СӔЙРАГ ТЕМӔ | ЦЫ ИС САРАЗӔН, ЦӔМӔЙ КЪАДДӔР МӔТ КӔНӔМ?
Мӕт ӕмӕ сагъӕстӕй хызт ничи у
«Хӕринаг ӕлхӕнынмӕ дуканимӕ ацыдтӕн, фӕлӕ дзы адджын гуылтӕ йеддӕмӕ ницы уыд, ӕмӕ уыдон дӕр – туджы аргъ! Дыккаг бон та дуканиты хӕринаг ӕппындӕр нал уыд» (Пол, Зимбабве).
«Мӕ лӕг мӕ ӕрбадын кодта ӕмӕ мын загъта, немӕ кӕй нал цӕрдзӕн. Ахӕм уӕззау цӕф куыд хъуамӕ сфӕразон? Куыд уыдзысты мӕ сывӕллӕттӕ?» (Джанет, Иугонд Штаттӕ).
«Сиренӕтӕ куы скусынц, уӕд пъадвалмӕ ныллидзын ӕмӕ, цалынмӕ ракетӕты гуыппытӕ нӕ банцайынц, уӕдмӕ пъолыл фӕхуыссын. Мӕ къухтӕ ма уый фӕстӕ дӕр цалдӕр сахаты зыр-зыр фӕкӕнынц» (Алёнӕ, Израил).
Мах цӕрӕм «тынг уӕззау рӕстӕг», нӕ цард йедзаг у мӕт ӕмӕ сагъӕстӕй (2 Тимофеймӕ 3:1). Адӕм мӕт кӕнынц, уымӕн ӕмӕ ӕхцайы бӕркад нал ис, бинонты цард хӕлы, хӕстытӕ цӕуы, мӕлӕтхӕссӕг низтӕ фӕзыны, ӕрдзон бӕллӕхтӕ ӕмӕ, адӕймаджы аххосӕй чи ӕрцӕуы, ахӕм ӕвирхъау хабӕрттӕ сарӕх сты. Уымӕй уӕлдай ма фӕмӕт кӕнӕм ӕндӕр цӕуылдӕрты дӕр, зӕгъӕм: «Мӕ буары цы къуыбар фӕзынд, уый, мыййаг, рак нӕу?» Кӕнӕ фӕхъуыды кӕнӕм: «Нӕ сывӕллӕттӕ цавӕр дунейы цӕрдзысты?»
Фӕлӕ мӕт кӕнын алы хатт ӕвзӕр нӕ вӕййы. Нӕ конд афтӕ у, ӕмӕ фӕтыхсӕм экзамены размӕ, бирӕ адӕмы раз нӕ дзурын куы фӕхъӕуы, йе та нӕ куыст агургӕйӕ хицауимӕ аныхас кӕнын куы фӕхъӕуы, уӕд. Куы йӕ фембарӕм, ӕмӕ нӕ цардӕн цӕмӕйдӕр тӕссаг у, уӕд нӕхи фыдбылызӕй бахъахъхъӕнӕм. Фӕлӕ адӕймаг ӕдзух кӕнӕ ӕгӕр куы мӕт кӕна, уӕд ын уый стыр зиан ӕрхӕсдзӕн. Ӕрӕджы ахуыргӕндтӕ сбӕлвырд кодтой, адӕймаг иу гыццыл дӕр куы мӕт кӕна, уӕд йӕ цард кӕй цыбырдӕр кӕны. Уыцы иртасӕн куысты рӕстӕг сӕ хъус дардтой 68 000 адӕймагмӕ. Уӕдӕ Йесо Чырысти дӕр дзӕгъӕлы нӕ бафарста: «Куы мӕт кӕнат, уӕд уӕ уымӕй йӕ цардыл иу гыццыл дӕр исчи бафтаудзӕн?» Ӕмӕ ӕцӕгдӕр, иу адӕймагӕн дӕр мӕт кӕнгӕйӕ йӕ царды бонтӕ нӕ фӕфылдӕр сты. Уымӕ гӕсгӕ Йесо радта ахӕм уынаффӕ: «Мауал мӕт кӕнут» (Матфейы 6:25, 27). Фӕлӕ уый нӕ къухы цӕй фӕрцы бафтдзӕн?
Уый тыххӕй хъуамӕ куырыхон зондӕй архайӕм, Хуыцауыл фидарӕй ӕууӕндӕм ӕмӕ архайӕм, цӕмӕй фидӕнмӕ ныфсджынӕй ӕнхъӕлмӕ кӕсӕм. Кӕд абон нӕ уавӕр тынг уӕззау нӕу, уӕддӕр, сомбон цы уыдзӕн, уый ничи зоны. Цӕй ӕмӕ базонӕм, уыцы хъуыддӕгтӕ Полӕн, Джанетӕн ӕмӕ Алёнӕйӕн куыд баххуыс кодтой, цӕмӕй ӕгӕр мауал мӕт кӕной.