Хорз хъуыддӕгтыл ахуыр кӕн ӕмӕ стыр хорзӕхтӕй хайджын у
1. Хорз цӕмӕн у рӕстӕгӕй-рӕстӕгмӕ нӕ чырыстон хъуыддӕгты фӕткмӕ ӕркӕсын?
1 Чырыстон фӕндагыл куы ӕрлӕууыдтӕ, уӕд, ӕвӕццӕгӕн, бирӕ архайдтай, цӕмӕй дын дӕ уырнындзинадимӕ баст хъуыддӕгтӕн хорз фӕтк уа – Библи ахуыр кӕнын, ӕмбырдтӕм ӕмӕ уацамынды цӕуын ӕмӕ кувынӕн. Афтӕ кӕй архайдтай, уый руаджы дын Иегъовӕ арфӕ кодта ӕмӕ дӕ уырнындзинад фӕфидар. Ӕмӕ ныр, донаргъуыд куы райстай, уӕдӕй, чи зоны, рацыд цалдӕр азы. Цымӕ чырыстон куы сдӕ, уӕд цы хорз хъуыддӕгтыл сахуыр дӕ, уыдоныл ма фидар хӕцыс?
2. Цы пайда нын у алы бон дӕр Библи кӕсын?
2 Дӕ фӕткмӕ ӕркӕс. Алы бон дӕр Библи кӕсыс? Афтӕ куы кӕнай, уӕд цӕй стыр арфӕдзинӕдтӕ райсдзынӕ! (Йесо Навин 1:8; Псалом 1:2, 3). Рагон Израилы алы паддзах дӕр хъуамӕ кастаит Закъон, «цалынмӕ цардаит», уӕдмӕ. Цӕмӕн? Афтӕмӕй паддзах сӕрныллӕг уыдаит ӕмӕ ахуыр кодтаит Иегъовӕйӕ тӕрсын, цӕмӕй йын йӕ амындтӕй ма адзӕгъӕл уыдаит (Дыккаг закъон 17:18–20). Афтӕ абон дӕр, ӕрвылбон Библи куы кӕсӕм, уӕд нын уый ӕххуыс кӕндзӕн, цӕмӕй ӕнаипп ӕмӕ сыгъдӕгӕй баззайӕм ацы хӕлд дунейы. Уый руаджы ма алцӕмӕйдӕр цӕттӕ уыдзыстӕм Хуыцауӕн лӕггад кӕнынмӕ (Филиппӕгтӕм 2:15; 2 Тимофеймӕ 3:17).
3. Ӕдзух ӕмбырдтӕм кӕй цӕуӕм, уый нын цы арфӕдзинӕдтӕ хӕссы?
3 Йесо ахуыр уыд, Фыстад кӕм ӕвзӕрстой ӕдзух уырдӕм цӕуын (Лукайы 4:16). Ӕнӕдызӕрдыгӕй, уый йын ӕххуыс кодта йӕ фӕлварӕнты рӕстӕг. Мах дӕр фидар кӕнӕм, ӕмбырдты цы фехъусӕм, ӕмӕ кӕрӕдзийы ныфсыл ныфс кӕй ӕфтауӕм, уый фӕрцы (Ромӕгтӕм 1:12). Не ’фсымӕртӕ ӕмӕ нӕ хотимӕ кӕй ӕмбырд кӕнӕм, уый нын ӕххуыс кӕны ацы фӕстаг бонты зындзинӕдтӕ сфӕразынӕн (Дзуттытӕм 10:24, 25). Ды дӕр алы фембӕлдмӕ цӕуын ахуыр дӕ?
4. Цы пайда нын у ӕрвылкъуыри уацамынды цӕуын?
4 Библи нын дзуры, апостолтӕ «алы бон дӕр кувӕндоны ӕмӕ хӕдзари-хӕдзар» хорз хабар кӕй хъусын кодтой (Куыстытӕ 5:42, НТ). Кӕд дӕ бон нӕу алы бон дӕр хъусын кӕнын, уӕддӕр афтӕ спълан кӕнӕн нӕй, цӕмӕй ӕрвылкъуыри дӕр уацамынды цӕуай? Афтӕ куы архайай, уӕд ӕнӕмӕнгӕй Библийӕ арӕхстджындӕрӕй пайда кӕнын сахуыр уыдзынӕ, ӕмӕ дӕ зӕрдӕ кӕмӕй барухс уа, ахӕм цаутӕ дыл ӕрцӕудзӕн.
5. Иегъовӕмӕ ӕппынӕдзух кувын ахсджиаг цӕмӕн у?
5 Пехуымпар Данел хорзӕхджын ӕрцыд, Иегъовӕйӕн цӕрӕнбонты ӕнӕрынцойӕ кӕй лӕггад кодта, уый тыххӕй. Уымӕ хауд, ӕдзух Иегъовӕмӕ кувын ахуыр кӕй уыд, уый дӕр (Данелы 6:10, 16, 20). Мах дӕр ӕдзух Иегъовӕмӕ зӕрдиагӕй куы кувӕм, уӕд нын йӕ сыгъдӕг удӕй хай кӕндзӕн (Лукайы 11:9–13). Уымӕй уӕлдай ма нын Иегъовӕ уый бар дӕтдзӕн, цӕмӕй йӕм ӕввахсдӕр кӕнӕм (Псалом 24:14; Иаковы 4:8). Цӕй стыр лӕвар у уый! Уӕдӕ зӕрдиагӕй архайӕм, цӕмӕй цы хорз хъуыддӕгтыл сахуыр стӕм, уыдоныл фидар хӕцӕм ӕмӕ Иегъовӕйы стыр хорзӕхтӕй хайджын уӕм.