Ахуыр кӕнӕм афоныл цӕуын
1. Йегъовӕ алцыдӕр афоныл кӕй аразы, уымӕй нын фӕзминаг куыд у?
1 Йегъовӕ алцыдӕр афоныл аразы. Зӕгъӕм, йӕ лӕггадгӕнджытӕн бахъуаджы сахат баххуыс кӕны (Дзут. 4:16). Стӕй ма сын «афоныл дӕтты», сӕ уырнындзинад сын чи фидар кӕны, ахӕм хӕринаг дӕр (Матф. 24:45). Уымӕ гӕсгӕ фидарӕй зонӕм, йӕ масты бон дӕр кӕй «нӕ байрӕджы кӕндзӕн» (Ав. 2:3). Куыд хорз у, Йегъовӕ алцыдӕр афоныл кӕй аразы! (Пс. 70:5). Фӕлӕ мах ӕнӕххӕст, ӕнӕвдӕлон адӕм кӕй стӕм, уымӕ гӕсгӕ нын зын у афоныл цӕуын. Ацы хъуыддагыл цӕмӕн хъуамӕ ахуыр кӕнӕм?
2. Афоныл куы цӕуӕм, уӕд Йегъовӕйӕн кад куыд хӕсдзыстӕм?
2 Ацы фӕстаг бонты адӕм уарзынц рӕджы кӕнын, бирӕтӕ сӕ сты хиуарзон ӕмӕ сӕхиуыл хӕцын дӕр нӕ зонынц (2 Тим. 3:1–3). Уымӕ гӕсгӕ, куыстмӕ ӕмӕ ӕндӕр рӕттӕм афоныл куы цӕуӕм, уӕд уый иннӕтӕ ӕнӕбафиппайгӕ нӕ фӕуыдзысты, ӕмӕ Йегъовӕйӕн дӕр кад хӕсдзыстӕм (1 Пет. 2:12). Цымӕ афтӕ вӕййы, ӕмӕ куыстмӕ афоныл бацӕуӕм, ӕмбырды фембӕлдтӕм ӕмӕ конгресстӕм та рӕджы кӕнӕм? Ӕмбырдмӕ афоныл куы цӕуӕм, зарӕг ӕмӕ-иу куывд дӕр куы нӕ рауадзӕм, уӕд ӕвдисдзыстӕм, нӕ уӕларвон Фыды хуызӕн уӕм, уый нӕ кӕй фӕнды (1 Кор. 14:33, 40).
3. Куы нӕ рӕджы кӕнӕм, уӕд куыд ӕвдисдзыстӕм, иннӕтыл кӕй хъуыды кӕнӕм?
3 Куы нӕ рӕджы кӕнӕм, уӕд бӕрӕг уыдзӕн, иннӕтыл кӕй хъуыды кӕнӕм (Фил. 2:3, 4). Зӕгъӕм, ӕмбырды фембӕлдтӕм ӕмӕ уацамындон фембӕлдтӕм куы нӕ рӕджы кӕнӕм, уӕд не ’мчырыстӕтты нӕ хъыгдардзыстӕм. Фӕлӕ арӕх куы рӕджы кӕнӕм, уӕд иннӕтӕ хъуыды кӕндзысты, нӕхи рӕстӕгӕн тынгдӕр кӕй аргъ кӕнӕм. Афоныл куы цӕуӕм, уӕд бӕрӕг уыдзӕн, ӕууӕндӕн ныл кӕй ис ӕмӕ нӕ ныхасӕн хицау кӕй стӕм – уыцы миниуджытӕн адӕм тынг аргъ кӕнынц.
4. Нӕ бон цы у аразын, цӕмӕй ма рӕджы кӕнӕм?
4 Рӕджыгӕнаг куы уай, уӕд ахъуыды кӕн, цӕмӕн фӕрӕджы кӕныс, ууыл. Дӕ хъуыддӕгтӕ афтӕ пълан кӕн, цӕмӕй алцыдӕр афоныл аразай (Еккл. 3:1; Фил. 1:10). Йегъовӕйӕ ӕххуыс кур (1 Иоан. 5:14). Куы нӕ рӕджы кӕнӕм, уӕд бӕрӕг уыдзӕн, дыууӕ ахсджиаг фӕдзӕхстӕн кӕй аргъ кӕнӕм – Хуыцауы дӕр ӕмӕ адӕмы дӕр уарзӕм (Матф. 22:37–39).