Кӕсджыты фарстатӕ

Соломоны кувӕндоны мӕсыгӕн йӕ бӕрзӕнд цас уыд?

Кувӕндоны мӕсыг уыд, Сыгъдӕг бынатмӕ-иу кӕй уылты бахызтысты, уыцы агъуыст. 2023 азы онг чи рацыд, уыцы Библиты «Ног дунейы тӕлмац»-ы фыст ис: «Хӕдзарӕн разырдыгӕй цы мӕсыг уыд, уымӕн йӕ дӕргъ уыд дыууын ӕлмӕрины, хӕдзарӕн йӕ уӕрх цас уыди, уыйас. Йӕ бӕрзӕнд та уыд сӕдӕ дыууын ӕлмӕрины» (2 Аз. 3:4). Ӕмӕ Библийы ӕндӕр тӕлмацты дӕр афтӕ фыст ис, зӕгъгӕ, йӕ бӕрзӕнд уыд «120 ӕлмӕрины» (53 метры).

Фӕлӕ, 2023 азы фӕстӕ чи рацыд, уыцы Библиты «Ног дунейы тӕлмац»-ы Соломоны кувӕндоны мӕсыджы тыххӕй фыст ис: «Йӕ бӕрзӕнд уыд 20 ӕлмӕрины» (9 метры бӕрц)a. Цымӕ ацы ивындзинад цӕмӕн скодтой? Цӕй ӕмӕ йӕ базонӕм.

1 Паддзӕхты 6:3 стихы, кувӕндоны мӕсыгӕн йӕ бӕрзӕнд цас уыд, уый кой нӕй. Ацы стихы Йереми ныффыста, кувӕндоны мӕсыгӕн йӕ дӕргъ ӕмӕ йӕ уӕрх цас уыдысты, уый. Йӕ бӕрзӕнд цас уыд, уый кой та не скодта. Иннӕ сӕры та кӕны, кувӕндоны цы уыд, уыдӕтты кой, уыимӕ ӕрхуы денджызы, дӕс уӕрдоны ӕмӕ, кувӕндоны мӕсыджы раз чи уыд, уыцы дыууӕ ӕрхуы цӕджындзы кой (1 Пад. 7:15–37). Кӕд мӕсыгӕн йӕ бӕрзӕнд ӕцӕгдӕр 50 метрӕй фылдӕр уыд ӕмӕ кувӕндонӕй бӕрзонддӕр уыди, уӕд Йереми уый кой цӕуылнӕ скодта? Суанг ӕнусты фӕстӕ дӕр дзуттаг историктӕ фыстой, зӕгъгӕ, мӕсыг Соломоны кувӕндонӕй бӕрзонддӕр нӕ уыд.

Мӕсыгӕн йӕ бӕрзӕнд 120 ӕлмӕрины куы уыдаид, уӕд йӕ къултӕ ныккалдаиккой. Раджы заманты дуртӕй ӕмӕ агуыридуртӕй конд агъуыстытӕн сӕ бындуртӕ уыдысты уӕрӕх ӕмӕ, куыд уӕлдӕр, афтӕ нарӕгдӕр кодтой. Зӕгъӕм, афтӕ конд уыдысты Египеты кувӕндоны кулдуӕрттӕ дӕр. Фӕлӕ Соломоны кувӕндон ӕндӕрхуызон арӕзт уыди. Ахуыргӕндтӕ куыд зӕгъынц, афтӕмӕй йӕ къултӕн сӕ уӕрх 6 ӕлмӕринӕй (2,7 метрӕй) фылдӕр нӕ уыд. Уымӕ гӕсгӕ архитектурӕйы историк Те́одор Бу́синк ахӕм хатдзӕг скодта: «Мӕсыджы къултӕн сӕ уӕрх цас уыд, уымӕ гӕсгӕ уый гӕнӕн нӕ уыд, ӕмӕ йӕ бӕрзӕнд 120 ӕлмӕрины уыдаид».

Библийы къопитӕ куы кодтой, уӕд, ӕвӕццӕгӕн, 2 Азфыстыты 3:4 стихы рӕдыд скодтой. Иуӕй-иу рагон къухфыстыты ацы стихы фыст ис «120». Фӕлӕ, ӕууӕнчы аккаг чи у, уыцы къухфыстыты та, зӕгъӕм, Александриаг кодексы (фыст ӕрцыд 5 ӕнусы) ӕмӕ Амвросиайнаг кодексы (фыст ӕрцыд 6 ӕнусы) фыст ис «20 ӕлмӕрины». Къопитӕ чи кодта, уыцы писыр цӕй тыххӕй фӕрӕдыдаид? Дзуттаг ӕвзаджы дзырдтӕ «сӕдӕ» ӕмӕ «ӕлмӕрин» тынг ӕмхуызон сты. Уымӕ гӕсгӕ писыр, гӕнӕн ис, «ӕлмӕрины» бӕсты ныффыста «сӕдӕ».

Кӕй зӕгъын ӕй хъӕуы, мах архайӕм, цӕмӕй уыцы лыстӕг хабӕрттӕ базонӕм ӕмӕ Соломоны кувӕндон ныв кӕнӕм, ӕцӕгӕй цыхуызӕн уыд, афтӕ. Фӕлӕ нын уымӕй ахсджиагдӕр у, уыцы кувӕндон кӕй амоны стыр ӕнӕуынгӕ кувӕндонмӕ. Мах Йегъовӕйӕ тынг бузныг стӕм, йе ’нӕуынгӕ кувӕндоны йын кӕй лӕггад кӕнӕм, уый тыххӕй! (Дзут. 9:11–14; Рарг. 3:12; 7:9–17).