Фарстыты асыкк

◼ Библийӕ нӕм цавӕрдӕр фарст куы сӕвзӕра кӕнӕ нӕ сӕрмагонд хъуыддаджы уынаффӕ куы бахъӕуа, уӕд хъуамӕ Ӕхсӕнадмӕ телефонӕй дзурӕм?

Бирӕтӕ телефонӕй пайда кӕнынц, цӕмӕй сӕ хъуыддӕгтӕ тагъд саразой, фӕлӕ арӕх ӕрмӕст уый тыххӕй нӕ. Ацы дунейы адӕм ахуыр сты, сӕхицӕн ӕнцондӕр куыд у, афтӕ архайыныл; нӕ сӕ фӕнды бафыдӕбон кӕнын.

Куыд тынг хицӕн кӕны уый Хуыцауы уынаффӕйӕ! Уый нӕ разӕнгард кӕны зонындзинӕдтӕ арф ӕмбӕхст хӕзнайау агурынмӕ, уый та нысан кӕны, кӕй хъуамӕ архайӕм ӕппӕт тыхтӕй ӕмӕ ӕнӕзивӕгӕй. Цард ӕвдисы, афтӕ аразгӕйӕ нӕ циндзинад фылдӕр кӕй ахӕссы, уый (Фӕс. н. 2:1—4).

Ӕппӕт тыхтӕй нӕ архайын бахъӕудзӕн, зӕгъӕм, фембӕлдтӕм цӕттӕгӕнгӕйӕ нӕм исты фарст куы фӕзына кӕнӕ нӕ царды исты зындзинадыл куы сӕмбӕлӕм, уӕд. Нӕхицӕн пайда уыдзӕн, уайтагъд Ӕхсӕнадмӕ телефонӕй куы нӕ дзурӕм, фӕлӕ уыцы фарст нӕхӕдӕг Библи ӕмӕ публикациты ӕххуысӕй куы равзарӕм, уӕд. Уӕлдай ӕххуыс та нын уыдзӕн «Хъахъхъӕнӕг мӕсыджы публикациты индекс», уымӕн ӕмӕ дзы ис библион стихтӕ ӕмӕ темӕтӕ ссарынӕн ӕххуысгӕнӕг индекстӕ.

«Ӕмбӕхст хӕзнатӕ» афтӕмӕй куы агурӕм ӕмӕ ма уӕддӕр цыдӕр куы нӕ ӕмбарӕм, уӕд уый фӕстӕ бафӕрсӕн ис ӕмбырды хистӕр нӕлгоймӕгтӕй искӕй. Хистӕр нӕлгоймӕгтӕм ис фаг библион зонындзинӕдтӕ ӕмӕ уыдон зонынц, цавӕрдӕр информаци куыд хъӕуы агурын, уый. Се ’ххуыс нӕ уӕлдай тынгдӕр бахъӕудзӕн, куы нӕ хъӕуа цавӕрдӕр сӕрмагонд хъуыддаг аскъуыддзаг кӕнын, уӕд, уымӕн ӕмӕ уыдон зонынц мах дӕр ӕмӕ нӕ уавӕртӕ дӕр. Фӕлӕ, кӕй зӕгъын ӕй хъӕуы, уыцы хъуыддагмӕ сын ис раст ахаст. (Абар Куыстытӕ 8:30, 31.)

Кӕд ма дӕм уый фӕстӕ дӕр кӕса, комкоммӕ дӕ Ӕхсӕнадӕй фылдӕр информаци кӕй хъӕуы, уӕд хуыздӕр уаид фыстӕг арвитын. Дӕ бон ӕй у хистӕр нӕлгоймӕгтимӕ ныффыссын. (Дӕ хорзӕхӕй, фыстӕг фысгӕйӕ спайда кӕн, «Теократон лӕггаддзинады скъолайы разамынд»-ы амындтӕй, 85, 86 фӕрстӕ, 4—6 абз., уыр.) Ӕфсымӕртӕ ахӕм фыстӕг куы райсой, уӕд сын уыдзӕн рӕстӕг, цӕмӕй дзуапп радтой, фарст лӕмбынӕг раиртасгӕйӕ ӕмӕ йыл ахъуыдыгӕнгӕйӕ. Кӕй зӕгъын ӕй хъӕуы, алкӕд сын телефонӕй ахӕм лӕмбынӕг дзуапп радтын ӕнцон нӕ вӕййы.