Йесо Чырыстийы фӕзмӕм
1. Йесо фӕзминаг цӕмӕй уыд?
1 Уацамынды куы вӕййӕм, уӕд хъуамӕ нӕ зӕрдыл дарӕм: нӕ хъуыддӕгтӕ тынг фӕзынынц, чи нӕм кӕсы, уыдоныл. Йесо Чырысти ахуыр кодта ныхасӕй ӕмӕ хъуыддагӕй. Адӕм уыдтой, куыд зӕрдиагӕй архайдта, цы уарзондзинад ӕм уыд, сӕйрагдӕр ын кӕй уыд йӕ Фыды ном кадджын кӕнын ӕмӕ фӕндфидарӕй кӕй ӕххӕст кодта йӕ Фыды фӕндон (1 Пет. 2:21).
2. Уацамынды кӕимӕ вӕййӕм, уыдоныл куыд ӕндавы, куыд хъусын кӕнӕм, уый?
2 Хӕдзарӕй хӕдзармӕ хъусын кӕнгӕйӕ. Мах дӕр нӕхи куыд дарӕм, уый ӕндавы, уацамынды кӕимӕ вӕййӕм, уыдоныл. Ног ӕмӕ ӕвӕлтӕрд хъусынгӕнджытӕ куы уыной, куыд зӕрдиагӕй хъусын кӕнӕм, уӕд хъуыды кӕндзысты, сӕхӕдӕг хуыздӕр куыд хъусын кӕной, ууыл. Куыд цин кӕнӕм ӕмӕ адӕмыл зӕрдӕйӕ куыд тыхсӕм, уый куы уыной, уӕд сын уый сӕ зӕрдыл лӕууын кӕндзӕн, уацамынды ахӕм миниуджытӕ куыд ахсджиаг сты, уый. Куы уыной, Фыстадӕй куыд пайда кӕнӕм, адӕммӕ ногӕй куыд фӕцӕуӕм, семӕ Библи куыд ахуыр кӕнӕм, уӕд уыдоны дӕр фӕнддзӕн афтӕ кӕнын.
3. Библи кӕимӕ ахуыр кӕнӕм, уыдон махмӕ кӕсгӕйӕ цӕуыл сахуыр уыдзысты?
3 Адӕмимӕ Библи ахуыр кӕнгӕйӕ. Кӕимӕ ахуыр кӕнӕм, уыдон уӕлдай тынгдӕр кӕсынц нӕ хъуыддӕгтӕм. Зӕгъӕм, кӕд сын нӕ бон у бамбарын кӕнын, куыд ахсджиаг у Библийы ахуырмӕ цӕттӕ кӕнын, стихтӕ кӕсын ӕмӕ сӕйраг хъуыдытӕ бахахх кӕнын, уӕддӕр уыдон бамбардзысты, нӕхӕдӕг цӕттӕ стӕм ӕви нӕ (Ром. 2:21). Кӕд семӕ ахуыр кӕнынмӕ цы рӕстӕгыл баныхас кӕнӕм, уымӕ афоныл фӕцӕуӕм, уӕд уыдон дӕр архайдзысты, цӕмӕй ӕндӕр хъуыддӕгты тыххӕй Библийы ахуыр ма къуылымпы кӕной. Уымӕй уӕлдай ма, ӕнӕбафиппайгӕ нӕ фӕуыдзысты, удуӕлдайӕ кӕй лӕггад кӕнӕм ӕмӕ нын фидар уырнындзинад кӕй ис, уый дӕр. Ӕмӕ диссаг дӕр нӕ вӕййы, Йесойы чи фӕзмы, уыдонӕн сӕ ахуыргӕнинӕгтӕ арӕхдӕр кӕй свӕййынц зынгзӕрдӕ ӕмӕ хорз хъусынгӕнджытӕ.
4. Ӕмбырды иннӕтӕ махмӕ кӕсгӕйӕ цӕуыл ахуыр кӕнынц?
4 Ӕмбырды. Ӕмбырды хотӕ ӕмӕ ӕфсымӕртӕ сӕхи куыд дарынц, уымӕй иннӕты ахуыр кӕнынц. Ӕмбырдтӕм цӕуын чи райдайы, уыдоныл хорзырдӕм фӕзыны, ӕмбырды цы фӕуынынц, уый. Зӕгъӕм, чырыстӕттӕ кӕрӕдзи кӕй уарзынц, хӕдӕфсармыл дзурӕг дарӕс ӕмӕ конд сын кӕй ис, уый (Пс. 132:1). Ӕппынӕдзух ӕмбырдтӕм кӕй цӕуӕм ӕмӕ дзуаппытӕ кӕй дӕттӕм, уый дӕр ӕнӕбафиппагӕ нӕ фӕуыдзысты. Ӕмбырдмӕ чи ’рбацыд, ахӕм адӕймаг бафиппайдта, гыццыл чызг йӕ Библийы стих куыд тагъд ссардта ӕмӕ чи каст, уымӕ куыд лӕмбынӕг хъуыста, уый. Уымӕ кӕсгӕ йӕ бафӕндыд, цӕмӕй Библи ахуыр кӕнын райдыдтаид.
5. Нӕ хъуыддӕгтӕ адӕмыл куыд фӕзындзысты, уымӕ куыдфӕндыйы цӕстӕй цӕуылнӕ хъуамӕ кӕсӕм?
5 Фыстад нӕ разӕнгард кӕны, цӕмӕй кӕрӕдзийы хорз хъуыддӕгты фӕзмӕм (Фил. 3:17; Дзут. 13:7). Уымӕ гӕсгӕ хъуамӕ нӕ зӕрдыл дарӕм: Йесойы куы фӕзмӕм, уӕд уый иннӕтӕ дӕр уындзысты ӕмӕ сыл уый хорзырдӕм фӕзындзӕн. Афтӕ куы кӕнӕм, уӕд нӕ зӕрдӕмӕ айсдзыстӕм 1 Тимофеймӕ 4:16 ныхӕстӕ: «Ӕдзухдӕр дӕхимӕ кӕс, стӕй дӕ хъус дар, иннӕты куыд ахуыр кӕныс, уымӕ».