10 хай. Библи кӕимӕ ахуыр кӕнӕм, уыдонӕн ӕххуыс кӕнӕм уырнындзинады рӕзынӕн
Ахуыр сӕ кӕнӕм хӕдзарӕй-хӕдзармӕ хъусын кӕнын
1 Библи кӕимӕ ахуыр кӕныс, уымӕй хистӕр нӕлгоймӕгтӕ куы зӕгъой, ӕмӕ цӕттӕ у, цӕмӕй ӕнӕаргъуыд хъусынӕнӕг суа, уӕд йӕ бон у, ӕмӕ уый дӕр ӕмбырдимӕ райдайа хъусын кӕнын. (Кӕс чиныг «Цӕттӕ стӕм Иегъовӕйы фӕндон ӕххӕст кӕнынмӕ», 79–81 фф., уыр.) Куыд ын баххуыс кӕнӕм хӕдзарӕй-хӕдзармӕ хъусын кӕнынӕн?
2 Иумӕ цӕттӕ кӕнут. Фыццаджыдӕр хъӕуы хорз бацӕттӕ кӕнын. Библи кӕимӕ ахуыр кӕныс, уымӕн равдис, ныхас райдайынӕн «Нӕ хъусын кӕныны хъуыддаджы» цӕвиттонтӕ куыд ис ссарӕн. Стӕй йӕм фӕкӕс, хуымӕтӕгдӕр ӕмӕ дзы уӕ уавӕрты хуыздӕр кӕцы у, уый равзарынмӕ. Фыццаг бонӕй йын амон, цӕмӕй уацамынды ӕдзухдӕр пайда кӕна Библийӕ (2 Тим. 4:2).
3 Ног хъусынгӕнӕгӕн стыр ӕххуыс уыдзӕн, адӕймагимӕ куыд ныхас кӕндзӕн, уый уал раздӕр иумӕ куы афӕлвариккат. Равдис ын, адӕм арӕхдӕр цы фӕзӕгъынц, уымӕн дзуапп куыд ис раттӕн (Кол. 4:6). Бамбарын ын кӕн, адӕймаджы алы фарстӕн дзуапп куы нӕ зона, уымӕй тӕрсын кӕй нӕ хъӕуы. Арӕх ӕппӕты хуыздӕр вӕййы зӕгъын, ацы фарсты фӕдыл ӕрмӕг бацагурдзынӕн ӕмӕ йыл иннӕ хатт аныхас кӕндзыстӕм, зӕгъгӕ (Ӕмб. 15:28).
4 Иумӕ хъусын кӕнут. Хӕдзарӕй-хӕдзармӕ уацамынды фыццаг хатт куы ацӕуа, уӕд уал-иу, цы бацӕттӕ кодтат, уымӕй ныхас дӕхӕдӕг райдай. Уый фӕстӕ бар ратт уымӕн. Хатт ног хъусынгӕнӕгӕн ӕнцондӕр вӕййы, алцыдӕр йӕхи дзурын куы нӕ фӕхъӕуы, фӕлӕ ӕрмӕстдӕр Библийӕ стих куы бакӕсы ӕмӕ йӕ куы бамбарын кӕны. Ам зӕрдыл дарын хъӕуы, цавӕр адӕймаг у ӕмӕ йӕ бон цас у, уый (Фил. 4:5). Хъусын кӕнын ӕй куыд ахуыр кӕнай, афтӕ дзы ӕппӕлгӕ дӕр кӕн, дӕ хорз ныхас ын ма ӕвгъау кӕн.
5 Ног хъусынгӕнӕгӕн баххуыс кӕнын хъӕуы, цӕмӕй уацамындӕн фӕтк скӕна, гӕнӕн уӕвгӕйӕ, ӕрвылкъуыри дӕр куыд цӕуа (Фил. 3:16). Бӕлвырдӕй-иу баныхас кӕн йемӕ, кӕд ацӕудзыстут уацамынды ӕмӕ йын дзур, цӕмӕй-иу иннӕ хъусынгӕнджытимӕ дӕр баныхас кӕна. Уыцы зынгзӕрдӕ хъусынгӕнджытӕм кӕсгӕйӕ уый дӕр ахуыр кӕндзӕн ӕмӕ зӕрдӕрайгӕйӕ хъусын кӕндзӕн хӕдзарӕй-хӕдзармӕ.