Фарстыты асыкк

◼ Ӕмбырды фембӕлдты хъуамӕ чи кува?

Ӕмбырды фембӕлдты куывтытӕ сты нӕ кувынады ахсджиаг хай. Иегъовӕмӕ иннӕты номӕй кувын уыцы иу рӕстӕджы у кадджын хъуыддаг дӕр ӕмӕ стыр бӕрн дӕр. Уымӕ гӕсгӕ хистӕр нӕлгоймӕгтӕ фембӕлдты скувынӕн ӕфсымӕрты куы ӕвзарой, уӕд сӕм хъуамӕ лӕмбынӕг ӕркӕсой. Ӕмбырды номӕй чи кува, уыцы аргъуыд ӕфсымӕртӕ хъуамӕ уой фӕлтӕрдджын чырыстон лӕггадгӕнджытӕ, уой фӕзминаг ӕмӕ сын ӕмбырды хъуамӕ хорз ном уа. Сӕ уӕздан куывтытӕй хъуамӕ бӕрӕг уа, Иегъовӕ Хуыцауимӕ сын ӕнгом ахастытӕ кӕй ис, уый. «Хъахъхъӕнӕг мӕсыджы» 1999 азы 1 февралы номыры, 13, 14-ӕм фӕрстӕ, 1—6-ӕм абзацтӕ, статьяйы «Кувгӕйӕ сыгъдӕг къухтӕ ис» ӕмӕ 1986 азы 15 октябры номыры статьяйы «Молиться перед другими со смиренным сердцем» (уыр.) хъусдард здӕхт цӕуы, ӕмбырды номӕй чи кува, уыдонӕн ӕххуыс чи уыдзӕн, ахӕм ахсджиаг принциптӕм.

Ӕмбырды хорз ном кӕмӕн нӕ уа, йӕхи хорз чи нӕ дара, уымӕн хистӕр ӕфсымӕртӕ кувыны бар нӕ ратдзысты. Нӕ хъӕуы ӕвзарын, арӕх мӕсты чи кӕны, ӕфсымӕртимӕ чи фӕбыцӕу кӕны ӕмӕ уый тыххӕй кувгӕйӕ чи фӕдзуры, ахӕм ӕфсымӕры дӕр (1 Тим. 2:8). Ӕнахъом ӕфсымӕр аргъуыд куы уа, уӕддӕр ӕм хистӕр нӕлгоймӕгтӕ хъуамӕ ӕркӕсой, йӕ уырнындзинад афтӕ фидар у ӕви нӕ, цӕмӕй йӕ бон ӕмбырды номӕй кувын уа (Ап. к. 16:1, 2).

Иуӕй-иу хатт уацамындон фембӕлдты, гӕнӕн ис, аргъуыд хойы бахъӕуа скувын, къорды номӕй скувын кӕмӕн ӕмбӕла, ахӕм ӕфсымӕр дзы куы нӕ уа, уӕд. Уӕд йӕ сӕр хъуамӕ бамбӕрза, сылгоймагыл цы сӕрӕмбӕрзӕн фидауы, уымӕй. Куы рабӕрӕг уа, фӕлтӕрдджын ӕфсымӕр уацамындон фембӕлды кӕй нӕ уыдзӕн, уый, уӕд хистӕр нӕлгоймӕгтӕ фембӕлд ауадзынӕн хъуамӕ снысан кӕной фӕлтӕрдджын хойы.

Ӕмбырды раныхас куы вӕййы, уӕд райдианы фылдӕрхатт скувы, фембӕлд чи байгом кӕны, уый. Фӕлӕ иннӕ фембӕлдты ӕнӕмӕнг нӕ хъӕуы, цӕмӕй фембӕлд чи райдайа кӕнӕ, программӕйы фӕстаг хай нысангонд кӕмӕн уа, уыцы ӕфсымӕр акува. Фембӕлды райдианы кӕнӕ йӕ кӕроны скувыны бар радтӕн ис ӕндӕр ӕфсымӕрӕн, ӕмбырды цалдӕр фӕлтӕрдджын ӕфсымӕры куы уа, уӕд. Куыдфӕнды ма уа, уӕддӕр ӕмбырды фембӕлды цы ӕфсымӕр кувдзӕн, уымӕн уый тыххӕй хъӕуы рагацау зӕгъын, цӕмӕй ахъуыды кӕна, цы дзурдзӕн, ууыл. Уӕд йӕ бон уыдзӕн хуымӕтӕг, зӕрдиаг куывд зӕгъын, ахӕм ахсджиаг фембӕлдӕн цавӕр ӕмбӕлы, ахӕм.

Уыцы куывтытӕ хъуамӕ даргъ ма уой. Ӕфсымӕр иннӕты номӕй лӕугӕйӕ, хъӕрӕй ӕмӕ ӕнцонӕмбарӕн ныхӕстӕй куы кува, уӕд ӕй хуыздӕр бамбардзысты. Уӕд, залы чи уа, уыдон куывд хорз фехъусдзысты ӕмӕ сӕ бон уыдзӕн зӕрдиагӕй «оммен!» зӕгъын (1 Пар. 16:36; 1 Кор. 14:16).