Адӕмимӕ Библи ахуыр кӕнӕм!
1. Цавӕр «хорздзинад» у нӕ бон адӕмӕн аразын?
1 Хуыцауы Паддзахады тыххӕй хорз хабар куы фӕхъусын кӕнӕм, уӕд адӕмӕн «хорздзинад» нӕ февгъау кӕнӕм (Ӕмб. 3:27). Ног дуне кӕй уыдзӕн, уымӕй хуыздӕр хабар нӕй. Кӕд зӕрдиагӕй хъусын кӕныс, фадат дын куы фӕзыны, уӕд, кӕнӕ адӕмӕн литературӕ фӕхӕссыс, уӕддӕр хорз нӕ уаид дӕхицӕн нысан куы сӕвӕрис, искӕимӕ Библи ахуыр кӕнын, кӕд нырма никӕимӕ ахуыр кӕныс, уӕд?
2. Цы нӕ фӕхъыгдары искӕимӕ Библи ахуыр кӕнын райдайын?
2 Иуӕй-иутӕ искӕимӕ Библи ахуыр кӕнын нӕ райдайынц, сӕ ныфс кӕй нӕ хӕссынц, йе та тынг ӕнӕвдӕлон кӕй сты, уый тыххӕй. Дӕлдӕр цы уынаффӕтӕ ис, уыдон дын уыцы хъуыддаджы баххуыс кӕндзысты (Матф. 28:19; Ап. хъ. 20:20).
3. Нӕ бон цӕй фӕрцы у адӕмимӕ Библи ахуыр кӕнын?
3 Нӕ ныфс куы нӕ хӕссӕм. Чи зоны дӕм фаг ахуырад кӕй нӕй кӕнӕ дӕм ӕндӕр цӕйдӕр тыххӕй афтӕ кӕсы, дӕ бон кӕй не суыдзӕн адӕймагимӕ Библи ахуыр кӕнын. Фыццаг ӕнусы ӕнтыстджын хъусынгӕнджытӕм дӕр «ахуырдзинад... нӕ уыд ӕмӕ хуымӕтӕг адӕм» уыдысты. Цы сын ӕххуыс кодта адӕмӕн Хуыцауы ныхас амонӕн? Библийы кӕсӕм: «Уыдон дӕр-иу Йесоимӕ... уыдысты» (Ап. хъ. 4:13). Ахуыр кодтой ӕппӕты хуыздӕр ахуыргӕнӕгмӕ, Йесомӕ. Фыстады кӕсӕм, цы амыдта ӕмӕ иннӕты куыд ахуыр кодта, уый тыххӕй. Кӕд дӕм фаг ахуыр нӕй, уӕддӕр ды ахуыр кӕныс Хуыцау ӕмӕ йӕ фӕндты тыххӕй, уыцы ахуырадӕн та ӕмбал нӕй (Ис. 50:4; 2 Кор. 3:5).
4. Амосӕй цӕуыл ахуыр кӕнӕм?
4 Иуӕй-иу хатт-иу Йегъовӕ пехуымпарты уылты бауайдзӕф кодта ӕвзӕр паддзӕхтӕн кӕнӕ хицӕуттӕн. Уыцы пехуымпартӕй иуӕй-иутӕ, зӕгъӕм, Амос, уыдысты хуымӕтӕг адӕм. Амос загъта: «Ӕз нӕдӕр мӕхӕдӕг уыдтӕн пехуымпар, нӕдӕр мӕ фыд. Ӕз уыдтӕн фыййау ӕмӕ легъуитӕ хуынчъытӕ кодтон» (Амос 7:14). Фӕлӕ уӕддӕр Амос зӕрдиагӕй хъусын кодта Йегъовӕйы тӕрхоны хабар мӕнгхуыцауӕн кувӕг сауджын Амасийӕн (Амос 7:16, 17). Мах хъуамӕ ӕдзух нӕ зӕрдыл дарӕм, Хуыцауы хъуыддаг кӕй аразӕм ӕмӕ нын кӕй ӕххуыс кӕндзӕн, цӕмӕй йӕ ӕххӕст кӕнӕм (2 Тим. 3:17).
5. Искӕимӕ Библи ахуыр кӕнын райдайыныл цӕмӕн хъуамӕ архайӕм, ӕнӕвдӕлон куы уӕм, уӕддӕр?
5 Ӕнӕвдӕлон куы уӕм. Кӕд дын бирӕ куыст вӕййы, уӕддӕр, ӕвӕццӕгӕн, рӕстӕг рахицӕн кӕныс, цӕмӕй ӕдзух уацамынды цӕуай. Адӕмимӕ Библи ахуыр кӕнын у нӕ лӕггады ӕхсызгондӕр хъуыддӕгтӕй иу. Стыр кад куыннӕ у, Хуыцауы Ныхас адӕймаджы цард хуыздӕрырдӕм куыд ивы, уый уынын (Дзут. 4:12). Нӕхиуыл куы нӕ фӕауӕрдӕм, цӕмӕй адӕмӕн баххуыс кӕнӕм, «ӕцӕгдзинад цы у, уый бӕлвырдӕй базонынӕн», уӕд Йегъовӕйы зӕрдӕ барухс вӕййы (1 Тим. 2:4). Зӕдтӕ дӕр фӕцин кӕнынц, исчи куы ’рфӕсмон кӕны ӕмӕ Хуыцауӕн лӕггад кӕнын куы райдайы, уӕд (Лук. 15:10).
6. Цавӕр стыр кады аккаг нӕ скодта Хуыцау?
6 Хуыцауы «фӕнды, цӕмӕй алыхуызон адӕймӕгтӕ дӕр, ӕцӕгдзинад цы у, уый бӕлвырдӕй базоной ӕмӕ фервӕзой» (1 Тим. 2:4). Уӕдӕ, Хуыцауы фӕндон кӕй ӕххӕст кӕнӕм ӕмӕ адӕмимӕ Библи кӕй ахуыр кӕнӕм, уый цӕй стыр кад у!