Хуыцау дӕм йӕ цӕст дары

ИУӔЙ-ИУТӔ УУЫЛ ЦӔМӔН ДЫЗӔРДЫГ КӔНЫНЦ. Ӕрӕджы куыд сбӕрӕг кодтой, афтӕмӕй ӕрмӕст нӕ галактикӕйы ис ӕппынкъаддӕр 100 миллиард планетӕйы. Дун-дуне куыд стыр у, ууыл хъуыды кӕнгӕйӕ бирӕтӕм фӕзыны ахӕм фарста: «Нӕ гыццыл планетӕйыл хуымӕтӕг адӕм цы аразынц, уымӕ кӕсыны мӕт йеддӕмӕ ницы ис Ӕппӕтхъомысджын Сфӕлдисӕджы?»

ХУЫЦАУЫ НЫХАСЫ ЦЫ ФЫСТ ИС. Хабар афтӕ нӕу, ӕмӕ Хуыцау адӕмӕн Библи радта ӕмӕ йӕм уый фӕстӕ нымады дӕр нал сты. Йегъовӕ нын зӕрдӕ ӕвӕры: «Ратдзынӕн дын уынаффӕ ӕмӕ дӕм мӕ цӕст дардзынӕн» (Псалом 32:8).

Ӕркӕсӕм, н. э. размӕ 1900-ӕм азты чи цард, иу ахӕм египетаг сылгоймаг Агары хабармӕ. Агар йӕ хицау Сарӕмӕ ӕнӕрвӕссон цӕстӕй кӕй каст, уый тыххӕй йӕ Сарӕ афтӕ райдыдта ӕфхӕрын, ӕмӕ дзы ӕдзӕрӕг быдырмӕ фӕлыгъди. Уӕдӕ кӕд Агар раст нӕ бакодта, уӕд цымӕ Хуыцаумӕ нымады дӕр нал уыд? Библийы кӕсӕм: «Йегъовӕйы зӕд [ӕй] ссардта». Уыцы зӕд Агарӕн загъта: «Йегъовӕ [дын] дӕ дзыназын фехъуыста». Уый фӕстӕ Агар Йегъовӕйӕн загъта: «Ды дӕ алцыуынӕг Хуыцау» (Райдиан 16:4–13).

«Алцыуынӕг Хуыцау» дӕу дӕр уыны. Зӕгъӕм, мад йӕ цӕст тынгдӕр фӕдары йӕ гыццыл сывӕллӕттӕм. Сывӕллон цас къаддӕр у, уыйас ӕм тынгдӕр хъӕуы хъус дарын. Уӕдӕ махмӕ дӕр Хуыцау йӕ хъус тынгдӕр фӕдары, куы нӕ фефхӕрынц ӕмӕ лӕмӕгъ куы вӕййӕм, уӕд. «Ӕз цӕрын бӕрзонд ӕмӕ сыгъдӕг бынаты,– зӕгъы Йегъовӕ,– стӕй, ныфссаст ӕмӕ сӕрныллӕг чи у, уыдонимӕ, цӕмӕй сӕрныллӕг адӕмы ныфс бауадзон ӕмӕ, ныфссаст чи у, уыдонӕн сӕ зӕрдӕтӕ бафидар кӕнон» (Исай 57:15).

Фӕлӕ, чи зоны, ахъуыды кӕнай: «Хуыцау мӕм йӕ цӕст куыд дары? Ӕддейӕ бакӕсгӕйӕ куыд зынын, уымӕ гӕсгӕ кӕны хатдзӕгтӕ, цавӕр адӕймаг дӕн, уый тыххӕй? Ӕви арфдӕр кӕсы ӕмӕ, цавӕр удыхъӕды хицау дӕн, уый ӕцӕгдӕр зоны?»