Хъусын кӕнӕм цины хабар
1 Цӕй стыр кад у хъусын кӕнын «хорз хъуыддӕгты тыххӕй цины хабар!» (Ром. 10:15, НД). Ацы дунейы чи хъизӕмар кӕны ӕмӕ ныфссаст чи у, уыцы адӕмы бафидар кӕнынӕн махмӕ ис ныфсдӕттӕг хабар. Куыд сын бамбарын кӕнӕм, «хуыздӕр цы у, уый тыххӕй цины хабар» кӕй хъусын кӕнӕм, уый? (Ис. 52:7, НД).
2 Хорз хъуыддӕгтыл дзур. Уацамынды нӕ ныхас фылдӕр пайда ӕрхӕсдзӕн, хорз хъуыддӕгтыл куы ныхас кӕнӕм, уӕд. Уымӕ гӕсгӕ уацамынды цы дзурдзыстӕм, уый куы цӕттӕ кӕнӕм ӕмӕ цы публикацитӕ парахат кӕндзыстӕм, уыдоныл куы фӕлгӕсӕм, уӕд нӕ сӕйраджыдӕр нӕ хъус дарын хъӕуы, хъусинаджы хорзӕй цы ис, уымӕ. Библийыл бындуриуӕггӕнӕг ныфсы тыххӕй адӕмӕн ныфсджынӕй ӕмӕ зӕрдиагӕй куы дзурӕм, уӕд нын уыдзӕн хорз фӕстиуджытӕ (Фӕс. н. 25:11).
3 Дунейы уавӕртӕ кӕй фыддӕр кӕнынц ӕмӕ адӕмӕн бирӕ зындзинӕдтӕ кӕй хӕссынц, уымӕ гӕсгӕ сын кӕд тӕригъӕд кӕнӕм, уӕддӕр сын хъуамӕ дзурӕм, адӕмы зындзинӕдтӕ ӕрмӕстдӕр Хуыцауы Паддзахад кӕй аиуварс кӕндзӕн, уый тыххӕй. Ӕгӕрыстӕмӕй Иегъовӕйы «мастисӕн боны» ӕрцыдыл дӕр куы дзурӕм, уӕддӕр хъуамӕ ӕмбарын кӕнӕм, уый ӕцӕгдӕр «сӕрныллӕг адӕмӕн цины хабар» кӕй нысан кӕны (Ис. 61:1, 2, НД). Нӕ хъусджыты нӕ бон у баууӕндын кӕнын, зӕгъгӕ, Иегъовӕ цыдӕриддӕр аразы, уый ӕппынфӕстаг алкӕмӕндӕр кӕй ӕрхӕсдзӕн стыр амонд ӕмӕ стыр пайда.
4 Ӕцӕгады тыххӕй дзур цингӕнгӕйӕ. Адӕмимӕ цингӕнгӕйӕ ӕмӕ ныфсджынӕй куы фӕныхас кӕнӕм, уӕд нӕм хуыздӕр фӕхъусынц. Фидӕныл куы нӕ дызӕрдыг кӕнӕм, уӕд нӕ хъусджытӕ бамбардзысты, нӕ «ныфсыл [кӕй] цин кӕнӕм» (Ром. 12:12, НД). Уый сын тынгдӕр баххуыс кӕндзӕн цины хабар райсынӕн. Кӕй зӕгъын ӕй хъӕуы, мах нӕ лӕггаддзинад ӕххӕст кӕнӕм цингӕнгӕйӕ.
5 Куыд цины хабар хъусынгӕнджытӕ, афтӕ мах хъуамӕ ӕрмӕст фӕдзӕхсгӕ ма кӕнӕм. Уацамынд дӕтты фидар ныфс хуыздӕр цардӕн абон ӕмӕ ма фидӕны дӕр (1 Тим. 4:8). Кӕмӕфӕнды дӕр куы бацӕуӕм, ӕмӕ нӕ хӕларзӕрдӕ ахаст нӕ ныхӕсты куы бӕрӕг кӕна, уӕд адӕм цины хабармӕ байхъусдзысты. Цӕй уӕдӕ, цы дзурӕм ӕмӕ куыд дзурӕм, уымӕ нӕ хъус дарӕм, ӕмӕ сыгъдӕгзӕрдӕ адӕмы сразӕнгард кӕнӕм, цы цины хабар хъусын кӕнӕм, уый райсынмӕ!