Йегъовӕйы уарзт нын баххуыс кӕндзӕн, цӕмӕй мацӕмӕй тӕрсӕм

1. Адӕймаг арӕх цӕмӕй фӕтӕрсы?

ӔРКӔСӔМ цалдӕр хабармӕ. Несторы ӕмӕ йӕ бинойнаг Марийӕйы фӕндыди, хъусынгӕнджытӕ кӕм нӕ фаг кодта, уым лӕггад кӕнынb. Уый тыххӕй та сӕ хъуыди сӕ цард фӕхуымӕтӕгдӕр кӕнын. Фӕлӕ уыдон тарстысты, ӕхца сӕм алцӕй фаг куы нал уа, уӕд афтӕ амондджын кӕй нӕ уыдзысты. Биниам цӕры, Йегъовӕйы Ӕвдисӕнты ныхмӕ кӕм цӕуынц, ахӕм бӕстӕйы. Ӕмӕ Йегъовӕйы Ӕвдисӕн куы сси, уӕд ӕй ӕмбӕрста, гӕнӕн кӕй ис, ӕмӕ уый дӕр йӕ уырнындзинады тыххӕй ӕфхӕрд ӕййафа. Уый дзы тас уагъта. Ноджы тынгдӕр та тарсти, йӕ бинонтӕ йын йӕ ног динмӕ цы цӕстӕй ракӕсдзысты, уымӕй. Валерийӕмӕ ссардтой рак (уӕззау формӕ). Ӕмӕ йӕ бон нӕ уыди, ӕнӕ тугӕй йын операци чи скодтаид, ахӕм дохтыр ссарын. Валерийӕ тарсти, кӕй амӕлдзӕн, уымӕй.

2. Цӕмӕйдӕрты ӕгӕр цӕуылнӕ хъуамӕ тӕрсӕм?

² Ахӕм уавӕрты нӕ бирӕтӕ уыдысты. Фӕлӕ цӕмӕйдӕрты ӕгӕр куы тӕрсӕм, уӕд нӕ бон нӕ уыдзӕн раст уынаффӕтӕ хӕссын. Суанг ма, гӕнӕн ис, Йегъовӕйӕ дӕр адард уӕм. Хӕйрӕг дӕр уымӕ ӕнхъӕлмӕ кӕсы. Уый ма ӕдзух архайы, цӕмӕй нӕ тас бауадза ӕмӕ Йегъовӕйы закъӕтты сӕрты ахизӕм, зӕгъӕм, цӕмӕй хорз хабар мауал хъусын кӕнӕм (Рарг. 12:17). Хӕйрӕг у ӕгъатыр ӕмӕ тыхджын знаг, уый тӕригъӕд нӕ зоны. Фӕлӕ нӕ бон у нӕхи уыцы знагӕй бахъахъхъӕнын. Цымӕ куыд?

3. Цы нын баххуыс кӕндзӕн, цӕмӕй мацӕмӕй тӕрсӕм?

³ Фидарӕй нӕ куы уырна, Йегъовӕ нӕ кӕй уарзы ӕмӕ нӕ фарс кӕй у, уӕд нӕ Хӕйрӕг ницӕмӕй фӕтӕрсын кӕндзӕн (Пс. 118:6). 118-ӕм псалом чи ныффыста, уый тынг зын уавӕрты бахауд. Уыди йын бирӕ знӕгтӕ, иуӕй-иутӕ дзы уыдысты кадджын лӕгтӕ (9, 10 стихтӕ). Иуӕй-иу хатт карз ӕфхӕрд ӕййӕфта (13 стих). Стӕй йӕ Йегъовӕ дӕр бафхӕрдта (18 стих). Фӕлӕ уӕддӕр уыцы псаломзарӕггӕнӕг загъта: «Ӕз ницӕмӕй фӕтӕрсдзынӕн». Цӕмӕн уыд йӕ бон афтӕ зӕгъын? Кӕд ӕй Йегъовӕ бафхӕрдта, уӕддӕр ӕй зыдта, йӕ уӕларвон Фыд ӕй тынг кӕй уарзы. Ӕмӕ ӕппындӕр нӕ дызӕрдыг кодта, йӕ Хуыцау ын цыфӕнды зын уавӕры дӕр кӕй баххуыс кӕндзӕн (Пс. 118:29).

4. Хуыцау нӕ кӕй уарзы, ууыл куы нӕ дызӕрдыг кӕнӕм, уӕд цӕмӕйты нӕ тӕрсдзыстӕм?

⁴ Хъуамӕ махӕй алкӕй дӕр фидарӕй уырна, Йегъовӕ йӕ кӕй уарзы, уый. Ӕмӕ уӕд ницӕмӕй тӕрсдзыстӕм. Адӕймаг арӕх фӕтӕрсы: 1) йӕ бинонты фӕдарын йӕ бон кӕй нӕ уыдзӕн, уымӕй, 2) адӕмӕй ӕмӕ 3) мӕлӕтӕй. 1-аг абзацы кӕй кой ис, уыдонӕн цы баххуыс кодта, цӕмӕй сӕ зӕрдӕтӕй тас фӕсырдтаиккой? Уыдон фидарӕй зыдтой, Хуыцау сӕ кӕй уарзы, уый.

НӔ БОН НӔ БИНОНТЫ ФӔДАРЫН КӔЙ НӔ УЫДЗӔН, УЫМӔЙ ТӔРСЫН

5. Бинонты хистӕр цӕуыл фӕмӕт кӕны? (Кӕс нывмӕ ӕддаг цъарыл.)

⁵ Бинонты хистӕр фембары, йӕ хӕс кӕй у йӕ бинонты дарын, ӕмӕ уымӕ куыдфӕндыйы цӕстӕй нӕ фӕкӕсы (1 Тим. 5:8). Кӕд дын бинонтӕ ис, уӕд, чи зоны, пандемийӕйы рӕстӕг мӕт кодтай, ӕнӕ куыстӕй куы баззайон, уӕд мын мӕ бинонты чи дардзӕн, хӕдзарӕн цӕмӕй фиддзыстӕм, зӕгъгӕ. Стӕй, ӕвӕццӕгӕн, тарстӕ, дӕ бон ӕндӕр куыст ссарын кӕй нӕ уыдзӕн, уымӕй дӕр. Кӕнӕ Нестор ӕмӕ Марийӕйау, гӕнӕн ис, дӕ ныфс нӕ хастай ӕхцаджын куыст ныууадзынмӕ, цардыл не ’ххӕсдзыстӕм, зӕгъгӕ. Ахӕм хъуыдытӕ Хӕйрӕджы къухы сты тыхджын хӕцӕнгарз, ӕмӕ йын уый фӕрцы бирӕ бантыст.

6. Иуӕй-иу хатт Хӕйрӕг адӕймаджы цӕуыл баууӕндын кӕны?

⁶ Хӕйрӕджы фӕнды, цӕмӕй нӕ баууӕндын кӕна, Йегъовӕйы нӕ мӕт ӕппындӕр кӕй нӕй ӕмӕ нын нӕ бинонты дарынӕн дӕр кӕй не ’ххуыс кӕны. Афтӕ куы хъуыды кӕнӕм, уӕд та тӕрсдзыстӕм, Библийы уагӕвӕрдтӕ кӕй тыххӕй халӕм, ахӕм куыст ныууадзын дӕр.

7. Йесо нын Йегъовӕйы тыххӕй цы раргом кодта?

⁷ Йесойӕ хуыздӕр Йегъовӕйы ничи зоны. Ӕмӕ нын Йесо зӕгъы, зӕгъгӕ, «уӕ уӕларвон Фыд, кургӕ дӕр дзы ницыма ракӕнут, афтӕмӕй фӕзоны, цы хъуаг стут, уый» (Матф. 6:8). Стӕй Йесо зоны, Йегъовӕйы алкӕддӕр кӕй фӕфӕнды махӕн баххуыс кӕнын, цӕмӕй нын уа, ӕнӕмӕнг нӕ цы хъӕуы, уыдӕттӕ. Мах, чырыстӕттӕ, стӕм Хуыцауы бинонтӕй, ӕмӕ хъуамӕ ӕппындӕр ма дызӕрдыг кӕнӕм, нӕ бинонты Хистӕр, Йегъовӕ, йӕхӕдӕг дӕр кӕй архайы, 1 Тимофеймӕ 5:8 стихы цы уагӕвӕрд ныффыссын кодта, уымӕ гӕсгӕ.

8. а) Цы нын баххуыс кӕндзӕн, цӕмӕй ма тӕрсӕм, нӕ бон нӕ бинонты фӕдарын кӕй нӕ бауыдзӕн, уымӕй? (Матфейы 6:31–33). б) Ӕркӕс нывмӕ. Нӕ бон куыд у бафӕзмын, хойӕн хӕринаг чи ’рбахаста, уыцы бинонты?

⁸ Хъуамӕ нӕ фидарӕй уырна, Йегъовӕ мах дӕр ӕмӕ нын нӕ бинонты дӕр кӕй уарзы, уый. Ӕмӕ уӕд никуы дызӕрдыг кӕндзыстӕм, ӕнӕмӕнг нӕ цы хъӕуы, уыдӕттӕ нын кӕй уыдзӕн. (Бакӕс Матфейы 6:31–33.) Йегъовӕ ныл зӕрдиагӕй тыхсы. Уый у тынг рӕдау Хуыцау. Зӕхх куы сфӕлдыста, уӕд йӕ бон уыд, цӕрынӕн нӕ цы хъӕуы, ӕрмӕстдӕр уыдӕттӕ скӕнын. Фӕлӕ уый Зӕххыл скодта алы диссӕгтӕ, цӕмӕй нын цард циндзинад хӕсса (Райд. 2:9). Кӕд нӕм иуӕй-иу хатт хӕринаг ӕрмӕстдӕр иу боны фаг вӕййы, уӕддӕр-иу хъуамӕ фылдӕр хъуыды кӕнӕм, уыцы хӕринаг нын кӕй ис ӕмӕ нын ӕй Йегъовӕ кӕй радта, ууыл (Матф. 6:11). Рох нӕ макуы уӕд: кӕд нӕхи цӕмӕйдӕрты фӕцух кӕнӕм, уӕддӕр уыдон ницы сты Йегъовӕйы хорздзинӕдты раз. Фидӕны та нын балӕвар кӕндзӕн ӕнусон цард. Нестор ӕмӕ Марийӕ дӕр Йегъовӕйы рӕдаудзинад сӕхиуыл бавзӕрстой (Ис. 65:21, 22).

9. Нестор ӕмӕ Марийӕйы хабарӕй дӕхицӕн зондӕн цы райстай?

⁹ Нестор ӕмӕ Марийӕ цӕрынц Колумбийы. Уыдонӕн уыди дзӕбӕх хӕдзар, ӕхцаджын куыст. Фӕлӕ сӕ фӕндыди сӕ цард фӕхуымӕтӕгдӕр кӕнын, цӕмӕй сӕ бон уыдаид фылдӕр лӕггад кӕнын. Фӕлӕ тарстысты, ӕхца сӕм алцӕй фаг куы нал уа, уӕд афтӕ амондджын кӕй нал уыдзысты. Цы сын баххуыс кодта, цӕмӕй сӕ ныфс бахастаиккой сӕ цард фӕхуымӕтӕгдӕр кӕнынмӕ? Уыдон ахъуыды кодтой, Йегъовӕ сӕ царды куыд архайдта, ууыл. Иу ӕмӕ дыууӕ хатты нӕ равдыста, кӕй сӕ уарзы, уый. Ӕмӕ уӕд нал дызӕрдыг кодтой, алкӕддӕр сыл кӕй тыхсдзӕн, ууыл, ӕмӕ дыууӕйӕ дӕр се ’хцаджын куыст ныууагътой. Уый фӕстӕ сӕ хӕдзар ауӕй кодтой ӕмӕ ацыдысты, сӕ бӕстӕйы хъусынгӕнджытӕ кӕм нӕ фаг кодта, ахӕм ранмӕ. Цымӕ истӕуыл фӕфӕсмон кодтой? Нестор загъта: «Матфейы 6:33 стихы ныхӕстӕ раст кӕй сты, уый нӕхиуыл бавзӕрстам. Ницы хъуаг стӕм, алцыдӕр нын ис. Ӕмӕ ныр бирӕ амондджындӕр стӕм».

АДӔМӔЙ ТӔРСЫН

10. Адӕймаг адӕймагӕй кӕй фӕтӕрсы, уый диссаг цӕуылнӕ у?

¹⁰ Адам ӕмӕ Евӕ Хуыцауы ныхмӕ куы рацыдысты, уӕдӕй нырмӕ адӕм кӕрӕдзийы ӕфхӕрынц (Еккл. 8:9). Зӕгъӕм, хицӕуттӕ сӕ бартӕй раст нӕ пайда кӕнынц, фыдракӕндтӕ фылдӕрӕй-фылдӕр кӕнынц, бирӕтӕ суанг сӕ бинонтӕн дӕр фыдмитӕ фӕкӕнынц, скъоладзаутӕй иутӕ иннӕтӕй фӕхынджылӕг кӕнынц ӕмӕ сӕ фефхӕрынц. Уӕдӕ диссаг нӕу, адӕймаг адӕймагӕй кӕй фӕтӕрсы. Ӕмӕ Хӕйрӕг уыцы хӕцӕнгарзӕй дӕр пайда кӕны. Цымӕ куыд?

11, 12. Иуӕй-иу хатт адӕмӕй кӕй фӕтӕрсӕм, уымӕй Хӕйрӕг куыд спайда кӕны?

¹¹ Хӕйрӕг тынг архайы, цӕмӕй адӕмӕй афтӕ тӕрсӕм, ӕмӕ хорз хабар дӕр мауал хъусын кӕнӕм кӕнӕ Хуыцауы иннӕ закъӕтты сӕрты дӕр ахизӕм. Кӕцыдӕр бӕстӕты хицауӕдты ахӕм зондыл саразы, цӕмӕй нын нӕ хъуыддаг сӕхгӕной ӕмӕ нӕ ӕфхӕрой (Лук. 21:12; Рарг. 2:10). Хӕйрӕджы дунейы бирӕтӕ Йегъовӕйы Ӕвдисӕнтӕй кӕнынц мӕнг ныхӕстӕ, тугтӕ сыл ӕрымысынц. Ӕмӕ уыцы ныхӕстыл чи баууӕнды, уыдон нӕ фӕхынджылӕг кӕнынц ӕмӕ ма нӕм сӕ къух дӕр сисынц (Матф. 10:36). Хӕйрӕг афтӕ кӕй архайы, уый нӕм диссаг нӕ кӕсы. 1 ӕнусы дӕр афтӕтӕ кодта (Хъуыд. 5:27, 28, 40).

¹² Хицауад нӕ кӕй ӕфхӕры, Хӕйрӕг ӕрмӕст уымӕй нӕ пайда кӕны. Иуӕй-иутӕ тӕрсынц, Йегъовӕйы Ӕвдисӕнтӕ куы суой, уӕд сӕ бинонтӕ цы зӕгъдзысты, уымӕй. Хицауад сӕ кӕй бафхӕрдзӕн кӕнӕ сӕ нӕмгӕ дӕр кӕй фӕкӕндзысты, уымӕй дӕр афтӕ нӕ тӕрсынц. Сӕ бинонты тынг уарзынц, ӕмӕ сӕ фӕнды, цӕмӕй уыдон дӕр Йегъовӕйы базоной ӕмӕ йӕ бауарзой. Ӕмӕ сын зын вӕййы, ӕцӕг Хуыцауӕй ӕмӕ йӕ лӕггадгӕнджытӕй ӕвзӕр исты куы фӕдзурынц, уӕд. Кӕд дӕуӕн дӕр дӕ бинонтӕ рӕстдзинадмӕ ахӕм цӕстӕй кӕсынц, уӕд-иу дӕ ныфс ма асӕттӕд. Уыди-иу афтӕ дӕр, ӕмӕ-иу кӕд нӕ хотӕн ӕмӕ не ’фсымӕртӕн сӕ бинонтӕ фыццаг сӕ ныхмӕ цыдысты, уӕддӕр-иу уый фӕстӕ систы Йегъовӕйы Ӕвдисӕнтӕ. Фӕлӕ нӕм нӕ бинонтӕ ӕмгӕрон дӕр куы нал цӕуой, уӕд та куыд бакӕнӕм?

13. Нӕ бинонтӕ нӕ ныхмӕ куы цӕуой, уӕд нӕ зӕрдыл цӕмӕн хъуамӕ дарӕм, Хуыцау нӕ кӕй уарзы, уый? (Псалом 27:10).

¹³ Псаломы 27:10 стихы цы рӕсугъд ныхӕстӕ ис, уыдон нӕ ныфс уадзынц. (Бакӕс ӕй.) Хъуамӕ нӕ зӕрдыл дарӕм, Йегъовӕ нӕ куыд тынг уарзы, уый. Ӕмӕ уӕд ӕгӕр нӕ мӕт кӕндзыстӕм, нӕ бинонтӕ нӕ ныхмӕ кӕй систы, уый тыххӕй. Йегъовӕ нын нӕ фидардзинады тыххӕй ӕнӕмӕнг раарфӕ кӕндзӕн. Дӕтдзӕн нын, ӕнӕмӕнг нӕ цы хъӕуы, уыдӕттӕ. Ӕххуыс нын кӕндзӕн, цӕмӕй нӕ зӕрдӕтӕ сабыр уой ӕмӕ уӕм амондджын, стӕй йӕм цӕмӕй алкӕддӕр ӕввахс уӕм. Уый хуызӕн ныл ничи батыхсдзӕн! Биниам уый йӕхицӕй зоны.

14. Биниамы хабарӕй дӕхицӕн зондӕн цы райстай?

¹⁴ Биниам зыдта, Йегъовӕйы Ӕвдисӕнтӕ сӕ бӕстӕйы карз ӕфхӕрд кӕй ӕййафынц. Фӕлӕ уӕддӕр Йегъовӕйы Ӕвдисӕн сси. Уый фидарӕй уырныдта, Йегъовӕ йӕ кӕй уарзы, ӕмӕ уый фӕрцы адӕмӕй нал тарст. Биниам радзырдта: «Йегъовӕйы Ӕвдисӕнтӕ ахӕм карз ӕфхӕрд ӕййӕфтой, ӕмӕ йын зӕгъӕн дӕр нӕй! Фӕлӕ уымӕй тынгдӕр тарстӕн, мӕ бинонтӕ мӕ ныхмӕ кӕй суыдзысты, уымӕй. Мӕт кодтон, Йегъовӕйы Ӕвдисӕн куы суон, уӕд мӕ фыды кӕй фӕфыдӕнхъӕл кӕндзынӕн кӕнӕ мӕ бинонтӕ афтӕ кӕй хъуыды кӕндзысты, ницы дзы рауад, зӕгъгӕ». Фӕлӕ Биниам зыдта, Йегъовӕ, зынаргъ ын чи у, уыдоны кӕй никуы ныууадзы. Биниам ма загъта: «Хъуыды-иу кодтон, Йегъовӕ хотӕн ӕмӕ ’фсымӕртӕн алы зын уавӕрты куыд ӕххуыс кодта, ууыл, зӕгъӕм, истӕмӕй хъуаг куы ӕййӕфтой кӕнӕ-иу знӕт адӕм сӕ ныхмӕ куы рацыдысты, уӕд. Ӕмӕ уымӕ гӕсгӕ зыдтон, мӕ зӕрдӕ йыл куы нӕ сивон, уӕд мӕнӕн дӕр кӕй ӕххуыс кӕндзӕн. Цалдӕр хатты мӕ ’рцахстой, фыдмитӕ дӕр мын кодтой. Фӕлӕ мӕхиуыл бавзӕрстон, Йегъовӕ ахӕм зын уавӕрты куыд тынг баххуыс кӕны, иузӕрдионӕй йыл куы баззайӕм, уӕд». Биниам бамбӕрста, Йегъовӕ ӕцӕгдӕр йӕ Фыд кӕй у, йӕ лӕггадгӕнджытӕ та йӕ бинонтӕ кӕй сты.

МӔЛӔТӔЙ ТӔРСЫН

15. Адӕймаг мӕлӕтӕй кӕй тӕрсы, уый диссаг цӕуылнӕ у?

¹⁵ Библийы фыст ис, мӕлӕт кӕй у знаг (1 Кор. 15:25, 26). Ӕмӕ уӕззау рынчын куы вӕййӕм, уӕд мӕлӕтӕй фӕтӕрсӕм. Кӕнӕ нӕ хиуӕттӕй исчи куы вӕййы рынчын, уӕд дӕр фӕтӕрсӕм, куы амӕла, уымӕй. Цымӕ цӕмӕн? Йегъовӕ нӕ афтӕ сфӕлдыста, ӕмӕ нӕ фӕнды ӕнустӕм цӕрын (Еккл. 3:11). Мӕлӕтӕй кӕй тӕрсӕм, уый иуӕй-иу хатт хорз вӕййы. Зӕгъӕм, фӕхӕрӕм пайда хӕринӕгтӕ, фӕархайӕм, цӕмӕй фылдӕр змӕлӕм, упражненитӕ кӕнӕм. Куы бахъӕуы, уӕд дохтыртӕм дӕр ацӕуӕм ӕмӕ хостӕ дӕр фӕнуазӕм, стӕй, нӕ цардӕн тӕссаг цӕмӕй у, уыдӕттӕй нӕхи фӕхизӕм.

16. Мӕлӕтӕй кӕй фӕтӕрсӕм, уымӕй Хӕйрӕг куыд фӕпайда кӕны?

¹⁶ Хӕйрӕг зоны, адӕймагӕн йӕ уд – йӕ цард – зынаргъ кӕй у. Ӕмӕ дзуры, нӕ цард бахъахъхъӕныны тыххӕй алцыдӕр кӕй ратдзыстӕм, суанг ма, Йегъовӕимӕ нын цы хӕлардзинад ис, ууыл дӕр нӕ къух кӕй сисдзыстӕм (Иов 2:4, 5). Куыд тынг рӕдийы! Фӕлӕ Хӕйрӕгмӕ ис «мӕлӕт хӕссыны хъомыс». Ӕмӕ, мӕлӕтӕй кӕй фӕтӕрсӕм, уымӕй фӕпайда кӕны, цӕмӕй нын Йегъовӕйы ныууадзын кӕна (Дзут. 2:14, 15). Хӕйрӕджы зондыл чи цӕуы, уыцы адӕм иуӕй-иу хатт Йегъовӕйы лӕггадгӕнджытӕм фертхъирӕн кӕнынц, зӕгъгӕ, дӕ диныл дӕ къух куы нӕ сисай, уӕд дӕ амардзыстӕм. Кӕнӕ та, гӕнӕн ис, уӕззау низӕй фӕрынчын уӕм йе та цавӕрдӕр бӕллӕхы бахауӕм, ӕмӕ нӕ цардӕн тӕссаг уа. Ӕмӕ Хӕйрӕг уымӕй дӕр спайда кӕны. Не ’нӕуырнӕг бинонтӕ кӕнӕ нын дохтыртӕ, гӕнӕн ис, дзурой, цӕмӕй туг бауадзыныл сразы уӕм. Фӕлӕ афтӕмӕй фехалдзыстӕм Хуыцауы закъон. Чидӕртӕ та нын фӕамонынц, Библийы уагӕвӕрдты ныхмӕ чи у, ахӕм хосгӕнӕн мадзӕлттӕ.

17. Ромӕгтӕм 8:37–39 стихтӕм гӕсгӕ, мӕлӕтӕй цӕуылнӕ хъуамӕ тӕрсӕм?

¹⁷ Кӕй зӕгъын ӕй хъӕуы, мӕлын никӕй фӕнды. Фӕлӕ йӕ зонӕм, куы амӕлӕм, уӕддӕр нӕ Йегъовӕ кӕй уарздзӕн. (Бакӕс Ромӕгтӕм 8:37–39.) Йегъовӕйӕн йӕ хӕлӕрттӕй исчи куы амӕлы, уӕд ӕй нӕ ферох кӕны, уымӕн уыдон иууылдӕр удӕгас сты (Лук. 20:37, 38). Ӕмӕ бӕллы, цӕмӕй сӕ фӕстӕмӕ цардмӕ раздаха (Иов 14:15). Йегъовӕ стыр аргъ бафыста, цӕмӕй «ӕнусон цардӕй хайджын уӕм» (Иоан. 3:16). Мах ӕй зонӕм, куыд тынг нӕ уарзы, уый. Ӕмӕ, рынчын куы вӕййӕм кӕнӕ нын мӕлӕтӕй тӕссаг куы вӕййы, уӕд ӕй нӕ ныууадзӕм, фӕлӕ дзы удӕнцой, зонд ӕмӕ хъарутӕ фӕкурӕм. Валерийӕ ӕмӕ йӕ сӕрыхицау дӕр афтӕ бакодтой (Пс. 41:3).

18. Валерийӕйы хабарӕй дӕхицӕн зондӕн цы райстай?

¹⁸ Валерийӕйыл 35 азы куы цыд, уӕд ӕм ссардтой рак (уӕззау формӕ). Фӕлӕ йын Хуыцауы уарзондзинад баххуыс кодта, цӕмӕй мӕлӕтӕй ма тарстаид. Валерийӕ загъта: «Рак мӕм кӕй ис, уый куы базыдтам, уӕд арвы цӕфау фестӕм. Ӕвӕстиатӕй мын хъуыди операци скӕнын. Бирӕ дохтыртимӕ ныхас кодтон, фӕлӕ иу дӕр нӕ разы кодта операци ӕнӕ тугӕй скӕныныл. Мӕлын мӕ нӕ фӕндыд, фӕлӕ Хуыцауы фӕдзӕхсты сӕрты ницы хуызы ахызтаин. Йегъовӕ цал ӕмӕ цал хатты равдыста, кӕй мӕ уарзы, уый! Ӕдзухдӕр мӕ йӕ уарзтӕй тавта. Ныр та мӕ рад уыди, кӕй йӕ уарзын, уый равдисынӕн. Дохтыр та мын-иу куы загъта, хорзӕй дын ницы зӕгъдзынӕн, зӕгъгӕ, уӕд та-иу мӕ ноджы тынгдӕр бафӕндыд Йегъовӕйы зӕрдӕ барухс кӕнын. Нӕ мӕ фӕндыд, цӕмӕй Хӕйрӕг фӕуӕлахиз уыдаид. Ӕппынфӕстаг мын ӕнӕ тугӕй операци скодтой, ӕмӕ хорз ацыд. Ныр дӕр бынтон ӕнӕниз нӕ дӕн. Фӕлӕ мӕ бон у фидарӕй зӕгъын, Йегъовӕ нын алкӕддӕр кӕй баххуыс кӕны. Зӕгъӕм, мӕ низы тыххӕй куы базыдтам, уый размӕ ӕмбырды ахуыр кодтам статья „Ацы уӕззау рӕстӕджы фидар лӕууӕм“c. Уыцы статья нын стыр удӕнцой ӕрхаста. Ногӕй ӕмӕ йӕ ногӕй кастыстӕм. Ахӕм статьяты фӕрцы, стӕй, хорз хабар кӕй хъусын кодтам ӕмӕ ӕмбырдтӕм кӕй цыдыстӕм, уый фӕрцы-иу нӕ зӕрдӕтӕ ӕрсабыр сты ӕмӕ нӕ бон уыд раст уынаффӕтӕ хӕссын дӕр».

ХЪУАМӔ МАЦӔМӔЙ ТӔРСӔМ

19. Тагъд рӕстӕджы цы ’рцӕудзӕн?

¹⁹ Йегъовӕйы фӕрцы чырыстӕттӕ ӕгас зӕххыл дӕр фидар фӕлӕууынц алыхуызон зын уавӕрты, стӕй Хӕйрӕджы ныхмӕ дӕр (1 Пет. 5:8, 9). Ӕмӕ дӕуӕн дӕр дӕ бон у алы уавӕры дӕр фидар фӕлӕууын. Тагъд Йегъовӕ Йесойӕн ӕмӕ, йемӕ йӕ Паддзахады чи уыдзӕн, уыдонӕн бардзырд ратдзӕн, цӕмӕй «Хӕйрӕджы хъуыддӕгтӕ фехалой» (1 Иоан. 3:8). Ӕмӕ уый фӕстӕ, Хуыцауӕн зӕххыл чи лӕггад кӕндзӕн, уыцы адӕм никӕмӕйуал тӕрсдзысты ӕмӕ уыдзысты «дард, зӕрдӕйы тас цы уадзы, уыдӕттӕй» (Ис. 54:14; Мих. 4:4). Цалынмӕ уыцы рӕстӕг нӕ ралӕууыд, уӕдмӕ та нӕ хъӕуы тынг архайын, цӕмӕй-иу нӕ зӕрдӕтӕй тас фӕсурӕм.

20. Цы нын баххуыс кӕндзӕн, цӕмӕй мацӕмӕй тӕрсӕм?

²⁰ Хъуамӕ нӕ алкӕддӕр фидарӕй уырна, Йегъовӕ йӕ лӕггадгӕнджыты кӕй уарзы ӕмӕ сӕ кӕй хъахъхъӕны. Уымӕн нын цы баххуыс кӕндзӕн? Нӕ бон у хъуыды кӕнын, Йегъовӕ-иу раджы заманты йӕ лӕггадгӕнджыты куыд бахъахъхъӕдта, ууыл ӕмӕ уый тыххӕй иннӕтӕн дӕр дзурын. Стӕй хъуамӕ ма рох кӕнӕм, нӕхицӕн дӕр нын куыд баххуыс кӕны, уый. Йегъовӕйы фӕрцы нӕ бон у, ӕмӕ ӕппындӕр мацӕмӕй тӕрсӕм! (Пс. 34:4).