Де ’ддаг бакаст уаг ӕмӕ ӕфсармыл уӕд
1 «Нӕлгоймӕгтыл, ӕгӕрыстӕмӕй гыццыл лӕппутыл дӕр, ис галстуктӕ. Сылгоймӕгтыл, ӕрыгон ӕмӕ гыццыл чызджытыл та — къабатӕ кӕнӕ юбкӕтӕ. Никӕй дзы фендзынӕ джинс хӕлӕфты кӕнӕ та ронбӕгъдӕй. Ам иууылдӕр сты хъӕлдзӕг»,— фыстой иу газеты. Кӕй тыххӕй дзы дзырдӕуыд? Политикты? Ерысгӕнджыты? Рок-концерты тыххӕй? Нӕ! Уым фыстой, фарон сӕрды стыр облӕстон конгресмӕ цы ӕфсымӕртӕ ӕмӕ хотӕ ӕрӕмбырд, уыдоны тыххӕй.
2 Конгресс ма кӕм цыд, иу ахӕм горӕты иу уацхӕссӕг Ӕвдисӕнты тыххӕй ныффыста: «Нӕлгоймӕгтӕ иууылдӕр сты сыгъдӕг дарӕсы, ис сыл костюмтӕ ӕмӕ галстуктӕ. Сылгоймӕгтыл ис аив дарӕс». Уымӕ ма йӕ хъус дардта милицӕйы кусӕг дӕр ӕмӕ загъта: «Сымах стут ӕгъдауджын, уӕздан ӕмӕ сыгъдӕг адӕм. Цы федтон, уый мӕ зӕрдӕмӕ тынг фӕцыд. Ацы чъизи дунейы уӕ бон сси уӕхи ссыгъдӕг кӕнын!» Цӕй хорз ныхӕстӕ сты! Ӕхсызгон нын нӕу, не ’фсымӕрадӕй нын афтӕ кӕй ӕппӕлынц? Кӕй зӕгъын ӕй хъӕуы, Ӕвдисӕнтӕй алчидӕр аив арӕзт кӕй уыд, уымӕ гӕсгӕ сӕ раппӕлыдысты.
3 Мах не ’ддаг бакастӕй иннӕтӕй тынг кӕй хицӕн кӕнӕм, уымӕ гӕсгӕ нӕ иууылдӕр базонынц (Мал. 3:18). Цӕмӕн? Уымӕн ӕмӕ мах ӕххӕст кӕнӕм Библийы фӕдзӕхст ӕмӕ нӕ уӕлӕ кӕнӕм «аив дарӕс, ӕфсӕрмыгӕнгӕйӕ ӕмӕ ӕдӕгъдауӕй», «ӕмбӕлгӕ дӕр куыд кӕны, йӕхи Хуыцауы куыстӕн чи снывонд кодта», уыдонӕн (НФ) (1 Тим. 2:9, 10).
4 Цӕуыл дзурӕг у де ’ддаг бакаст? Нӕ дзаумайы кондӕй дӕр тынг бирӕ цыдӕртӕ ис базонӕн нӕ уырнындзинӕдтӕ, нӕ зондахаст ӕмӕ нӕ фӕндты тыххӕй. Нӕ дарӕсӕй бӕрӕг у, чи стӕм ӕмӕ кӕй номӕй дзурӕм. Мах хъуамӕ нӕхи хизӕм дунейы хӕлд зондахаст ӕмӕ уагахастӕй. Модӕйы фӕдыл хъуамӕ ма лидзӕм, фӕлӕ хъуамӕ хъуыды кӕнӕм, Хуыцауы лӕггадгӕнӕгыл фидауы ӕви нӕ (Ром. 12:2). Мах нӕ фӕзмӕм дунейы зондахаст ӕмӕ йе ’нӕгъдаудзинад, фӕлӕ нӕ фӕнды, цӕмӕй не ’ддаг бакастӕй бӕрӕг уа, кӕй «кадджын кӕнӕм Хуыцауы» (1 Пет. 2:12).
5 Гӕнӕн ис, ӕрӕджы аргъуыд чи райста, ӕвӕлтӕрд кӕнӕ та, йӕ уырнындзинад лӕмӕгъ кӕмӕн у, ахӕм адӕймагӕн йӕ уӕлӕдарӕс кӕнӕ йӕ уынд дунейӕ ма хицӕн кӕной, ӕмӕ хъуыды дӕр ма акӕна, уымӕй Иегъовӕ кӕнӕ йӕ организацийӕн цы ном кӕны, ууыл. Махӕй алкӕмӕндӕр йӕ бон у сбӕлвырд кӕнын, дунейы зондахаст ыл ӕндавы ӕви нӕ. Фӕлтӕрд ӕфсымӕр кӕнӕ хойы ис бафӕрсӕн, цӕмӕй нын ӕргомӕй зӕгъа, нӕ дарӕсы аив цы нӕу, уый тыххӕй, ӕмӕ йын уый фӕстӕ хъӕуы йӕ ныхӕстыл лӕмбынӕг ахъуыды кӕнын.
6 Бирӕтӕ сразы уыдзысты, лӕмбынӕг сӕ кӕй хъӕуы ахъуыды кӕнын, конгресмӕ цӕй мидӕг ацӕудзысты, ууыл. Фӕлӕ конгрессы фӕстӕ куы фӕулӕфынц, уӕд сӕ дарӕс ахӕм ӕфсармджын нал вӕййы. Чырыстон лӕггадгӕнджытӕ хъуамӕ алкӕддӕр уой ӕгъдауджын (2 Кор. 6:3, 4). Иегъовӕйы Ӕвдисӕнтӕ кӕй стӕм, уый адӕм зондзысты нӕ плакеткӕтӕй ӕмӕ нӕ аив кондӕй. Уӕдӕ нӕ дарӕс хъуамӕ алы хатт дӕр уа рӕсугъд ӕмӕ аив, ӕмӕ уымӕй хъуамӕ бӕрӕг уа, «дунейӕ кӕй не стӕм» (Иоан. 15:19).
7 Уӕдӕ зӕрдӕбынӕй бацархайӕм, цӕмӕй ацы аз облӕстон конгресс «Хуыцауы Паддзахады зынгзӕрдӕ хъусынгӕнджытӕ»-йы ӕвдисӕм, нӕ «Хуыцау Иегъовӕйы сыгъдӕг адӕм» кӕй стӕм, уый. Адӕм нӕ хорзы кой куы кӕной, уӕд Иегъовӕйӕн уый уыдзӕн «кад, хорз ном ӕмӕ фидауц» (Дык. з. 26:19).
[Рамкӕ 6 фарсыл]
Куыд ис Иегъовӕйы кадджын кӕнӕн.
■ Хуыцауы лӕггадгӕнӕгӕн цы дарӕс ӕмбӕлы, ахӕм дар.
■ Дунейы зондахаст цы дзаумӕттӕй бӕрӕг кӕны, уыдон ма дар.
■ Алцыдӕр уаг ӕмӕ ӕфсармыл куы уа, уӕд уый дзурӕг уыдзӕн ӕмбаргӕдзинадыл.