Адӕмы ногӕй бӕрӕг кӕнын — хорз фадат Библи искӕимӕ ахуыр кӕнын райдайынӕн
1. Адӕмы ногӕй бӕрӕг кӕнын афтӕ ахсджиаг цӕмӕн у?
1 Йесо йӕ фӕдылдзӕуджытӕн ӕрмӕст хъусын кӕнын нӕ бафӕдзӕхста, фӕлӕ ма «цӕттӕ кӕнын ахуыргӕнинӕгтӕ... ахуыр сӕ кӕнын» (Матф. 28:19, 20, НД). Хъусынгӕнӕджы хӕс у хъусын кӕнын, фӕлӕ ахуыргӕнӕг та фылдӕр аразы. Уый амоны, ӕмбарын кӕны ӕмӕ бӕлвырдгӕнӕнтӕ хӕссы. Нӕ ахуыр кӕныны мадзӕлттӕй иу у цымыдисгӕнӕг адӕмы ногӕй бӕрӕг кӕнын, цӕмӕй семӕ Библи ахуыр кӕнын райдайӕм.
2. Кӕй ис ногӕй бӕрӕг кӕнӕн?
2 Кӕй у дӕ бон ногӕй бӕрӕг кӕнын? Кӕй зӕгъын ӕй хъӕуы, литературӕ чи исы, кӕнӕ хорз хабар иу гыццылдӕр кӕй бацымыдис кодта, уыдонӕй алкӕйдӕр. Ӕхсӕнадон бынӕтты хъусынгӕнгӕйӕ, исчи куы бацымыдис кӕна, уӕд ын райс йӕ адрис кӕнӕ йӕ телефоны номыр, цӕмӕй йемӕ дарддӕр ныхас кӕнай ӕцӕгады тыххӕй. Ныфс дӕ уӕд, искӕимӕ Библи ахуыр кӕнын кӕй райдайдзынӕ. Дарддӕр дӕр агур, Библи ахуыр кӕнын кӕй бафӕнда, ахӕм адӕмы, ӕмӕ сӕ уӕд, гӕнӕн ис, ссарай (Матф. 10:11).
3, 4. Цы хъӕуы, цӕмӕй адӕймагмӕ ногӕй куы бацӕуӕм, уӕд йемӕ хорз аныхас кӕнӕм?
3 Адӕмыл зӕрдӕйӕ у. Адӕймагимӕ фыццаг хатт куы фӕныхас кӕнӕм, дыккаг бацыдӕн бындур растдӕр уӕд сӕвӕрӕм. Фӕлтӕрд хъусынгӕнджытӕ сӕхимӕ ныффыссынц, адӕймаджы цы цымыдис кӕны, уый, ӕмӕ дзы стӕй спайда кӕнынц дарддӕры фембӕлдты. Иуӕй-иутӕ ныхасы кӕрон адӕймагмӕ цымыдисаг фарст раттынц, цӕмӕй ӕндӕр хатт куы бацӕуой, уӕд зоной, цӕуыл ныхас кӕной, уый. Адӕмыл зӕрдӕйӕ куы уӕм, уӕд сыл уый фӕстӕ дӕр хъуыды кӕндзыстӕм ӕмӕ бацархайдзыстӕм, цӕмӕй сӕм тагъддӕр бацӕуӕм. Гӕнӕн уӕвгӕйӕ, цымыдисгӕнӕг адӕммӕ тагъддӕр бацу, цалынмӕ ма, цӕуыл дзырдтат, уый хъуыды кӕнынц, уӕдмӕ, зӕгъӕм, иу кӕнӕ дыууӕ боны фӕстӕ.
4 Адӕймагмӕ ногӕй куы бацӕуай, уӕд адарддӕр кӕн, уымӕй размӕ цӕуыл ныхас кодтат, уый. Дӕ разы нысан сӕвӕр — алы бацыдӕн дӕр Библийӕ ӕппынкъаддӕр иу зӕрдӕфидаргӕнӕн хъуыды зӕгъын ӕмӕ зӕрдӕбынӕй хъусын. Бацархай адӕймаджы хуыздӕр базонын ӕмӕ-иу ӕм куы бацӕуай, уӕд-иу ын Хуыцауы Ныхасӕй бакӕс, тынгдӕр ыл чи бандавдзӕн, ахӕм хъуыдытӕ.
5. Хуымӕтӕгӕй куыд ис искӕимӕ Библи ахуыр кӕнын райдайӕн?
5 Архай искӕимӕ Библи ахуыр кӕнын райдайын. Адӕмы ногӕй куы бӕрӕг кӕнай, уӕд дӕ разы нысан сӕвӕр, цӕмӕй искӕимӕ Библи ахуыр кӕнын райдайай. Куыд ис уый саразӕн? Дӕ бон у зӕгъын, кӕй дӕ фӕнды иу хорз хъуыды бакӕсын, стӕй рафӕлдах чиныг «Базонынад» кӕнӕ брошюрӕ «Цы домы»-йы ахӕм абзац, дӕумӕ гӕсгӕ йын йӕ зӕрдӕ тынгдӕр чи бацагайдзӕн. Бакӕс абзац, равзар фарст ӕмӕ ӕрныхас кӕн амынд стихтӕй иу кӕнӕ дыууӕйыл. Уый саразӕн ис къӕсӕргӕрон дӕр фондз-дӕс минутмӕ. Кӕронбӕттӕны та ратт ӕндӕр фарст ӕмӕ баныхас кӕн, кӕд ыл аныхас кӕндзыстут, ууыл.
6. Куыд у нӕ бон ӕвдисын, адӕмы ногӕй бӕрӕг кӕнын ахсджиаг кӕй у, уый кӕй ӕмбарӕм?
6 Адӕймаг иу гыццылдӕр куы байхъуса, уӕд ӕй хъӕуы ӕцӕгадимӕ хуыздӕр зонгӕ кӕнын, уымӕн ӕмӕ уый у нӕ уацамынды ахсджиаг фадыг. Уымӕ гӕсгӕ алы къуыри дӕр хицӕн кӕн рӕстӕг адӕмы ногӕй бӕрӕг кӕнынӕн. Афтӕмӕй дын уацамынды фылдӕр ӕнтысдзӕн ӕмӕ дӕ зӕрдӕ цинӕй райдзӕн.