Йегъовӕйы Ӕвдисӕнтӕ цы цӕстӕй кӕсынц, раздӕр сӕ диныл хӕст чи уыд, уыдонмӕ?
Мах фӕнды, цӕмӕй алкӕй дӕр уарзӕм, алкӕимӕ дӕр хӕларзӕрдӕ уӕм ӕмӕ сын аргъ кӕнӕм. Йегъовӕйы Ӕвдисӕнтӕй искӕмӕн йӕ уырнындзинад куы ’рлӕмӕгъ вӕййы кӕнӕ Йегъовӕйӕн куы нал фӕлӕггад кӕны, уӕд йемӕ аныхас кӕнӕм. Фӕзӕгъӕм ын, кӕй йӕ уарзӕм ӕмӕ фӕархайӕм, цӕмӕй йын баххуыс кӕнӕм, ӕмӕ та Йегъовӕмӕ баввахс уа (Лукайы 15:4–7).
Иуӕй-иу хатт адӕймаджы фӕхъӕуы ӕмбырдӕй фӕхицӕн кӕнын цавӕрдӕр хъуыддӕгты тыххӕй (1 Коринфӕгтӕм 5:13). Фӕлӕ не ’мчырыстӕтты тынг кӕй уарзӕм, уымӕ гӕсгӕ фӕархайӕм, цӕмӕй йын баххуыс кӕнӕм, ӕмӕ йӕ ӕмбырдӕй фӕхицӕн кӕнын ма бахъӕуа. Ӕмбырдӕй йӕ куы фӕхицӕн кӕной, уӕддӕр ӕй уарздзыстӕм ӕмӕ йын аргъ кӕндзыстӕм, уымӕн ӕмӕ Библийы афтӕ фыст ис (Марчы 12:31; 1 Петры 2:17).
Адӕймаджы ӕмбырдӕй цӕмӕн фӕхицӕн кӕнынц?
Библийы комкоммӕ фыст ис, адӕймаг стыр тӕригъӕд куы сараза ӕмӕ йӕ ивын куы нӕ фӕнда, уӕд ӕй ӕмбырдӕй фӕхицӕн кӕнын кӕй хъӕуыa (1 Коринфӕгтӕм 5:11–13). Зӕгъӕм, адӕймаг йӕ цардӕмбалыл гадзрахатӕй куы рацӕуа, фыднозт куы кӕна, искӕй куы амара, йӕ бинонты куы ’фхӕра ӕмӕ куы дава, уӕд ӕй ӕмбырдӕй фӕхицӕн кӕнын хъӕудзӕн (1 Коринфӕгтӕм 6:9, 10; Галатӕгтӕм 5:19–21; 1 Тимофеймӕ 1:9, 10).
Фӕлӕ, адӕймаг стыр тӕригъӕд куы саразы, уӕд ӕй уайтагъд ӕмбырдӕй нӕ фӕхицӕн кӕнынц. Фыццаг уал ын ӕмбырды хистӕр нӕлгоймӕгтӕb феххуыс кӕнынц, цӕмӕй йе ’взӕр хъуыддӕгтӕ ныууадза (Ромӕгтӕм 2:4). Йемӕ фӕлмӕнӕй ӕмӕ уӕзданӕй фӕныхас кӕнынц ӕмӕ вӕййынц хӕларзӕрдӕ, цӕмӕй йӕ аивын бафӕнда (Галатӕгтӕм 6:1). Уый фӕрцы адӕймаг, чи зоны, йӕ рӕдыд бамбара ӕмӕ ’рфӕсмон кӕна (2 Тимофеймӕ 2:24–26). Фӕлӕ, Библимӕ гӕсгӕ раст цы нӕу, уый дарддӕр куы араза ӕмӕ куы нӕ фӕсмон кӕна, (кӕд ын хистӕр нӕлгоймӕгтӕ бирӕ хӕттыты архайдтой баххуыс кӕныныл, уӕддӕр), уӕд ӕй ӕмбырдӕй фӕхицӕн кӕндзысты. Хистӕр нӕлгоймӕгтӕ ӕмбырды фехъусын кӕндзысты, уыцы адӕймаг Йегъовӕйы Ӕвдисӕн кӕй нал у.
Тӕригъӕд чи ракодта, уыцы адӕймагимӕ хистӕр нӕлгоймӕгтӕ фӕныхас кӕнынц фӕлмӕнӕй ӕмӕ уӕзданӕй ӕмӕ вӕййынц хӕларзӕрдӕ, цӕмӕй йӕ аивын бафӕнда
Йӕ тӕригъӕдыл чи не ’рфӕсмон кӕны, уыцы адӕймаджы ӕмбырдӕй кӕй фӕхицӕн кӕнынц, уый цы пайда ӕрхӕссы? Иу уый, ӕмӕ ӕмбырд Библийы уагӕвӕрдтӕм гӕсгӕ кӕй фӕархайы, уый фӕрцы иннӕтыл йе ’взӕр зондахаст нӕ фӕзыны (1 Коринфӕгтӕм 5:6; 15:33; 1 Петры 1:16). Уымӕй уӕлдай ма, чи зоны, адӕймаджы бафӕнда йе ’взӕр хъуыддӕгтӕ ныууадзын ӕмӕ аивын (Дзуттӕгтӕм 12:11).
Йегъовӕйы Ӕвдисӕнтӕ цы цӕстӕй кӕсынц, ӕмбырдӕй кӕй фӕхицӕн кодтой, уыдонмӕ?
Библийы фыст ис, чырыстӕттӕн иумӕйагӕй кӕй мацы хъуамӕ уа, ӕмбырдӕй кӕй фӕхицӕн кодтой, уыимӕ, зӕгъгӕ, «ахӕмимӕ иу фынгыл дӕр ма бадут» (1 Коринфӕгтӕм 5:11). Уӕдӕ, ӕмбырдӕй кӕй фӕхицӕн кодтой, уыимӕ нӕ рӕстӕг не ’рвитдзыстӕм. Фӕлӕ уый ууыл дзурӕг нӕу, ӕмӕ йӕ хъуамӕ бынтондӕр мацӕмӕ дарӕм. Мах ын аргъ кӕнӕм. Ахӕм адӕймагӕн йӕ бон вӕййы ӕмбырдмӕ ’рбацӕуын ӕмӕ, куы ’рбацӕуа, уӕд ын Йегъовӕйы Ӕвдисӕнтӕ салам ратдзыстыc. Йӕ бон ма у хистӕр нӕлгоймӕгтӕн зӕгъын, цӕмӕй йын баххуыс кӕной фӕстӕмӕ ӕмбырдмӕ ӕрбаздӕхынӕн.
Ӕмбырдӕй кӕй фӕхицӕн кодтой, уыдон ӕмбырдмӕ куы ’рбацӕуынц, уӕд нын тынг ӕхсызгон вӕййы
Ӕмбырдӕй кӕй фӕхицӕн кодтой, фӕлӕ йӕ цардӕмбал ӕмӕ йӕ сывӕллӕттӕ Йегъовӕйы Ӕвдисӕнтӕ кӕмӕн сты, уыдонӕй та цы ис зӕгъӕн? Кӕд ныр иу диныл хӕст нал сты, уӕддӕр сты иу бинонтӕ ӕмӕ хъуамӕ кӕрӕдзийы уарзой ӕмӕ кӕрӕдзийӕн аргъ кӕной. Иу хӕдзары кӕй фӕцӕрынц, уымӕ гӕсгӕ сӕ бон вӕййы хӕдзары хъуыддӕгтӕ ӕмӕ хабӕрттӕ дарддӕр дӕр иумӕ аразын.
Ӕмбырдӕй кӕй фӕхицӕн кодтой, уымӕн йӕ бон у хистӕр нӕлгоймӕгтӕн зӕгъын, цӕмӕй-иу ӕй бабӕрӕг кӕной. Уыдон-иу ын Библийӕ уынаффӕтӕ фӕлмӕнӕй ратдзысты ӕмӕ йын ӕххуыс кӕндзысты, цӕмӕй ӕрфӕсмон кӕна ӕмӕ фӕстӕмӕ Хуыцаумӕ ’рбаздӕха (Захари 1:3). Йе ’взӕр хъуыддӕгтӕ куы ныууадза ӕмӕ бӕрӕг куы уа, Библийы уагӕвӕрдтӕм гӕсгӕ цӕрын ӕй ӕцӕгдӕр кӕй фӕнды, уӕд та йӕ бон уыдзӕн ногӕй ӕмбырдимӕ лӕггад кӕнын. Ӕмбырд ын «зӕрдӕйӕ ныххатыр кӕндзӕн ӕмӕ йын йӕ зӕрдӕ бафидар кӕндзӕн». Афтӕ бакодтой Коринфы чырыстӕттӕ, чи ’рфӕсмон кодта ӕмӕ чи аивта, уыцы адӕймагӕн (2 Коринфӕгтӕм 2:6–8).
Ӕмбырдӕй кӕй фӕхицӕн кодтой ӕмӕ фӕстӕмӕ чи ’рбаздӕхт, уыдон цы зӕгъынц?
Дӕ хъус ӕрдар, Йегъовӕйы Ӕвдисӕнтӕй ӕмбырдӕй кӕй фӕхицӕн кодтой ӕмӕ фӕстӕмӕ Хуыцаумӕ чи ’рбаздӕхт, уыдон цы зӕгъынц, уымӕ.
«Ӕмбырдмӕ ’рбаздӕхын мӕ куы бафӕндыд, уӕд хъуыды кодтон, хистӕр нӕлгоймӕгтӕ мӕ кӕй фӕрсдзысты, ӕмбырдӕй мӕ куы фӕхицӕн кодтой, уыцы азты дӕргъы куыд цардтӕн, уымӕй. Фӕлӕ мын уыдон загътой, кӕй сӕ фӕнды, цӕмӕй ахъуыды кӕнон, ныр куыд цӕрдзынӕн, ууыл. Сӕ ныхӕсты фӕстӕ мын тынг фенцон» (Мария, Америкӕйы Иугонд Штаттӕ).
«Ӕмбырд тынг ӕнхъӕлмӕ каст, кӕд ӕрбаздӕхдзынӕн, уымӕ. Уыдтон ӕй, кӕй мын аргъ кӕнынц. Хотӕ ӕмӕ ’фсымӕртӕ сӕхи мемӕ куыд дардтой, уымӕй бӕрӕг уыд, Йегъовӕ ӕмӕ мын сӕхӕдӕг дӕр кӕй ныххатыр кодтой. Уый фӕрцы мӕ бафӕндыд размӕ цӕуын, мӕ фидӕныл хъуыды кӕнын. Хистӕр нӕлгоймӕгтӕ алкӕддӕр цӕттӕ уыдысты баххуыс кӕнынмӕ. Ныфс-иу мӕ бауагътой ӕмӕ мын баххуыс кодтой, цӕмӕй бамбӕрстаин, Йегъовӕ мын раздӕрау кӕй аргъ кӕны ӕмӕ мӕ кӕй уарзы» (Малком, Сьеррӕ-Леоне).
«Ӕз тынг цин кӕнын, Йегъовӕ йӕ адӕмы афтӕ тынг кӕй уарзы, ӕмӕ йӕ организаци сыгъдӕгӕй кӕй хъахъхъӕны. Тӕригъӕд чи ракодта, уыдоны ӕмбырдӕй кӕй фӕхицӕн кӕнынц, уый, чи зоны, иннӕтӕм ӕгӕр карз ӕфхӕрд фӕкӕса, фӕлӕ уый ӕнӕмӕнг хъуыддаг у ӕмӕ уарзондзинадыл дзурӕг у. Нӕ уӕларвон Фыдӕй бузныг дӕн, кӕй мӕ уарзы ӕмӕ хатыргӕнаг кӕй у, уый тыххӕй» (Сэнди, Америкӕйы Иугонд Штаттӕ).
a Тӕригъӕд чи ракодта ӕмӕ чи не ’рфӕсмон кодта, уыдоны тыххӕй-иу раздӕр фыстам, ӕмбырдӕй йӕ ацух кодтой, зӕгъгӕ. Фӕлӕ ныр фӕпайда кӕнӕм, Библийы цы дзырд ис, уымӕй ӕмӕ фӕзӕгъӕм, ӕмбырдӕй йӕ фӕхицӕн кодтой, зӕгъгӕ.
b Хистӕр нӕлгоймӕгтӕ сты фӕлтӕрдджын чырыстӕттӕ. Уыдон ӕмбырды иннӕты Библийы фӕрцы ахуыр кӕнынц, ӕххуыс сын кӕнынц ӕмӕ сын сӕ уырнындзинад фидар кӕнынц. Уый тыххӕй сын ӕхца нӕ фидынц (1 Петры 5:1–3).
c Иуӕй-иу хатт адӕймаг ӕмбырд ныууадзы ӕмӕ ма фӕархайы иннӕты дӕр ӕвзӕр зондыл саразыныл кӕнӕ сӕ ӕвзӕр хъуыддӕгтӕ аразыныл фӕардауы. Хабар афтӕ куы вӕййы, уӕд фӕархайӕм Библийы уынаффӕмӕ гӕсгӕ ӕмӕ йын салам дӕр нӕ фӕдӕттӕм (2 Иоанны 9–11).