Ӕрдзон бӕллӕхтӕм цӕттӕ дӕ?
1. Ӕрдзон бӕллӕхтӕм цӕттӕ кӕнын зондыл дзурӕг цӕмӕн у?
1 Алы аз дӕр ӕгас дунейы милуантӕ, уыдонимӕ нӕ хотӕ ӕмӕ ӕфсымӕртӕй дӕр бирӕтӕ бахауынц зӕххӕнкъуыстыты, цунамийы, тӕрккъӕвдаты, тыхдымгӕты ӕмӕ донивылдты. Ӕрдзон бӕллӕхтӕ ӕнӕнхъӕлӕджы кӕй ӕрцӕуынц ӕмӕ алкӕмӕндӕр тӕссаг кӕй сты, уымӕ гӕсгӕ зондыл дзурӕг уыдзӕн, цӕттӕ сӕм куы уӕм, уӕд (Ӕмб. 21:5).
2. Ныр нын цы адрис ӕмӕ телефоны номыртӕ ис, уыдон хистӕр нӕлгоймӕгтӕм цӕмӕн хъуамӕ уой?
2 Рагацау цӕттӕ уӕм. Иуӕй-иу хатт хицауад бӕллӕхы тыххӕй рагацау бафӕдзӕхсы. Тынг ахсджиаг у, цӕмӕй ахӕм фӕдзӕхстытӕм нӕ хъус лӕмбынӕг дарӕм (Ӕмб. 22:3). Ахӕм рӕстӕг хистӕр нӕлгоймӕгтӕ ӕмбырды алкӕйдӕр ӕрцагурдзысты, цӕмӕй сын баххуыс кӕной, цы хъӕуы, уый бацӕттӕ кӕнынӕн. Бӕллӕхы фӕстӕ дӕр хистӕр нӕлгоймӕгтӕ архайдзысты, ӕмбырдтӕм чи цӕуы, уыдон бабӕрӕг кӕныныл, цӕмӕй базоной, дзӕбӕх кӕй сты ӕмӕ сын баххуыс кӕнын цӕмӕй хъӕуы, уый. Хистӕр нӕлгоймӕгтӕ куы нӕ зоной, кӕм агургӕ сты, уый, уӕд сын афоныл нӕ баххуыс кӕндзысты. Уымӕ гӕсгӕ тынг ахсджиаг у, хъусынгӕнджытӕн ныр цы адристӕ ӕмӕ телефоны номыртӕ ис, уыдон куы уаиккой секретармӕ ӕмӕ сӕ чиныгахуыры цӕстдарӕгмӕ.
3. Бӕллӕхтӕ арӕх кӕм вӕййы, уым хистӕр нӕлгоймӕгтимӕ ӕмгуыст кӕнын цӕмӕн хъӕуы?
3 Бӕллӕхтӕ арӕх кӕм вӕййы, ахӕм ран ма хистӕр нӕлгоймӕгтӕн сӕ бон у хъусынгӕнджытӕй базонын, уырдӕм ӕввахс чи нӕ цӕры, ӕмӕ бахъуаджы рӕстӕг фӕдзурӕн кӕмӕ уа, ахӕм хӕстӕджытӕ кӕнӕ ӕмбӕлтты нӕмттӕ ӕмӕ сӕ телефонты номыртӕ. Афтӕмӕй хистӕр нӕлгоймӕгтӕн сӕ бон уыдзӕн, чи алыгъд, уыдон кӕм сты, уый базонын. Хистӕр нӕлгоймӕгтӕн ма сӕ бон у пълан бацӕттӕ кӕнын дӕр – ӕмбырд цы хъуамӕ араза, ӕнӕнхъӕлӕджы исты куы ’рцӕуа, уӕд. Уыцы пъланмӕ бахӕссӕн ис: уыцы рӕстӕг ӕнӕмӕнг цы бахъӕудзӕн, ахӕм дзауматы номхыгъд; бӕллӕхы рӕстӕг уыцы бынатӕй куыд ацӕуӕн уыдзӕн, ӕмӕ тынгдӕр фӕкӕсын хъуаг чи у, уыдонӕн куыд баххуыс кӕндзысты, уый. Ацы хъуыддаг у нӕ пайдайӕн, уымӕ гӕсгӕ ӕмгуыст кӕнын ахсджиаг у (Дзут. 13:17).
4. Кӕм цӕрӕм уым бӕллӕх куы ’рцӕуа, уӕд цы хъуамӕ аразӕм?
4 Бӕллӕхы фӕстӕ. Кӕм цӕрыс, уым бӕллӕх куы ’рцӕуа, уӕд цы хъуамӕ аразай? Базон, дӕ бинонты ӕнӕмӕнг цы хъӕуы, уый цух кӕй не сты. Кӕд дӕ бон у, уӕд иннӕтӕм дӕр фӕкӕс. Цас тагъддӕр, уыйас хуыздӕр уыдзӕн, дӕ чиныгахуыры цӕстдарӕг кӕнӕ ӕндӕр хистӕр нӕлгоймаджы ӕрцагурын кӕнӕ йӕм телефонӕй фӕдзурын. Афтӕ бакӕнын хъӕудзӕн, ӕдас ран куы уай ӕмӕ дӕ ӕххуыс куы нӕ хъӕуа, уӕддӕр. Ӕххуыс дӕ куы хъӕуа, уӕд та фидарӕй зон, ӕфсымӕртӕ алцыдӕр кӕй сараздзысты, цӕмӕй дын баххуыс кӕной (1 Кор. 13:4, 7). Дӕ зӕрдыл дар: Йегъовӕ дын дӕ уавӕр зоны, кӕй дын баххуыс кӕндзӕн, ууыл дызӕрдыг ма кӕн (Пс. 36:39; 61:9). Лӕмбынӕг у, зӕрдӕ бавӕрын ӕмӕ бафидар кӕнын кӕй хъӕуы, уыдоны фарсмӕ балӕуу (2 Кор. 1:3, 4). Гӕнӕн ӕмӕ амалӕй бацархай, цӕмӕй та раздӕрау Хуыцауы хъуыддӕгты архайай (Матф. 6:33).
5. Бӕллӕхтӕй тӕссаг кӕй у, уый ныл куыд хъуамӕ ӕндава?
5 Кӕд бӕллӕхтӕй тӕссаг кӕй у, уый адӕмы мӕты ’фтауы, уӕддӕр махӕн нӕ бон у фидӕнмӕ ныфсджынӕй кӕсын. Тагъд бӕллӕхтӕн сӕ кой дӕр нал уыдзӕн (Рарг. 21:4). Фӕлӕ уал уӕдмӕ хъуамӕ ӕмбаргӕ уӕм ӕмӕ нӕхи цӕттӕ кӕнӕм ӕрдзон бӕллӕхтӕм ӕмӕ уӕззау рӕстӕджытӕм, ӕмӕ дарддӕр дӕр зынгзӕрдӕйӕ хъусын кӕнӕм хорз хабар.