Уазӕгуарзондзинад – ӕнӕмӕнг чи хъӕуы ӕмӕ циндзинад чи хӕссы, уыцы миниуӕг!
«Уӕ кӕрӕдзийы-иу ӕнӕ хъуыр-хъуырӕй суазӕг кӕнут» (1 ПЕТ. 4:9).
1. Фыццаг ӕнусы чырыстӕттӕ цавӕр уавӕры уыдысты?
НӔ ЭРӔЙЫ 62–64 азты апостол Павел ныффыста, «Понтмӕ, Галатимӕ, Каппадокимӕ, Азимӕ ӕмӕ Вифинимӕ чи фӕлыгъд, уыцы рӕтты рӕстӕгмӕ чи царди, уыцы ӕвзӕрстытӕм» (1 Пет. 1:1). Уыцы чырыстӕттӕ уыдысты алы рӕттӕй. «Фӕлварӕнты арты кӕй бахаудысты», ома сӕ фӕдыл кӕй зылдысты ӕмӕ сӕ алы ӕфхӕрӕн ныхӕстӕ кӕй кодтой, уый тыххӕй сӕ хъуыди бафидар кӕнын ӕмӕ сын бацамонын, дарддӕр сын цы кӕнгӕ у, уый. Уымӕй уӕлдай ма уыдон цардысты тынг тӕссаг рӕстӕджы. Петр ныффыста: «Тагъд алцӕмӕн дӕр ӕрцӕудзӕн кӕрон». Ӕмӕ ӕцӕгдӕр, уымӕй дӕс азы дӕр нӕ рацыд, афтӕ ромӕгтӕ Иерусалим ныппырх кодтой. Цымӕ уыцы зын рӕстӕг чырыстӕттӕн фидар фӕлӕууынӕн цы баххуыс кодта? (1 Пет. 4:4, 7, 12).
2, 3. Петр чырыстӕтты цӕмӕн разӕнгард кодта, цӕмӕй-иу кӕрӕдзийы суазӕг кодтаиккой? (Кӕс нывмӕ статьяйы райдианы.)
2 Петр чырыстӕтты разӕнгард кодта, цӕмӕй-иу «кӕрӕдзийы... суазӕг кодтаиккой» (1 Пет. 4:9). Дзырд «уазӕгуарзондзинад»-ӕй цы грекъаг дзырд ӕрцыд тӕлмац, уый комкоммӕ нысан кӕны «хӕларзӕрдӕдзинад ӕцӕгӕлӕттӕм». Фӕлӕ ацы ран Петр ӕцӕгӕлӕтты суазӕг кӕныны кой нӕ кодта, фӕлӕ чырыстӕттӕн дзырдта, цӕмӕй-иу «кӕрӕдзийы», ома, хорз кӕй зыдтой ӕмӕ Хуыцауы хъуыддаджы иумӕ кӕимӕ архайдтой, уыдоны, суазӕг кодтаиккой. Цымӕ сын уый куыд баххуыс кодтаид?
3 Уый фӕрцы кӕрӕдзимӕ ӕнгомдӕр кодтаиккой. Дӕуӕй та цы зӕгъӕн ис? Исчи дӕ йӕхимӕ уазӕгуаты куы фӕхоны, уӕд дын ӕхсызгон нӕ вӕййы, уӕ рӕстӕг иумӕ кӕй арвитут, уый? Ӕмӕ дӕхӕдӕг дӕр уазӕгуаты искӕй фӕхоныс? Кӕд о, уӕд тынгдӕр нӕ балымӕн вӕййут? Ӕцӕгдӕр, де ’мбырды хотӕ ӕмӕ ӕфсымӕрты хуыздӕр базонай, уымӕн хорз мадзал у уазӕгуарзондзинад ӕвдисын. Петры рӕстӕджы чи цард, уыцы чырыстӕтты хъуыди кӕрӕдзиимӕ ӕнгомдӕр кӕнын, уымӕн ӕмӕ царды уавӕртӕ фыддӕрӕй-фыддӕр кодтой. Ӕмӕ уый зӕгъӕн ис махӕй дӕр, уымӕн ӕмӕ цӕрӕм «фӕстаг бонты» (2 Тим. 3:1).
4. Ацы статьяйы дзырд цавӕр фарстатыл цӕудзӕн?
4 Цымӕ нын кӕрӕдзийы суазӕг кӕнынӕн цавӕр фадӕттӕ ис? Нӕ бон цы у аразын, цӕмӕй нӕ мацы къуылымпы кӕна уазӕгуарзондзинад ӕвдисын? Ӕмӕ нӕхӕдӕг хорз уазджытӕ цӕй фӕрцы уыдзыстӕм?
УАЗӔГУАРЗОНДЗИНАД РАВДИСЫНӔН НЫН ЦАВӔР ФАДӔТТӔ ИС
5. Ӕмбырды нӕ бон куыд у уазӕгуарзондзинад равдисын?
5 Ӕмбырды. Ӕмбырдтӕм нӕ фӕхонынц Йегъовӕ ӕмӕ йӕ организаци. Ӕмӕ не ’мбырдтӕм чи ӕрбацӕуы, уыдонӕй алкӕуыл дӕр, уӕлдайдӕр та ногтыл, зӕрдиагӕй бацин кӕнӕм (Ром. 15:7). Уыдон дӕр махау Йегъовӕйы уазджытӕ сты. Уӕдӕ-иу сӕм хъуамӕ хӕларзӕрдӕ уӕм, сӕ уынд ӕмӕ сӕ конд цавӕрфӕнды ма уой, уӕддӕр (Иак. 2:1–4). Кӕд ӕй бафиппайдтам, ӕмӕ ӕмбырдмӕ ног чидӕр ӕрбацыд ӕмӕ дзы никӕй зоны, уӕд ӕй нӕ бон нӕ уаид нӕ фарсмӕ сбадын кӕнын? Ӕмбырды рӕстӕг ын куы ’ххуыс кӕнӕм, ныхас цӕуыл цӕуы ӕмӕ дарддӕр та цы уыдзӕн, уый бамбарынӕн ӕмӕ-иу ын Библийы стихтӕ ссарынӕн куы баххуыс кӕнӕм, уӕд нӕ, ӕвӕццӕгӕн, фӕбузныг уыдзӕн. Ӕмӕ уӕд махӕй дӕр зӕгъӕн уыдзӕн, уазӕгуарзон кӕй стӕм (Ром. 12:13).
6. Уазӕгуарзондзинад фыццаджыдӕр кӕмӕ хъуамӕ ӕвдисӕм?
6 Искӕй нӕхимӕ къӕбӕр ахӕрынмӕ фӕхонӕм. Рагзаманты-иу адӕймаг йӕ хӕдзармӕ уазӕджы куы фӕхуыдта, уӕд-иу ӕй истӕмӕй федта. Афтӕмӕй-иу равдыста, хорз зӕрдӕ йӕм кӕй дары (Райд. 18:1–8; Тӕрх. 13:15; Лук. 24:28–30). Цымӕ мах та уазӕгуарзондзинад кӕмӕ хъуамӕ ӕвдисӕм? Кӕй зӕгъын ӕй хъӕуы, фыццаджыдӕр не ’мбырды хотӕ ӕмӕ ӕфсымӕртӕм. Ахӕм рӕстӕг куы ралӕууа, ӕмӕ цард бынтон уӕззау куы суа, уӕд нӕ нӕ кӕрӕдзийы ӕххуыс куыннӕ хъӕудзӕн. Уымӕ гӕсгӕ хъуамӕ кӕрӕдзимӕ хорз зӕрдӕ дарӕм ӕмӕ кӕрӕдзиимӕ фӕрнӕй цӕрӕм. 2011 азы Разамонӕг совет ахӕм уынаффӕ рахаста, цӕмӕй Иугонд Штатты Вефилы бинонты ахуыры рӕстӕг фӕивтаиккой. Кӕд-иу раздӕр 18:45 райдыдта, уӕд ныр та райдайы 18:15. Цымӕ ахӕм уынаффӕ цӕмӕн рахастой? Уӕд вефилӕгтӕн загътой, афтӕмӕй сын бинонты ахуыры фӕстӕ фылдӕр рӕстӕг кӕй уыдзӕн кӕрӕдзийы уазӕгуаты хонынӕн. Ӕмӕ уыдонмӕ гӕсгӕ бинонты ахуыры рӕстӕг фӕивтой иннӕ филиалты дӕр. Уыцы ивындзинады руаджы Вефилы бинонтӕ кӕрӕдзиимӕ ноджы ӕнгомдӕр систы.
7, 8. Не ’мбырдмӕ раныхӕстимӕ цы ӕфсымӕртӕ ӕрбацӕуы, уыдонмӕ нӕ бон куыд у уазӕгуарзондзинад равдисын?
7 Ӕндӕр ӕмбырдӕй нӕм ӕфсымӕртӕ раныхӕстимӕ куы ’рбацӕуынц кӕнӕ та нын не ’мбырд районон цӕстдарӕг йе та хатгай филиалӕй ӕрвыст ӕфсымӕр куы бабӕрӕг кӕны, уӕд нын уый хорз фадат вӕййы, цӕмӕй нӕ уазӕгуарзондзинад равдисӕм. (Бакӕс 3 Иоанны 5–8.) Зӕгъӕм, нӕ бон сӕ вӕййы нӕхимӕ къӕбӕр ахӕрынмӕ фӕхонын.
8 Иугонд Штаттӕй иу хо радзырдта: «Бирӕ азты дӕргъы-иу мӕ сӕрыхицауимӕ нӕ хӕдзары суазӕг кодтам, раныхӕстӕ-иу кӕмӕн уыд, ахӕм ӕфсымӕрты ӕмӕ сӕ бинойнӕгты. Ӕмӕ-иу алы хатт дӕр нӕ рӕстӕг хъӕлдзӕгӕй арвыстам. Сӕйраджыдӕр та-иу уый фӕрцы нӕ уырнындзинад бафидар. Кӕй-иу сӕ суазӕг кодтам, ууыл никуы фӕфӕсмон кодтам».
9, 10. а) Цасдӕр рӕстӕгмӕ цӕрӕнбынат кӕй фӕхъӕуы? б) Цымӕ, хуымӕтӕг цард чи кӕны, уыдонӕн дӕр сӕ бон у уыцы хъуыддаджы баххуыс кӕнын? Ӕрхӕсс цӕвиттон.
9 Цасдӕр рӕстӕг нӕм цӕрынмӕ чи баззайы, ахӕм уазджытӕ. Рагзаманты-иу ахӕм ӕгъдау уыд, ӕмӕ-иу фысым кӕй суазӕг кодта, уыдоны-иу хатт йӕ хӕдзары цасдӕр рӕстӕг цӕрын бауагъта (Иов 31:32; Филим. 22). Ӕмӕ абон мах дӕр хатгай бахъӕуы искӕй цасдӕр рӕстӕгмӕ суазӕг кӕнын. Зӕгъӕм, арӕх цӕрӕнбынат фӕхъӕуы районон цӕстдарджыты, ӕмбырдтӕ куы фӕбӕрӕг кӕнынц, уӕд. Ахӕм цӕрӕнбынӕттӕ ма хатгай фӕхъӕуы, нӕ организацийы скъолаты чи фӕахуыр кӕны кӕнӕ арӕзтадон куыстыты чи фӕархайы, уыдонӕй дӕр кӕйдӕрты. Иуӕй-иу бинонтӕ ӕнӕ хӕдзарӕй баззайынц ӕрдзон бӕллӕхты тыххӕй, ӕмӕ цалынмӕ сӕ хӕдзӕрттӕ цалцӕггонд не ’рцӕуынц, уӕдмӕ сӕ фӕхъӕуы, кӕм ацӕрой, ахӕм бынат. Хъуамӕ афтӕ ма хъуыды кӕнӕм, ӕмӕ ахӕм адӕмы суазӕг кӕнын йӕ бон у, хорз хӕдзар кӕмӕн ис, ӕрмӕстдӕр уыдонӕн. Чи зоны, уыдон ӕнӕуи дӕр ахӕм хорздзинад бирӕ хӕттыты сарӕзтой. Мыййаг, дӕуӕн дӕр дӕ бон нӕу дӕ хӕдзары цасдӕр рӕстӕгмӕ искӕй суазӕг кӕнын, кӕд дӕ хӕдзар гыццыл у, уӕддӕр?
10 Хуссар Корейӕ иу ӕфсымӕр хъуыды кӕны, нӕ организацийы скъолаты-иу чи ахуыр кодта, уыдоны-иу куыд суазӕг кодта, уый. Уый ныффыста: «Раздӕр мӕм худинаг каст искӕй нӕ хӕдзармӕ ацӕрынмӕ фӕхонын, уымӕн ӕмӕ уӕд нырма ног бинонтӕ уыдыстӕм ӕмӕ хуымӕтӕг цард кодтам. Фӕлӕ-иу нӕм уыцы хотӕ ӕмӕ ӕфсымӕртӕ куы ’рлӕууыдысты, уӕд-иу нӕ рӕстӕг тынг хъӕлдзӕгӕй арвыстам. Уыдонмӕ кӕсгӕйӕ мӕ бинойнагимӕ уыдтам, Хуыцауы хъуыддаджы фылдӕр аразынмӕ чи фӕтырны, уыцы бинонтӕ куыд амондджын вӕййынц, уый».
11. Ӕмбырды ног хотӕ ӕмӕ ӕфсымӕртӕм уазӕгуарзондзинад ӕвдисын цӕмӕн хъӕуы?
11 Не ’мбырды ногтӕ куы фӕзына. Гӕнӕн ис, кӕм цӕрӕм, уырдӕм ӕндӕр рӕттӕй цӕрынмӕ ӕрлидзой хотӕ ӕмӕ ӕфсымӕртӕ кӕнӕ ма ӕнӕхъӕн бинонтӕ дӕр. Чидӕртӕ та нӕм, гӕнӕн ис, ӕрцӕуой, цӕмӕй хъусын кӕныны хъуыддаджы баххуыс кӕной. Уыдонӕй алкӕй дӕр фӕхъӕуы ног цӕуылдӕрты ахуыр кӕнын. Фӕхъӕуы сӕ ног ӕвзаг сахуыр кӕнын, стӕй ма-иу хъуамӕ сахуыр уой ног бынатыл, ног ӕмбырдыл ӕмӕ ног ӕгъдӕуттыл. Уӕдӕ-иу сӕ нӕхимӕ уазӕгуаты кӕнӕ искуыдӕм хи аирхӕфсынмӕ куы фӕхонӕм, уӕд сын ӕнцондӕр уыдзӕн ног ӕмбӕлттӕ ссарын, стӕй сӕ ног уавӕртыл дӕр тагъддӕр сахуыр уыдзысты.
12. Цӕмӕн ис афтӕ зӕгъӕн, ӕмӕ уазӕгуарзондзинад равдисынӕн стыр фынгтӕ ӕрӕвӕрын ӕнӕмӕнг нӕу? Ӕрхӕсс цӕвиттон.
12 Уазӕгуарзондзинад равдисынӕн ӕнӕмӕнг нӕу, ӕмӕ стыр фынгтӕ ӕрӕвӕрай. (Бакӕс Лукайы 10:41, 42.) Иу ӕфсымӕр радзырдта, йӕ бинойнагимӕ миссионертӕй лӕггад кӕнын куы райдыдтой, уӕд сыл цы хабар ӕрцыд, уый тыххӕй: «Уӕд уыдыстӕм ӕрыгон ӕмӕ ӕвӕлтӕрд, стӕй нӕ хӕдзар ӕмӕ не ’мбӕлтты тынг мысыдыстӕм. Иу изӕр мӕ бинойнаджы фӕстӕмӕ нӕхимӕ афтӕ тынг ӕрфӕндыд, ӕмӕ ма йын цы акодтаин, уый нал зыдтон. Уалынмӕ нӕм иу-асты ӕрдӕгыл чидӕр ӕрбахоста. Уый разынд, Библи чи ахуыр кодта, иу ахӕм сылгоймаг, йӕ къухы уыд ӕртӕ апельсины. Фӕндыд ӕй махыл, ног миссионертыл, бацин кӕнын. Мидӕмӕ йӕ фӕхуыдтам ӕмӕ йын дон авӕрдтам. Стӕй цай скодтам ӕмӕ шоколад сфыхтам. Уӕд ӕвзаг суахили нӕма зыдтам, уый та англисаг ӕвзаг нӕ зыдта. Фӕлӕ уыцы хабары фӕстӕ бынӕттон хотӕ ӕмӕ ӕфсымӕртӕй бирӕтимӕ балымӕн стӕм, ӕмӕ нын уый уыд стыр цины хос».
УАЗӔГУАРЗОНДЗИНАД ӔВДИСЫН НӔ МАЦЫ КЪУЫЛЫМПЫ КӔНӔД
13. Уазӕгуарзон адӕймаг цавӕр хорздзинӕдтӕй вӕййы хайджын?
13 Мыййаг дын искуы афтӕ уыди, ӕмӕ-иу цӕйдӕр тыххӕй уӕхимӕ уазджыты нӕ фӕхуыдтай? Кӕд о, уӕд, гӕнӕн ис, дӕхи ӕнӕхай фӕкодтай цавӕрдӕр хорздзинӕдтӕй. Адӕймагӕн йӕ хӕдзары уазджытӕ куы вӕййы, уӕд йӕ рӕстӕг хъӕлдзӕгӕй арвиты ӕмӕ ма йӕхицӕн хорз ӕмбӕлттӕ дӕр ссары. Уазӕгуарзон чи у, уымӕ афтӕ никуы кӕсдзӕн, ӕмӕ никӕй хъӕуы. Фӕлӕ, чи зоны, зӕгъай, зӕгъгӕ, уый гӕнӕн куыд ис, ӕмӕ дӕ уӕхимӕ искӕй фӕхонын ма фӕнда. Уымӕн вӕййы цалдӕр аххосаджы.
14. Нӕ бон цы у саразын, уазджыты хонынӕн кӕнӕ нын уазӕгуаты цӕуынӕн фаг рӕстӕг ӕмӕ хъарутӕ куы нӕ уа, уӕд?
14 Рӕстӕг ӕмӕ хъарутӕ. Йегъовӕйы Ӕвдисӕнтӕн бирӕ хъуыддӕгтӕ вӕййы ӕмӕ сӕ арӕх фӕхъӕуы цавӕрдӕр хӕстӕ ӕххӕст кӕнын. Ӕмӕ сӕ уый тыххӕй кӕмӕдӕрты, чи зоны, афтӕ кӕса, ӕмӕ сын сӕ хӕдзармӕ уазджыты фӕхонынӕн нӕдӕр рӕстӕг ис, нӕдӕр хъарутӕ. Кӕд, мыййаг, дӕуӕн дӕр дӕ хабар афтӕ у, уӕд дӕ, чи зоны, хъӕуы дӕ графикыл ахъуыды кӕнын. Мыййаг дзы фӕивӕн ницы ис, цӕмӕй дӕ бон уа уазджыты хонын ӕмӕ уазӕгуаты цӕуын? Библи чырыстӕттӕн фӕдзӕхсы, уазӕгуарзон кӕй хъуамӕ уой (Дзут. 13:2). Уӕдӕ, уыцы хъуыддагӕн рӕстӕг рахицӕн кӕнай, уый хорз у. Фӕлӕ дӕ уый тыххӕй, чи зоны, бахъӕуа, афтӕ ахсджиаг чи нӕу, уыцы хъуыддӕгтыл къаддӕр рӕстӕг хардз кӕнын.
15. Иуӕй-иутӕ уазджыты фӕхонынмӕ сӕ ныфс цӕуылнӕ фӕхӕссынц?
15 Уазджыты фӕхонынмӕ дӕ ныфс куы нӕ хӕссай. Чи зоны дӕ кӕйдӕрты уазӕгуаты фӕхонын фӕфӕнды, фӕлӕ дӕ ныфс нӕ фӕхӕссыс. Чи зоны, ӕфсӕрмыгӕнаг дӕ ӕмӕ тӕрсыс, мыййаг, мӕ уазджытӕ бадтӕй райгондӕй куы нӕ баззайой. Кӕнӕ та, гӕнӕн ис, иуӕй-иу хотӕ ӕмӕ ӕфсымӕртимӕ абаргӕйӕ хъӕздыг цард нӕ кӕныс, ӕмӕ тыхсыс, дӕ хӕдзары дӕ уазджытӕн сӕ зӕрдӕмӕ кӕй нӕ фӕцӕудзӕн. Фӕлӕ дӕ рох ма уӕд, сӕйраг уый кӕй нӕу, ӕмӕ дын хорз хӕдзар уа. Сӕйраг у, цӕмӕй дӕм ӕфснайд ӕмӕ сыгъдӕг уа ӕмӕ дӕ уазджытӕ уыной, се ’рбацыд дын ӕхсызгон кӕй у.
16, 17. Уазджыты фӕхонынмӕ дӕ ныфс куы нӕ хӕссай, уӕд дын цы баххуыс кӕндзӕн?
16 Кӕд дӕ хӕдзармӕ уазджыты фӕхонынмӕ дӕ ныфс нӕ хӕссыс, уӕд ӕй зон, ӕрмӕст ды кӕй нӕ дӕ ахӕм уавӕры. Великобританийӕ иу хистӕр нӕлгоймаг загъта: «Адӕймаг уазджыты куы фӕхоны, уӕд хатгай тыхсгӕ дӕр фӕкӕны, се ’рбацыдмӕ йӕхи куы фӕцӕттӕ кӕны, уӕд. Йегъовӕйӕн лӕггад кӕнгӕйӕ дӕр адӕймаг, гӕнӕн ис, цӕуылдӕрты тыхса, фӕлӕ уый цы хорздзинӕдтӕ ӕмӕ цы циндзинад ӕрхӕссы, уыдон уый аргъ сты. Уазӕгуарзондзинадӕн дӕр йӕ хабар афтӕ у. Мӕ уазджытимӕ ӕрмӕст къофи дӕр куы фӕнуазын, уӕддӕр мын ӕхсызгон вӕййы семӕ мӕ рӕстӕг ӕрвитын». Рох дӕ ма уӕд, ахсджиаг кӕй у, цӕмӕй дӕ уазӕг ӕмбара, кӕй йын аргъ кӕныс (Фил. 2:4). Ӕвӕццӕгӕн, ахӕм адӕймаг нӕй, йӕ царды хабӕрттӕ дзурын чи ма уарза. Ӕмӕ хатгай кӕрӕдзи хуыздӕр базонӕн ӕрмӕстдӕр бадтыты рӕстӕг вӕййы. Иу хистӕр нӕлгоймаг ныффыста: «Ме ’мбырдӕй искӕйты уазӕгуаты куы фӕхонын, уӕд семӕ хуыздӕр базонгӕ вӕййын, стӕй мын фадат вӕййы, цӕмӕй-иу, рӕстдзинад куыд базыдтой, уымӕй сӕ бафӕрсон». Уӕдӕ-иу дӕ уазджытыл зӕрдиагӕй куы баузӕлай, уӕд-иу се ’ппӕт дӕр райгондӕй баззайдзысты.
17 Пионерӕй чи лӕггад кӕны, иу ахӕм хо-иу арӕх суазӕг кодта, нӕ организацийы алыхуызон скъолаты чи ахуыр кодта, ахӕм хотӕ ӕмӕ ӕфсымӕрты, ӕмӕ мӕнӕ цы радзырдта: «Фыццӕгты-иу тынг тыхстӕн, уымӕн ӕмӕ хъӕздыг цард нӕ кӕнын, цы мебель мӕм ис, уый дӕр кӕйдӕр зӕронд мебель у. Уыцы скъолаты ахуыргӕнджытӕй мын иуы бинойнаг баххуыс кодта, цӕмӕй уыцы хъуыддагмӕ раст цӕстӕй ракастаин. Уый мын загъта, йӕ сӕрыхицауимӕ къуырийӕ-къуыримӕ алыхуызон ӕмбырдтӕ куы фӕбӕрӕг кӕнынц, уӕд алыхуызон адӕммӕ кӕй ӕрлӕууынц. Фӕлӕ сын ӕппӕты ӕхсызгондӕр вӕййы, уыдонау йӕ сӕйраг нысан Йегъовӕйӕн лӕггад кӕнын ӕмӕ хуымӕтӕг цард кӕнын кӕмӕн у, ахӕм адӕймагмӕ куы ӕрлӕууынц, уӕд, кӕд хъӕздыг нӕ вӕййы, уӕддӕр. Йӕ ныхӕстӕ мын мӕ зӕрдыл ӕрлӕууын кодтой, гыццылӕй нын нӕ мад цы дзырдта, уый, зӕгъгӕ, дам, уӕм фӕлтау халсартӕй хӕринаг уӕд, ӕмӕ кӕрӕдзи уарзут» (Ӕмб. 15:17). Уӕдӕ тыхсын ницӕуыл хъӕуы, уымӕн ӕмӕ ахсджиагдӕр у, уазӕгуарзондзинад равдисынмӕ нӕ уарзондзинад разӕнгард кӕна, уый.
18, 19. Уазӕгуарзондзинад нын куыд баххуыс кӕндзӕн, цӕмӕй иннӕтӕм хорз зӕрдӕ дарӕм?
18 Кӕмӕдӕрты хорз зӕрдӕ куы нӕ дарай. Мыййаг, де ’мбырды ахӕм исчи ис, ӕмӕ йӕм хорз зӕрдӕ нӕ дарыс? Уыцы ӕнкъарӕнтимӕ куы нӕ тох кӕнай, уӕд уавӕр хуыздӕр нӕ фӕуыдзӕн. Чи зоны дӕ ма фӕнда, дӕ зӕрдӕмӕ чи нӕ цӕуы, уыцы адӕймаджы уазӕгуаты фӕхонын. Кӕнӕ дӕ, чи зоны, чидӕр кӕддӕр фӕхъыг кодта, ӕмӕ дын зын у, цӕмӕй йын йӕ рӕдыд ныббарай.
19 Библимӕ гӕсгӕ, иннӕтимӕ, суанг ма не знӕгтимӕ дӕр, бафидауынӕн хорз мадзал у уазӕгуарзондзинад равдисын. (Бакӕс Ӕмбисӕндтӕ 25:21, 22.) Адӕймаджы дӕ хӕдзармӕ куы фӕхонай, уӕд ӕм, чи зоны, ӕндӕр цӕстӕй кӕсын ӕмӕ йӕм хорз зӕрдӕ дарын райдайай. Чи зоны, афтӕмӕй фенай, Йегъовӕ йӕ йӕхимӕ цы миниуджыты тыххӕй ӕрбакодта, уыдон (Иоан. 6:44). Адӕймаджы, уый ӕнхъӕл куы нӕ уа, афтӕмӕй уазӕгуаты куы фӕхонай, уӕд, чи зоны, хорз ӕмбӕлттӕ дӕр суат. Цымӕ цы ис саразӕн, цӕмӕй дӕ уазӕгуарзондзинад ӕвдисынмӕ уарзондзинад разӕнгард кӕна? Уымӕн иу хорз мадзал у Филиппӕгтӕм 2:3 стихы фыст уагӕвӕрдмӕ гӕсгӕ архайын: «Ут сӕрныллӕг ӕмӕ иннӕты уӕхицӕй уӕлдӕр ӕвӕрут». Хъуамӕ ӕмбарӕм, хотӕ ӕмӕ ӕфсымӕртӕй алчидӕр махӕй цӕмӕйдӕр хуыздӕр кӕй у. Чи зоны нын фӕзминаг сты сӕ уырнындзинадӕй, сӕ фидардзинадӕй кӕнӕ ӕндӕр чырыстон миниуджытӕй. Сӕ хорз миниуджытыл сын куы хъуыды кӕнӕм, уӕд сӕ тынгдӕр уарздзыстӕм ӕмӕ нын ӕнцондӕр уыдзӕн, цӕмӕй сӕм уазӕгуарзондзинад ӕвдисӕм.
ХОРЗ УАЗДЖЫТӔ ЦӔЙ ФӔРЦЫ УЫДЗЫСТӔМ?
Фысымтӕ уазджыты ӕрбацыдмӕ алцыдӕр бацӕттӕ кӕнынц (кӕс 20 абзац)
20. Уазӕгуаты ацӕуыныл куы сразы уӕм, уӕд нӕ ныхас цӕуылнӕ хъуамӕ фӕсайӕм ӕмӕ, нӕ фысымтӕн кӕй аргъ кӕнӕм, уый нӕ бон куыд у равдисын?
20 Псаломзарӕггӕнӕг Давид ныффыста: «О Йегъовӕ, кӕй суазӕг кӕндзынӕ дӕ цатыры?» (Пс. 15:1). Уый фӕстӕ ныффыста, Йегъовӕ, кӕй суазӕг кӕны, уыдонмӕ цӕмӕ ӕнхъӕлмӕ кӕсы, ома сӕм цавӕр миниуджытӕ хъуамӕ уа, уый тыххӕй. Уыцы миниуджытӕй сӕ иу баст у, адӕймаг йӕ ныхасӕн хицау кӕй хъуамӕ уа, уыимӕ. Библийы уый тыххӕй фыст ис: «Йӕ сомыйӕ йӕхицӕн зиан куы уа, уӕд дӕр йӕ ныхас нӕ ивы» (Пс. 15:4). Раст нӕ уыдзӕн, кӕмӕдӕр уазӕгуаты ацӕуыныл куы сразы уӕм, фӕлӕ стӕй исты куы сӕфсон кӕнӕм ӕмӕ куы нал ацӕуӕм. Чи нӕ фӕхуыдта, уый, чи зоны, цыдӕртӕ ӕрцӕттӕ кодта, ӕмӕ йын афтӕ куы зӕгъӕм, не ’рбацӕудзынӕн, зӕгъгӕ, уӕд йӕ фыдӕбон дзӕгъӕлы фӕуыдзӕн (Матф. 5:37). Иуӕй-иутӕ, кӕмӕдӕр уазӕгуаты ацӕуыныл куы сразы вӕййынц, фӕлӕ сӕ стӕй ӕндӕр исчи куы фӕхоны, уӕд уырдӕм ацӕуынц, зӕгъгӕ, уым хуыздӕр уыдзӕн. Фӕлӕ цымӕ уый ууыл дзурӕг уыдзӕн, ӕмӕ нӕ фыццаг чи фӕхуыдта, уыцы хо кӕнӕ ӕфсымӕры уарзӕм ӕмӕ йын аргъ кӕнӕм? Кӕй зӕгъын ӕй хъӕуы, нӕ. Уӕдӕ-иу хъуамӕ бузныг уӕм, кӕй нӕ фӕхуыдтой, уый тыххӕй, кӕд нын нӕ разы стыр фынгтӕ не ’рӕвӕрой, уӕддӕр (Лук. 10:7). Ӕмӕ, мыййаг, нӕ уавӕртӕ куы фӕивой ӕмӕ нын уазӕгуаты ацӕуын ӕцӕгдӕр куы нӕ уайа, уӕд хъуамӕ нӕ фысымты, гӕнӕн уӕвгӕйӕ, уый тыххӕй рагацау бафӕдзӕхсӕм.
21. Бынӕттон ӕгъдӕуттӕ нӕ зӕрдыл куы дарӕм, уӕд нын уый куыд баххуыс кӕндзӕн, цӕмӕй нӕ хорз уазджытӕ схонӕн уа?
21 Ахсджиаг ма у, цӕмӕй-иу бынӕттон ӕгъдӕуттӕ нӕ зӕрдыл дарӕм. Иуӕй-иу бӕстӕты афтӕ у, ӕмӕ уазӕг ӕнӕнхъӕлӕджы куы ’рбацӕуы, уӕд уый фысымӕн ӕхсызгон вӕййы. Кӕцыдӕр бӕстӕты та уазӕгуаты ӕнӕхонгӕйӕ цӕуын не ’мбӕлы. Иуӕй-иу рӕтты фысым уазӕджы раз ӕрӕвӕры хуыздӕр хӕринӕгтӕ. Кӕцыдӕр бӕстӕты та уазӕг дӕр ӕмӕ фысымы бинонтӕ дӕр уыцы иу хӕринӕгтӕ фӕхӕрынц. Иуӕй-иу бӕстӕты аив нӕу, уазӕг афтидкъухӕй ӕрбацӕуа, уый. Кӕмдӕрты та фысымы нӕ фӕфӕнды, цӕмӕй уазӕг йӕхи батыхсын кӕна. Иуӕй-иу адӕмыхӕттытӕм ахӕм ӕгъдау ис, ӕмӕ дӕ исчи уазӕгуаты куы хона, уӕд ын фыццаг дыууӕ хатты хъуамӕ уӕзданӕй зӕгъай, нӕ мын уайы, зӕгъгӕ. Кӕцыдӕр адӕмыхӕттытӕм та афтӕ у, ӕмӕ дӕ адӕймаг куы фӕхона, уӕд ын, нӕ, зӕгъгӕ, дзурын, не ’мбӕлы. Уӕдӕ-иу хъуамӕ архайӕм, цӕмӕй-иу нӕ нӕ фысым райгондӕй баззайа.
22. Уазӕгуарзон уӕм, уый ахсджиаг цӕмӕн у?
22 Петр загъта: «Тагъд алцӕмӕн дӕр ӕрцӕудзӕн кӕрон» (1 Пет. 4:7). Кӕрон ныртӕккӕ куыд хӕстӕг у, афтӕ никуыма. Разӕй нӕм ӕнхъӕлмӕ кӕсы, чи никуыма уыд, ахӕм стыр бӕллӕх. Ӕмӕ ацы дунейы цард цас фыддӕр кӕна, уыйас нӕ хъӕудзӕн тынгдӕр архайын, цӕмӕй нӕ хотӕ ӕмӕ не ’фсымӕртимӕ нӕ уарзондзинады тӕгтӕ фидардӕр кӕной. Уӕдӕ абон уӕлдай ахсджиаг у Петры уынаффӕмӕ гӕсгӕ архайын, «уӕ кӕрӕдзийы-иу... суазӕг кӕнут», зӕгъгӕ (1 Пет. 4:9). Ӕцӕгдӕр, уазӕгуарзондзинад у, циндзинад чи хӕссы, стӕй нӕ абон дӕр ӕмӕ ӕнустӕм дӕр чи хъӕудзӕн, ахӕм миниуӕг!