Бинонты фӕтк: ӕрвылбоны стих
1 Уарзӕгой ныййарджытӕ бирӕ фыдӕбон кӕнынц сӕ сывӕллӕттӕн алы бон дӕр хӕринаг амал кӕныныл. Библийӕ сын хӕринаг дӕттын та ноджы ахсджиагдӕр у (Матф. 4:4). Цӕмӕй дӕ сывӕллӕттӕ Хуыцауы Ныхас бауарзой ӕмӕ «сырӕзой ирвӕзындзинадӕн», уый тыххӕй алы бон дӕр рӕстӕг ар, стих ӕмӕ йӕм цы ӕмбарынгӕнӕн хъуыдытӕ ис, уыдон иумӕ ӕвзарынӕн (1 Пет. 2:2). Уымӕн рӕстӕг кӕд ссардзыстут?
2 Хӕрды афон. Уӕ бон стих ӕвзарынӕй куы райдайат, уӕд уӕ бинонтӕ ӕнӕхъӕн бон Иегъовӕйы сӕ зӕрдыл дардзысты (Пс. 15:8). Иу хо йӕ фыртимӕ ӕрвылбоны стих ӕмӕ йӕм цы ӕмбарынгӕнӕн хъуыдытӕ ис, уыдон касти ӕмӕ-иу сыл ныхас кодта, цалынмӕ-иу уый аходӕн хордта, уӕдмӕ. Стӕй-иу скъоламӕ цӕуыны размӕ йемӕ скуывта. Уый лӕппуйӕн ӕххуыс кодта ӕнӕгъдау хъуыддӕгты ныхмӕ фидар лӕууынӕн, национализмимӕ баст хъуыддӕгтӕй хи хизынӕн ӕмӕ ӕцӕгады тыххӕй ахуыргӕнинӕгтӕ ӕмӕ ахуыргӕнджытӕн ныфсджынӕй дзурынӕн. Кӕд скъолайы уый йеддӕмӕ Ӕвдисӕн нӕ уыд, уӕддӕр йӕхи иунӕг никуы хатыдис.
3 Райсомӕй уӕ бон стих ӕвзарын куы нӕ уа, уӕд ыл ныхас кӕнӕн ис ӕхсӕвӕр афон. Иуӕй-иутӕ ма фӕдзурынц, куыд хъусын кодтой ӕмӕ Библи кӕсгӕйӕ сӕ зӕрдӕмӕ цы фӕцыди, уый тыххӕй дӕр. Бирӕтӕ зӕгъынц, зӕгъгӕ-иу ӕгас бинонтӕ ӕхсӕвӕр афон иумӕ куы ӕрӕмбырд сты, уӕд-иу уымӕй хуыздӕр ницы уыд.
4 Фынӕйы размӕ. Кӕмӕндӕрты та стих ӕвзарынӕн ӕппӕты хуыздӕр рӕстӕг у фынӕйы размӕ. Уый ма хорз фадат у иумӕ кувынӕн дӕр. Уӕ сывӕллӕттӕн Иегъовӕйы тыххӕй алы бон дӕр куы дзурат, ӕмӕ куы хъусой, куыд ӕм кувут, уӕд ӕцӕг кӕй ис, уый сӕ уырндзӕн.
5 Уӕдӕ дын Иегъовӕ ахӕм арфӕ ракӕнӕд, ӕмӕ къаннӕг чиныг «Алы бон дӕр ӕвзар Фыстытӕ» бӕстон ӕвзаргӕйӕ, ӕцӕгад дӕ сывӕллӕтты зӕрдӕты арф уидӕгтӕ цы ауадза.