Хорз уацхъуыд хъусынгӕнгӕйӕ хъуамӕ уӕм ӕмбаргӕ
1 Хуыцауы удцырынӕй фыст фӕсномыг ныхасы дзырдӕуы: «Ӕмбаргӕдзинадӕй ифтонг чи уа, уымӕн уыдзӕн хорз» (Фӕс. н. 19:8). Ацы ныхӕстӕ раст кӕй сты, уый арӕх фенӕн вӕййы уацамынды. Зӕгъӕм, хъусынгӕнджытӕй бирӕтӕ ӕмбаргӕ ӕмӕ уӕздан кӕй уыдысты, уый руаджы-иу сын бантыст, чи-иу сӕм нӕ хъуыста, уыдонӕн дӕр ӕвдисӕн кӕнын. Науӕд та-иу афтӕ ныхас кодтой, цӕмӕй ма сӕ бон уыдаид, дыккаг хатт ӕрбацӕугӕйӕ, ныхас адарддӕр кӕнын. Уымӕн куыд ис гӕнӕн?
2 Адӕймаджы хъусын куы нӕ фӕнда. Адӕм арӕх фӕзӕгъынц: «Нӕ мӕ ’вдӕлы». Хӕдзары хицауы ӕцӕгӕйдӕр не ’вдӕлы ӕви йӕ нӕ фӕнды бирӕ ныхас кӕнын? Ахӕм уавӕры хъуамӕ уӕм ӕмбаргӕ. Куы фӕхатӕм, адӕймаг бынтон ӕнӕвдӕлон нӕу, уӕд хъӕуы бацархайын, цӕмӕй нӕ ныхас адарддӕр кӕнӕм. Нӕ бон у зӕгъын: «Уӕд дӕ бирӕ нӕ бафӕстиат кӕндзынӕн». Стӕй нӕ бон у не ’рбацыды сӕр зӕгъын, ӕмӕ йӕ нӕ хъӕуы бирӕ фӕстиат кӕнын. Ӕрхъуыдыджын куы уӕм ӕмӕ куы архайӕм адӕймаджы бацымыдис кӕныныл, уӕд ӕй, чи зоны, бафӕнда дарддӕр дӕр ныхас кӕнын.
3 Фӕлӕ зӕгъӕм адӕймаджы ӕцӕгӕйдӕр не ’вдӕлы? Кӕд нӕ тынг фӕнды, цӕй тыххӕй ӕрбацыдыстӕм, уый зӕгъын, уӕддӕр къӕйных хъуамӕ ма уӕм, цӕмӕй адӕймаджы ма смӕсты кӕнӕм. Хӕдзарӕй сылгоймаг куы ракӕса ӕмӕ йӕ къухы исты мигӕнӕн куы уа ӕмӕ хӕдзарӕй хӕринаджы тӕф куы кӕла, уӕд ӕй, ӕвӕццӕгӕн, ӕцӕгӕйдӕр не ’вдӕлы. Ахӕм уавӕры хъуамӕ уӕм ӕмбаргӕ. Рӕсугъд нӕ уыдзӕн йемӕ ныхас кӕныныл схӕцын. Хуыздӕр уаид хӕдзары хицауӕн трактат радтын ӕмӕ йын зӕгъын, иннӕ хатт ӕм кӕй ӕрбацӕудзыстӕм. Афтӕмӕй адӕймаг мах тыххӕй дӕр ӕвзӕрӕй ницы ахъуыды кӕндзӕн ӕмӕ йӕм иннӕ хатт Ӕвдисӕнтӕй исчи куы бацӕуа, уӕд уымӕн дӕр йӕ бон уыдзӕн ӕнтыстджынӕй ӕвдисӕн кӕнын.
4 Адӕймаг йӕ чемыл куы нӕ уа. Хӕдзарӕй-хӕдзармӕ куы фӕхъусын кӕнӕм, уӕд хаттӕй-хатт фембӕлӕм тызмӕг адӕмыл. Куыд кӕнгӕ нын у уӕд та? Фӕсномыг ныхӕсты 17:27-ӕм стихы ис уынаффӕ: «Ӕмбаргӕ адӕймаг мӕстыгӕр нӕу». Уый цы хорз уынаффӕ у! Тызмӕг адӕймагимӕ уӕзданӕй куы ныхас кӕнӕм ӕмӕ йӕ куы бамбара, кӕй йыл тыхсӕм, уый, уӕд, гӕнӕн ис, йӕ зӕрдӕ фӕфӕлмӕндӕр уа. Уымӕй уӕлдай ма нӕ бон у, адӕймаджы ма фӕхъыг кӕнӕм ӕмӕ йӕ афтӕмӕй сразӕнгард кӕнӕм, цӕмӕй йӕ цы тыхсын кӕны, уый зӕгъа, ӕмӕ уӕд, гӕнӕн ис, нӕ кӕрӕдзи бамбарӕм. Дзурын нӕ куы нӕ бауадза, уӕддӕр, гӕнӕн ис, ӕмӕ нӕ уӕздан дзуаппӕй йӕ цӕстӕнгас ӕмӕ йӕ ахаст Иегъовӕйы Ӕвдисӕнтӕм фӕива. Уый уаид тынг хорз. Кӕй зӕгъын ӕй хъӕуы, хӕдзары хицауӕн йӕ зӕрдӕмӕ исты куы нӕ фӕцӕуа кӕнӕ куы смӕсты уа, уӕд хуыздӕр уаид ӕнӕ уӕлдай ныхӕстӕй ацӕуын ӕмӕ йемӕ ӕндӕр хатт аныхас кӕныныл бацархайын.
5 Фембӕлӕм ма, быцӕу чи фӕкӕны, фӕлӕ сыгъдӕгзӕрдӕ чи вӕййы, ахӕм адӕймӕгтыл дӕр. Семӕ нӕ дарддӕр аныхас кӕнынӕн бахъӕудзӕн стыр фӕразондзинад. Арфуынӕг куы уӕм, уӕд уайтагъд хатдзӕг не скӕндзыстӕм, зӕгъгӕ, адӕймаджы хорз уацхъуыд нӕ цымыдис кӕны, ӕндӕр цӕстӕнгасыл фидар кӕй хӕцы, ӕрмӕстдӕр уый тыххӕй. Хорз уаид, арӕхстджынӕй йӕ куы бафӕрсиккам ӕмӕ куы базониккам, афтӕ цӕмӕн хъуыды кӕны ӕмӕ йын стӕй куы равдисиккам, Библи уый тыххӕй цы дзуры, уый (Фӕс. н. 20:5). Афтӕмӕй базондзыстӕм, дарддӕр ма йемӕ ныхас кӕнын ӕмбӕлы ӕви нӕ.
6 Ӕмбаргӕ хъусынгӕнӕг ӕмбары, адӕймагыл рӕстӕг ӕмӕ уавӕртӕ кӕй ӕндавынц ӕмӕ йӕ ахаст Паддзахады уацхъуыдмӕ кӕй фӕивы, уый. Иннӕ хатт ӕм куы ӕрбацӕуӕм, уӕд нӕм, гӕнӕн ис, бынтон ӕндӕр цӕстӕй ракӕса. Кӕд нӕм адӕймаг фӕстаг хатт нӕ байхъуыста, уӕд хъуамӕ ма тагъд кӕнӕм хатдзӕг скӕныныл, зӕгъгӕ нӕм ацы хатт дӕр нӕ байхъусдзӕн.
7 Ӕнцон нӕ вӕййы, адӕймагимӕ ма дарддӕр ныхас кӕнын хъӕуы ӕви нӕ, уый сбӕлвырд кӕнын. Фӕлӕ ахуыр кӕныны дӕсниад хуыздӕр кӕнгӕйӕ ӕмӕ ӕмбаргӕ уӕвгӕйӕ, хорз уацхъуыд ӕнтыстджындӕрӕй хъусын кӕндзыстӕм ӕмӕ нын Иегъовӕ кӕй раарфӕ кӕндзӕн, ууыл нӕ ныфс дардзыстӕм (1 Кор. 3:6; Тит. 1:9).