Зӕрдиагӕй ахуыр кӕнӕм чиныг «Библи бӕлвырдӕй цы дзуры?»
1 Фарон облӕстон конгрессы, «Хуыцаумӕ хъусут», зӕгъгӕ, ӕхсызгонӕй райстам чиныг «Библи бӕлвырдӕй цы дзуры?». Ныр дзы уацамынды арӕх пайда кӕндзыстӕм, уӕлдайдӕр та искӕимӕ Библи куы ахуыр кӕнӕм, уӕд. Уымӕ гӕсгӕ хъуамӕ нӕхӕдӕг хорз зонӕм ацы чиныг. Ӕмӕ нын уымӕн дӕр фадат уыдзӕн – 2006 азы 28 августы йӕ ӕмбырды чиныгахуырты ахуыр кӕнын райдайдзыстӕм.
2 Ӕмбырды чиныгахуыры цӕстдарӕг-иу хъус ӕрдардзӕн, алы сӕры райдианы дӕр цы фарстытӕ ис, уыдонмӕ. Ахуыры рӕстӕг та-иу ратдзӕн, абзацтӕм цы фарстытӕ ис, уыдон. Сӕйраг стихтӕ хъӕудзӕн кӕсын ӕмӕ сыл ныхас кӕнын. Алы сӕры кӕрон дӕр фӕлгӕт «Цы зӕгъы Библи» ӕххуыс уыдзӕн ӕрмӕг сфӕлхат кӕнынӕн, уымӕн ӕмӕ, алы сӕры райдианы дӕр цы фарстытӕ ис, уыдонӕн дзы ис Библийӕ дзуаппытӕ. Ахуыры рӕстӕг дын ӕхсызгон уыдзӕн дзуапп дӕттын, уымӕн ӕмӕ чиныг фыст у ӕнцонӕмбарӕн, хуымӕтӕг ӕвзагӕй, адӕймаджы сцымыдис кӕны.
3 Чиныджы цы уӕлӕмхасӕн ис, уый бӕстондӕр ӕмбарын кӕны алыхуызон фарстытӕ. Ацы ӕрмӕгӕй нӕ бон уыдзӕн спайда кӕнын, Библи кӕимӕ ахуыр кӕнӕм, уымӕн цавӕрдӕр фарста бамбарын кӕнынӕн фылдӕр ӕрмӕг куы хъӕуа, уӕд. Уӕлӕмхасӕны иуӕй-иу хӕйттӕ ӕвзӕрст цӕудзысты чиныгахуыры. Цы ӕрмӕг дзы ис, уый кӕсдзӕн, чиныгахуыры чи кӕса, уый, ӕмӕ стыр темӕтӕ хӕйттыл дих кӕнӕн уыдзӕн. Уӕлӕмхасӕн ӕрмӕгмӕ фарстытӕ лӕвӕрд нӕй. Фӕлӕ чиныгахуыры цӕстдарӕгӕн йӕ бон у сӕйраг хъуыдытӕм фарстытӕ раттын.
4 Ӕмбырды чиныгахуыры чиныг «Библи цы дзуры» ӕвзарын хъӕуы цӕрдӕг. Фӕлӕ уый ууыл дзурӕг нӕу, ӕмӕ ацы чиныджы руаджы искӕимӕ Библи куы ахуыр кӕнӕм, уӕддӕр тагъд кӕнын хъӕуы, уӕлдайдӕр та адӕймаг иу гыццыл кӕнӕ ӕппындӕр куы нӕ зона Библи, уӕд (Ап. к. 26:28, 29). Искӕимӕ Библи куы ахуыр кӕнӕм, уӕд хъуамӕ бӕстондӕр ӕвзарӕм Библийӕ стихтӕ, ӕмбарын кӕнӕм нывтӕ ӕмӕ афтӕ дарддӕр. Хорз уаид, нӕхицӕн нысан куы сӕвӕриккам, чиныг «Библи бӕлвырдӕй цы дзуры?» кӕм ахуыр кӕндзыстӕм, уыцы чиныгахуырмӕ алы къуыри дӕр цӕуын ӕмӕ дзуапп дӕттын.