи ӕрлӕмӕгъ, уыдонӕн. Чи ӕрлӕмӕгъ, уыцы хо кӕнӕ ӕфсымӕр та ӕмбырдмӕ куы ’рбацӕуа, уӕд ӕм цы цӕстӕй хъуамӕ ракӕсӕм? Цымӕ Йесо та йӕхи куыд дардта, рӕстӕгмӕ йӕ чи ныууагъта, уыцы ахуыргӕнинӕгтимӕ? Йесо сӕ хӕларзӕрдӕйӕ схуыдта «ме ’фсымӕртӕ», зӕгъгӕ, ӕмӕ сыл кӕй ӕууӕнды, уый равдыста. Суанг ма сын сӕ бӕрны ахсджиаг хъуыддаг дӕр бакодта (Матф. 28:10, 18, 19). Уымӕй бирӕ нӕ рацыд, афтӕ йӕ ахуыргӕнинӕгтӕ «ӕнӕрынцойӕ» хъусын кодтой хорз хабар (Ап. хъ. 5:42).
5. Чи ӕрлӕмӕгъ, уыдоны тыххӕй хистӕр нӕлгоймӕгтӕн зӕгъын кӕд фӕхъӕуы?
5 Чи ӕрлӕмӕгъ, уымӕн цалынмӕ Библи ахуыр кӕныны тыххӕй зӕгъӕм кӕнӕ, уацамынды бирӕ рӕстӕг чи нӕ уыд, уый цалынмӕ немӕ хъусын кӕнынмӕ акӕнӕм, уӕдмӕ уал хъӕуы хистӕр нӕлгоймӕгты бафӕрсын. Кӕд ыл нӕ участокы фембӕлдыстӕм, уӕд хъуамӕ фӕхабар кӕнӕм хистӕр нӕлгоймӕгтӕн, цӕмӕй нын уыцы хъуыддаджы баххуыс кӕной.
6. Чи ӕрлӕмӕгъ, уыдонӕн куы ’ххуыс кӕнӕм, уӕд нӕ зӕрдӕ куыд барухс уыдзӕн?
6 Библи бӕлвырдӕй дзуры, зӕгъгӕ, уырнындзинады фӕндагыл кӕронмӕ чи азгъора, ӕрмӕстдӕр уыдон кӕй фервӕздзысты (Матф. 24:13). Уӕдӕ ма рох кӕнӕм, чи фӕкъуылымпы кӕнӕ чи ӕрлӕмӕгъ, уыдоны. Кӕд сӕм Йегъовӕйау фӕразон стӕм, уарзӕм сӕ ӕмӕ сыл тыхсӕм, уӕд нӕ зӕрдӕ барухс уыдзӕн, куы фенӕм, немӕ та ногӕй кӕй лӕггад кӕнынц, уый (Лук. 15:4–10).