Хуыцауӕй ратгӕ зонды стыр ахадындзинад
1 Иуӕй-иутӕ хъуыды кӕнынц, зӕгъгӕ, Иегъовӕйы Ӕвдисӕнтӕ хъуамӕ фылдӕр ууыл архайой, цӕмӕй баххуыс кӕной, абон адӕм цы зындзинӕдтыл ӕмбӕлынц, уыдон аиуварс кӕнынӕн. Ахӕм адӕм не ’мбарынц, нӕ ахуырадон куыстӕн цы стыр ахадындзинад ис, уый. Растдӕр ахӕм адӕмы тыххӕй апостол Павел фыста: «Ныхас дзуары [«хъизӕмӕртты цӕджындзы», НД] тыххӕй, сӕфгӕ чи фӕкӕндзӕн, уыдонӕн у ӕнӕзонддзинад, махӕн та, ирвӕзинӕгтӕн — Хуыцауы тых» (1 Кор. 1:18). Мах ӕй зонӕм, хъусын кӕныны хъуыддаг абон кӕй у ӕппӕты ахсджиагдӕр куыст зӕххыл.
2 Хуыздӕр цард абон. Адӕм мӕтыфтауӕг хъуыддӕгтӕ аскъуыддзаг кӕныныл архайынц, фӕлӕ сын бирӕ ницы ӕнтысы. Закъӕттӕ исынц, фӕлӕ фыдракӕндты нымӕц нӕ къаддӕр кӕны. Сабырдзинады бадзырдтӕ ӕмӕ фидауынгӕнӕг тыхтӕ хӕстытӕн кӕрон не скодтой. Адӕмы царды уавӕртӕ фӕхуыздӕр кӕнынӕн арӕзт программӕтӕ мӕгуырдзинад нӕ фесӕфтой (Пс. 145:3, 4; Иер. 8:9). Уыйхыгъд, Паддзахады хабар ивы милуангай адӕмы цард — ӕххуыс сын кӕны, цӕмӕй суой, Хуыцауы зӕрдӕмӕ чи цӕуы, ахӕм ног адӕймӕгтӕ (Ром. 12:2; Кол. 3:9, 10). Афтӕмӕй уыдон абон дӕр хуыздӕр цӕрынц (1 Тим. 4:8).
3 Амондджын фидӕн. Хуыцауы зонд нын ӕххуыс кӕны абоны зындзинӕдтӕ иуварс кӕнынӕн, ӕмӕ ма нын уыимӕ фадат дӕтты фидӕнмӕ дӕр хорз цӕттӕ кӕнынӕн (Пс. 118:105). Уый нӕ хъахъхъӕны, цӕмӕй дзӕгъӕлы ма архайӕм ацы дуне фӕхуыздӕр кӕныныл (Еккл. 1:15; Ром. 8:20). Куыд бузныг стӕм мах, нӕ цард ӕнӕхъуаджы кӕй не ’рвитӕм, митын мӕсгуытӕ кӕй нӕ амайӕм! Уый бӕсты мах ӕппӕт тыхтӕй нӕхи цӕттӕ кӕнӕм, Иегъовӕйы зӕрдӕвӕрдмӕ гӕсгӕ рӕстдзинад кӕм цӕрдзӕн, уыцы «ног арв ӕмӕ ног зӕххы» ӕрцыдмӕ. Иегъовӕйы тӕрхоны бон куы ’рцӕуа, уӕд ӕнӕмӕнгдӕр рабӕрӕг уыдзӕн, Хуыцауы зондыл чи хӕцыд, уыдон раст кӕй бакодтой, уый (2 Петры 3:10—13; Пс. 36:34).
4 «Ацы дуджы зондыл» фидарӕй чи хӕцы, уыдонмӕ Хуыцауы зондмӕ гӕсгӕ архайын кӕд раст нӕ кӕсы, уӕддӕр ӕрмӕстдӕр уый фӕрцы ис хорз цӕрӕн (1 Кор. 1:21; 2:6—8). Уымӕ гӕсгӕ мах дарддӕр дӕр ӕгас зӕххыл хъусын кӕнӕм, «иунӕг уӕлзондджын Хуыцауӕй» цы хабар цӕуы, уый (Ром. 14:26).