Ныхас кӕнӕм, адӕймаджы цы цымыдис кӕны, ууыл
1. Фыццаг ӕнусы чырыстӕттӕ алыхуызон адӕмӕн куыд хъусын кодтой, уымӕй цӕуыл ахуыр кӕнӕм?
1 Фыццаг ӕнусы чырыстӕттӕ хорз хабар кӕмӕн хъусын кодтой, уыдон уыдысты алы адӕмыхӕттытӕй ӕмӕ алыхуызон диныл хӕст (Кол. 1:23). Кӕд сӕйраджыдӕр Хуыцауы паддзахады тыххӕй дзырдтой, уӕддӕр-иу сӕ ныхас райдыдтой, сӕ ныхасмӕхъусджытӕ чи уыдысты, уымӕ гӕсгӕ. Зӕгъӕм, Фыстадыл тынг чи ӕууӕндыд, Петр уыцы дзуттӕгтӕн куы хъусын кодта, уӕд йӕ ныхас райдыдта пехуымпар Иоилы ныхӕстӕй (Хъуыд. 2:14–17). Хъуыддӕгты 17:22–31 та фыст ис, Павел грекъӕгтӕн куыд хъусын кодта, уый тыххӕй. Абон кӕм хъусын кӕнӕм, уым чидӕртӕ ӕууӕндынц Хуыцауы Ныхасыл. Уымӕ гӕсгӕ хӕдзарӕй-хӕдзармӕ хъусынгӕнгӕйӕ нӕ бон вӕййы Библийӕ пайда кӕнын. Фӕлӕ хъуамӕ ӕмбаргӕ уӕм, Библи ӕмӕ дин кӕй нӕ цымыдис кӕнынц, кӕнӕ чырыстон диныл хӕст чи нӕу, ахӕм адӕмимӕ куы ныхас кӕнӕм, уӕд.
2. Литературӕ дӕтгӕйӕ куыд ныхас кӕнӕм, Библийыл чи ӕууӕнды ӕмӕ йыл чи не ’ууӕнды, ахӕм адӕмимӕ?
2 Литературӕ дӕтгӕйӕ куыд ныхас кӕнӕм. Ацы лӕггады азы цы трактаттӕ ӕмӕ брошюрӕтӕ парахат кӕндзыстӕм, уыдон дӕтгӕйӕ цы зӕгъӕн уыдзӕн, уый алы дыууӕ мӕй дӕр ивдзӕн. Нӕ территорийы адӕм Библийыл куы не ’ууӕндой, уӕд дӕр нӕ бон уыдзӕн семӕ ныхас кӕнын, цы сӕ цымыдис кӕны, ууыл. Фыццаг хатт кӕмӕ бацыдыстӕм, уымӕн кӕд Библийӕ стих нӕ бакастыстӕм, фӕлӕ нӕм хорз байхъуыста, уӕд ын иннӕ хатт баххуыс кӕндзыстӕм, цӕмӕй Сфӕлдисӕгыл ӕмӕ йӕ Ныхасыл баууӕнда. Кӕнӕ кӕм хъусын кӕнӕм, уым адӕм Библийӕн куы аргъ кӕной, уӕд сын нӕ бон у литературӕ дӕттын ӕмӕ нӕ ныхас дӕр уымӕ гӕсгӕ аразын. Брошюрӕтӕ «Хуыцаумӕ хъус» ӕмӕ «Хуыцаумӕ хъус, ӕмӕ ӕнустӕм цӕрай» нӕ бон у парахат кӕнын алкӕддӕр, уыцы мӕй ӕндӕр исты куы парахат кӕнӕм, уӕддӕр. Сӕйрагдӕр у, цӕмӕй адӕмы бафӕнда Йегъовӕйы тыххӕй фылдӕр базонын.
3. Нӕ территорийы адӕмӕн сӕ зӕрдӕтӕ зӕххимӕ абарӕн цӕмӕн ис?
3 Зӕрдӕтӕ цӕттӕ кӕнӕм. Адӕймаджы зӕрдӕ абарӕн ис зӕххимӕ (Лук. 8:15). Иуӕй-иу зӕхх, кӕнӕ зӕрдӕ, фӕхъӕуы фылдӕр цӕттӕ кӕнын, цалынмӕ дзы рӕстдзинады мыггӕгтӕ уидаг ауадзой ӕмӕ сырӕзой, уӕдмӕ. Фыццаг ӕнусы хъусынгӕнджытӕ мыггаг ӕнтыстджынӕй тыдтой алыхуызон зӕххы, ӕмӕ сын уый хаста стыр циндзинад (Хъуыд. 13:48, 52). Мах дӕр ӕнтыстджын уыдзыстӕм, литературӕ дӕтгӕйӕ куыд ныхас кӕнӕм, уымӕ нӕ хъус куы дарӕм, уӕд.