Адӕммӕ ногӕй цӕугӕйӕ нӕхи цӕттӕ кӕнӕм
1. Фыццаг ӕнусы чырыстӕттӕ цы куыст кодтой, уый куыд апарахат?
1 Йесо Чырысти йӕ ахуыргӕнинӕгты хорз бацӕттӕ кодта, цӕмӕй «Хуыцауы паддзахады тыххӕй» бӕстон хъусын кодтаиккой (Матф. 4:23; 9:35). Уыцы рӕстӕг хъусын кодтой ӕрмӕст Палестинӕйы. Фӕлӕ уӕлӕрвтӕм ацӕуыны размӕ Йесо загъта, хорз хабар ӕнӕхъӕн дунейы дӕр кӕй апарахат уыдзӕн, цӕмӕй «ӕппӕт адӕмыхӕттытӕй дӕр цӕттӕ кӕной ахуыргӕнинӕгтӕ» (Матф. 28:19, 20).
2. Чырыстийы фӕдзӕхстмӕ, цӕттӕ кӕнут ахуыргӕнинӕгтӕ, зӕгъгӕ, цы хауы?
2 Ацы куыстмӕ хауы, Хуыцауы Паддзахады тыххӕй фылдӕр базонын кӕй фӕнды, уыдонмӕ ногӕй цӕуын ӕмӕ сӕ ахуыр кӕнын, цӕмӕй, Чырысти цы бафӕдзӕхста, ӕппӕт уыдӕттӕ ӕххӕст кӕной. Адӕймагмӕ ногӕй куы цӕуӕм, уӕд хъуамӕ нӕхи хорз бацӕттӕ кӕнӕм, цӕмӕй йын нӕ бон баххуыс кӕнын уа.
3. Адӕймагимӕ фыццаг хатт ныхас кӕнгӕйӕ нӕ бон цы у саразын, цӕмӕй иннӕ хатт нӕ ныхас адарддӕр кӕнӕм?
3 Фыццаг фембӕлды рӕстӕг-иу баныхас кӕн. Иуӕй-иу хъусынгӕнджытӕ адӕймагимӕ фыццаг хатт куы фембӕлынц, уӕд сӕ ныхасы кӕрон раттынц фарста, ӕмӕ стӕй фӕзӕгъынц, иннӕ хатт ыл кӕй аныхас кӕндзысты. Дыккаг хатт куы бацӕуынц, уӕд чиныгӕй «Библи цы дзуры» цыдӕр хъуыды фӕзӕгъынц, ӕмӕ уый фӕрцы адӕймагимӕ Библи ахуыр кӕнын райдайынц.
4. Цӕмӕй адӕймагмӕ ногӕй бацӕуӕм, уый тыххӕй цӕуылнӕ хъӕуы ног журналтӕм ӕнхъӕлмӕ кӕсын?
4 Цӕмӕй адӕймагмӕ ногӕй бацӕуӕм, уый тыххӕй нӕ нӕ хъӕуы ӕнхъӕлмӕ кӕсын, ног журналтӕ кӕд райсдзыстӕм, уымӕ. Цӕмӕй йӕ фылдӕр базонын бафӕнда, уый тыххӕй нӕ бон у йемӕ ныхас кӕнын, цы журнал ын раттам, уымӕй искӕцы статьяйыл.
5. Цӕуыл ныхас кӕндзынӕ, ууыл рагацау ахъуыды кӕнын цӕмӕн хъӕуы?
5 Цӕуыл ныхас кӕндзынӕ, ууыл рагацау ахъуыды кӕн. Адӕймагмӕ дыккаг хатт бацӕуыны размӕ дӕ фыстытӕм ӕркӕс ӕмӕ ахъуыды кӕн, цӕуыл дзурдзынӕ, ууыл. Зӕгъӕм, уыйразмӕ йын цы журнал ныууагътай, уырдыгӕй цавӕрдӕр хъуыдыйыл аныхас кӕн. Кӕнӕ та йын ратт, фӕстаг хатт цӕуыл ныхас кодтат, уыимӕ баст литературӕ. Кӕд цыдӕр фарста равзарыныл баныхас кодтат, уӕд-иу ын ӕнӕмӕнг дзуапп ратт. Дӕ ныхас дын хуыздӕр чи ӕмбарын кӕны, уыцы стих ын комкоммӕ Библийӕ бакӕс.
6. Адӕймагмӕ ногӕй куы бацӕуӕм, уӕд нӕ нысан цы вӕййы?
6 Нӕ нысан. Нӕ нысан у адӕмимӕ Библи ахуыр кӕнын райдайын. Иу ӕфсымӕр иу лӕгмӕ дыккаг хатт куы бацыд, уӕд ын Библийы ахуыры тыххӕй загъта, фӕлӕ уыцы лӕджы нӕ бафӕндыд. Ӕфсымӕр ӕм ӕндӕр хатт ног журналтимӕ бацыд ӕмӕ йын загъта: «Абон адӕмимӕ ныхас кӕнӕм Библийӕ иу фарстайыл». Адӕймаг йӕ хъуыды куы загъта, уӕд ын ӕфсымӕр бакаст стих ӕмӕ чиныгӕй абзац. Афтӕмӕй йемӕ Библи ахуыр кӕнын райдыдта.
7. Дӕхи кӕй фӕцӕттӕ кӕныс, уый дын куыд баххуыс кодта, цӕмӕй искӕимӕ Библи ахуыр кӕнын райдайай?
7 Адӕммӕ ногӕй бацӕуыны размӕ нӕхи рагацау куы цӕттӕ кӕнӕм, уӕд нын бирӕ бантысдзӕн. Нӕ циндзинад фылдӕр кӕндзӕн ӕмӕ, «ӕнусон цардмӕ здӕхт» чи у, уыдонӕн баххуыс кӕндзыстӕм (Ап. хъ. 13:48).