Хуыцауы Паддзахады тыххӕй хъусын кӕнын – стыр кад
1 Зӕххыл цӕрӕг адӕм иу бон дӕр цух не сты Иегъовӕйы стыр хорзӕхтӕй,– цард цӕй фӕрцы ис, уыцы хорзӕхтӕй (Матф. 5:45). Фӕлӕ ӕрмӕстдӕр стӕмтӕ пайда кӕнынц уыцы кадджын фадатӕй – Хуыцауы Паддзахады хорз хабар хъусын кӕнын ӕмӕ уымӕй ӕвдисын, се Сфӕлдисӕгӕй бузныг кӕй сты (Матф. 24:14). Куыд тынг аргъ кӕныс, ахӕм кадджын фадат дын кӕй ис, уымӕн?
2 Паддзахады тыххӕй хъусын кӕныны хъуыддаг Хуыцауы кадджын кӕны ӕмӕ ацы змӕст рӕстӕг тыхст адӕмӕн та дӕтты ныфс ӕмӕ фарн (Дзут. 13:15). Уыцы хабар йӕ зӕрдӕмӕ чи айса, уыдон цӕрдзысты ӕнустӕм (Иоан. 17:3). Ацы дунейы кӕцы стыр бынат кӕнӕ кӕцы куыст хӕссы ахӕм хорзӕхтӕ? Апостол Павел йӕ лӕггад нымадта стыр хӕзнайыл, ӕмӕ уый бӕрӕг уыд, куыд ӕй ӕххӕст кодта, уымӕй (Ап. к. 20:20, 21, 24; 2 Кор. 4:1, 7).
3 Аргъ кӕнӕм, цы стыр кад нӕм ӕрхауд, уымӕн. Хъусын кӕныны кад нӕм кӕй ӕрхауд, уымӕн кӕй аргъ кӕнӕм, уый равдисынӕн иу амал – куыд хъусын кӕнӕм, уымӕ нӕ хъус дарын. Цымӕ уацамындмӕ цӕттӕ кӕнынӕн рӕстӕг ссарӕм, цӕмӕй кӕимӕ ныхас кӕндзыстӕм, уыдоны зӕрдӕтӕ бацагайӕм? Библийӕ куыд пайда кӕнӕм ӕмӕ адӕмимӕ куыд ныхас кӕнӕм, уым ма исты фӕхуыздӕр кӕнын у нӕ бон? Цы территорийы хъусын кӕнӕм, уым бӕстон ӕххӕст кӕнӕм нӕ куыст? Нӕ бон у Библийы ахуыр райдайын ӕмӕ йӕ адарддӕр кӕнын? Рагзаманты ӕмӕ абоны иузӕрдион чырыстӕттау, мах дӕр раст цӕстӕй кӕсӕм нӕ лӕггадмӕ ӕмӕ стыр аргъ кӕнӕм, цы кад нӕм ӕрхаудта, уымӕн (Матф. 25:14–23).
4 Кӕд нӕ исчи ацӕргӕ кӕнӕ рынчын у, йе та ӕндӕр зындзинӕдтӕ ӕвзары, уӕддӕр ӕй зонӕм, зӕрдиагӕй хъусын кӕныныл кӕй архайӕм, уымӕн стыр агъ кӕй ис, ӕмӕ нын уый ныфсы хос у. Хуыцауы Ныхас нын зӕрдӕ ӕвӕры, нӕ фыдӕбон Иегъовӕйӕ рох кӕй нӕу, кӕд иннӕты цӕсты уадиссагӕй ницы аразӕм, уӕд дӕр (Лук. 21:1–4).
5 Хуыцауы Паддзахады тыххӕй хъусын кӕнын зӕрдӕрухсы хос у. 92 азы кӕуыл цӕуы, ахӕм хо загъта: «Цӕй стыр кад у, Иегъовӕйӕн 80 азы ӕнувыдӕй фӕлӕггад кӕнын! Уыцы азтӕм акӕсгӕйӕ ӕз ницӕуыл фӕсмон кӕнын. Мӕ бон куы уаид мӕ цард ногӕй фӕцӕрын, уӕддӕр ницы аивин, уыцы фӕндаг та равзарин, уымӕн ӕмӕ Хуыцауы „хорзӕх хуыздӕр у, цӕйнӕфӕлтау цард“» (Пс. 62:4). Цӕй уӕдӕ мах дӕр стыр аргъ кӕнӕм, Хуыцауӕй нӕм цы кад ӕрхауд, уымӕн – йӕ Паддзахады тыххӕй хъусын кӕнын.