Рынчындӕтты кусджытӕн нӕ статьятӕ стыр ӕххуыс фесты

Брин цӕры цӕгат Каролинӕйы (АИШ) ӕмӕ лӕггад кӕны рынчындӕттимӕ ӕмгуыстгӕнӕг комитеты. Уыцы комитеты ӕфсымӕртӕ ӕмгуыст кӕнынц алыхуызон рынчындӕттимӕ, цӕмӕй ӕххуыс кӕной, Йегъовӕйы Ӕвдисӕнтӕй рынчындӕтты чи ис, уыдонӕн.

Коронавирусы пандемийӕйы тыххӕй рынчындӕттӕй бирӕтӕ мидӕмӕ никӕй уагътой. Брин бынӕттон рынчындоны хицауадӕй кӕмӕдӕр фӕдзырдта, цӕмӕй базыдтаид, йӕ бон куыд у баххуыс кӕнын, Ӕвдисӕнтӕй рынчындоны чи хуыссы, уыдонӕн.

Бринӕн дзуапп радта хицауы ӕххуысгӕнӕг. Мидӕмӕ кӕй никӕй уагътой, уымӕ гӕсгӕ йӕ Брин бафарста, зӕгъгӕ, дам, уый гӕнӕн ис, цӕмӕй мын мӕ телефоны номыр Ӕвдисӕнтӕн раттай, ӕмӕ-иу семӕ аныхас кӕнон. Хицауы ӕххуысгӕнӕн сразы.

Брин ахъуыды кодта рынчындоны кусджытыл дӕр. Ӕмӕ хицауы ӕххуысгӕнӕгӕн загъта, сӕ кусджыты фыдӕбонӕн тынг кӕй аргъ кӕны ӕмӕ йӕ ныфс кӕй ис, ӕнӕниз кӕй сты. Стӕй ма загъта, кӕмдӕр кӕй бакаст, бирӕтӕ, уӕлдайдӕр та рынчындоны кусджытӕ, пандемийӕйы тыххӕй тынг кӕй тыхсынц.

Хицауы ӕххуысгӕнӕг сразы, коронавирусы пандемимӕйы тыххӕй рынчындоны кусджытӕ ӕцӕгдӕр тынг тыхст уавӕры кӕй сты.

Ӕмӕ йын уӕд Брин загъта, нӕ сайты jw.org кӕй ис бирӕ статьятӕ, адӕймаг тынг куы тыхса, уӕд ын цы баххуыс кӕндзӕн, уый тыххӕйa.

Цалынмӕ ныхас кодтой, уӕдмӕ хицауы ӕххуысгӕнӕг бацыд сайтмӕ ӕмӕ дзы статьятӕ уый фӕдыл ацагуырдта. Куы сӕм ӕркаст, уӕд загъта: «О-о-о, хицауӕн ӕй равдисдзынӕн! Ацы статьятӕ нӕ рынчындоны кусджытӕн се ’ппӕтӕн дӕр баххуыс кӕндзысты. Ныртӕккӕ сӕ принтерыл рауадздзынӕн ӕмӕ сын сӕ байуардзынӕн».

Цалдӕр къуырийы фӕстӕ Брин хицауимӕ аныхас кодта. Ӕмӕ йын хицау загъта, сайтмӕ кӕй бацыдысты ӕмӕ, адӕймагӕн тыхст уавӕры цы баххуыс кӕндзӕн, уыцы темӕйы фӕдыл ӕмӕ ӕндӕр ахӕм темӕты фӕдыл статьятӕ принтерыл кӕй рауагътой. Уыцы статьятӕ радтой медицинон хотӕн ӕмӕ рынчындоны иннӕ кусджытӕн.

Брин загъта: «Хицау мын нӕ куысты тыххӕй ӕмӕ нӕ диссаджы хорз статьяты тыххӕй раарфӕ кодта ӕмӕ загъта, тынг, дам, нын баххуыс кодтой».