Библи ахуыр кӕнын райдайын къӕсӕргӕрон ӕмӕ телефонӕй
1, 2. Цы аразӕн ис, цӕмӕй ӕнӕвдӕлон адӕмӕн Библи ахуыр кӕнынӕн ӕххуыс кӕнӕм?
1 Абон адӕм ӕнӕвдӕлон сты. Фӕлӕ сӕ уӕддӕр бирӕты фӕнды Хуыцауы тыххӕй базонын. Куыд сын у нӕ бон баххуыс кӕнын? (Матф. 5:3). Бирӕ хъусынгӕнджытӕ адӕмимӕ Библи ахуыр кӕнын райдайынц хӕдзары къӕсӕргӕрон кӕнӕ телефонӕй. Дӕуӕн дӕр дӕ бон нӕ уаид афтӕ аразын?
2 Искӕимӕ ахуыр райдайынӕн хъуамӕ кӕддӕриддӕр цӕттӕ уӕм, Библи куыд ахуыр кӕнӕн ис, уый равдисынмӕ. Куыд ӕмӕ кӕм аразӕн ис уый?
3. Библи куыд ахуыр кӕнӕн ис, уый адӕймагӕн, фыццаг хатт ӕм куы бацӕуӕм, уӕд цӕмӕн хъӕуы ӕвдисын ӕмӕ уый куыд саразӕн ис?
3 Къӕсӕргӕрон. Библийыл ныхас кӕнын кӕй фӕнды, ахӕм адӕймагыл куы сӕмбӕлай, уӕд дӕ бирӕ ницы хъӕуы: бакӕн, рагацау кӕй бацӕттӕ кодтай, уыцы абзац, зӕгъӕм, брошюрӕ «Цы домы»-йы 1-аг урочы фыццаг абзац. Бакӕс ӕй, равзар фарст ӕмӕ иу кӕнӕ дыууӕ стихы Библийӕ. Арӕхдӕр уый саразӕн вӕййы къӕсӕргӕрон дӕр, фондз кӕнӕ дӕс минуты дӕргъы. Цӕуыл ныхас кӕнут, уый кӕд адӕймагӕн йӕ зӕрдӕмӕ цӕуы, уӕд йемӕ бадзур, иннӕ хатт та ноджы иу кӕнӕ дыууӕ абзацы кӕй развардзыстут (Библи ахуыр кӕныны тыххӕй комкоммӕ куыд ис зӕгъӕн, уый фӕдыл фылдӕр уынаффӕтӕ ис 2002 азы январы «Нӕ хъусын кӕныны хъуыддаг»-ы, 6 фарс).
4. Адӕймагмӕ ногӕй куы бацӕуӕм, уӕд куыд у нӕ бон йемӕ къӕсӕргӕрон Библи ахуыр кӕнын райдайын?
4 Раст афтӕ у нӕ бон райдайын Библи ахуыр кӕнын, адӕймагмӕ дыккаг-ӕртыккаг хатт куы бацӕуӕм, уӕд дӕр. Дӕ бон у, ӕмӕ йын равдисай брошюрӕ «Цы домы» ӕмӕ йын 2-аг урочы фыццаг дыууӕ абзацмӕ гӕсгӕ радзурай Хуыцауы номы тыххӕй. Иннӕ хатт ӕм куы бацӕуай, уӕд та 3-аг ӕмӕ 4-ӕм абзацтӕм гӕсгӕ равзар, Библи Иегъовӕйы миниуджыты тыххӕй цы дзуры. Уый фӕстӕ та ӕрныхас кӕн 5-ӕм ӕмӕ 6-ӕм абзацтыл. Уыимӕ ма йын, 5-ӕм фарсыл цы ныв ис, уый фӕрцы бамбарын кӕн, Библи ахуыргӕнгӕйӕ Иегъовӕйы хуыздӕр куыд базонӕн ис, уый. Ӕппӕт уыдӕттӕ аразӕн ис къӕсӕргӕрон.
5, 6. а) Иуӕй-иутӕн телефонӕй ахуыр кӕнын ӕнцондӕр цӕмӕн у? ӕ) Адӕймагӕн телефонӕй ахуыр кӕныны тыххӕй куыд у нӕ бон зӕгъын?
5 Телефонӕй. Иуӕй-иутӕн Библи ахуыр кӕнын, чи зоны, ӕнцондӕр уа телефонӕй. Цӕвиттон, хӕдзарӕй-хӕдзармӕ хъусынгӕнгӕйӕ хо фембӕлд иу ӕрыгон сылгоймагыл. Сылгоймаг уыд сывӕллонджын, стӕй ма йӕ куыстӕй – бынтон ӕнӕвдӕлон. Фӕлӕ йӕ уый фӕстӕ хо хӕдзары нал ӕййӕфта, ӕмӕ йӕм уӕд телефонӕй фӕдзырдта. Сылгоймаг ын загъта, зӕгъгӕ мын Библийыл ныхас кӕнынӕн ӕппындӕр рӕстӕг нӕй. Уӕд ын хо загъта: «Дӕ бон у, ӕмӕ-иу телефонӕй дӕр 10–15 минутмӕ Библийӕ ног истытӕ базонай». «Хорз, кӕд телефонӕй, уӕд разы дӕн»,– загъта йын сылгоймаг. Бирӕ нӕ рацыд, афтӕ телефонӕй Библи ахуыр кӕнын райдыдтой.
6 Ды кӕмӕн хъусын кӕныс, уыдонӕй дӕр, мыййаг, чидӕртӕ сразы уыдзысты телефонӕй ахуыр кӕнын? Дӕ бон у, нӕ хо куыд бакодта, афтӕ саразын кӕнӕ та зӕгъын: «Кӕд дӕ фӕнды, уӕд нӕ бон у Библийыл телефонӕй дӕр ныхас кӕнын. Мыййаг дын афтӕ ӕнцондӕр уыдзӕн?». Адӕмӕн куыд ӕнцондӕр у, афтӕ куы ахуыр кӕнӕм семӕ Библи, уӕд сын баххуыс кӕндзыстӕм «Хуыцауы тыххӕй раст зонындзинӕдтӕ» ссарынӕн (Ӕмб. 2:5; 1 Кор. 9:23).