Иегъовӕйы фӕзмӕм, хорздзинад кӕнгӕйӕ
1 Рӕсугъд хурныгуылдмӕ куы фӕкӕсӕм кӕнӕ хӕрзад хӕринагӕй нӕхи куы бафидар кӕнӕм, уӕд нӕ Иегъовӕйӕн, алы хорздзинады Суадонӕн, бузныг зӕгъын нӕ фӕфӕнды? Йӕ хорздзинад нӕ разӕнгард кӕны, цӕмӕй йӕ фӕзмӕм (Пс. 118:66, 68; Еф. 5:1). Куыд у нӕ бон хорздзинад кӕнын?
2 Ӕнӕуырнджытӕн. Фыццаджыдӕр, Иегъовӕйы фӕзмдзыстӕм, уырнындзинады иу кӕимӕ не стӕм, уыдоныл сыгъдӕгзӕрдӕйӕ куы тыхсӕм, уӕд (Гал. 6:10). Хорздзинад сын куы аразӕм, уӕд гӕнӕн ис Иегъовӕйы Ӕвдисӕнты тыххӕй дӕр ӕмӕ сын цы хабар хӕссӕм, уый тыххӕй дӕр хуыздӕр хъуыды кӕнын райдайой.
3 Цӕвиттон, иу ӕрыгон пионер-ӕфсымӕр поликлиникӕйы ӕнхъӕлмӕ каст дохтырмӕ. Йӕ фарсмӕ бадтис иу ацӕргӕ сылгоймаг, рады чи уыд, уыдонӕй бирӕ рынчындӕр зындис. Ӕфсымӕрӕн йӕ рад куы ӕрхӕццӕ, уӕд уыцы сылгоймаджы йӕ разӕй бауагъта. Фӕстӕдӕр ыл ногӕй куы сӕмбӕлд, ацы хатт базары, уӕд сылгоймагӕн тынг ӕхсызгон уыд йӕ фенд. Сылгоймаг ын загъта, зӕгъгӕ, раздӕр хорз хабармӕ нӕ хъуыстон, фӕлӕ ныр зонын, Иегъовӕйы Ӕвдисӕнтӕ ӕцӕгдӕр адӕмы кӕй уарзынц. Уыцы сылгоймаг Библи ахуыр кӕнын райдыдта.
4 Не ’фсымӕртӕн. Дыккаджы та, Иегъовӕйы хорздзинад фӕзмдзыстӕм, не ’мчырыстӕтты фарс балӕууынмӕ цӕттӕ куы уӕм, уӕд. Исты бӕллӕх куы ӕрцӕуы, уӕд не ’фсымӕртӕм ӕххуысмӕ фыццаг мах фӕзынӕм. Ахӕм зӕрдӕйы уаг ма ӕвдисӕм, фембӕлдтӕм цӕуын зын кӕмӕн у, уыдоны машинӕйыл куы фӕласӕм, рынчынты куы фӕбӕрӕг кӕнӕм, ӕмӕ ӕмбырды хорз кӕй нӕ зонӕм, уыдонӕн фылдӕр рӕстӕг куы арӕм (2 Кор. 6:11—13; Дзут. 13:16).
5 Иегъовӕ ма хорздзинад ӕвдисы, хатыргӕнаг кӕй у, уымӕй дӕр (Пс. 85:5, НД). Мах дӕр уыйау хорздзинад кӕй уарзӕм, уый нӕ бон у бӕлвырд кӕнын, иннӕтӕн хатыргӕнгӕйӕ (Еф. 4:32). Уый фӕрцы нын не ’мчырыстӕттимӕ уыдзӕн «хорз ӕмӕ ӕхсызгон» (Пс. 132:1—3).
6 Цӕй ӕмӕ Иегъовӕйы ӕвӕджиауы хорздзинад нӕ зӕрдыл дарӕм, цӕмӕй йӕ ӕппӕт зӕрдӕйӕ кадджын кӕнӕм, ӕмӕ нӕ цины судзгӕ цырагъ макуы ахуысса. Ӕмӕ нӕ уый разӕнгард кӕнӕд нӕ алы хъуыддаджы дӕр йӕ хорздзинад фӕзмынынмӕ (Пс. 144:7; Иер. 31:12).