Адӕмимӕ чиныг «Библи цы дзуры» ахуыр кӕнгӕйӕ Чырыстийы фӕзм
1. Йесо адӕмы куыд ахуыр кодта?
1 Ӕппӕты хуыздӕр ахуыргӕнӕг, Йесо Чырысти, амыдта хуымӕтӕг ӕмӕ ӕнцонӕмбарӕн ӕвзагӕй. Цӕмӕй-иу йӕ ныхасмӕхъусджытӕ цӕуылдӕр ахъуыды кодтаиккой, уый тыххӕй-иу сӕ хатт фыццаг сӕ хъуыдыйӕ афарста (Матф. 17:24–27). Адӕмы ’ргом здӕхта Хуыцауы Ныхасмӕ (Матф. 26:31; Марчы 7:6). Йесо йӕ ахуыргӕнинӕгтӕн иу хаттӕн ӕгӕр бирӕ нӕ амыдта, зыдта, фӕстӕдӕр фылдӕр кӕй базондзысты (Иоан. 16:12). Стӕй ма йӕ хъус дардта, цӕуыл сӕ ахуыр кодта, уый бамбӕрстой ӕмӕ йыл ӕууӕндынц ӕви нӕ (Матф. 13:51). Чиныг «Библи цы дзуры» дӕр уый тыххӕй рауагътой, цӕмӕй адӕмы афтӕ ахуыр кӕнӕм.
2. Сӕры райдианы цы фарстытӕ ис, уыдонӕй нӕ бон куыд у пайда кӕнын?
2 Сӕры райдиан фарстытӕ. Ӕрмӕг ахуыр кӕныны размӕ уал хорз уаид, алы сӕры райдиан цы фарстытӕ ис, уыдонмӕ дӕ хъус куы ’рдарис. Ахуыры размӕ фарстытӕ адӕймаджы сцымыдис кӕндзысты. Кӕнӕ та йын зӕгъ, цӕмӕй цыбыртӕй уыцы фарстыты фӕдыл йӕ хъуыдытӕ зӕгъа. Йӕ хъуыдытӕм истытӕ ӕфтауын кӕнӕ йӕ рӕстытӕ кӕнын ӕнӕмӕнг нӕ хъӕуы. Бузныг-иу ын зӕгъ ӕмӕ-иу ахуыр райдай. Сӕры райдианы цы фарстытӕ ис, уыдонӕй адӕймаджы куы бафӕрсӕм, уӕд базондзыстӕм, цавӕр хъуыдытӕм хъӕуы хъус тынгдӕр ӕрдарын.
3. Нӕ бон куыд у адӕймагӕн хуымӕтӕгӕй амонын?
3 Библийы стихтӕ. Ахуыры рӕстӕг сӕйрагдӕр хъуамӕ уа Библи (Дзут. 4:12). Фӕлӕ алы стих кӕсын нӕ хъӕуы. Нӕ уырнындзинады бындур цы у, ӕрмӕст-иу уыцы стихтыл аныхас кӕн. Кӕд, ныхас цӕуыл у, стих комкоммӕ уыимӕ баст нӕу, уӕд ӕй кӕсын нӕ хъӕуы. Чиныг «Библи цы дзуры» Хуыцауы Ныхас хуымӕтӕг ӕвзагӕй амоны. Ды дӕр ууыл архай ахуыры рӕстӕг. Дӕ хъус дар, уӕ ныхасы сӕр цы у, уымӕ, ӕмӕ лыстӕгдзинӕдтыл ӕгӕр бирӕ ма дзур. Стӕй чиныджы цы ис, уымӕй фылдӕр ӕрмӕгӕй дӕр ма пайда кӕн.
4. Ахуыры рӕстӕг уӕлӕмхасӕнӕй пайда кӕнын хъӕуы ӕви нӕ, уый цӕуыл баст у?
4 Уӕлӕмхасӕн. Чиныджы «Уӕлӕмхасӕны» ис, сӕйраг темӕтӕ хуыздӕр чи ӕмбарын кӕны, ахӕм 14 фарстайы. Ахуыры рӕстӕг сыл ныхас кӕнын ӕнӕмӕнг нӕу. Дӕ бон у зӕгъын адӕймагӕн, цӕмӕй «Уӕлӕмхасӕнӕй» иуӕй-иу темӕтӕ йӕхӕдӕг бакӕса, уӕлдайдӕр та, цы ахуыр кӕнут, уый кӕд хорз ӕмбары ӕмӕ сыл разы у, уӕд. Зӕгъӕм, адӕймаг нӕ дызӕрдыг кӕны, Чырысти Мессийӕ кӕй у, ууыл. Уӕд 4 сӕр, «Чи у Йесо Чырысти?», зӕгъгӕ, ахуыр кӕнгӕйӕ ӕнӕмӕнг нӕу, цӕмӕй «Уӕлӕмхасӕнӕй» равзарат темӕ «Йесо Чырысти – Зӕрдӕвӕрд Мессиа». Фӕлӕ хатт хуыздӕр вӕййы ахуыры рӕстӕг уӕлӕмхасӕныл кӕнӕ йӕ кӕцыдӕр хайыл аныхас кӕнын.
5. Кӕд уӕлӕмхасӕн равзарын хъӕуы, уӕд уый куыд саразӕн ис?
5 Кӕд дӕ фӕнды ахуыргӕнинагимӕ уӕлӕмхасӕныл аныхас кӕнын, уӕд рагацау фарстытӕ бацӕттӕ кӕн ӕмӕ йӕ абзацгай равзар. Кӕнӕ адӕймаджы уавӕртӕм гӕсгӕ, ахуыры рӕстӕг цалдӕр минуты ӕрмӕгыл аныхас кӕн. Афтӕмӕй бӕрӕг уыдзӕн, уӕлӕмхасӕны цы бакаст, уый ӕмбары ӕви нӕ.
6. Фӕлгӕтӕй куыд пайда кӕнӕн ис?
6 Фӕлгӕт. Алы сӕры кӕрон дӕр фӕлгӕты цы хъуыдыйӕдтӕ ис, уыдон дзуапп дӕттынц, сӕры райдианы цы фарстытӕ ис, уыдонӕн. Дӕ бон у уыцы хъуыдыйӕдтӕм гӕсгӕ сӕры ахсджиаг хъуыдытыл аныхас кӕнын. Иуӕй-иу хъусынгӕнджытӕ бафиппайдтой, хорз кӕй у адӕймагимӕ иумӕ фӕлгӕты хъуыдыйӕдтӕ ӕмӕ стихтӕ бакӕсын. Уый фӕстӕ ахуыргӕнинаджы бафӕрсынц, цыбыртӕй куыд зӕгъиккой, стих уыцы хъуыды куыд бӕлвырд кӕны. Афтӕмӕй базонӕн ис, ахсджиаг хъуыдытӕ ӕмӕ сӕ цы стихтӕ ӕмбарын кӕнынц, уыдон бамбӕрста ӕмӕ семӕ разы у ӕви нӕ. Уый руаджы ма адӕймаг ахуыр кӕны, цы базоны, уый иннӕтӕн амонгӕйӕ Библийӕ пайда кӕнын дӕр.
7. Цӕмӕй нӕ хӕс ӕххӕст кӕнӕм, уый тыххӕй нӕ бон куыд у чиныг «Библи цы дзуры»-йӕ пайда кӕнын?
7 Нӕ хӕс у адӕмы ахуыр кӕнын ӕмӕ ахуыргӕнинӕгтӕ цӕттӕ кӕнын, ӕмӕ уыцы хъуыддаг ӕнтыстджынӕй сӕххӕст кӕндзыстӕм, Йесойау куы амонӕм, уӕд (Матф. 28:19, 20). Баххуыс нын кӕндзӕн чиныг «Библи цы дзуры». Хорз дзы пайда кӕн, цӕмӕй адӕмӕн Хуыцауы Ныхас амонай ӕнцонӕмбарӕн ӕмӕ хуымӕтӕг ӕвзагӕй, стӕй афтӕ, ӕмӕ сӕ фылдӕр зонын куыд фӕнда.