Хӕстытӕн ӕмӕ фыддзинадӕн кӕрон цӕуылнӕ ӕрцӕуы?

АДӔМ СТЫ ТӔРИГЪӔДДЖЫН

Хуыцау Адам ӕмӕ Евӕйы сфӕлдыста йӕхимӕ гӕсгӕ (Райдиан 1:27). Уый ууыл дзурӕг у, ӕмӕ хъуамӕ ӕвдыстаиккой, Хуыцаумӕ цы миниуджытӕ ис, уыдон, зӕгъӕм, хъуамӕ уыдаиккой фарнуарзаг ӕмӕ иннӕты уарзтаиккой (1 Коринфӕгтӕм 14:33; 1 Иоанны 4:8). Фӕлӕ Адам ӕмӕ Евӕ Хуыцауы коммӕ нӕ бакастысты ӕмӕ тӕригъӕд сарӕзтой. Уый тыххӕй адӕм иууылдӕр сӕ туджы рахастой тӕригъӕд ӕмӕ мӕлӕт (Ромӕгтӕм 5:12). Тӕригъӕдджын кӕй стӕм, уый тыххӕй нӕм арӕх ӕвзӕр хъуыдытӕ фӕзыны, ӕмӕ уымӕ гӕсгӕ бирӕтӕ ӕвзӕр хъуыддӕгтӕ фӕаразынц (Райдиан 6:5; Марчы 7:21, 22).

ХИЦӔУТТӔ

Хуыцау нӕ афтӕ не сфӕлдыста, цӕмӕй нӕхӕдӕг нӕхицӕн разамынд дӕттӕм. Библийы фыст ис: «Адӕймагӕн йӕ къахдзӕфтыл дӕр йӕ бар нӕ цӕуы» (Йереми 10:23). Уымӕ гӕсгӕ хицӕуттӕн сӕ бон нӕу хӕстытӕн ӕмӕ фыддзинадӕн кӕрон скӕнын.

ХӔЙРӔГ ӔМӔ ЙӔ ДӔЛИМОНТӔ

Библийы фыст ис: «Ӕгас дуне... ис Фыдбылызы къухы» (1 Иоанны 5:19). Уыцы «Фыдбылыз» у Сайтан, кӕнӕ Хӕйрӕг. Уый у ӕгъатыр лӕгмар (Иоанны 8:44). Хӕйрӕг ӕмӕ дӕлимонтӕ адӕмы зондахастыл кӕй ӕндавынц, уый тыххӕй цӕуы хӕстытӕ ӕмӕ уый тыххӕй ис фыддзинад (Раргомад 12:9, 12).