Куыст дӕ хъыгдары хъусын кӕнынӕн?
1 Адӕмӕн сӕ фылдӕр ӕдзухдӕр вӕййынц ӕнӕвдӕлон. Иегъовӕйы Ӕвдисӕнтӕ та сты иууыл ӕнӕвдӕлондӕр — ахуыр кӕнынц Хуыцауы Ныхас, цӕуынц ӕмбырды фембӕлдтӕм ӕмӕ вӕййынц уацамынды. Уымӕй уӕлдай ма нӕ бирӕтӕ кусынц, хӕдзары куыстытӕ кӕнынц кӕнӕ та ахуыр кӕнынц ӕмӕ ма кӕнынц бирӕ ӕндӕр хъуыддӕгтӕ, ӕмӕ уыдӕттӕн хъӕуы рӕстӕг. Ӕппӕты фылдӕр хӕстӕ та вӕййы бинонты хистӕртыл.
2 Бирӕ рӕтты экономикон уавӕр уӕззау кӕй у, уымӕ гӕсгӕ бинонты хистӕрты хъӕуы бирӕ фыдӕбон кӕнын сӕ бинонты фӕдарынӕн. Уӕззау куыстыл бирӕ рӕстӕг ӕмӕ бирӕ хъарутӕ куы фӕхардз кӕнынц, уӕд сын хъусын кӕнынӕн фадат нал вӕййы. Сӕ бинонты дарын сӕ кӕй хъӕуы, уымӕ гӕсгӕ сӕ, чи зоны, исчи хъуыды кӕна, зӕгъгӕ, йӕ бон бирӕ лӕггад кӕнын нӕу (1 Тим. 5:8). Кӕй зӕгъын ӕй хъӕуы, абон бинонты фӕдарын ӕнцон нӕу. Фӕлӕ чырыстоны йӕ куыст хъуамӕ ма хъыгдара хорз уацхъуыд хъусын кӕнынӕн (Маркы 13:10). Уӕдӕ хъуамӕ нӕ уавӕрмӕ ӕркӕсӕм.
3 Цард бонӕй-бонмӕ кӕй ивы, уымӕ гӕсгӕ бинонты хистӕр, гӕнӕн ис, арӕх куса куысты фӕстӕ дӕр, цӕмӕй, цы нӕ вӕййы, зӕгъгӕ, йӕ бинонтӕ хъуаг мацӕмӕй уой (1 Кор. 7:31). Адӕймагмӕ, гӕнӕн ис, афтӕмӕй фылдӕр ӕхца ӕфта кӕнӕ та йын улӕфтӕн ӕмӕ хиирхӕфсӕнтӕн фылдӕр гӕнӕнтӕ фӕзына. Фӕлӕ бинонтӕн уыдӕтты аххосӕй Хуыцауы хъуыддӕгтӕн ӕмӕ фембӕлдтӕм иудадзыг цӕуынӕн рӕстӕг куы нал уа, уӕд амондджындӕр ӕмӕ райгонддӕр фӕуыдзысты? Мах хъуамӕ нӕхи хизӕм, нӕ уырнындзинадӕн тӕссаг цы у, уымӕй. Зондджын ми уыдзӕн Йесойы уынаффӕмӕ хъусын, зӕгъгӕ, «ӕмбырд кӕнут... хӕзнатӕ арвыл» ӕмӕ «Хуыцауы мидӕг... хъӕздыг кӕнут» (Матф. 6:19—21; Лук. 12:15—21).
4 Фыццаджыдӕр агурут Хуыцауы Паддзахад. Йесо йӕ фӕдылдзӕуджытӕн дзырдта, цӕмӕй Хуыцауы Паддзахадимӕ баст хъуыддӕгтӕ сӕ царды фыццаг бынаты ӕвӕрдтаиккой. Уый сын загъта: «Мӕт ма кӕнут, ӕмӕ ма дзурут: цы хӕрӕм? кӕнӕ цы нуазӕм? кӕнӕ нӕ уӕлӕ цы скӕнӕм?» Цӕмӕ загъта афтӕ? Уый бамбарын кодта: «Уӕ Уӕларвон Фыд зоны, уыдон ӕппӕт уӕ кӕй хъӕуынц, уый». Кӕд ууыл фидарӕй ӕууӕндӕм, уӕд нӕ ӕппындӕр ницы бахъыгдардзӕн, дарддӕр Йесо цы загъта, уый аразынӕн. Уый загъта: «Фӕлӕ фыццаджыдӕр агурут Хуыцауы Паддзахад ӕмӕ Йӕ рӕстдзинад, ӕмӕ уыдон иуылдӕр [ӕнӕмӕнг уӕ цы хъӕуа, уыдон] бафтдзысты уӕ къухы». Хуыцау ууыл йӕхӕдӕг батыхсдзӕн! (Матф. 6:31—33, НФ). Ныртӕккӕ ӕцӕгдӕр уый рӕстӕг нӕу, ӕмӕ ӕгӕр мӕт кӕнӕм, цӕмӕй фӕцӕрдзыстӕм, ууыл, кӕнӕ, чи фӕивгъуыйы, уыцы цардӕвӕрды хорз бынатмӕ бӕллӕм (1 Пет. 5:7; 1 Иоан. 2:15—17).
5 Адӕймаг сӕйраджыдӕр хъуамӕ куса, цӕмӕй йӕ бон йӕхи дарын уа. Фӕлӕ нӕ цас хъӕуы? Апостол Павел фыста: «Хӕринаг нын куы уа ӕмӕ дарӕс, уӕд хъуамӕ уымӕй разы уӕм!» Уымӕй уӕлдай ма истӕмӕ бӕллӕм? Кӕд о, уӕд нӕ уый ӕркӕндзӕн, апостол Павел цӕмӕй фӕдзӕхста, уымӕ: «Сбонджынмӕ чи бӕллы, уыдон бахауынц фыдӕвзарӕны ӕмӕ къӕппӕджы, ӕмӕ бирӕ ӕнӕзонд ӕмӕ фыдбылызджын цыбӕлты, адӕмы хӕрзхӕлдмӕ ӕмӕ бынысӕфтмӕ чи цыссоны,— ахӕмты мидӕг» (1 Тим. 6:8, 9, НФ; Матф. 6:24; Лук. 14:33). Куыд ис базонӕн, ахӕм бӕллицтӕ нӕ хъыгдарынц ӕви нӕ?
6 Кӕд нын нӕ хъуыддӕгты тыххӕй уацамынды бирӕ не ’нтысы кӕнӕ нӕ архайӕм хорз уацхъуыды сӕраппонд нӕхи цӕмӕйдӕрты фӕцух кӕныныл, уӕд хъуамӕ ӕркӕсӕм, фыццаг бынаты цы ӕвӕрӕм, уымӕ (Дзут. 13:15, 16). Нӕ цард куы фӕхуымӕтӕгдӕр кӕнӕм, уӕд нӕ бон уыдзӕн фылдӕр хъусын кӕнын. Нӕ рӕстӕг ӕмӕ нӕ хъарутӕ хъуамӕ фыццаджыдӕр дӕттӕм Паддзахады хъуыддӕгтӕн.
7 Нӕ фыдӕбон дзӕгъӕлы нӕу. Павелы ныхӕстӕ нӕ разӕнгард кӕнынц, цӕмӕй алкӕддӕр уӕм «ӕнтыстджын Хицауы хъуыддаджы [«бирӕ куыст нын уа Хицауы хъуыддаджы», НД], зонгӕйӕ, нӕ фыдӕбон дзӕгъӕлы кӕй нӕу Хицауы раз» (1 Кор. 15:58). «Хицауы хъуыддагмӕ» сӕйраджыдӕр хауы Паддзахады тыххӕй хъусын кӕнын ӕмӕ ахуыргӕнинӕгтӕ цӕттӕ кӕнын (Матф. 24:14; 28:19, 20). Цӕмӕй уыцы хъуыддаджы ӕппӕт тыхтӕй архайӕм, уый тыххӕй хъуамӕ алы къуыри дӕр уацамындӕн рӕстӕг хицӕн кӕнӕм ӕмӕ йӕ ӕндӕр хъуыддӕгтыл ма хардз кӕнӕм (Еф. 5:15—17). Уӕд нӕ хъусын кӕнынӕн нӕдӕр куыст хъыгдардзӕн, нӕдӕр ӕндӕр хъуыддӕгтӕ.
8 Иннӕтӕн Библийы ӕцӕгдзинӕдты тыххӕй зӕрдӕбынӕй куы фӕдзурӕм, уӕд вӕййӕм тынг амондджын, кӕй дӕттӕм, уымӕй (Ап. к. 20:35). Паддзахады тыххӕй хъусын кӕныны хъуыддаджы хайад исгӕйӕ, нӕ бон у нӕ фидӕнмӕ ныфсджынӕй ӕнхъӕлмӕ кӕсын, «уымӕн ӕмӕ Хуыцау ӕнӕраст нӕу, цӕмӕй ферох кӕна нӕ хъуыддаг ӕмӕ уарзондзинады куыст, кӕцы мах кодтам Уый номыл» (Дзут. 6:10).