Адӕмимӕ Библи ахуыр кӕн къӕсӕргӕрон ӕмӕ телефонӕй
1. Адӕмимӕ Библи ахуыр кӕнын цӕмӕн райдайӕм?
1 Куыд ӕхсызгон вӕййы, искӕимӕ Библи ахуыр кӕнын куы райдайӕм! Фӕлӕ хъуыддаг ӕрмӕст уый мидӕг нӕй, ӕмӕ ахӕм адӕймаг ссарӕм. Нӕ нысан у, цӕмӕй уый суа Чырыстийы ӕцӕг ахуыргӕнинаг (Матф. 28:19, 20). Цы нын баххуыс кӕндзӕн ацы хъуыддаджы?
2. Библи къӕсӕргӕрон ӕмӕ телефонӕй куыд ис ахуыр кӕнӕн ӕмӕ уый хорз цӕмӕн у?
2 Ӕнӕвдӕлон адӕм. Адӕм бонӕй-бонмӕ ӕнӕвдӕлондӕр кӕнынц. Иуӕй-иу рӕтты райдианы, чи зоны, ӕрмӕст стӕмты фӕфӕнды Библи ӕнӕхъӕн сахат ахуыр кӕнын. Цӕмӕй ахӕм адӕмӕн баххуыс кӕнӕм, уый тыххӕй нӕ хъӕуы семӕ Библи ахуыр кӕнын райдайын къӕсӕргӕрон кӕнӕ телефонӕй. Ахӕм ахуыртӕ фыццаг вӕййынц цыбыр. Уыцы рӕстӕг фаг вӕййы, цӕмӕй равзарӕм иу кӕнӕ дыууӕ абзацы, зӕгъӕм, чиныг «Библи цы дзуры»-йӕ ӕмӕ бакӕсӕм, цы стихтӕ дзы ис, уыдонӕй цалдӕр. Раппӕлинаг сты, адӕмимӕ къӕсӕргӕрон кӕнӕ телефонӕй Библи афтӕ чи ахуыр кӕны, уыцы хъусынгӕнджытӕ!
3. Искӕимӕ къӕсӕргӕрон ахуыр кӕнын куы райдайӕм, уӕд ахуыры рӕстӕг сабыргай фылдӕр кӕнын цӕмӕн хъӕуы?
3 Уӕдӕ кӕд къӕсӕргӕрон ахуыр кӕнын райдыдтам, уӕд хъуамӕ кӕронмӕ дӕр афтӕ уа? Нӕ. Ӕвзӕр нӕ уаид, райдианты адӕймагимӕ бирӕ рӕстӕг куы нӕ ныхас кӕниккам. Фӕлӕ нын 1990 азы майы «Нӕ хъусын кӕныны хъуыддаджы» (англ.) 8 фарсыл лӕвӕрд уыд ахӕм уынаффӕ: «Кӕд адӕймагимӕ ныр дзӕвгар рӕстӕг ахуыр кӕныс ӕмӕ йӕ ноджы фылдӕр базонын фӕнды, уӕд гӕнӕн ис, ӕмӕ-иу йемӕ фылдӕр рӕстӕг ахуыр кӕнай». Уый тынг ахсджиаг у. Зӕгъӕм, ӕххормаг чи ӕййафы, ахӕм сывӕллонӕн хӕринаг гыццыл йеддӕмӕ нӕ дӕтдзысты, цалынмӕ йӕхӕдӕг хорз хӕрын нӕ райдайа. Фӕлӕ рӕстӕг куыд цӕуа, афтӕ йӕ хӕринаг куы нӕ фылдӕр кӕна, уӕд цымӕ ногӕй схъӕддых уыдзӕн ӕмӕ дзӕбӕх рӕздзӕн? Уӕдӕ цӕмӕй адӕймаг Хуыцауы фӕлтӕрд лӕггадгӕнӕг суа, уый тыххӕй йӕ хъӕуы Библи иудадзыг ӕмӕ бӕстондӕр ахуыр кӕнын (Дзут. 5:13, 14).
4. Цы пайда у Библи хӕдзары ахуыр кӕнын?
4 Библийы ахуыр хӕдзары. Хуыздӕр уаид, Библи хибар ран ахуыр кӕнын, зӕгъӕм, хӕдзары кӕнӕ ӕндӕр искуы. Уӕд ахуыр кӕнын уыдзӕн ӕнцондӕр ӕмӕ ахуыргӕнинаг хуыздӕр ӕмбардзӕн Хуыцауы Ныхас (Матф. 13:23). Ахуыргӕнӕгӕн дӕр йӕ бон уыдзӕн ӕрмӕг афтӕ амонын, цӕмӕй йӕ ахуыргӕнинаг ӕнцонтӕй ӕмбара ӕмӕ дзы царды пайда кӕна. Уымӕй уӕлдай ма, ахуыры рӕстӕг фылдӕр куы уа, уӕд Хуыцауы Ныхас лӕмбынӕгдӕр ӕвзӕрст цӕудзӕн ӕмӕ йӕ уырнындзинад фидардӕр кӕндзӕн (Ром. 10:17).
5. Къӕсӕргӕрон ахуыр кӕнынӕй хӕдзары ахуыр кӕнынмӕ нӕ бон ахизын куыд у?
5 Куыд у дӕ бон къӕсӕргӕрон ахуыр кӕнынӕй хӕдзары ахуыр кӕнынмӕ ахизын? Кӕд адӕймагимӕ цалдӕр хатты фембӕлдтӕ, уӕд хорз нӕ уаид, комкоммӕ йын куы зӕгъис, ныр та фылдӕр рӕстӕг аныхас кӕнӕм, зӕгъгӕ? Кӕнӕ та йӕ дӕ бон у бафӕрсын: «Рӕстӕг дын нӕ уаид, куы ӕрбадиккам ӕмӕ ацы фарстыл куы аныхас кӕниккам?» Науӕд та йын зӕгъ: «Цас рӕстӕг дын ис ацы фарстыл аныхас кӕнынӕн?» Уымӕй дын куы ницы рауайа, уӕд дӕр ӕй ма ныууадз – дарддӕр дӕр йемӕ гыццылгай къӕсӕргӕрон ахуыр кӕн. Фӕстӕдӕр та ногӕй бафӕлвар, цӕмӕй ахуыр кӕнат хӕдзары.
6. Хъусын кӕнгӕйӕ нӕ нысан цы у, ӕмӕ ацы статьяйы цы уынаффӕтӕ ис, уыдон нын куыд баххуыс кӕндзысты?
6 Аккаг адӕмы агургӕйӕ, ма рох кӕнӕм, искӕимӕ Библи ахуыр кӕнын цӕмӕн райдайӕм, уый. Мах фӕнды ӕххуыс кӕнын сыгъдӕгзӕрдӕ адӕмӕн, цӕмӕй Иегъовӕйӕн сӕхи снывонд кӕной ӕмӕ донаргъуыд райсой. Цӕй, уӕдӕ нын ацы хъуыддаджы Иегъовӕ арфӕ кӕнӕд! (2 Тим. 4:5).