Хуыцауы Дзырд раст амонын
1 Иу хицауӕн хъусынгӕнгӕйӕ «Филипп йӕ дзых байгом кодта ӕмӕ, [бӕрӕг] фыстӕй райдайгӕйӕ, дзырдта уымӕн хорз уацхъуыд Йесойы тыххӕй» (Ап. к. 8:35). Филипп «ӕцӕгады дзырд раст амыдта» (2 Тим. 2:15, НФ). Фӕлӕ абон цӕугӕ цӕстдарджытӕ бафиппайдтой, хъусынгӕнджытӕй бирӕтӕ уацамынды Библийӕ арӕх кӕй нӕ фӕпайда кӕнынц. Ды фӕпайда кӕныс Библийӕ, куы фӕхъусын кӕныс, уӕд?
2 Цӕуылдӕриддӕр ӕууӕндӕм ӕмӕ цыдӕриддӕр амонӕм, уыдон бындуриуӕг кӕнынц Хуыцауы Ныхасыл (2 Тим. 3:16, 17). Адӕм Иегъовӕмӕ Библийы руаджы ӕввахс кӕнынц ӕмӕ сын уый амоны, куыд цӕрын сӕ хъӕуы, уый. Уымӕ гӕсгӕ уацамынды ахсджиаг у, адӕмы цы фарстатӕ цымыдис кӕны, уыдоныл ӕнӕуи кӕй нӕ ныхӕстӕ кӕнӕм, фӕлӕ Библийӕ кӕй пайда кӕнӕм (Дзут. 4:12). Адӕмӕн сӕ фылдӕр Библи дзӕбӕх кӕй нӕ зонынц, уымӕ гӕсгӕ сын хъуамӕ равдисӕм, абоны цардӕн нын цавӕр разамынд дӕтты ӕмӕ ӕппӕт адӕмы фидӕны тыххӕй цы дзуры, уый.
3 Комкоммӕ Библийӕ кӕс. Дӕ бон у бафӕлварын хӕдзарӕй-хӕдзармӕ хъусын кӕнынмӕ ӕнӕ сумкӕйӕ цӕуын. Цы литературӕ дӕтдзынӕ, уый дӕ бон у гыццыл папкӕйы нывӕрын ӕмӕ Библи та дӕ къухы кӕнӕ дӕ дзыппы хӕссын. Стӕй, искӕимӕ ныхас кӕнын куы райдайай, уӕд дӕ бон у Библи афтӕ рафӕлдахын, цӕмӕй адӕймаг ма ахъуыды кӕна, ӕмӕ йын дин амонынмӕ хъавыс. Афтӕ слӕуу, цӕмӕй дӕм чи хъуса, уымӕн дӕр демӕ йӕ бон уа Библимӕ кӕсын. Дӕ бон у уымӕ дӕр бахатай, цӕмӕй стих хъӕрӕй бакӕса. Библи цы дзуры, уый дӕуӕй куы фехъуса, уӕд ӕм уый афтӕ нӕ бахъардзӕн; йӕхӕдӕг ӕй куы бакӕса, уӕд ын тынгдӕр бацагайдзӕн йӕ зӕрдӕ. Цӕмӕй йын библион стихы хъуыды бамбарын кӕнай, уый тыххӕй йын хъуамӕ, кӕй зӕгъын ӕй хъӕуы, йӕ хъус ӕрдарай сӕйраг дзырдтӕм.
4 Куыд ис ныхас райдайӕн иу библион стихӕй. Дӕхи куы бацамонай, уӕд уый фӕстӕ дӕ бон у зӕгъын: «Адӕм сӕ цардӕн разамынд агурынц алыхуызон чингуыты кӕнӕ ахуыргонд адӕймӕгтӕм. Куыд дӕм кӕсы, ӕппӕты хуыздӕр разамынд кӕм ис ссарӕн? [Бауадз ӕй йӕ хъуыды зӕгъын.] Цы хъуыды кӕныс мӕнӕ ацы ныхӕсты тыххӕй? [Бакӕс Ӕмбисӕндтӕ 2:6, 7 ӕмӕ йӕ бауадз йӕ хъуыды зӕгъын.] Адӕймаджы зонд хорзӕй ницы хӕссы, бирӕты ныфссаст фӕкодта. Хуыцауы зондыл та алкӕддӕр ис ӕууӕндӕн ӕмӕ адӕймагӕн хӕссы пайда». Уый фӕстӕ йын равдис, цы публикаци дӕ фӕнды радтын, уый, ӕмӕ дзы иу цӕвиттон ӕрхӕсс, Хуыцауы зонд куыд пайда у нӕ цардӕн, уый равдисынӕн.
5 Йесо цӕмӕй сыгъдӕгзӕрдӕ адӕмӕн баххуыс кодтаид, уый тыххӕй пайда кодта Фыстадӕй (Лук. 24:32). Павел цы амыдта, уый бӕлвырд кодта Фыстадӕй (Ап. к. 17:2, 3). Хуыцауы Ныхас цас растдӕр амонӕм, уыйас уацамынды ныфсджындӕр уыдзыстӕм ӕмӕ фылдӕр циндзинад исдзыстӕм.