Дӕ бон куыд у Йегъовӕйау хатыр кӕнын?

1, 2. а) Уӕлдайдӕр нын кӕд вӕййы зын кӕмӕндӕр ныххатыр кӕнын? б) Дениз тынг зын уавӕры куыд бакодта?

ЗЫН дын вӕййы искӕмӕн ныххатыр кӕнын? Махӕй бирӕтӕ зӕгъдзысты, о, зӕгъгӕ, уӕлдайдӕр нӕ исчи истӕмӕй куы фӕхъыг кӕны, нӕ зӕрдӕ нын куы фӕриссын кӕны, уӕд. Фӕлӕ уӕддӕр уый гӕнӕн ис, цӕмӕй адӕймагмӕ мауал мӕсты кӕнӕм ӕмӕ йын ныххатыр кӕнӕм. Ӕркӕсӕм-ма иу хабармӕ. Хо Дени́зa бахауд тынг зын уавӕры. Фӕлӕ йӕ бон сси, сӕ бинонтӕн стыр маст чи бавзарын кодта, уыцы адӕймагӕн ныххатыр кӕнын. 2017 азы йӕ лӕг ӕмӕ йӕ сывӕллӕттимӕ ацыдысты экскурсимӕ Йегъовӕйы Ӕвдисӕнты ног сӕйраг хайадмӕ. Фӕстӕмӕ куы здӕхтысты, уӕд аварийы бахаудысты. Иу машинӕ сӕ скъуырдта. Шофыр йӕхӕдӕг дӕр нӕ бамбӕрста, афтӕ куыд рауад. Дениз йӕхимӕ куы ’рцыд, уӕд базыдта, йӕ сывӕллӕттӕ тынг кӕй фӕцӕфтӕ сты, йӕ лӕг Бра́йан та кӕй фӕмард. Уый фӕстӕ уыцы хабӕртты тыххӕй Дениз афтӕ загъта: «Дуне мыл баталынг. Ахӕм хабар ныл кӕй ӕрцыд, уый мӕм нӕ хъардта». Фӕстӕдӕр базыдта, чи сӕ скъуырдта, уыцы шофыр нозтджын кӕй нӕ уыд, уӕдӕ фӕндагмӕ дӕр каст. Фӕлӕ Денизӕн уымӕй йӕ зӕрдӕйы рыст нӕ фӕкъаддӕр. Ӕмӕ Йегъовӕмӕ куывта, цӕмӕй йын йӕ зӕрдӕ ӕрсабыр кодтаид ӕмӕ йе ’нкъарӕнтыл йӕ бар цыдаид.

² Аварийы адӕймаг кӕй фӕмард, уый тыххӕй шофыры ӕрцахстой. Аххосджыныл ӕй куы банымадтаиккой, уӕд ӕй сбадын кодтаиккой. Фӕлӕ тӕрхонгӕнӕг Денизӕн загъта, тӕрхоны рӕстӕг цы зӕгъдзӕн, уымӕй кӕнгӕ кӕй уыдзӕн, уыцы лӕгӕн цавӕр тӕрхон рахӕсдзысты, уый. Дениз загъта: «Раст цыма мын чидӕр мӕ хъӕдгомыл ведрайы дзаг цӕхх ауагъта, афтӕ уыдтӕн. Мӕ царды ӕппӕты ӕвзӕрдӕр хабӕрттӕ та цыма ногӕй хъуамӕ бавзӕрстаин». Уыцы лӕгӕн тӕрхон кодтой цалдӕр къуырийы фӕстӕ. Ӕмӕ цымӕ Дениз тӕрхондоны цы загъта? Тӕрхонгӕнӕгмӕ бахатыд, цӕмӕй уыцы адӕймаджы аххосджыныл ма банымадтаиккойb. Йӕ ныхас куы фӕци, уӕд тӕрхонгӕнӕг йӕ цӕссыг нал баурӕдта. Стӕй загъта: «Тӕрхонгӕнӕг дӕн 25 азы, фӕлӕ ахӕм цыдӕр ам, тӕрхондоны, фыццаг хатт хъусын. Никуы уыд афтӕ, ӕмӕ, чи фӕмард, уымӕн йӕ бинонтӕ курой, цӕмӕй, зиан сыл кӕй тыххӕй ӕрцыд, уый ма сбадын кӕной. Ацы ран никуы фехъуыстон уарзондзинады ӕмӕ хатыр кӕныны кой».

3. Дениз уыцы адӕймагӕн цӕмӕн ныххатыр кодта?

³ Денизӕн цы баххуыс кодта, цӕмӕй уыцы адӕймагӕн ныххатыр кодтаид? Уый хъуыды кодта, Йегъовӕ куыд хатыр кӕны, ууыл (Мих. 7:18). Йегъовӕ махӕн кӕй хатыр кӕны, уый тыххӕй дзы бузныг куы уӕм, уӕд мах дӕр фӕнддзӕн иннӕтӕн хатыр кӕнын.

4. Йегъовӕйы цы фӕнды? (Ефесӕгтӕм 4:32).

⁴ Йегъовӕйы фӕнды, цӕмӕй иннӕтӕн хатыр кӕнӕм зӕрдӕйӕ, уый махӕн куыд хатыр кӕны, афтӕ. (Бакӕс Ефесӕгтӕм 4:32.) Фӕнды йӕ, цӕмӕй-иу цӕттӕ уӕм, чи нӕ фӕхъыг кӕны, уыдонӕн ныххатыр кӕнынмӕ (Пс. 86:5; Лук. 17:4). Ацы статьяйы аныхас кӕндзыстӕм, цы нын баххуыс кӕндзӕн, ууыл. Ӕркӕсдзыстӕм ӕртӕ хъуыддагмӕ.

АХЪУЫДЫ КӔН, ИСЧИ ДЫН ДӔ ЗӔРДӔ КУЫ ФӔРИССЫН КӔНЫ, УӔД ЦЫ ФЕНКЪАРЫС

5. Ӕмбисӕндтӕ 12:18 стихмӕ гӕсгӕ, куыд фӕвӕййӕм, исчи нӕ куы фӕхъыг кӕны, уӕд?

⁵ Гӕнӕн ис, адӕймаг исты зӕгъа кӕнӕ сараза, ӕмӕ нын уымӕй нӕ зӕрдӕ тынг фӕриссын кӕна. Уый не ’мбал кӕнӕ нӕ бинонтӕй исчи куы вӕййы, уӕд нын уый уӕлдай зын вӕййы (Пс. 55:12–14). Хатт уыцы зӕрдӕрыст вӕййы карды цӕфы хуызӕн. (Бакӕс Ӕмбисӕндтӕ 12:18.) Чи зоны, архайӕм, цӕмӕй уыцы маст кӕнӕ зӕрдӕрыст мацӕмӕ дарӕм. Фӕлӕ кард хъӕдгомӕй куы не сласай, уӕд хъӕдгом байгас уыдзӕн? Раст афтӕ, дӕхицӕн куы дзурай, никуыд мыл фӕзынд, зӕгъгӕ, уӕд ӕрмӕст уымӕй дӕ зӕрдӕйы хъӕдгом нӕ байгас уыдзӕн.

6. Исчи нӕ куы фӕхъыг кӕны, уӕд хатт цы фенкъарӕм?

⁶ Исчи нӕ куы фӕхъыг кӕны, уӕд, чи зоны, уайтагъд рамӕсты вӕййӕм. Библийы дӕр фыст ис, уый гӕнӕн кӕй ис, ӕмӕ-иу хатт рамӕсты уӕм. Фӕлӕ нӕ фӕдзӕхсы, цӕмӕй-иу нӕ маст бирӕ ма ахӕсса (Пс. 4:4; Еф. 4:26). Цӕмӕн? Цы фенкъарӕм, уый арӕх ӕркӕны хъуыддӕгтӕм. Ӕмӕ, адӕймаг йӕ масты фӕдыл куы ацӕуы, уӕд ӕй уый хорзӕй ницӕмӕ ӕркӕны (Иак. 1:20). Хъуамӕ нӕ зӕрдыл дарӕм: рамӕсты уыдзыстӕм ӕви нӕ, ууыл алы хатт нӕ бар нӕ фӕцӕуы. Дарддӕр мӕсты кӕндзыстӕм ӕви нӕ, уый та нӕхӕдӕг ӕвзарӕм.

7. Исчи нын нӕ зӕрдӕ куы фӕриссын кӕны, уӕд ма ноджыдӕр цы фенкъарӕм?

⁷ Исчи нын ӕвзӕрӕй исты куы саразы, уӕд ма ноджыдӕр цы фенкъарӕм? Хо Энн загъта: «Гыццыл куы уыдтӕн, уӕд мӕ фыд мӕ мады ныууагъта ӕмӕ нӕм сывӕллонгӕсӕй чи куыста, уыцы сылгоймаджы ракуырдта. Афтӕ мӕм каст, ӕмӕ мӕ мӕ фыд нал уарзы. Сывӕллӕттӕ сын куы райгуырд, уӕд та мӕм афтӕ кӕсын райдыдта, ӕмӕ йӕ ӕппындӕр нал хъӕуын. Уыцы хъуыдытӕ мын ӕнцой никуы лӕвӕрдтой». Хо Джордже́тыл йӕ лӕг гадзрахатӕй куы рацыд, уӕд цы ӕнкъардта, уый тыххӕй афтӕ загъта: «Мӕ зӕрдӕ мын скъахта. Кӕрӕдзи гыццылӕй фӕстӕмӕ зыдтам ӕмӕ ӕмбӕлттӕ уыдыстӕм. Пионертӕй дӕр иумӕ лӕггад кодтам». Ӕппынфӕстаг ахицӕн сты. Хо Нао́ми та загъта: «Уый ӕнхъӕл никуы уыдтӕн, ӕмӕ мын мӕ лӕг мӕ зӕрдӕ афтӕ фӕриссын кӕндзӕн. Куы мын загъта, сусӕгӕй порнографимӕ кӕй фӕкӕсы, уӕд мӕм афтӕ фӕкаст, ӕмӕ мыл гадзрахатӕй рацыд, фӕсайдта мӕ».

8. а) Нӕ зӕрдӕ нын чи фӕриссын кодта, уымӕн цӕмӕн хъуамӕ ныххатыр кӕнӕм? б) Хатыр кӕнын хорз цӕмӕн у? (Кӕс рамкӕ «Исчи нын нӕ зӕрдӕ куы скъаха, уӕд куыд кӕнгӕ у?».)

⁸ Иннӕтӕ нын цы зӕгъдзысты кӕнӕ цы сараздзысты, ууыл нӕ бар нӕ фӕцӕуы. Фӕлӕ, мах куыд бакӕндзыстӕм, ууыл та нӕ бар цӕуы. Ӕмӕ арӕх ӕппӕты хуыздӕр вӕййы ныххатыр кӕнын. Цӕмӕн? Йегъовӕйы кӕй уарзӕм, уый тыххӕй. Уый та фӕнды, цӕмӕй уӕм хатыргӕнаг. Дарддӕр дӕр адӕймагмӕ куы мӕсты кӕнӕм ӕмӕ йын куы нӕ ныххатыр кӕнӕм, уӕд, гӕнӕн ис, исты ӕнӕзонд ми бакӕнӕм. Стӕй уый, гӕнӕн ис, не ’нӕниздзинадӕн дӕр зиан ӕрхӕсса (Ӕмб. 14:17, 29, 30). Хо Кристи́н загъта: «Мӕ зӕрдӕ мын куыд фӕриссын кодтой, ӕдзух ууыл куы фӕхъуыды кӕнын, уӕд худгӕ дӕр нал фӕкӕнын. Пайда чи нӕу, ахӕм хӕринӕгтӕ хӕрын райдайын. Ӕхсӕв ӕвзӕр фӕфынӕй кӕнын. Уый тыххӕй та мын мӕхиуыл фӕхӕцын дӕр зындӕр вӕййы. Гъемӕ мӕ лӕгыл ӕмӕ иннӕтыл дӕр мӕ пырх акалын».

9. Цӕмӕн хъуамӕ бацархайӕм, цӕмӕй адӕймагмӕ мауал мӕсты кӕнӕм?

⁹ Нӕ зӕрдӕ нын чи фӕриссын кодта, уыцы адӕймаг нӕ хатыр куы нӕ ракура, уӕддӕр нӕ бон у цыдӕр саразын, цӕмӕй нӕ зӕрдӕйы хъӕдгом байгас уа. Джорджет ма загъта: «Кӕд рӕстӕг бахъуыд, уӕддӕр мын ӕппынфӕстаг рауад, цӕмӕй мӕ лӕгмӕ мауал мӕсты кодтаин. Ӕмӕ уӕд мӕ зӕрдӕ афтӕ ӕрсабыр, ӕмӕ йын зӕгъӕн дӕр нӕй». Адӕймагмӕ куы нал фӕмӕсты кӕнӕм, уӕд нӕ уыцы маст нал фӕхӕры. Уымӕй нӕхи удӕн дӕр хорз кӕнӕм – нӕ зӕрдӕмӕ та рухс бакӕлы ӕмӕ та нын цард царды ад скӕны (Ӕмб. 11:17). Фӕлӕ куыд кӕнгӕ у, уӕддӕр дӕ бон ныххатыр кӕнын куы нӕ уа, уӕд?

БАЦАРХАЙ, ЦӔМӔЙ МАУАЛ МАСТ КӔНАЙ

10. Нӕхицӕн рӕстӕг цӕмӕн хъуамӕ раттӕм, цӕмӕй нӕ зӕрдӕйы хъӕдгом байгас уа? (Кӕс нывтӕм дӕр.)

¹⁰ Дӕ бон цы у саразын, цӕмӕй дӕ зӕрдӕйы хъӕдгом байгас уа? Дӕхицӕн рӕстӕг ратт. Адӕймагӕн йӕ буары уӕнгтӕй искӕцы тынг куы бахъыгдард вӕййы, уӕд ӕй фыццаг фӕхъӕуы дохтырты ӕххуыс. Фӕлӕ уый фӕстӕ фӕхъӕуы рӕстӕг, цӕмӕй йӕ къахыл слӕууа. Афтӕ мах дӕр фӕхъӕуы рӕстӕг, цӕмӕй нӕ зӕрдӕйы хъӕдгом байгас уа ӕмӕ нӕ бон уа, чи нӕ фӕхъыг кодта, уымӕн зӕрдӕйӕ ныххатыр кӕнын (Еккл. 3:3; 1 Пет. 1:22).

11. Куы-иу кувай, уӕд дын уый куыд ӕххуыс кӕндзӕн, цӕмӕй хатыргӕнаг уай?

¹¹ Йегъовӕйӕ ӕххуыс кур, цӕмӕй дӕ бон хатыр кӕнын уаc. Уый размӕ кӕй кой кодтам, уыцы хотӕй иу, Энн, радзырдта: «Йегъовӕйӕ куырдтон, цӕмӕй нӕ бинонтӕй алкӕмӕн дӕр ныххатыр кодтаид, раст цы нӕ сарӕзтам кӕнӕ ма ноджыдӕр цӕмӕй фӕрӕдыдыстӕм, уыдӕттӕ. Уый фӕстӕ мӕ фыдмӕ ӕмӕ йӕ усмӕ писмойы ныффыстон, кӕй сын ныххатыр кодтон». Эннӕн афтӕ бакӕнын ӕнцон нӕ уыд. Фӕлӕ уый загъта: «Ӕз Йегъовӕйы бафӕзмыдтон ӕмӕ сын ныххатыр кодтон. Ӕмӕ мӕ ныфс ис, уый фӕрцы сӕ кӕй бафӕнддзӕн Йегъовӕйы тыххӕй фылдӕр базонын».

12. Нӕхимӕ раст куыд кӕсы, афтӕ нӕ, фӕлӕ, Йегъовӕмӕ раст куыд кӕсы, афтӕ-иу цӕмӕн хъуамӕ бакӕнӕм? (Ӕмбисӕндтӕ 3:5, 6).

¹² Дӕхимӕ раст куыд кӕсы, афтӕ нӕ, фӕлӕ, Йегъовӕмӕ раст куыд кӕсы, афтӕ-иу бакӕн. (Бакӕс Ӕмбисӕндтӕ 3:5, 6.) Йегъовӕ алкӕддӕр фӕзоны, хуыздӕр нын цы у, уый (Ис. 55:8, 9). Ӕмӕ нын зиан цы ’рхӕсса, ахӕмӕй нын никуы ницы аразын кӕндзӕн. Уӕдӕ нын кӕд дзуры, цӕмӕй хатыргӕнаг уӕм, уӕд хъуамӕ ма дызӕрдыг кӕнӕм, уый нӕ пайдайӕн кӕй у (Пс. 40:4; Ис. 48:17, 18). Нӕхимӕ раст куы кӕсӕм, уӕд та адӕймагӕн никуы ныххатыр кӕндзыстӕм (Ӕмб. 14:12; Йер. 17:9). Наоми (гыццыл раздӕр йӕ кой кодтам) загъта: «Мӕ лӕг порнографимӕ кӕй каст, уый тыххӕй йын мӕ бон ныххатыр кӕнын нӕ уыд. Ӕмӕ мӕм фыццаг уый раст каст. Тарстӕн, ногӕй та мын мӕ зӕрдӕ куы фӕриссын кӕна кӕнӕ мын стыр маст кӕй бавзарын кодта, уый дзы куы ферох уа. Ӕмӕ хъуыды кодтон, зӕгъын мӕ Йегъовӕ дӕр ӕмбары. Фӕлӕ мӕм стӕй бахъардта, Йегъовӕ мӕ кӕй ӕмбары, уый ууыл дзурӕг кӕй нӕу, ӕмӕ мемӕ разы у. Уый хорз зоны, цы ’нкъарын, уый, ӕмӕ рӕстӕг кӕй хъӕуы, цӕмӕй мӕ зӕрдӕйы хъӕдгом байгас уа. Фӕлӕ ма йӕ фӕнды, цӕмӕй хатыргӕнаг дӕр уон»d.

АДӔЙМАГМӔ ХОРЗӔЙ ЦЫ ИС, УУЫЛ ХЪУЫДЫ КӔН

13. Ромӕгтӕм 12:18–21 стихтӕм гӕсгӕ-иу куыд хъуамӕ бакӕнӕм?

¹³ Ныххатыр кӕнын ӕрмӕст уый нӕ нысан кӕны, ӕмӕ, цы ’рцыд, уый кой мауал кӕнӕм. Нӕ нысан вӕййы, нӕ зӕрдӕ нын тынг чи фӕриссын кодта, уыцы адӕймагимӕ бафидауын, уӕлдайдӕр кӕд нӕ чырыстон хо кӕнӕ ’фсымӕр у, уӕд (Матф. 5:23, 24). Хъуамӕ йӕм мауал мӕсты кӕнӕм, фӕлӕ фӕлмӕнзӕрдӕдзинад равдисӕм ӕмӕ йын ныххатыр кӕнӕм. (Бакӕс Ромӕгтӕм 12:18–21; 1 Пет. 3:9). Уымӕн нын цы баххуыс кӕндзӕн?

14. Чи нӕ фӕхъыг кодта, уымӕ кӕй цӕстӕй хъуамӕ кӕсӕм ӕмӕ цӕмӕн?

¹⁴ Хъуамӕ архайӕм, цӕмӕй, чи нӕ фӕхъыг кодта, уыцы адӕймагмӕ Йегъовӕйы цӕстӕй кӕсӕм. Йегъовӕйы фӕфӕнды, алы адӕймагмӕ дӕр хорзӕй цы ис, уый ссарын (2 Аз. 16:9; Пс. 130:3). Мах та иннӕтӕм цавӕр миниуджытӕ фӕагурӕм? Хорз миниуджытӕ куы агурӕм, уӕд ссардзыстӕм хорз миниуджытӕ, ӕвзӕр миниуджытӕ куы агурӕм, уӕд та – ӕвзӕр миниуджытӕ. Адӕмӕн сӕ хорз миниуджытӕ куы уынӕм, уӕд нын хатыр кӕнын дӕр ӕнцондӕр уыдзӕн. Ӕфсымӕр Джа́ррод загъта: «Хойӕн кӕнӕ ӕфсымӕрӕн ныххатыр кӕнын мын ӕнцондӕр вӕййы, йӕ рӕдыдыл нӕ, фӕлӕ йӕм цы бирӕ хорз миниуджытӕ ис, уыдоныл ӕмӕ дзы мӕ зӕрдӕмӕ цы цӕуы, ууыл куы фӕхъуыды кӕнын, уӕд».

15. Цӕмӕн фӕхъӕуы адӕймагӕн зӕгъын, кӕй йын ныххатыр кодтай?

¹⁵ Ахсджиаг ма вӕййы адӕймагӕн зӕгъын, кӕй йын ныххатыр кодтай. Наоми загъта: «Мӕ лӕг мӕ бафарста, ныххатыр, дам, мын кодтай. Ӕмӕ йын куыддӕр зӕгъынмӕ хъавыдтӕн, ныххатыр дын кодтон, зӕгъгӕ, афтӕ бамбӕрстон, ме ’взаг кӕй нӕ комы уыцы ныхӕстӕ зӕгъын. Бамбӕрстон ӕй, ӕцӕгӕй йын кӕй нӕ ныххатыр кодтон ӕмӕ мӕ маст кӕй нӕма ссыд. Рӕстӕг куы рацыд, уӕд мӕ бон сси уыцы ӕртӕ ахсджиаг ныхасы зӕгъын. Мӕ лӕгӕн йӕ цӕстытӕ доны разылдысты. Уый ӕнхъӕл нӕ уыдтӕн, ӕмӕ уымӕн дӕр ӕмӕ мӕхицӕн дӕр афтӕ фенцон уыдзӕн. Раздӕрау та йыл ӕууӕндын райдыдтон ӕмӕ та ногӕй стӕм ӕввахс ӕмбӕлттӕ».

16. Хатыр кӕныны тыххӕй цы базыдтай?

¹⁶ Йегъовӕйы фӕнды, цӕмӕй хатыргӕнаг уӕм (Кол. 3:13). Фӕлӕ-иу нын иннӕтӕн ныххатыр кӕнын ӕнцон куы нӕ уа, уӕд-иу нын цы баххуыс кӕндзӕн? Исчи нын нӕ зӕрдӕ куы фӕриссын кӕна, уӕд-иу хъуамӕ ахъуыды кӕнӕм, цы ӕнкъарӕм, ууыл. Стӕй-иу хъуамӕ бацархайӕм, цӕмӕй мауал маст кӕнӕм. Уый фӕстӕ та-иу ахъуыды кӕнӕм, уыцы адӕймагмӕ хорзӕй цы ис, ууыл. (Кӕс рамкӕ «Ӕртӕ къахдзӕфы, цӕмӕй адӕймагӕн ныххатыр кӕнӕм».)

ХАТЫРГӔНАГ УАЙ, УЫЙ ХОРЗ ЦӔМӔН У?

17. Цӕмӕн хъуамӕ уӕм хатыргӕнаг?

¹⁷ Бирӕ цӕйдӕрты тыххӕй хъуамӕ уӕм хатыргӕнаг. Фыццаг: афтӕмӕй фӕзмӕм нӕ фӕлмӕнзӕрдӕ Фыд Йегъовӕйы ӕмӕ йын йӕ зӕрдӕ рухс кӕнӕм (Лук. 6:36). Дыккаг: афтӕмӕй ӕвдисӕм, Йегъовӕ нын зӕрдӕйӕ кӕй ныххатыр кӕны, уый тыххӕй дзы бузныг кӕй стӕм (Матф. 6:12). Ӕмӕ ӕртыккаг: уыдзыстӕм ӕнӕниздӕр ӕмӕ иннӕтимӕ хӕларӕй цӕрдзыстӕм.

18, 19. Иннӕтӕн куы хатыр кӕнӕм, уӕд уый, гӕнӕн ис, сӕ цардыл куыд фӕзына?

¹⁸ Иннӕтӕн куы ныххатыр кӕнӕм, уӕд иуӕй-иу хатт хабар рауайы, ӕнхъӕл дӕр куыд нӕ вӕййӕм, афтӕ. Уый бӕрӕг у, статьяйы райдианы кӕй кой уыд, уыцы хойы, Денизы, хабарӕй. Дениз ӕй уӕд нӕма зыдта, фӕлӕ сӕ чи скъуырдта, уыцы нӕлгоймаг тӕрхоны фӕстӕ йӕхи марынмӕ хъавыд. Фӕлӕ йын Дениз кӕй ныххатыр кодта, уый йын йӕ зӕрдӕ афтӕ бацагайдта, ӕмӕ Йегъовӕйы Ӕвдисӕнтимӕ Библи ахуыр кӕнын райдыдта.

¹⁹ Чи зоны нын кӕмӕндӕр ныххатыр кӕнын афтӕ зын вӕййы, ӕмӕ нӕм уымӕй зындӕр ницы фӕкӕсы. Фӕлӕ-иу куы ныххатыр кӕнӕм, уӕд-иу махӕй амондджындӕр нӕ уыдзӕн (Матф. 5:7). Цӕй уӕдӕ Йегъовӕйы фӕзмӕм ӕмӕ иннӕтӕн зӕрдӕйӕ хатыр кӕнӕм.