Фӕлтӕрдджындӕр хъусынгӕнджытӕй ахуыр кӕнӕм
Не ’мбырды цы фӕлтӕрдджын хъусынгӕнджытӕ ис, уыдонӕн мах тынг аргъ кӕнӕм. Чидӕртӕ сӕ Йегъовӕйӕн иузӕрдионӕй лӕггад кӕнынц бирӕ азты дӕргъы. Иннӕтӕ та Хуыцауӕн лӕггад кӕнын ӕрӕджы райдыдтой ӕмӕ арӕхстджынӕй хъусын кӕнын сахуыр сты. Уыцы хъусынгӕнджытӕ сӕхи цӕстӕй уынынц, ацы фӕстаг бонты Чырысти ӕмбырдӕн разамынд кӕй дӕтты, уый – хъусын кӕныны ӕмӕ ахуыргӕнинӕгтӕ цӕттӕ кӕныны хъуыддаг размӕ цӕуы (Матф. 28:19, 20). Уыцы хъуыддаджы кӕй фӕархайынц, уый тыххӕй сӕмбӕлынц алыхуызон зындзинӕдтыл, фӕлӕ схайджын вӕййынц, «адӕймагмӕ чи нӕй, ахӕм хъаруйӕ» (2 Кор. 4:7). Уыцы фӕлтӕрд хъусынгӕнджытӕй мах бирӕ цӕуылдӕрты ахуыр кӕнӕм. Цы зонынц, уый иннӕтӕн бацамонынӕн сын фадат куы фӕзыны, уӕд сын уый тынг ӕхсызгон вӕййы (Пс. 71:18). Уӕдӕ-иу хъуамӕ фадӕттӕ агурӕм, цӕмӕй-иу нын истытӕ бацамоной. Уый куыд ис аразӕн?
Уацамынды. Ног хъусынгӕнджытӕ ӕмӕ, афтӕ фӕлтӕрдджын чи нӕу, уыцы хъусынгӕнджытӕ цӕмӕй уацамынды ӕнтыстджын уой, уый тыххӕй сӕ хъӕуы ахуыр кӕнын. Уыцы хъуыддаджы сын стыр ӕххуыс уыдзӕн, фӕлтӕрдджын хъусынгӕнджытӕ куыд лӕггад кӕнынц, уымӕ сӕ хъус куы дарой. (Кӕс брошюрӕйы «Йесойау сӕрныллӕг ӕмӕ тӕригъӕдгӕнаг ут» [bw555] статья «Дӕ зӕрдӕйы зынг ӕрмынӕг кӕнын ма бауадз!», дӕлсӕргонды «Ног хъусынгӕнджытӕн ӕххуыс кӕн» 3 абзац.) Ахӕм хъусынгӕнджытимӕ уацамынды куы фӕцӕуыс, уӕд дын уый цы пайда ӕрхӕссы?
Хорз уаид, фӕлтӕрдджын хъусынгӕнджытӕй искӕмӕн куы зӕгъис, цӕмӕй демӕ уацамынды ацӕуа. Кӕд йе ’нӕниздзинад лӕмӕгъ у, уӕд, чи зоны, дӕ бон уаид, цӕмӕй-иу рӕстӕгӕй-рӕстӕгмӕ йӕ хӕдзары дӕ Библийы ахуыртӕй иу ауадзай. Уый фӕстӕ-иу ӕй бафӕрс, цавӕр уынаффӕ дын раттид, фӕхуыздӕр кӕнӕн цы ис, уый фӕдыл.
Дӕ рӕстӕг семӕ ӕрвит. Фӕлтӕрдджын хъусынгӕнджытимӕ дӕ рӕстӕг ӕрвит, цӕмӕй сӕ хуыздӕр базонай. Дӕ бинонты ахуырмӕ-иу сӕ искӕй фӕхон ӕмӕ-иу ын зӕгъ, цӕмӕй-иу йӕхи тыххӕй исты радзура. Кӕд йе ’нӕниздзинад лӕмӕгъ у, уӕд-иу бацархай, цӕмӕй дӕ бинонты ахуыр уый хӕдзары ауадзай. Бафӕрс-иу ӕй, рӕстдзинад куыд базыдта, уый тыххӕй. Цавӕр арфӕдзинӕдтӕй схайджын? Уӕ территорийы ӕмбырдтӕ ӕмӕ хъусынгӕнджытӕ куыд фылдӕр кодтой, уый тыххӕй йӕ бон цы у зӕгъын? Йегъовӕйӕн лӕггад кӕнын ын цавӕр циндзинад ӕрхаста?
Ӕмбаргӕ у ӕмӕ иннӕтӕм бирӕ цӕмӕдӕрты ма ӕнхъӕлмӕ кӕс. Йегъовӕйӕн рагӕй чи лӕггад кӕны, уыдон дӕр махау хайджын сты, хъусын кӕнынӕн сын чи ӕххуыс кӕны, алыхуызон ахӕм курдиӕттӕй (Ром. 12:6–8). Азтӕ сӕ уӕз кӕуыл ӕруагътой, уыдонӕй кӕмӕндӕрты сӕ бон нӕу немӕ бирӕ рӕстӕг ӕрвитын. Фӕлӕ уӕддӕр уыдонӕй нӕ бон бирӕ цӕуылдӕрты у ахуыр кӕнын, уымӕн ӕмӕ Йегъовӕйӕн иузӕрдионӕй лӕггад кӕнгӕйӕ систы фӕлтӕрдджын.