«Бӕстон хъусын кӕнӕм»
1. Апостол Павел куыд хъусын кодта, уымӕй нын фӕзминаг куыд у?
1 «Дӕ лӕггады рохуаты мацы уадз» (2 Тим. 4:5). Апостол Павелӕн йе ’фсарм уый бар лӕвӕрдта, цӕмӕй Тимофейӕн ахӕм уынаффӕ радтаид. Цӕмӕн? Уымӕн ӕмӕ н. э. 47 азӕй 56 азмӕ Павел уыди ӕртӕ уацамындон балцы. Хъуыддӕгты чиныджы иу ӕмӕ дыууӕ хатты фыст нӕй, Павел «бӕстон [кӕй] хъусын кодта», уый тыххӕй (Хъуыд. 23:11; 28:23). Цымӕ махӕн та нӕ бон куыд у бӕстон хъусын кӕнын?
2. Нӕ бон куыд у хӕдзарӕй-хӕдзармӕ бӕстон хъусын кӕнын?
2 Хӕдзарӕй-хӕдзармӕ. Нӕ участокы хорз хабар чи нӕма фехъуыста, уыдоны нӕ бон у алыхуызон рӕстӕг бӕрӕг кӕнын, цӕмӕй семӕ аныхас кӕнӕм. Нӕлгоймӕгтӕй бирӕтӕ хӕдзары вӕййынц изӕрыгӕтты кӕнӕ улӕфгӕ бонты. Хъуамӕ архайӕм, цӕмӕй нын иу хӕдзар дӕр афтӕмӕй ма баззайа, ӕмӕ дзы макӕимӕ аныхас кӕнӕм, ногӕй-иу цӕуӕм, кӕм никӕй баййӕфтам, уырдӕм. Фӕлӕ дын адӕймаджы хӕдзары баййафын зын куы уа, уӕд та? Уӕд, ӕвӕццӕгӕн, хорз уыдзӕн, писмо йӕм куы ныффыссис кӕнӕ йӕм телефонӕй куы бадзурис.
3. Цавӕр фадӕттӕ дын ис, цӕмӕй, адӕм кӕм ис ӕмӕ дын фадат куы фӕзына, уӕд хъусын кӕнай?
3 Адӕм кӕм ис, уым ӕмӕ нын фадат куы фӕзына, уӕд. Йегъовӕйы лӕггадгӕнджытӕ «ӕцӕг зонд» хъусын кӕнынц, чидӕриддӕр сӕм хъусы, уыдонӕн. Иуӕй-иу хатт фӕхъусын кӕнынц «уынджы» ӕмӕ «горӕты фӕзты» (Ӕмб. 1:20, 21). Исты хъуыддӕгты фӕдыл искуыдӕм куы ацӕуӕм, уӕд нӕ хорз хабар хъусын кӕнын нӕ ферох вӕййы? Цымӕ афтӕ зӕгъӕн ис, ӕмӕ «не ’ппӕт хъарутӕ дӕр сарӕзтам Хуыцауы ныхас хъусын кӕнынмӕ»? (Хъуыд. 18:5). Кӕд о, уӕд нӕ хӕс ӕххӕст кӕнӕм – «бӕстон хъусын кӕнӕм» (Хъуыд. 10:42; 17:17; 20:20, 21, 24).
4. Хуыцаумӕ куы кувӕм ӕмӕ лӕмбынӕг куы хъуыды кӕнӕм, уӕд нын уый куыд баххуыс кӕндзӕн, цӕмӕй бӕстон хъусын кӕнӕм?
4 Фӕлӕ нын хатт хъусын кӕныны фадат куы фӕзыны, уӕддӕр дзы не спайда кӕнӕм, уымӕн ӕмӕ нӕ ныфс нӕ фӕхӕссӕм кӕнӕ ӕфсӕрмыгӕнаг стӕм. Кӕй зӕгъын ӕй хъӕуы, Йегъовӕ хорз ӕмбары, нӕ бон цы у ӕмӕ цы нӕу, уый (Пс. 103:14). Ахӕм фадат нын куы фӕзына, уӕд-иу Йегъовӕмӕ скувӕм, цӕмӕй ныфсджынӕй дзурӕм (Хъуыд. 4:29, 31). Хуыцауы Ныхас куы фӕахуыр кӕнӕм ӕмӕ йыл куы фӕхъуыды кӕнӕм, уӕд хорз хабарӕн тынгдӕр аргъ кӕнын райдайӕм (Фил. 3:8). Уый нӕ разӕнгард кӕндзӕн, цӕмӕй зынгзӕрдӕйӕ хъусын кӕнӕм!
5. Нӕ бон цы у аразын, цӕмӕй Иоилы пехуымпарад ӕххӕст кӕна?
5 Пехуымпар Иоил ныффыста, зӕгъгӕ, цалынмӕ Йегъовӕйы стыр ӕмӕ тасӕфтауӕг бон не ’рцыд, уӕдмӕ Хуыцауы адӕм цӕудзысты ӕмӕ сын хъусын кӕныны хъуыддаджы къуылымпыйы хос ницы уыдзӕн (Иоил 2:2, 7–9). Уӕдӕ нӕ бон цыдӕриддӕр у, уый зӕрдиагӕй аразӕм, чи никуыуал уыдзӕн, уыцы хъуыддаджы.