Цӕмӕн хъӕуы дарддӕр дӕр хъусын кӕнын?
1 Кӕм цӕрыс, уым Паддзахады хабар рагӕй хъусын кӕнынц? (Матф. 24:14). Кӕд о, уӕд дӕм, гӕнӕн ис, афтӕ кӕсы, уе ’мбырды территори хорз куыст кӕй у. Уацамынды цы адӕмыл фембӕлыс, уыдонӕн сӕ фылдӕры, чи зоны, Паддзахады хорз хабар нӕ фӕцымыдис кӕны. Кӕд афтӕ у, уӕд ма дӕ хъус ӕрдар, чиныг «Исайы пехуымпарады», II томы 141 фарсыл (уыр.) Йесойы ӕцӕг ахуыргӕнинӕгты тыххӕй цы дзырдӕуы: «Иуӕй-иу рӕтты гӕнӕн ис, сӕ куыст цӕсты ма ахада, цы бирӕ хъарутӕ бахардз кӕнынц, уыимӕ абаргӕйӕ. Фӕлӕ уӕддӕр фӕразынц». Уӕдӕ цӕмӕн хъӕуы дарддӕр дӕр хъусын кӕнын?
2 Дӕ зӕрдыл дар Иеремийы. Мах хъуамӕ иудадзыг иузӕрдионӕй хъусын кӕнӕм, адӕм нӕм хъусынц ӕви нӕ, уымӕ нӕкӕсгӕйӕ. Иереми 40 азы бӕрц хъусын кодта иу ран, кӕд ӕм тынг гыццыл адӕм хъуыстой ӕмӕ бирӕтӕ йӕ ныхмӕ цыдысты, уӕддӕр. Иереми афтӕ фӕндфидарӕй цӕмӕн хъусын кодта? Уыцы куыст ын Хуыцау кӕй бахӕс кодта, ӕмӕ фидӕны цы ӕрцӕудзӕн, уый кӕй зыдта, уый йӕ разӕнгард кодта, цӕмӕй дарддӕр дӕр хъусын кодтаид (Иер. 1:17; 20:9).
3 Мах дӕр стӕм ахӕм уавӕры. Йесо «бафӕдзӕхста махӕн хъусын кӕнын ӕмӕ ӕвдисӕн лӕууын адӕмӕн, Уый кӕй у Хуыцауӕй ӕвӕрд Тӕрхонгӕнӕг ӕгӕстӕн ӕмӕ мӕрдтӕн» (Ап. к. 10:42). Цы хабар хъусын кӕнӕм, ууыл баст у, чи йӕ хъусы, уыдоны цард ӕмӕ мӕлӕт. Адӕм хорз хабармӕ куыд байхъусой, уымӕ гӕсгӕ ӕрцӕудзысты тӕрхонгонд. Уӕдӕ нӕ хӕс у, цӕмӕй архайӕм, куыддӕриддӕр нын загъдӕуыд, уымӕ гӕсгӕ. Ӕмӕ нӕм кӕд адӕм нӕ хъусынц, уӕддӕр нӕ хъуыддаг ӕнувыдӕй кӕй ӕххӕст кӕнӕм, уымӕй ӕвдисӕм, адӕмы тынг кӕй уарзӕм ӕмӕ Иегъовӕйыл иузӕрдион кӕй стӕм, уый. Фӕлӕ хъуыддаг ууыл нӕ фӕуд кӕны.
4 Арфӕдзинӕдтӕ исӕм. Кӕм хъусын кӕнӕм, уым нын адӕм цыфӕнды ма дзурой, уӕддӕр, Хуыцауы фӕндон кӕй ӕххӕст кӕнӕм, уый нын хӕссы удӕнцой, циндзинад ӕмӕ амонд, уый та ӕндӕр никуыд ис ссарӕн (Пс. 39:9). Уый нын нӕ цардӕн дӕтты ӕцӕг нысан. Цас фылдӕр архайӕм уацамынды, уыйас Хуыцауы ног дунейыл тынгдӕр дарӕм нӕ зӕрдӕ ӕмӕ фылдӕр кӕны нӕ цин. Фыстады зӕрдӕвӕрдтыл куы хъуыды кӕнӕм, уӕд нӕ уырнындзинад фидардӕр кӕндзӕн ӕмӕ Иегъовӕмӕ ӕввахсдӕр кӕндзыстӕм.
5 Уацамынды кӕд нӕ куыст ӕвиппайды нӕ разыны, уӕддӕр гӕнӕн ис, адӕймаджы зӕрдӕйы ӕцӕгады тауинаг ныххауа ӕмӕ йӕ йӕ рӕстӕджы Иегъовӕ сырӕзын кӕна (Иоан. 6:44; 1 Кор. 3:6). Махӕй ничи зоны, Иегъовӕйы адӕмы куысты фӕрцы ма цас адӕм базондзӕн Паддзахады тыххӕй, нӕ территорийы дӕр ӕмӕ ӕппӕт дунейы дӕр.
6 Абон хъуамӕ нӕ хъус тынгдӕр дарӕм Йесойы фӕдзӕхстмӕ: «Уӕхи цӕттӕ дарут ӕмӕ кувут. Уымӕн ӕмӕ уыцы афон кӕд ӕрцӕудзӕн, уый нӕ зонут. Сымахӕн цы зӕгъын, уый хауы алкӕмӕдӕр: цӕттӕ дарут уӕхи» (Маркы 13:33, 37, МСЕ). Цӕй уӕдӕ нӕ алчидӕр дарддӕр дӕр хъусын кӕнӕд Паддзахады хорз хабар ӕмӕ рухс кӕнӕд Иегъовӕйы зӕрдӕ, йе стыр ӕмӕ йын йӕ сыгъдӕг ном кадджынгӕнгӕйӕ.