Бинонты хистӕртӕ, уӕ бинонты уырнындзинадмӕ иудадзыг кӕсут
1 Данел Вавилоны бирӕ фӕцард. Вавилойнӕгтӕ куывтой гуымирытӕ ӕмӕ дзуӕрттӕм, стӕй уыдысты тынг хӕлд адӕм. Фӕлӕ кӕд Данел ахӕм адӕмы ’хсӕн цард, уӕддӕр ӕй зыдтой Иегъовӕйӕн «иудадзыг» кувӕг адӕймагӕй (Дан. 6:16, 20). Йӕ уырнындзинад куыд фидар кодта? Библийы куыд фыст ис, афтӕмӕй, алы бон дӕр ӕй цы кӕнын хъуыди, уый зыдта. Цӕвиттонӕн, бон ӕртӕ хатты йӕ уаты куывта Хуыцаумӕ (Дан. 6:10). Кӕй зӕгъын ӕй хъӕуы, Данелӕн йӕ иннӕ монон хъуыддӕгтӕн дӕр уыди рӕстӕг, зӕгъӕм, Закъон кӕсынӕн. Ӕмӕ иухатт тынг уӕззау уавӕры куы бахауд, уӕд Иегъовӕйыл ӕнувыдӕй баззад ӕмӕ йӕ мӕлӕтӕй фервӕзын кодта (Дан. 6:5—23).
2 Афтӕ абон мах дӕр хъуамӕ «ӕдзухдӕр» нӕхи цӕттӕ дарӕм (Еф. 6:18, НФ). Цы дунейы цӕрӕм, уый ис «Фыдбылызы къухы» (1 Иоан. 5:19). Гӕнӕн ис, ӕмӕ ӕнӕнхъӕлӕджы нӕ ныхмӕ рацӕуой кӕнӕ фыдӕвзарӕнты бахауӕм, ӕмӕ уӕд нӕ уырнындзинад фӕлвӕрд цӕудзӕн. Стыр утӕхсӕны рӕстӕджы Магогӕй Гог Хуыцауы лӕггадгӕнджыты ныхмӕ растдзӕн, ӕмӕ афтӕ фӕкӕсдзӕн, цыма сын фервӕзӕн нал ис. Уӕд сӕ бахъӕудзӕн сӕ ныфс Иегъовӕйыл сӕвӕрын (Иез. 38:14—16).
3 «Уымӕн ис иу ахадгӕ мадзал — уӕ бинонтимӕ алы бон дӕр кӕсут Библи ӕмӕ йӕ ахуыр кӕнут, стӕй йыл иумӕ ныхас кӕнут». Ахӕм ныхӕстӕй райдыдта, 1998 азы облӕстон конгрессы драмӕйы разныхас (драмӕ хуынди «Бинонтӕ, алы бон дӕр кӕсут Библи!»). Дарддӕр дзы дзырдӕуыд: «Бинонтӕ Библи иудадзыг куы ахуыр кӕной, стӕй сӕ ахуыр хъӕлдзӕгӕй куы уадзой, уӕд сын уыцы ахуыр тынгдӕр фӕахъаз уыдзӕн. Ахӕм ахуыры фӕрцы фылдӕр кӕнынц нӕ зонындзинӕдтӕ. Нӕ уырнындзинад фидардӕр кӕны. Афтӕ ма нӕ зӕрдыл ӕрлӕууынц рагзаманты цӕрӕг Хуыцауыл ӕнувыд нӕлгоймӕгтӕ ӕмӕ сылгоймӕгтӕ. Уыдоны цӕвиттонтӕ та нӕ ныфс бауадзынц, ӕмӕ афтӕмӕй нӕ бон вӕййы ӕцӕгады фарс фидар лӕууын». Мах ӕркӕсдзыстӕм иуӕй-иу мадзӕлттӕм, монон хъуыддӕгтӕн хорз боны фӕтк саразынӕн, ӕмӕ дзы бинонты хистӕртӕ хъуамӕ иу кӕнӕ дыууӕ равзарой, цӕмӕй сӕ бинонтӕн баххуыс кӕной.
4 Алы бон дӕр Хуыцауы Ныхас кӕсын. «Хуыцауы Паддзахад ӕппӕт бартӕ дӕр йӕ къухмӕ куы райса ӕмӕ Хуыцауы фӕндон уӕларвыл куыд ӕххӕст кӕны, афтӕ зӕххыл дӕр куы ӕххӕст кӕна, уӕд ничиуал „кӕндзӕн фыддзинад кӕнӕ знаггад“ — нӕдӕр хӕлд адӕм, нӕдӕр цӕрӕгойтӕ» (Ис. 11:9; Матф. 6:9, 10). Ацы ныхӕстӕ фыст сты брошюрӕ «Алы бон дӕр ӕвзар Фыстытӕ»-йы 2001 азӕн, 11 сентябры стихы комментариты. Ӕвӕдза, цӕй ныфсдӕттӕг ныхӕстӕ уыдысты! Бинонты хистӕртӕ, «Ӕвзар Фыстытӕ»-йы алы бонӕн дӕр цы стих ис ӕмӕ йӕм цы комментаритӕ ис, уый уӕ бинонтимӕ равзарут? Уый тынг ахсджиаг у. Кӕд райсомӕй уӕ бон нӕу, уӕд ӕй фӕстӕдӕр равзарут. Иу фыд уый фӕдыл загъта: «Алы бон дӕр Библийӕ стих ӕвзарынӕн нын иууыл хуыздӕр рӕстӕг у ӕхсӕвӕр».
5 Кӕд уӕ бинонтимӕ иумӕ алы бон дӕр стих ӕвзарут, уӕд уый арфӕйаг хъуыддаг у! Стыр ахъаз ма уын уыдзӕн, уыимӕ ма Библийӕ скъуыддзӕгтӕ дӕр куы кӕсат, уый дӕр. Иуӕй-иу бинонтӕм ис ахӕм ӕгъдау, ӕмӕ ӕнӕхъӕнӕй бакӕсынц, боны стих кӕцӕй ист у, уыцы сӕр. Иннӕтӕ та Библийы сӕртӕ кӕсынц фӕдфӕдыл. Алы бон дӕр Хуыцауы Ныхас кӕй кӕсут, уый фӕрцы уӕ бинонтӕй алчидӕр Хуыцауӕй аргъуыц кӕндзӕн ӕмӕ сӕ тынгдӕр фӕнддзӕн йӕ фӕндон ӕххӕст кӕнын (Дык. з. 17:18—20).
6 Бинонтимӕ иумӕ алы бон дӕр Библи куы кӕсат ӕмӕ боны стих куы ӕвзарат, уӕд уын ноджы тынгдӕр фӕахъаз уыдзӕн, сӕ сӕйраг хъуыдытӕ-иу сын куы равзарат, уӕд. Уый фӕдыл «Хуыцауы ныхас хъусынгӕнджыты чиныджы» 60 фарсыл ис ахӕм уынаффӕ: «Къуырийы мидӕг Библийӕ цы скъуыддзаг бакӕсын хъӕуы, уырдыгӕй цалдӕр стихы равзар, сӕ хъуыды сын райхал ӕмӕ сӕм ратт ахӕм фарстытӕ: „Ацы ныхӕстӕ махӕн цӕуыл дзурӕг сты? Куыд нын баххуыс кӕндзысты уацамынды? Цы нын дзурынц, Иегъовӕ цавӕр Хуыцау у ӕмӕ куыд архайы, уый фӕдыл, ӕмӕ йын уый тыххӕй ноджы тынгдӕр куыд хъуамӕ аргъ кӕнӕм?„». Уый руаджы дӕ бинонтӕ «ӕмбардзысты, цы у Хуыцауы фӕндон» (Еф. 5:17).
7 Бинонтимӕ Библи ахуыр кӕнын. Бинонты хистӕр алы къуыри дӕр бинонтимӕ иудадзыг Библи куы ахуыр кӕна, уӕд афтӕмӕй йӕ цотӕн ӕвдисдзӕн, Хуыцауы хъуыддаг сӕйрагдӕр кӕй у, уый. Иу лӕппулӕгӕн йӕ сабибонтӕй йӕ зӕрдыл ӕрлӕууыд ахӕм ныв: «Мӕ фыд-иу кӕд куыстӕй фӕлладӕй ӕрбацыд, ӕмӕ-иу ӕм кӕд фынӕй дӕр цыд, уӕддӕр-иу ахуыр ауагъта. Уый руаджы бамбӕрстам, уыцы хъуыддаг ахсджиаг кӕй у». Сывӕллӕттӕй дӕр бирӕ кӕнгӕ у, цӕмӕй бинонты ахуыр хорз цӕуа. Иу хӕдзары, ис дзы фараст сывӕллоны, Библийы ахуыр ауадзынӕн алы хатт дӕр сыстынц райсомӕй фондз сахатыл, уымӕн ӕмӕ сӕ ӕндӕр рӕстӕг нӕ февдӕлы.
8 Цӕмӕй бинонты ахуыр хуыздӕр цӕуа, уый тыххӕй бинонты хистӕр хъуамӕ ӕдзухдӕр кӕса, куыд амоны, уымӕ (1 Тим. 4:16). Чиныг «Хъусынгӕнджыты скъола»-йы 32 фарсыл фыст ис: «Бинонтимӕ Хуыцауы Ныхас ахуыр кӕнын райдайын хъӕуы, бинонтӕ цы уавӕры сты, уымӕ ӕркӕсынӕй (уымӕн ӕмӕ уӕ ахуыр афтӕмӕй уыдзӕн ахадгӕ). Чырыстон фӕндагыл размӕ цӕуынц, истытӕ сын ӕнтысы? [...] Дӕ сывӕллӕттимӕ хъусын кӕнынмӕ куы вӕййыс, уӕд се ’мбӕлтты цур, Иегъовӕйы Ӕвдисӕнтӕ кӕй сты, уымӕй нӕ фефсӕрмы кӕнынц? Библи иумӕ кӕй кӕсут ӕмӕ йӕ кӕй ахуыр кӕнут, уый сӕ зӕрдӕмӕ цӕуы? Иегъовӕйы фӕндаг сӕ цардвӕндаг сси? Дӕ бинонтӕм дӕ хъус лӕмбынӕг куы дарай, уӕд уындзынӕ, куыд хистӕр, афтӕ дӕ бон цы у саразын, цӕмӕй сӕ алчидӕр ахуыр кӕна ӕмӕ йӕ удыхъӕды фидар кӕна чырыстон миниуджытӕ».
9 Ӕмбырды фембӕлдтӕ. Ахсджиаг у алы къуыри дӕр ӕмбырдтӕм цӕттӕ кӕнын ӕмӕ сӕм цӕуын (Дзут. 10:24, 25). Чи зоны, уын ӕнтыса бинонтимӕ иумӕ фембӕлдтӕм цӕттӕ кӕнын дӕр. Цӕмӕй алцыдӕр къуырцдзӕвӕнмӕ ма цӕуа, уый тыххӕй уӕ бон нӕу рагацау цӕттӕ кӕнын? Ацы хъуыддаг уын уаг ӕмӕ ӕгъдауыл куы уа, уӕд хуыздӕр цӕттӕ уыдзыстут, стӕй уын фембӕлдтӕ уӕд тынгдӕр фӕахъаз уыдзысты (Ӕмб. 21:5).
10 Кӕд алы хатт дӕр ӕмбырдмӕ хорз цӕттӕ кӕнут, уӕд зӕгъӕн ис, монон хъуыддӕгтӕн уын хорз фӕтк кӕй ис. Кӕд уӕ цыдӕр хъыгдары алы ӕмбырдмӕ дӕр цӕттӕ кӕнын, уӕд та цы кӕнгӕ у? Чиныг «Хъусынгӕнджыты скъола»-йы 31 фарсыл ис ахӕм уынаффӕ: «Раст нӕ уаид, цы дзы уыдзӕн, уыдӕттӕ иууылдӕр уӕлӕнгӕйтты, ӕфсоны каст акӕнын. Ноджы ӕвзӕрдӕр та у афтӕ хъуыды кӕнын, зӕгъгӕ, иугӕр мӕ бон алцы сахуыр кӕнын нӕу, уӕд дзы ӕппындӕр ницы ахуыр кӕнын. Хуыздӕр уыдзӕн, дӕ бон бацӕттӕ кӕнын цас у, ууыл ахъуыды кӕнын ӕмӕ йӕ уый фӕстӕ дзӕбӕх бацӕттӕ кӕнын. Афтӕ кӕн алы къуыри дӕр. Сындӕг-сындӕг архай иннӕ фембӕлдтӕм цӕттӕ кӕныныл дӕр».
11 Бинонтӕ фембӕлдмӕ гыццыл раздӕр куы ӕрбацӕуынц, уӕд сабыр сбадынц, ӕмӕ фӕхъуыды кӕнынц ӕрмӕстдӕр, Иегъовӕйы куыд скадджын кӕной, ӕмӕ сын цы амоны, уый хуыздӕр куыд бамбарой. Дӕ бинонтӕ афтӕ кӕнынц? Уый тыххӕй алцыдӕр хъӕуы пълан кӕнын, стӕй бинонтӕ кӕрӕдзийӕн дӕр хъуамӕ ӕххуыс кӕной. Кӕд уӕхи ӕмбырдмӕ ӕппынӕдзух тагъд-тагъд фӕцӕттӕ кӕнут, уӕд уӕ боны фӕткы фӕивӕн ницы ис? Исты дзы раздӕр бакӕнӕн нӕй? Кӕд искӕй фылдӕр цыдӕртӕ бакӕнын фӕхъӕуы, уӕд хорз нӕ уаид, цӕмӕй-иу ӕм иннӕтӕ дӕр фӕкӕсой? Афтӕ куы бакӕнат, ӕмӕ уӕ алчидӕр йӕхи цалдӕр минут раздӕр куы срӕвдз кӕна, уӕд бирӕ ӕдыхстдӕр нӕ уыдзыстут? Кӕй зӕгъын ӕй хъӕуы, уыдзыстут ӕдыхст. Бинонтӕм алцыдӕр уаг ӕмӕ ӕгъдауыл куы уа, уӕд се ’хсӕн дӕр ӕмӕ ӕмбырды ’хсӕн дӕр уыдзӕн фарн (1 Кор. 14:33, 40).
12 Уацамынд. Бинонтӕн уацамындӕн дӕр алы хатт рӕстӕг куы уа, уӕд уый дӕр хорз ӕгъдау у. Иу лӕппу, йӕ ном Джейсон, зӕгъы: «Мӕ бинонтӕ-иу алы сабатбон дӕр райсомӕй цыдысты уацамынды. Уый мыл тынг бандӕвта, уымӕн ӕмӕ уацамынды цас арӕхдӕр цыдтӕн ӕмӕ мӕ ӕнтыстытӕ цас арӕхдӕр уыдтон, уыййас хъусын кӕнын мӕ зӕрдӕмӕ тынгдӕр цыд». Йӕ ныййарджытӕ Иегъовӕйы Ӕвдисӕнтӕ кӕмӕн сты, уыдонӕй бирӕтӕ зӕгъынц, зӕгъгӕ-иу алы къуыри дӕр кӕцыдӕр бон бинонтӕ иумӕ уацамынды кӕй цыдысты, уый руаджы уыдысты ӕнтыстджын Хуыцауы хъуыддаджы.
13 Алцыдӕр уӕм уаг ӕмӕ ӕгъдауыл куы уа, уӕд уӕ бинонтӕн уацамындӕй дӕр сӕ зӕрдӕ райдзӕн ӕмӕ уын ӕнтысгӕ дӕр фылдӕр кӕндзӕн. Ӕмӕ уый тыххӕй цы ис саразӕн? 1999 азы 1 июлы «Хъахъхъӕнӕн мӕсыджы», 31 фарсыл дзырдӕуы: «Цымӕ бинонтимӕ ахуыргӕнгӕйӕ иуӕй-иу хатт рӕстӕг ссарут, цӕмӕй уӕ бинонтӕн баххуыс кӕнат уыцы къуыри уацамындмӕ бацӕттӕ кӕнынӕн? Уый ӕрхӕсдзӕн стыр пайда (2 Тимофеймӕ 2:15). Уый ӕххуыс кӕны, цӕмӕй ӕмбаргӕйӕ ӕмӕ ӕнтыстджынӕй лӕггад кӕнӕм. Уацамындмӕ иуӕй-иу хатт бацӕттӕгӕнӕн ис бинонтимӕ ахуыргӕнгӕйӕ. Арӕхдӕр уацамындимӕ баст фарстытыл уӕ бон у дзурын, бинонтимӕ ахуыр куы фӕуат кӕнӕ та уыцы къуыри ӕндӕр бон». Уӕ бинонтӕ ацы уынаффӕмӕ гӕсгӕ архайынц?
14 Размӕ цӕут. Ацы статьяйӕ бамбӕрстай, дӕ бинонтӕн цы бантыст, уый? Раппӕл сӕ ӕмӕ сӕ сразӕнгард кӕн, цӕмӕй дарддӕр дӕр зӕрдиагӕй архайой. Кӕд уӕ уӕ боны фӕткы исты фӕивын хъӕуы, уӕд уал иу кӕнӕ дыууӕйӕ райдайут. Уый уын куы бантыса, уӕд та иннӕтыл кусын райдайут. Дӕ ныфс ма асӕттӕд, стӕй тагъд дӕр ма кӕн (Фил. 4:4, 5). Бинонты бирӕ хъарутӕ бахъӕудзӕн сӕ монон хъуыддӕгтӕн хорз боны фӕтк скӕнынӕн, фӕлӕ уӕ куыст дзӕгъӕлы нӕ фӕуыдзӕн, уымӕн ӕмӕ Иегъовӕ зӕгъы: «Чи кӕсы йӕ фӕндагмӕ, уымӕ фӕзынын кӕндзынӕн Ӕз Хуыцауы ирвӕзындзинад» (Пс. 49:23).