Йегъовӕйӕн лӕггад кӕнгӕйӕ алкӕддӕр уыдтӕн амондджын

Иннӕ аз Вефилы фехъусын кодтой, Хуссар-Африкаг Республикӕйы филиалы кӕй хъӕуы барвӕндон лӕггадгӕнджытӕ. Уым хъуамӕ сӕвӕрдтаиккой ног мыхуыргӕнӕн станок. Ӕз дӕр загътон, кӕй мӕ фӕнды ацӕуын. Ӕмӕ мӕ куы равзӕрстой, уӕд ма мӕ цинӕн кӕрон кӕм уыд! Ноджыдӕр ма равзӕрстой ӕртӕ ’фсымӕры – Деннис Личы, Билл Маклелланы ӕмӕ Кен Нордины. Билеттӕ та нын райстой ӕрмӕст иуырдӕм.

Ӕз мӕ мадмӕ телефонӕй фӕдзырдтон ӕмӕ йын загътон: «Ма, цыдӕр дын хъуамӕ зӕгъон. Хуссар-Африкаг Республикӕмӕ цӕуын!» Мӕ мад уыди сабыр сылгоймаг, фӕлӕ уыди фидар уырнындзинады хицау ӕмӕ Йегъовӕйы тынг уарзта. Бирӕ дзурын никуы уарзта, ӕмӕ ацы хатт дӕр афтӕ уыд. Фӕлӕ йӕ зыдтон, мемӕ разы кӕй уыд. Кӕд мӕ фыдӕн дӕр ӕмӕ мӕ мадӕн дӕр зын уыд, дард кӕй уыдзынӕн, уый, уӕддӕр афтӕ никуы загътой, ахӕм уынаффӕ цӕмӕн рахастай, зӕгъгӕ.

ФӔЦӔУЫН ХУССАР-АФРИКАГ РЕСПУБЛИКӔМӔ

Фыццаг ацыдыстӕм Бруклины Вефилмӕ. Уым ӕртӕ мӕйы дӕргъы ахуыр кодтам типографийы. Ӕмӕ уый фӕстӕ уӕзласӕн науыл араст стӕм Хуссар-Африкаг Республикӕмӕ, Кейптаунмӕ. Мӕныл гъеуӕд сӕххӕст 20 азы. Кейптауны та изӕрӕй сбадтыстӕм поездыл ӕмӕ ацыдыстӕм Йоханнесбургмӕ. Бирӕ фӕцыдыстӕм. Поезд фыццаг хатт ӕрлӕууыд райсомӕй иу гыццыл горӕты. Уыцы горӕт уыди Каруйы, ӕдзӕрӕг быдыртӕ дӕр кӕм уыд, ахӕм бынаты. Уыди дзы тынг тӕвд ӕмӕ рыг. Цыппарӕй дӕр кастыстӕм рудзынгӕй ӕмӕ хъуыдытӕ кодтам, ай цавӕр бынат у ӕмӕ нӕм цы ’нхъӕлмӕ кӕсы, зӕгъгӕ. Уый фӕстӕ йӕ бамбӕрстам, уыцы ран тынг рӕсугъд кӕй у. Стӕй дзы уыди сабыр.

Цалдӕр азы дӕргъы кодтон тынг цымыдисаг куыст. Фӕлӕ хуымӕтӕг куыст дӕр нӕ уыди. Журналтӕ «Хъахъхъӕнӕн мӕсыг» ӕмӕ «Райхъал ут!» мыхуыр кӕнынӕн цӕттӕ кодтон мыхуыргӕнӕн формӕтӕ. Филиал мыхуыр кодта журналтӕ бирӕ африкаг ӕвзӕгтыл, ӕмӕ ӕрмӕст Хуссар-Африкаг Республикӕйӕн нӕ, фӕлӕ иннӕ африкаг бӕстӕтӕн дӕр. Канадӕйӕ Африкӕмӕ кӕй тыххӕй ӕрцыдыстӕм, уыцы ног мыхуыргӕнӕн станок йӕ куыст тынг хорз кодта.

Уый фӕстӕ лӕггад кодтон, литературӕ тӕлмац кӕнынӕн, мыхуыр кӕнынӕн ӕмӕ йӕ иннӕ рӕттӕм ӕрвитынӕн дзуапп чи лӕвӕрдта, уыцы хайады. Ӕз мӕ цардӕй тынг райгонд уыдтӕн.

БИНОНТӔ ӔРХАСТОН ӔМӔ ЛӔГГАД КӔНЫН РАЙДЫДТАМ ӔНДӔР РАН

1968 азы мӕ цард баиу кодтон иу хоимӕ – Лорӕ Боуэнимӕ. Уый царди Вефилмӕ хӕстӕг. Лорӕ лӕггад кодта пионерӕй, стӕй ма ӕххуыс кодта тӕлмацгӕнджыты хайадӕн дӕр – мыхуыргӕнӕн машинкӕйыл-иу тексттӕ мыхуыр кодта. Уыцы рӕстӕг-иу вефилӕгтӕй исчи ус куы ракуырдта кӕнӕ-иу куы смой кодта, уӕд сӕ бон нӕ уыди дарддӕр Вефилы лӕггад кӕнын. Ӕмӕ мах снысан кодтой сӕрмагонд пионертӕй. Иу гыццыл тыхстӕн. Вефилы фӕлӕггад кодтон 10 азы, ӕмӕ мӕ нӕ хъуыди хӕринагыл кӕнӕ цӕрӕнбынатыл хъуыды кӕнын. Ӕмӕ мӕт кодтон, сӕрмагонд пионертӕн цы ӕхца лӕвӕрдтой, уыдонӕй куыд фӕцӕрдзыстӕм, зӕгъгӕ. Истаиккам фӕйнӕ 25 рэнды (уӕд уыдон уыдысты 35 америкаг доллӕры). Фӕлӕ-иу нын уыцы ӕхца радтаиккой, сахӕтты нормӕ-иу куы сӕххӕст кодтаиккам, ӕрмӕстдӕр уӕд. Стӕй-иу дыккаг бацыдтӕн дӕр ӕмӕ-иу цас литературӕ хъуамӕ апарахат кодтаиккам, уымӕн дӕр уыд бӕлвырд нымӕц. Уыцы ӕхцайӕ нӕ хъуыди, кӕм цардыстӕм, уыцы бынатӕн фидын. Стӕй цыдысты хӕринагыл, машинӕйыл ӕмӕ ма ӕндӕр цӕуылдӕрты, зӕгъӕм, дохтыртыл.

Снысан нӕ кодтой иу гыццыл къордмӕ, горӕт Дурбанмӕ ’ввахс. Уый ис Индийы океаны былгӕрон. Уым бирӕ индиӕгтӕ царди. Бирӕтӕ дзы уыдысты, кӕддӕр 1800-ӕм азты Хуссар-Африкаг Республикӕмӕ ӕндӕр рӕттӕй сӕкӕры плантациты кусынмӕ чи ’рцыд, уыдоны байзӕддӕгтӕ. Мах уым куы уыдыстӕм, уӕд уыцы куыст нал кодтой, фӕлӕ уӕддӕр се ’гъдӕуттыл хӕст уыдысты, сӕ хӕринӕгтӕ кодтой, уыимӕ тынг хӕрзад карри. Дзырдтой англисагау, ӕмӕ нын уый фӕрцы семӕ ныхас кӕнын ӕнцондӕр уыди.

Сӕрмагонд пионертӕ хъуамӕ алы мӕй дӕр хъусын кодтаиккой 150 сахаты. Гъемӕ Лорӕимӕ фыццаг бон спълан кодтам, 6 сахаты кӕй хъусын кӕндзыстӕм. Уыди тынг тӕвд ӕмӕ ӕнуд. Дыккаг хатт кӕй хъуыди бабӕрӕг кӕнын, ахӕм нын ничима уыди, стӕй Библи дӕр нырма никӕимӕ ахуыр кодтам. Ӕмӕ 6 сахаты хъуамӕ хъусын кодтаиккам хӕдзарӕй-хӕдзармӕ. Цасдӕры фӕстӕ мӕ сахатмӕ куы ’ркастӕн, уӕд федтон, 40 минуты йеддӕмӕ кӕй нӕ рацыди. Гъемӕ ахъуыды кодтон, зӕгъын, афтӕмӕйты сӕрмагонд пионертӕй куыд лӕггад кӕндзыстӕм.

Фӕлӕ бирӕ нӕ рацыд, ӕмӕ нӕ ног цардыл фӕцахуыр стӕм. Алы бон дӕр-иу немӕ рахастам термосы къофи, стӕй исты акомдзаг кӕнынӕн. Аулӕфын-иу нӕ куы хъуыди, уӕд-иу нӕ гыццыл «Фольксваген» бӕласы бын сӕвӕрдтам. Иуӕй-иу хатт-иу рӕсугъд индиаг сывӕллӕттӕ нӕ алыварс ӕрӕмбырд сты ӕмӕ-иу нӕм цымыдисхуызӕй кастысты, уымӕн ӕмӕ уыдонӕй хицӕн кодтам. Цалдӕр боны фӕстӕ йӕ бамбӕрстам, зын кӕй вӕййы фыццаг дыууӕ кӕнӕ ӕртӕ сахаты ӕмӕ уый фӕстӕ рӕстӕг тынг тагъд кӕй атӕхы.

Уыцы территорийы цы адӕм цард, уыдон тынг уазӕгуарзон уыдысты, ӕмӕ нын ӕхсызгон уыд семӕ Библийыл ныхас кӕнын. Индиӕгтӕ сты уӕздан, хӕларзӕрдӕ адӕм ӕмӕ Хуыцауӕй тӕрсынц. Индуизмыл хӕст индиӕгтӕй бирӕтӕ сӕ зӕрдӕмӕ хорз хабар айстой. Библийы, Йегъовӕйы, Йесойы ӕмӕ ног дунейы тыххӕй, стӕй, мӕрдтӕ кӕй райгас уыдзысты, уый тыххӕй-иу сын куы дзырдтам, уӕд-иу нӕм тынг зӕрдиагӕй хъуыстой. Иу азмӕ нын фӕзынд 20 Библийы ахуыры. Библи кӕимӕ ахуыр кодтам, уыцы бинонтӕй-иу нӕ сӕхимӕ иу бон иутӕ фӕхуыдтой сихор бахӕрынмӕ, иннӕ бон – иннӕтӕ. Уыцы ран лӕггад кӕнгӕйӕ тынг амондджын уыдыстӕм.

Фӕлӕ бирӕ нӕ рацыд, афтӕ мӕ снысан кодтой районон цӕстдарӕгӕй. Нӕ территори уыди Индийы океаны рӕсугъд былгӕрон. Алы къуыри дӕр-иу кӕцыдӕр ӕмбырд куы бӕрӕг кодтам, уӕд-иу ӕрлӕууыдыстӕм искӕцы бинонтӕм. Уыдон-иу нӕ афтӕ суазӕг кодтой, раст цыма сӕ бинонтӕй уыдыстӕм. Тынг уарзтам семӕ ӕмӕ сӕ сывӕллӕттимӕ рӕстӕг ӕрвитын. Афтӕ ратахт дыууӕ азы. Ӕмӕ дын нӕм стӕй филиалӕй куы ’рбадзуриккой. Ӕфсымӕртӕ нын загътой: «Фӕнды нӕ, цӕмӕй фӕстӕмӕ Вефилы лӕггад кӕнын райдайат». Ӕз сын загътон: «Ӕмӕ ам дӕр нӕ зӕрдӕмӕ тынг цӕуы». Фӕлӕ, кӕй зӕгъын ӕй хъӕуы, мах цӕттӕ уыдыстӕм, кӕдӕм нӕ снысан кодтаиккой, уым лӕггад кӕнынмӕ.

НОГӔЙ СТӔМ ВЕФИЛЫ

Вефилы лӕггад кодтон уацамындӕн дзуапдӕттӕг хайады. Ахӕм кад мӕм ӕрхауд, ӕмӕ дзы ӕмгуыст кодтон бирӕ фӕлтӕрдджын ӕфсымӕртимӕ. Уыцы рӕстӕг-иу районон цӕстдарӕг ӕмбырд куы бабӕрӕг кодта, уӕд-иу уыцы ӕмбырды тыххӕй ныффыста писмо филиалмӕ. Ӕмӕ-иу уый фӕстӕ филиал та ӕмбырдмӕ ныффыста писмо. Уыцы писмойы-иу сӕ раппӕлыди, стӕй-иу сын хъӕугӕ амындтӕ радта. Уымӕ гӕсгӕ нӕ секретартӕн бирӕ куыст уыд. Хъуыди-иу сӕ ӕвзӕгтӕ косӕ ӕмӕ зулуйӕ, стӕй иннӕ ӕвзӕгтӕй дӕр писмотӕ англисаг ӕвзагмӕ тӕлмац кӕнын, стӕй англисаг ӕвзагӕй та – африкаг ӕвзӕгтӕм. Ӕз тынг аргъ кодтон уыцы тӕлмацгӕнджыты фыдӕбонӕн. Уыдоны фӕрцы ма хуыздӕр бамбӕрстон, нӕ сауцъар африкаг хотӕ ӕмӕ ’фсымӕртӕ цавӕр зындзинӕдтыл ӕмбӕлдысты, уый дӕр.

Уыцы рӕстӕг хицауады закъӕтты тыххӕй Хуссар-Африкаг Республикӕйы сауцъар адӕм ӕфхӕрд ӕййӕфтой. Урсцъар адӕм кӕм цардысты, уым сауцъар адӕмӕн цӕрыны бар нӕ уыд, ӕмӕ-иу кӕрӕдзиимӕ арӕх не ’мбӕлдысты. Сауцъар африкаг ӕфсымӕртӕ дзырдтой ӕрмӕст сӕхи ӕвзӕгтыл, хъусын дӕр кодтой сӕхи ӕвзӕгтыл ӕмӕ сӕ бон уыд ӕрмӕстдӕр сӕхи ӕвзагыл дзурӕг ӕмбырдтӕм цӕуын.

Ӕз-иу англисаг ӕмбырдты лӕггад кодтон, ӕмӕ сауцъар ӕфсымӕртӕй бирӕты нӕ зыдтон. Фӕлӕ мын ныр фӕзынд фадат, цӕмӕй уыдоны тыххӕй, стӕй сӕ культурӕйы ӕмӕ се ’гъдӕутты тыххӕй фылдӕр базыдтаин. Ӕз базыдтон, бынӕттон ӕгъдӕутты тыххӕй ӕмӕ, африкӕгтӕ цы динтыл хӕст уыдысты, уыдоны тыххӕй ӕфсымӕртӕ цы зындзинӕдтыл ӕмбӕлдысты, уый. Уыдон тынг хъӕбатыр уыдысты. Библимӕ гӕсгӕ раст чи нӕ уыд, уыцы ӕгъдӕуттӕ кӕй нӕ кодтой ӕмӕ спиритизмимӕ баст хъуыддӕгтӕ дӕр кӕй нӕ кодтой, уый тыххӕй-иу сӕ бинонтӕ ӕмӕ ӕнӕхъӕн хъӕу дӕр сӕ ныхмӕ тынг рацыдысты. Хъӕуты бирӕтӕ тынг мӕгуыр уыдысты. Бирӕтӕ дзы скъолайы дӕр нӕ ахуыр кодтой. Фӕлӕ Библийӕн тынг аргъ кодтой.

Цалдӕр хатты та ӕфсымӕртӕн ӕххуыс кодтон, тӕрхондӕтты-иу цавӕрдӕр хъуыддӕгтӕ ӕвзӕрст куы цыдысты, уӕд. Баст уыдысты, Хуыцауӕн нын сӕрибарӕй кувыны бар кӕй ис ӕмӕ ацы дунейы хъуыддӕгты кӕй нӕ архайӕм, уыимӕ. Йегъовӕйы Ӕвдисӕнты сывӕллӕтты-иу скъолайӕ ратардтой, иннӕтимӕ-иу кӕй нӕ куывтой ӕмӕ-иу дины зарджытӕ кӕй нӕ зарыдысты, уый тыххӕй. Ӕмӕ, уыцы сывӕллӕттӕ куыд иузӕрдион ӕмӕ куыд хъӕбатыр уыдысты, уый уынгӕйӕ-иу мӕхи уырнындзинад дӕр бафидар.

Иу гыццыл африкаг бӕстӕйы (уӕд хуынди Свазиленд) ӕфсымӕртӕ сӕмбӕлдысты ӕндӕр фӕлварӕныл. Паддзах Собхузӕ Дыккаг куы амард, уӕд нӕлгоймӕгтӕ хъуамӕ сӕ сӕртӕ ныддастаиккой, сылгоймӕгтӕ та хъуамӕ сӕ сӕрыхъуынтӕ цыбыр алвыдтаккой. Уый баст уыд мӕрдтӕн табу кӕныны ӕгъдӕуттимӕ. Ӕмӕ бирӕ хотӕ ӕмӕ ’фсымӕртӕ ӕфхӕрд баййӕфтой, афтӕ кӕй нӕ бакодтой, уый тыххӕй. Йегъовӕйыл афтӕ иузӕрдион кӕй уыдысты, уый тыххӕй сӕ сӕрыстыр уыдыстӕм. Нӕ африкаг хотӕ ӕмӕ ’фсымӕртӕ куыд иузӕрдион ӕмӕ куыд фӕразон уыдысты, уымӕй нын уыдысты фӕзминаг. Ӕмӕ уыдоны фӕрцы нӕ уырнындзинад тынг бафидар.

НОГӔЙ ТА КУСЫН ТИПОГРАФИЙЫ

1981 азы та мӕ ногӕй снысан кодтой типографимӕ. Хъуамӕ райдыдтаиккам нӕ литературӕ компьютерты фӕрцы мыхуыр кӕнын. Уый диссаджы рӕстӕг уыд! Мыхуыр кӕныны мадзӕлттӕ тынг ивтой. Иу бынӕттон компани нын радта фотонаборы машинӕ, цӕмӕй йӕ лӕвар бафӕлвӕрдтаиккам. Ӕмӕ уый фӕстӕ, мыхуыргӕнӕн формӕтӕ кӕй фӕрцы цӕттӕ кодтам, уыцы фараст машинӕйы баивтам фондз ног фотонаборы машинӕйӕ. Стӕй ма типографийы сӕвӕрдтам ног мыхуыргӕнӕн станок дӕр. Ӕмӕ райдыдтам ноджы фылдӕр литературӕ мыхуыр кӕнын.

Компьютерты фӕрцы фӕзынд фадат, цӕмӕй ӕфсымӕртӕ ӕрхъуыды кодтаиккой ног программӕ публикацитӕ мыхуырмӕ цӕттӕ кӕнынӕн (MEPS). Ацы программӕйы фӕрцы нӕ литературӕ ис бирӕ ӕвзӕгтыл уадзӕн. Цыппарӕй Канадӕйы Вефилӕй Хуссар-Африкаг Республикӕмӕ куы ’рцыдыстӕм, уӕдӕй технологитӕ куыд тынг фӕивтой! (Ис. 60:17). Уӕдмӕ нӕ цыппарӕн дӕр уыди бинонтӕ. Ракуырдтам, пионертӕй чи лӕггад кодта ӕмӕ Йегъовӕйы тынг чи уарзта, ахӕм хоты. Ӕз ӕмӕ Билл дарддӕр дӕр лӕггад кодтам Вефилы. Кен ӕмӕ Деннис та хъомыл кодтой сывӕллӕттӕ. Сӕ бинонтимӕ цардысты Вефилмӕ хӕстӕг.

Филиалы цы куыст цыди, уый фылдӕрӕй-фылдӕр кодта. Нӕ литературӕ цы ӕвзӕгтӕм цыд тӕлмац ӕмӕ цы ӕвзӕгтыл цыд мыхуыргонд, уыдоны нымӕцыл ӕфтыд. Стӕй ма литературӕ мыхуыр кодтам ӕндӕр филиалтӕн дӕр ӕмӕ йӕ уырдӕм ӕрвыстам. Уымӕ гӕсгӕ бахъуыди ног филиал аразын. Ӕмӕ йӕ ӕфсымӕртӕ сарӕзтой, Йоханнесбургӕй ныгуылӕнырдӕм чи уыд, иу ахӕм рӕсугъд бынаты. Филиал Йегъовӕйӕн снывонд кодтой 1987 азы. Ӕппӕт уыцы хъуыддӕгты ӕз дӕр кӕй архайдтон, уый мын стыр циндзинад хаста. Уымӕй уӕлдай ма бирӕ азты дӕргъы лӕггад кодтон Хуссар-Африкаг Республикӕйы Филиалы комитеты.

ЛӔГГАД КӔНЫН РАЙДЫДТАМ ӔНДӔР РАН

Нӕ дисӕн кӕрон дӕр нӕ уыди, 2001 азы мӕ Америкӕйы Иугонд Штатты Филиалы комитетмӕ куы снысан кодтой, уӕд. Уыцы комитет гъеуӕд фӕзынд. Зын нын уыди Хуссар-Африкаг Республикӕйӕ ацӕуын, уымӕн ӕмӕ нӕ лӕггад нӕ зӕрдӕмӕ цыд, стӕй нын дзы фӕзынд ӕмбӕлттӕ. Фӕлӕ Америкӕйы Иугонд Штатты Вефилы кӕй лӕггад кӕндзыстӕм, ууыл дӕр цин кодтам.

Ӕрмӕст мӕт кодтам Лорӕйы мадыл, уымӕн ӕмӕ йыл бирӕ цыди, ӕмӕ йын Нью-Йоркӕй нӕ бон нӕ уыдаид алцӕмӕй ӕххуыс кӕнын. Фӕлӕ Лорӕйӕн йе ’ртӕ хойы загътой, сӕ мадмӕ кӕй фӕкӕсдзысты ӕмӕ йӕ цух дӕр кӕй ницӕмӕй уадздзысты. Загътой нын: «Махӕн нӕ бон нӕу ӕххӕстрӕстӕг лӕггад кӕнын, фӕлӕ мамӕйы фарсмӕ куы уӕм, уӕд сымахӕн уӕ бон уыдзӕн дарддӕр дӕр лӕггад кӕнын». Ӕмӕ сӕ мах тынг бузныг стӕм.

Мӕ фыд ӕгас нал уыд. Мӕ мад та 20 азӕй фылдӕр царди Торонтойы (Канадӕ) ме ’фсымӕримӕ ӕмӕ мӕ чындзимӕ. Уыдон ӕй буц дардтой. Суанг йӕ мӕлӕты онг дӕр ӕм уыдон кастысты. Мӕ мад фӕзиан, Нью-Йоркмӕ куы ’рцыдыстӕм, уымӕй бирӕ нӕ рацыд, афтӕ. Нӕ бинонтӕ нын сты Хуыцауы лӕвар. Уыдон цӕттӕ уыдысты сӕ царды цыдӕртӕ фӕивынмӕ, цӕмӕй сӕхимӕ хӕстӕ райстаиккой, кӕд уый алы хатт ӕнцон нӕ уыди, уӕддӕр.

Иугонд Штатты цалдӕр азы лӕггад кодтон типографийы. Литературӕ мыхуыр кӕныны хъуыддаг ноджы фӕхуыздӕр ӕмӕ фӕхуымӕтӕгдӕр. Ныр та лӕггад кӕнын амал кӕныны хайады. Фӕстаг 20 азы уыцы стыр филиалы кӕй лӕггад кӕнӕм, уый нын стыр арфӕдзинад у. Ныртӕккӕ дзы ис 5 000 вефиладжы бӕрц. 2 000 адӕймаджы бӕрц та Вефилӕн феххуыс кӕнынц къуыри иу кӕнӕ цалдӕр боны.

60 азы размӕ йӕ кӕцӕй зыдтон, кӕм уыдзынӕн, кӕм лӕггад кӕндзынӕн. Лорӕ алкӕддӕр уыди ме ’ххуысгӕнӕг. Хуыцауӕн лӕггад кӕнгӕйӕ алкӕддӕр уыдыстӕм амондджын. Мах ӕххӕст кодтам алыхуызон хӕстӕ. Стӕй лӕггад кодтам диссаджы адӕмимӕ. Алыхуызон филиалтӕ куы бӕрӕг кодтам, уӕд дӕр базонгӕ стӕм бирӕ дзӕбӕх хотӕ ӕмӕ ’фсымӕртимӕ. Ныр мыл цӕуы 80 азӕй фылдӕр, ӕмӕ мӕ кусын къаддӕр хъӕуы. Вефилы ис бирӕ ӕрыгон ӕфсымӕртӕ, ӕмӕ уыдонӕн сӕ бон у алыхуызон хӕстӕ ӕххӕст кӕнын.

Псаломзарӕггӕнӕг ныффыста: «Амондджын сты, сӕ Хуыцау Йегъовӕ кӕмӕн у, уыцы адӕм» (Пс. 33:12). Ӕмӕ уый ӕцӕгдӕр афтӕ у. Ӕз Йегъовӕйӕ тынг бузныг дӕн, мӕ бон ын кӕй у йӕ амондджын адӕмимӕ иумӕ лӕггад кӕнын.